অধ্যায় 245

245.1

ব্যাস উবাচ
শরীরাদ্বিপ্রমুক্তং হি সূক্ষ্মভূতং শরীরিণম্
কর্মভিঃ পরিপশ্যন্তি শাস্ত্রোক্তৈঃ শাস্ত্রচেতসঃ

যথা মরীচ্যঃ সহিতাশ্চরন্তি; গচ্ছন্তি তিষ্ঠন্তি চ দৃশ্যমানাঃ
দেহৈর্বিমুক্তা বিচরন্তি লোকাং;স্তথৈব সত্ত্বান্যতিমানুষাণি

প্রতিরূপং যথৈবাপ্সু তাপঃ সূর্যস্য লক্ষ্যতে
সত্ত্ববাংস্তু তথা সত্ত্বং প্রতিরূপং প্রপশ্যতি

তানি সূক্ষ্মাণি সত্ত্বস্থা বিমুক্তানি শরীরতঃ
স্বেন তত্ত্বেন তত্ত্বজ্ঞাঃ পশ্যন্তি নিয়তেন্দ্রিয়াঃ

স্বপতাং জাগ্রতাং চৈব সর্বেষামাত্মচিন্তিতম্
প্রধানদ্বৈধয়ুক্তানাং জহতাং কর্মজং রজঃ

যথাহনি তথা রাত্রৌ যথা রাত্রৌ তথাহনি
বশে তিষ্ঠতি সত্ত্বাত্মা সততং যোগয়োগিনাম্

তেষাং নিত্যং সদানিত্যো ভূতাত্মা সততং গুণৈঃ
সপ্তভিস্ত্বন্বিতঃ সূক্ষ্মৈশ্চরিষ্ণুরজরামরঃ

মনোবুদ্ধিপরাভূতঃ স্বদেহপরদেহবিৎ
স্বপ্নেষ্বপি ভবত্যেষ বিজ্ঞাতা সুখদুঃখয়োঃ

তত্রাপি লভতে দুঃখং তত্রাপি লভতে সুখম্
ক্রোধলোভৌ তু তত্রাপি কৃত্বা ব্যসনমর্ছতি

প্রীণিতশ্চাপি ভবতি মহতোঽর্থানবাপ্য চ
করোতি পুণ্যং তত্রাপি জাগ্রন্নিব চ পশ্যতি

তমেবমতিতেজোংশং ভূতাত্মানং হৃদি স্থিতম্
তমোরজোভ্যামাবিষ্টা নানুপশ্যন্তি মূর্তিষু

শাস্ত্রয়োগপরা ভূত্বা স্বমাত্মানং পরীপ্সবঃ
অনুচ্ছ্বাসান্যমূর্তীনি যানি বজ্রোপমান্যপি

পৃথগ্ভূতেষু সৃষ্টেষু চতুর্ষ্বাশ্রমকর্মসু
সমাধৌ যোগমেবৈতচ্ছাণ্ডিল্যঃ শমমব্রবীৎ

বিদিত্বা সপ্ত সূক্ষ্মাণি ষডঙ্গং চ মহেশ্বরম্
প্রধানবিনিয়োগস্থঃ পরং ব্রহ্মাধিগচ্ছতি