অধ্যায় 239

239.1

শুক উবাচ
অধ্যাত্মং বিস্তরেণেহ পুনরেব বদস্ব মে
যদধ্যাত্মং যথা চেদং ভগবন্নৃষিসত্তম

239.2

ব্যাস উবাচ
অধ্যাত্মং যদিদং তাত পুরুষস্যেহ বিদ্যতে
তত্তেঽহং সংপ্রবক্ষ্যামি তস্য ব্যাখ্যামিমাং শৃণু

239.3

ভূমিরাপস্তথা জ্যোতির্বায়ুরাকাশমেব চ
মহাভূতানি ভূতানাং সাগরস্যোর্ময়ো যথা

239.4

প্রসার্যেহ যথাঙ্গানি কূর্মঃ সংহরতে পুনঃ
তদ্বন্মহান্তি ভূতানি যবীয়ঃসু বিকুর্বতে

239.5

ইতি তন্ময়মেবেদং সর্বং স্থাবরজঙ্গমম্
সর্গে চ প্রলয়ে চৈব তস্মান্নির্দিশ্যতে তথা

239.6

মহাভূতানি পঞ্চৈব সর্বভূতেষু ভূতকৃৎ
অকরোত্তাত বৈষম্যং যস্মিন্যদনুপশ্যতি

239.7

শুক উবাচ
অকরোদ্যচ্ছরীরেষু কথং তদুপলক্ষয়েৎ
ইন্দ্রিয়াণি গুণাঃ কেচিত্কথং তানুপলক্ষয়েৎ

239.8

ব্যাস উবাচ
এতত্তে বর্তয়িষ্যামি যথাবদিহ দর্শনম্
শৃণু তত্ত্বমিহৈকাগ্রো যথাতত্ত্বং যথা চ তৎ

239.9

শব্দঃ শ্রোত্রং তথা খানি ত্রয়মাকাশসংভবম্
প্রাণশ্চেষ্টা তথা স্পর্শ এতে বায়ুগুণাস্ত্রয়ঃ

239.10

রূপং চক্ষুর্বিপাকশ্চ ত্রিধা জ্যোতির্বিধীয়তে
রসোঽথ রসনং স্নেহো গুণাস্ত্বেতে ত্রয়োঽম্ভসাম্

239.11

ঘ্রেয়ং ঘ্রাণং শরীরং চ ভূমেরেতে গুণাস্ত্রয়ঃ
এতাবানিন্দ্রিয়গ্রামো ব্যাখ্যাতঃ পাঞ্চভৌতিকঃ

239.12

বায়োঃ স্পর্শো রসোঽদ্ভ্যশ্চ জ্যোতিষো রূপমুচ্যতে
আকাশপ্রভবঃ শব্দো গন্ধো ভূমিগুণঃ স্মৃতঃ

239.13

মনো বুদ্ধিশ্চ ভাবশ্চ ত্রয় এতেঽঽত্ময়োনিজাঃ
ন গুণানতিবর্তন্তে গুণেভ্যঃ পরমা মতাঃ

239.14

ইন্দ্রিয়াণি নরে পঞ্চ ষষ্ঠং তু মন উচ্যতে
সপ্তমীং বুদ্ধিমেবাহুঃ ক্ষেত্রজ্ঞং পুনরষ্টমম্

239.15

চক্ষুরালোচনায়ৈব সংশয়ং কুরুতে মনঃ
বুদ্ধিরধ্যবসানায় সাক্ষী ক্ষেত্রজ্ঞ উচ্যতে

239.16

রজস্তমশ্চ সত্ত্বং চ ত্রয় এতে স্বয়োনিজাঃ
সমাঃ সর্বেষু ভূতেষু তদ্গুণেষূপলক্ষয়েৎ

239.17

যথা কূর্ম ইহাঙ্গানি প্রসার্য বিনিয়চ্ছতি
এবমেবেন্দ্রিয়গ্রামং বুদ্ধিঃ সৃষ্ট্বা নিয়চ্ছতি

239.18

যদূর্ধ্বং পাদতলয়োরবাঙ্মূর্ধ্নশ্চ পশ্যতি
এতস্মিন্নেব কৃত্যে বৈ বর্ততে বুদ্ধিরুত্তমা

239.19

গুণান্নেনীয়তে বুদ্ধির্বুদ্ধিরেবেন্দ্রিয়াণ্যপি
মনঃষষ্ঠানি সর্বাণি বুদ্ধ্যভাবে কুতো গুণাঃ

239.20

তত্র যত্প্রীতিসংয়ুক্তং কিংচিদাত্মনি লক্ষয়েৎ
প্রশান্তমিব সংশুদ্ধং সত্ত্বং তদুপধারয়েৎ

239.21

যত্তু সংতাপসংয়ুক্তং কায়ে মনসি বা ভবেৎ
রজঃ প্রবর্তকং তত্স্যাত্সততং হারি দেহিনাম্

239.22

যত্তু সংমোহসংয়ুক্তমব্যক্তবিষয়ং ভবেৎ
অপ্রতর্ক্যমবিজ্ঞেয়ং তমস্তদুপধার্যতাম্

239.23

প্রহর্ষঃ প্রীতিরানন্দঃ সাম্যং স্বস্থাত্মচিত্ততা
অকস্মাদ্যদি বা কস্মাদ্বর্ততে সাত্ত্বিকো গুণঃ

239.24

অভিমানো মৃষাবাদো লোভো মোহস্তথাক্ষমা
লিঙ্গানি রজসস্তানি বর্তন্তে হেত্বহেতুতঃ

239.25

তথা মোহঃ প্রমাদশ্চ তন্দ্রী নিদ্রাপ্রবোধিতা
কথংচিদভিবর্তন্তে বিজ্ঞেয়াস্তামসা গুণাঃ

Contains text from DharmicData, made available under the Open Database License (ODbL). Simple meanings are written by AI and can contain mistakes.