অধ্যায় 249

249.1

স্থাণুরুবাচ
প্রজাসর্গনিমিত্তং মে কার্যবত্তামিমাং প্রভো
বিদ্ধি সৃষ্টাস্ত্বয়া হীমা মা কুপ্যাসাং পিতামহ

তব তেজোগ্নিনা দেব প্রজা দহ্যন্তি সর্বশঃ
তা দৃষ্ট্বা মম কারুণ্যং মা কুপ্যাসাং জগত্প্রভো

প্রজাপতিরুবাচ
ন কুপ্যে ন চ মে কামো ন ভবেরন্প্রজা ইতি
লাঘবার্থং ধরণ্যাস্তু ততঃ সংহার ইষ্যতে

ইয়ং হি মাং সদা দেবী ভারার্তা সমচোদয়ৎ
সংহারার্থং মহাদেব ভারেণাপ্সু নিমজ্জতি

যদাহং নাধিগচ্ছামি বুদ্ধ্যা বহু বিচারয়ন্
সংহারমাসাং বৃদ্ধানাং ততো মাং ক্রোধ আবিশৎ

স্থাণুরুবাচ
সংহারান্তং প্রসীদস্ব মা ক্রুধস্ত্রিদশেশ্বর
মা প্রজাঃ স্থাবরং চৈব জঙ্গমং চ বিনীনশঃ

পল্বলানি চ সর্বাণি সর্বং চৈব তৃণোলপম্
স্থাবরং জঙ্গমং চৈব ভূতগ্রামং চতুর্বিধম্

তদেতদ্ভস্মসাদ্ভূতং জগত্সর্বমুপপ্লুতম্
প্রসীদ ভগবন্সাধো বর এষ বৃতো ময়া

নষ্টা ন পুনরেষ্যন্তি প্রজা হ্যেতাঃ কথংচন
তস্মান্নিবর্ত্যতামেতত্তেজঃ স্বেনৈব তেজসা

উপায়মন্যং সংপশ্য প্রজানাং হিতকাম্যয়া
যথেমে জন্তবঃ সর্বে নিবর্তেরন্পরংতপ

অভাবমভিগচ্ছেয়ুরুত্সন্নপ্রজনাঃ প্রজাঃ
অধিদৈবনিয়ুক্তোঽস্মি ত্বয়া লোকেষ্বিহেশ্বর

ত্বদ্ভবং হি জগন্নাথ জগত্স্থাবরজঙ্গমম্
প্রসাদ্য ত্বাং মহাদেব যাচাম্যাবৃত্তিজাঃ প্রজাঃ

নারদ উবাচ
শ্রুত্বা তু বচনং দেবঃ স্থাণোর্নিয়তবাঙ্মনাঃ
তেজস্তত্স্বং নিজগ্রাহ পুনরেবান্তরাত্মনা

ততোঽগ্নিমুপসংগৃহ্য ভগবাঁল্লোকপূজিতঃ
প্রবৃত্তিং চ নিবৃত্তিং চ কল্পয়ামাস বৈ প্রভুঃ

উপসংহরতস্তস্য তমগ্নিং রোষজং তদা
প্রাদুর্বভূব বিশ্বেভ্যঃ খেভ্যো নারী মহাত্মনঃ

কৃষ্ণা রক্তাম্বরধরা রক্তনেত্রতলান্তরা
দিব্যকুণ্ডলসংপন্না দিব্যাভরণভূষিতা

সা বিনিঃসৃত্য বৈ খেভ্যো দক্ষিণামাশ্রিতা দিশম্
দদৃশাতেঽথ তৌ কন্যাং দেবৌ বিশ্বেশ্বরাবুভৌ

তামাহূয় তদা দেবো লোকানামাদিরীশ্বরঃ
মৃত্যো ইতি মহীপাল জহি চেমাঃ প্রজা ইতি

ত্বং হি সংহারবুদ্ধ্যা মে চিন্তিতা রুষিতেন চ
তস্মাত্সংহর সর্বাস্ত্বং প্রজাঃ সজডপণ্ডিতাঃ

অবিশেষেণ চৈব ত্বং প্রজাঃ সংহর ভামিনি
মম ত্বং হি নিয়োগেন শ্রেয়ঃ পরমবাপ্স্যসি

এবমুক্তা তু সা দেবী মৃত্যুঃ কমলমালিনী
প্রদধ্যৌ দুঃখিতা বালা সাশ্রুপাতমতীব হি

পাণিভ্যাং চৈব জগ্রাহ তান্যশ্রূণি জনেশ্বরঃ
মানবানাং হিতার্থায় যয়াচে পুনরেব চ