অধ্যায় 244

244.1

ব্যাস উবাচ
দ্বংদ্বানি মোক্ষজিজ্ঞাসুরর্থধর্মাবনুষ্ঠিতঃ
বক্ত্রা গুণবতা শিষ্যঃ শ্রাব্যঃ পূর্বমিদং মহৎ

আকাশং মারুতো জ্যোতিরাপঃ পৃথ্বী চ পঞ্চমী
ভাবাভাবৌ চ কালশ্চ সর্বভূতেষু পঞ্চসু

অন্তরাত্মকমাকাশং তন্ময়ং শ্রোত্রমিন্দ্রিয়ম্
তস্য শব্দং গুণং বিদ্যান্মূর্তিশাস্ত্রবিধানবিৎ

চরণং মারুতাত্মেতি প্রাণাপানৌ চ তন্ময়ৌ
স্পর্শনং চেন্দ্রিয়ং বিদ্যাত্তথা স্পর্শং চ তন্ময়ম্

ততঃ পাকঃ প্রকাশশ্চ জ্যোতিশ্চক্ষুশ্চ তন্ময়ম্
তস্য রূপং গুণং বিদ্যাত্তমোঽন্ববসিতাত্মকম্

প্রক্লেদঃ ক্ষুদ্রতা স্নেহ ইত্যাপো হ্যুপদিশ্যতে
রসনং চেন্দ্রিয়ং জিহ্বা রসশ্চাপাং গুণো মতঃ

সংঘাতঃ পার্থিবো ধাতুরস্থিদন্তনখানি চ
শ্মশ্রু লোম চ কেশাশ্চ সিরাঃ স্নায়ু চ চর্ম চ

ইন্দ্রিয়ং ঘ্রাণসংজ্ঞানং নাসিকেত্যভিধীয়তে
গন্ধশ্চৈবেন্দ্রিয়ার্থোঽয়ং বিজ্ঞেয়ঃ পৃথিবীময়ঃ

উত্তরেষু গুণাঃ সন্তি সর্বে সর্বেষু চোত্তরাঃ
পঞ্চানাং ভূতসংঘানাং সংততিং মুনয়ো বিদুঃ

মনো নবমমেষাং তু বুদ্ধিস্তু দশমী স্মৃতা
একাদশোঽন্তরাত্মা চ সর্বতঃ পর উচ্যতে

ব্যবসায়াত্মিকা বুদ্ধির্মনো ব্যাকরণাত্মকম্
কর্মানুমানাদ্বিজ্ঞেয়ঃ স জীবঃ ক্ষেত্রসংজ্ঞকঃ

এভিঃ কালাষ্টমৈর্ভাবৈর্যঃ সর্বৈঃ সর্বমন্বিতম্
পশ্যত্যকলুষং প্রাজ্ঞঃ স মোহং নানুবর্ততে