অধ্যায় 241

241.1

ব্যাস উবাচ
সৃজতে তু গুণান্সত্ত্বং ক্ষেত্রজ্ঞস্ত্বনুতিষ্ঠতি
গুণান্বিক্রিয়তঃ সর্বানুদাসীনবদীশ্বরঃ

স্বভাবয়ুক্তং তত্সর্বং যদিমান্সৃজতে গুণান্
ঊর্ণনাভির্যথা সূত্রং সৃজতে তন্তুবদ্গুণান্

প্রধ্বস্তা ন নিবর্তন্তে প্রবৃত্তির্নোপলভ্যতে
এবমেকে ব্যবস্যন্তি নিবৃত্তিরিতি চাপরে

উভয়ং সংপ্রধার্যৈতদধ্যবস্যেদ্যথামতি
অনেনৈব বিধানেন ভবেদ্গর্ভশয়ো মহান্

অনাদিনিধনং নিত্যমাসাদ্য বিচরেন্নরঃ
অক্রুধ্যন্নপ্রহৃষ্যংশ্চ নিত্যং বিগতমত্সরঃ

ইত্যেবং হৃদয়গ্রন্থিং বুদ্ধিচিন্তাময়ং দৃঢম্
অতীত্য সুখমাসীত অশোচংশ্ছিন্নসংশয়ঃ

তপ্যেয়ুঃ প্রচ্যুতাঃ পৃথ্ব্যা যথা পূর্ণাং নদীং নরাঃ
অবগাঢা হ্যবিদ্বাংসো বিদ্ধি লোকমিমং তথা

ন তু তাম্যতি বৈ বিদ্বান্স্থলে চরতি তত্ত্ববিৎ
এবং যো বিন্দতেঽঽত্মানং কেবলং জ্ঞানমাত্মনঃ

এবং বুদ্ধ্বা নরঃ সর্বাং ভূতানামাগতিং গতিম্
সমবেক্ষ্য শনৈঃ সম্যগ্লভতে শমমুত্তমম্

এতদ্বৈ জন্মসামর্থ্যং ব্রাহ্মণস্য বিশেষতঃ
আত্মজ্ঞানং শমশ্চৈব পর্যাপ্তং তত্পরায়ণম্

এতদ্বুদ্ধ্বা ভবেদ্বুদ্ধঃ কিমন্যদ্বুদ্ধলক্ষণম্
বিজ্ঞায়ৈতদ্বিমুচ্যন্তে কৃতকৃত্যা মনীষিণঃ

ন ভবতি বিদুষাং মহদ্ভয়ং; যদবিদুষাং সুমহদ্ভয়ং ভবেৎ
ন হি গতিরধিকাস্তি কস্যচি;দ্ভবতি হি যা বিদুষঃ সনাতনী

লোকমাতুরমসূয়তে জন;স্তত্তদেব চ নিরীক্ষ্য শোচতে
তত্র পশ্য কুশলানশোচতো; যে বিদুস্তদুভয়ং কৃতাকৃতম্

যত্করোত্যনভিসংধিপূর্বকং; তচ্চ নির্ণুদতি যত্পুরা কৃতম্
ন প্রিয়ং তদুভয়ং ন চাপ্রিয়ং; তস্য তজ্জনয়তীহ কুর্বতঃ