অধ্যায় 240

240.1

ব্যাস উবাচ
মনঃ প্রসৃজতে ভাবং বুদ্ধিরধ্যবসায়িনী
হৃদয়ং প্রিয়াপ্রিয়ে বেদ ত্রিবিধা কর্মচোদনা

ইন্দ্রিয়েভ্যঃ পরা হ্যর্থা অর্থেভ্যঃ পরমং মনঃ
মনসস্তু পরা বুদ্ধির্বুদ্ধেরাত্মা পরো মতঃ

বুদ্ধিরাত্মা মনুষ্যস্য বুদ্ধিরেবাত্মনোঽঽত্মিকা
যদা বিকুরুতে ভাবং তদা ভবতি সা মনঃ

ইন্দ্রিয়াণাং পৃথগ্ভাবাদ্বুদ্ধির্বিক্রিয়তে হ্যণু
শৃণ্বতী ভবতি শ্রোত্রং স্পৃশতী স্পর্শ উচ্যতে

পশ্যন্তী ভবতে দৃষ্টী রসতী রসনং ভবেৎ
জিঘ্রতী ভবতি ঘ্রাণং বুদ্ধির্বিক্রিয়তে পৃথক্

ইন্দ্রিয়াণীতি তান্যাহুস্তেষ্বদৃশ্যাধিতিষ্ঠতি
তিষ্ঠতী পুরুষে বুদ্ধিস্ত্রিষু ভাবেষু বর্ততে

কদাচিল্লভতে প্রীতিং কদাচিদপি শোচতে
ন সুখেন ন দুঃখেন কদাচিদিহ যুজ্যতে

সেয়ং ভাবাত্মিকা ভাবাংস্ত্রীনেতানতিবর্ততে
সরিতাং সাগরো ভর্তা মহাবেলামিবোর্মিমান্

যদা প্রার্থয়তে কিংচিত্তদা ভবতি সা মনঃ
অধিষ্ঠানানি বৈ বুদ্ধ্যা পৃথগেতানি সংস্মরেৎ
ইন্দ্রিয়াণ্যেব মেধ্যানি বিজেতব্যানি কৃত্স্নশঃ

সর্বাণ্যেবানুপূর্ব্যেণ যদ্যন্নানুবিধীয়তে
অবিভাগগতা বুদ্ধির্ভাবে মনসি বর্ততে
প্রবর্তমানং তু রজঃ সত্ত্বমপ্যনুবর্ততে

যে চৈব ভাবা বর্তন্তে সর্ব এষ্বেব তে ত্রিষু
অন্বর্থাঃ সংপ্রবর্তন্তে রথনেমিমরা ইব

প্রদীপার্থং নরঃ কুর্যাদিন্দ্রিয়ৈর্বুদ্ধিসত্তমৈঃ
নিশ্চরদ্ভির্যথায়োগমুদাসীনৈর্যদৃচ্ছয়া

এবংস্বভাবমেবেদমিতি বিদ্বান্ন মুহ্যতি
অশোচন্নপ্রহৃষ্যংশ্চ নিত্যং বিগতমত্সরঃ

ন হ্যাত্মা শক্যতে দ্রষ্টুমিন্দ্রিয়ৈঃ কামগোচরৈঃ
প্রবর্তমানৈরনয়ে দুর্ধরৈরকৃতাত্মভিঃ

তেষাং তু মনসা রশ্মীন্যদা সম্যঙ্নিয়চ্ছতি
তদা প্রকাশতে হ্যাত্মা ঘটে দীপ ইব জ্বলন্
সর্বেষামেব ভূতানাং তমস্যপগতে যথা

যথা বারিচরঃ পক্ষী ন লিপ্যতি জলে চরন্
এবমেব কৃতপ্রজ্ঞো ন দোষৈর্বিষয়াংশ্চরন্
অসজ্জমানঃ সর্বেষু ন কথংচন লিপ্যতে

ত্যক্ত্বা পূর্বকৃতং কর্ম রতির্যস্য সদাত্মনি
সর্বভূতাত্মভূতস্য গুণমার্গেষ্বসজ্জতঃ

সত্ত্বমাত্মা প্রসবতি গুণান্বাপি কদা চ ন
ন গুণা বিদুরাত্মানং গুণান্বেদ স সর্বদা

পরিদ্রষ্টা গুণানাং স স্রষ্টা চৈব যথাতথম্
সত্ত্বক্ষেত্রজ্ঞয়োরেতদন্তরং বিদ্ধি সূক্ষ্ময়োঃ

সৃজতে তু গুণানেক একো ন সৃজতে গুণান্
পৃথগ্ভূতৌ প্রকৃত্যা তৌ সংপ্রয়ুক্তৌ চ সর্বদা

যথা মত্স্যোঽদ্ভিরন্যঃ সন্সংপ্রয়ুক্তৌ তথৈব তৌ
মশকোদুম্বরৌ চাপি সংপ্রয়ুক্তৌ যথা সহ

ইষীকা বা যথা মুঞ্জে পৃথক্চ সহ চৈব চ
তথৈব সহিতাবেতাবন্যোন্যস্মিন্প্রতিষ্ঠিতৌ