অধ্যায় 243

243.1

ব্যাস উবাচ
গন্ধান্রসান্নানুরুন্ধ্যাত্সুখং বা; নালংকারাংশ্চাপ্নুয়াত্তস্য তস্য
মানং চ কীর্তিং চ যশশ্চ নেচ্ছে;ত্স বৈ প্রচারঃ পশ্যতো ব্রাহ্মণস্য

সর্বান্বেদানধীয়ীত শুশ্রূষুর্ব্রহ্মচর্যবান্
ঋচো যজূংষি সামানি ন তেন ন স ব্রাহ্মণঃ

জ্ঞাতিবত্সর্বভূতানাং সর্ববিত্সর্ববেদবিৎ
নাকামো ম্রিয়তে জাতু ন তেন ন চ ব্রাহ্মণঃ

ইষ্টীশ্চ বিবিধাঃ প্রাপ্য ক্রতূংশ্চৈবাপ্তদক্ষিণান্
নৈব প্রাপ্নোতি ব্রাহ্মণ্যমভিধ্যানাত্কথংচন

যদা চায়ং ন বিভেতি যদা চাস্মান্ন বিভ্যতি
যদা নেচ্ছতি ন দ্বেষ্টি ব্রহ্ম সংপদ্যতে তদা

যদা ন কুরুতে ভাবং সর্বভূতেষু পাপকম্
কর্মণা মনসা বাচা ব্রহ্ম সংপদ্যতে তদা

কামবন্ধনমেবৈকং নান্যদস্তীহ বন্ধনম্
কামবন্ধনমুক্তো হি ব্রহ্মভূয়ায় কল্পতে

কামতো মুচ্যমানস্তু ধূম্রাভ্রাদিব চন্দ্রমাঃ
বিরজাঃ কালমাকাঙ্ক্ষন্ধীরো ধৈর্যেণ বর্ততে

আপূর্যমাণমচলপ্রতিষ্ঠং; সমুদ্রমাপঃ প্রবিশন্তি যদ্বৎ
স কামকান্তো ন তু কামকামঃ; স বৈ লোকাত্স্বর্গমুপৈতি দেহী

বেদস্যোপনিষত্সত্যং সত্যস্যোপনিষদ্দমঃ
দমস্যোপনিষদ্দানং দানস্যোপনিষত্তপঃ

তপসোপনিষত্ত্যাগস্ত্যাগস্যোপনিষত্সুখম্
সুখস্যোপনিষত্স্বর্গঃ স্বর্গস্যোপনিষচ্ছমঃ

ক্লেদনং শোকমনসোঃ সংতাপং তৃষ্ণয়া সহ
সত্ত্বমিচ্ছসি সংতোষাচ্ছান্তিলক্ষণমুত্তমম্

বিশোকো নির্মমঃ শান্তঃ প্রসন্নাত্মাত্মবিত্তমঃ
ষড্ভির্লক্ষণবানেতৈঃ সমগ্রঃ পুনরেষ্যতি

ষড্ভিঃ সত্ত্বগুণোপেতৈঃ প্রাজ্ঞৈরধিকমন্ত্রিভিঃ
যে বিদুঃ প্রেত্য চাত্মানমিহস্থাংস্তাংস্তথা বিদুঃ

অকৃত্রিমমসংহার্যং প্রাকৃতং নিরুপস্কৃতম্
অধ্যাত্মং সুকৃতপ্রজ্ঞঃ সুখমব্যয়মশ্নুতে

নিষ্প্রচারং মনঃ কৃত্বা প্রতিষ্ঠাপ্য চ সর্বতঃ
যাময়ং লভতে তুষ্টিং সা ন শক্যমতোঽন্যথা

যেন তৃপ্যত্যভুঞ্জানো যেন তুষ্যত্যবিত্তবান্
যেনাস্নেহো বলং ধত্তে যস্তং বেদ স বেদবিৎ

সংগোপ্য হ্যাত্মনো দ্বারাণ্যপিধায় বিচিন্তয়ন্
যো হ্যাস্তে ব্রাহ্মণঃ শিষ্টঃ স আত্মরতিরুচ্যতে

সমাহিতং পরে তত্ত্বে ক্ষীণকামমবস্থিতম্
সর্বতঃ সুখমন্বেতি বপুশ্চান্দ্রমসং যথা

সবিশেষাণি ভূতানি গুণাংশ্চাভজতো মুনেঃ
সুখেনাপোহ্যতে দুঃখং ভাস্করেণ তমো যথা

তমতিক্রান্তকর্মাণমতিক্রান্তগুণক্ষয়ম্
ব্রাহ্মণং বিষয়াশ্লিষ্টং জরামৃত্যূ ন বিন্দতঃ

স যদা সর্বতো মুক্তঃ সমঃ পর্যবতিষ্ঠতে
ইন্দ্রিয়াণীন্দ্রিয়ার্থাংশ্চ শরীরস্থোঽতিবর্ততে

কারণং পরমং প্রাপ্য অতিক্রান্তস্য কার্যতাম্
পুনরাবর্তনং নাস্তি সংপ্রাপ্তস্য পরাত্পরম্