অধ্যায় 247

247.1

ভীষ্ম উবাচ
ভূতানাং গুণসংখ্যানং ভূয়ঃ পুত্র নিশাময়
দ্বৈপায়নমুখাদ্ভ্রষ্টং শ্লাঘয়া পরয়ানঘ

দীপ্তানলনিভঃ প্রাহ ভগবান্ধূম্রবর্চসে
ততোঽহমপি বক্ষ্যামি ভূয়ঃ পুত্র নিদর্শনম্

ভূমেঃ স্থৈর্যং পৃথুত্বং চ কাঠিন্যং প্রসবাত্মতা
গন্ধো গুরুত্বং শক্তিশ্চ সংঘাতঃ স্থাপনা ধৃতিঃ

অপাং শৈত্যং রসঃ ক্লেদো দ্রবত্বং স্নেহসৌম্যতা
জিহ্বা বিষ্যন্দিনী চৈব ভৌমাপ্যাস্রবণং তথা

অগ্নের্দুর্ধর্ষতা তেজস্তাপঃ পাকঃ প্রকাশনম্
শৌচং রাগো লঘুস্তৈক্ষ্ণ্যং দশমং চোর্ধ্বভাগিতা

বায়োরনিয়মঃ স্পর্শো বাদস্থানং স্বতন্ত্রতা
বলং শৈঘ্র্যং চ মোহশ্চ চেষ্টা কর্মকৃতা ভবঃ

আকাশস্য গুণঃ শব্দো ব্যাপিত্বং ছিদ্রতাপি চ
অনাশ্রয়মনালম্বমব্যক্তমবিকারিতা

অপ্রতীঘাততা চৈব ভূতত্বং বিকৃতানি চ
গুণাঃ পঞ্চাশতং প্রোক্তাঃ পঞ্চভূতাত্মভাবিতাঃ

চলোপপত্তির্ব্যক্তিশ্চ বিসর্গঃ কল্পনা ক্ষমা
সদসচ্চাশুতা চৈব মনসো নব বৈ গুণাঃ

ইষ্টানিষ্টবিকল্পশ্চ ব্যবসায়ঃ সমাধিতা
সংশয়ঃ প্রতিপত্তিশ্চ বুদ্ধৌ পঞ্চেহ যে গুণাঃ

যুধিষ্ঠির উবাচ
কথং পঞ্চগুণা বুদ্ধিঃ কথং পঞ্চেন্দ্রিয়া গুণাঃ
এতন্মে সর্বমাচক্ষ্ব সূক্ষ্মজ্ঞানং পিতামহ

ভীষ্ম উবাচ
আহুঃ ষষ্টিং ভূতগুণান্বৈ; ভূতবিশিষ্টা নিত্যবিষক্তাঃ
ভূতবিষক্তাশ্চাক্ষরসৃষ্টাঃ; পুত্র ন নিত্যং তদিহ বদন্তি

তত্পুত্র চিন্তাকলিতং যদুক্ত;মনাগতং বৈ তব সংপ্রতীহ
ভূতার্থতত্ত্বং তদবাপ্য সর্বং; ভূতপ্রভাবাদ্ভব শান্তবুদ্ধিঃ