অধ্যায় 246

246.1

ব্যাস উবাচ
হৃদি কামদ্রুমশ্চিত্রো মোহসংচয়সংভবঃ
ক্রোধমানমহাস্কন্ধো বিবিত্সাপরিমোচনঃ

তস্য চাজ্ঞানমাধারঃ প্রমাদঃ পরিষেচনম্
সোঽভ্যসূয়াপলাশো হি পুরাদুষ্কৃতসারবান্

সংমোহচিন্তাবিটপঃ শোকশাখো ভয়ংকরঃ
মোহনীভিঃ পিপাসাভির্লতাভিঃ পরিবেষ্টিতঃ

উপাসতে মহাবৃক্ষং সুলুব্ধাস্তং ফলেপ্সবঃ
আয়াসৈঃ সংয়তঃ পাশৈঃ ফলানি পরিবেষ্টয়ন্

যস্তান্পাশান্বশে কৃত্বা তং বৃক্ষমপকর্ষতি
গতঃ স দুঃখয়োরন্তং যতমানস্তয়োর্দ্বয়োঃ

সংরোহত্যকৃতপ্রজ্ঞঃ সংতাপেন হি পাদপম্
স তমেব ততো হন্তি বিষং গ্রস্তমিবাতুরম্

তস্যানুশয়মূলস্য মূলমুদ্ধ্রিয়তে বলাৎ
ত্যাগাপ্রমাদাকৃতিনা সাম্যেন পরমাসিনা

এবং যো বেদ কামস্য কেবলং পরিকর্ষণম্
বধং বৈ কামশাস্ত্রস্য স দুঃখান্যতিবর্ততে

শরীরং পুরমিত্যাহুঃ স্বামিনী বুদ্ধিরিষ্যতে
তত্র বুদ্ধেঃ শরীরস্থং মনো নামার্থচিন্তকম্

ইন্দ্রিয়াণি জনাঃ পৌরাস্তদর্থং তু পরা কৃতিঃ
তত্র দ্বৌ দারুণৌ দোষৌ তমো নাম রজস্তথা

যদর্থমুপজীবন্তি পৌরাঃ সহপুরেশ্বরাঃ
অদ্বারেণ তমেবার্থং দ্বৌ দোষাবুপজীবতঃ

তত্র বুদ্ধির্হি দুর্ধর্ষা মনঃ সাধর্ম্যমুচ্যতে
পৌরাশ্চাপি মনস্ত্রস্তাস্তেষামপি চলা স্থিতিঃ

যদর্থং বুদ্ধিরধ্যাস্তে ন সোঽর্থঃ পরিষীদতি
যদর্থং পৃথগধ্যাস্তে মনস্তত্পরিষীদতি

পৃথগ্ভূতং যদা বুদ্ধ্যা মনো ভবতি কেবলম্
তত্রৈনং বিবৃতং শূন্যং রজঃ পর্যবতিষ্ঠতে

তন্মনঃ কুরুতে সখ্যং রজসা সহ সংগতম্
তং চাদায় জনং পৌরং রজসে সংপ্রয়চ্ছতি