অধ্যায় 242

242.1

শুক উবাচ
যস্মাদ্ধর্মাত্পরো ধর্মো বিদ্যতে নেহ কশ্চন
যো বিশিষ্টশ্চ ধর্মেভ্যস্তং ভবান্প্রব্রবীতু মে

242.2

ব্যাস উবাচ
ধর্মং তে সংপ্রবক্ষ্যামি পুরাণমৃষিসংস্তুতম্
বিশিষ্টং সর্বধর্মেভ্যস্তমিহৈকমনাঃ শৃণু

242.3

ইন্দ্রিয়াণি প্রমাথীনি বুদ্ধ্যা সংয়ম্য যত্নতঃ
সর্বতো নিষ্পতিষ্ণূনি পিতা বালানিবাত্মজান্

242.4

মনসশ্চেন্দ্রিয়াণাং চ হ্যৈকাগ্র্যং পরমং তপঃ
তজ্জ্যায়ঃ সর্বধর্মেভ্যঃ স ধর্মঃ পর উচ্যতে

242.5

তানি সর্বাণি সংধায় মনঃষষ্ঠানি মেধয়া
আত্মতৃপ্ত ইবাসীত বহু চিন্ত্যমচিন্তয়ন্

242.6

গোচরেভ্যো নিবৃত্তানি যদা স্থাস্যন্তি বেশ্মনি
তদা ত্বমাত্মনাত্মানং পরং দ্রক্ষ্যসি শাশ্বতম্

242.7

সর্বাত্মানং মহাত্মানং বিধূমমিব পাবকম্
তং পশ্যন্তি মহাত্মানো ব্রাহ্মণা যে মনীষিণঃ

242.8

যথা পুষ্পফলোপেতো বহুশাখো মহাদ্রুমঃ
আত্মনো নাভিজানীতে ক্ব মে পুষ্পং ক্ব মে ফলম্

242.9

এবমাত্মা ন জানীতে ক্ব গমিষ্যে কুতো ন্বহম্
অন্যো হ্যত্রান্তরাত্মাস্তি যঃ সর্বমনুপশ্যতি

242.10

জ্ঞানদীপেন দীপ্তেন পশ্যত্যাত্মানমাত্মনা
দৃষ্ট্বা ত্বমাত্মনাত্মানং নিরাত্মা ভব সর্ববিৎ

242.11

বিমুক্তঃ সর্বপাপেভ্যো মুক্তত্বচ ইবোরগঃ
পরাং বুদ্ধিমবাপ্যেহ বিপাপ্মা বিগতজ্বরঃ

242.12

সর্বতঃস্রোতসং ঘোরাং নদীং লোকপ্রবাহিনীম্
পঞ্চেন্দ্রিয়গ্রাহবতীং মনঃসংকল্পরোধসম্

242.13

লোভমোহতৃণচ্ছন্নাং কামক্রোধসরীসৃপাম্
সত্যতীর্থানৃতক্ষোভাং ক্রোধপঙ্কাং সরিদ্বরাম্

242.14

অব্যক্তপ্রভবাং শীঘ্রাং দুস্তরামকৃতাত্মভিঃ
প্রতরস্ব নদীং বুদ্ধ্যা কামগ্রাহসমাকুলাম্

242.15

সংসারসাগরগমাং যোনিপাতালদুস্তরাম্
আত্মজন্মোদ্ভবাং তাত জিহ্বাবর্তাং দুরাসদাম্

242.16

যাং তরন্তি কৃতপ্রজ্ঞা ধৃতিমন্তো মনীষিণঃ
তাং তীর্ণঃ সর্বতোমুক্তো বিপূতাত্মাত্মবিচ্ছুচিঃ

242.17

উত্তমাং বুদ্ধিমাস্থায় ব্রহ্মভূয়ং গমিষ্যসি
সংতীর্ণঃ সর্বসংক্লেশান্প্রসন্নাত্মা বিকল্মষঃ

242.18

ভূমিষ্ঠানীব ভূতানি পর্বতস্থো নিশাময়
অক্রুধ্যন্নপ্রহৃষ্যংশ্চ ননৃশংসমতিস্তথা
ততো দ্রক্ষ্যসি ভূতানাং সর্বেষাং প্রভবাপ্যয়ৌ

242.19

এবং বৈ সর্বধর্মেভ্যো বিশিষ্টং মেনিরে বুধাঃ
ধর্মং ধর্মভৃতাং শ্রেষ্ঠ মুনয়স্তত্ত্বদর্শিনঃ

242.20

আত্মনোঽব্যয়িনো জ্ঞাত্বা ইদং পুত্রানুশাসনম্
প্রয়তায় প্রবক্তব্যং হিতায়ানুগতায় চ

242.21

আত্মজ্ঞানমিদং গুহ্যং সর্বগুহ্যতমং মহৎ
অব্রুবং যদহং তাত আত্মসাক্ষিকমঞ্জসা

242.22

নৈব স্ত্রী ন পুমানেতন্নৈব চেদং নপুংসকম্
অদুঃখমসুখং ব্রহ্ম ভূতভব্যভবাত্মকম্

242.23

নৈতজ্জ্ঞাত্বা পুমান্স্ত্রী বা পুনর্ভবমবাপ্নুয়াৎ
অভবপ্রতিপত্ত্যর্থমেতদ্বর্ত্ম বিধীয়তে

242.24

যথা মতানি সর্বাণি ন চৈতানি যথা তথা
কথিতানি ময়া পুত্র ভবন্তি ন ভবন্তি চ

242.25

তত্প্রীতিয়ুক্তেন গুণান্বিতেন; পুত্রেণ সত্পুত্রগুণান্বিতেন
পৃষ্টো হীদং প্রীতিমতা হিতার্থং; ব্রূয়াত্সুতস্যেহ যদুক্তমেতৎ

Contains text from DharmicData, made available under the Open Database License (ODbL). Simple meanings are written by AI and can contain mistakes.