অধ্যায় 248

248.1

যুধিষ্ঠির উবাচ
য ইমে পৃথিবীপালাঃ শেরতে পৃথিবীতলে
পৃতনামধ্য এতে হি গতসত্ত্বা মহাবলাঃ

একৈকশো ভীমবলা নাগায়ুতবলাস্তথা
এতে হি নিহতাঃ সংখ্যে তুল্যতেজোবলৈর্নরৈঃ

নৈষাং পশ্যামি হন্তারং প্রাণিনাং সংয়ুগে পুরা
বিক্রমেণোপসংপন্নাস্তেজোবলসমন্বিতাঃ

অথ চেমে মহাপ্রাজ্ঞ শেরতে হি গতাসবঃ
মৃতা ইতি চ শব্দোঽয়ং বর্তত্যেষু গতাসুষু

ইমে মৃতা নৃপতয়ঃ প্রায়শো ভীমবিক্রমাঃ
তত্র মে সংশয়ো জাতঃ কুতঃ সংজ্ঞা মৃতা ইতি

কস্য মৃত্যুঃ কুতো মৃত্যুঃ কেন মৃত্যুরিহ প্রজাঃ
হরত্যমরসংকাশ তন্মে ব্রূহি পিতামহ

ভীষ্ম উবাচ
পুরা কৃতয়ুগে তাত রাজাসীদবিকম্পকঃ
স শত্রুবশমাপন্নঃ সংগ্রামে ক্ষীণবাহনঃ

তত্র পুত্রো হরির্নাম নারায়ণসমো বলে
স শত্রুভির্হতঃ সংখ্যে সবলঃ সপদানুগঃ

স রাজা শত্রুবশগঃ পুত্রশোকসমন্বিতঃ
যদৃচ্ছয়াশান্তিপরো দদর্শ ভুবি নারদম্

স তস্মৈ সর্বমাচষ্ট যথা বৃত্তং জনেশ্বরঃ
শত্রুভির্গ্রহণং সংখ্যে পুত্রস্য মরণং তথা

তস্য তদ্বচনং শ্রুত্বা নারদোঽথ তপোধনঃ
আখ্যানমিদমাচষ্ট পুত্রশোকাপহং তদা

রাজঞ্শৃণু সমাখ্যানমদ্যেদং বহুবিস্তরম্
যথা বৃত্তং শ্রুতং চৈব ময়াপি বসুধাধিপ

প্রজাঃ সৃষ্ট্বা মহাতেজাঃ প্রজাসর্গে পিতামহঃ
অতীব বৃদ্ধা বহুলা নামৃষ্যত পুনঃ প্রজাঃ

ন হ্যন্তরমভূত্কিংচিত্ক্বচিজ্জন্তুভিরচ্যুত
নিরুচ্ছ্বাসমিবোন্নদ্ধং ত্রৈলোক্যমভবন্নৃপ

তস্য চিন্তা সমুত্পন্না সংহারং প্রতি ভূপতে
চিন্তয়ন্নাধ্যগচ্ছচ্চ সংহারে হেতুকারণম্

তস্য রোষান্মহারাজ খেভ্যোঽগ্নিরুদতিষ্ঠত
তেন সর্বা দিশো রাজন্দদাহ স পিতামহঃ

ততো দিবং ভুবং খং চ জগচ্চ সচরাচরম্
দদাহ পাবকো রাজন্ভগবত্কোপসংভবঃ

তত্রাদহ্যন্ত ভূতানি জঙ্গমানি ধ্রুবাণি চ
মহতা কোপবেগেন কুপিতে প্রপিতামহে

ততো হরিজটঃ স্থাণুর্বেদাধ্বরপতিঃ শিবঃ
জগাদ শরণং দেবো ব্রহ্মাণং পরবীরহা

তস্মিন্নভিগতে স্থাণৌ প্রজানাং হিতকাম্যয়া
অব্রবীদ্বরদো দেবো জ্বলন্নিব তদা শিবম্

করবাণ্যদ্য কং কামং বরার্হোঽসি মতো মম
কর্তা হ্যস্মি প্রিয়ং শংভো তব যদ্ধৃদি বর্ততে