Utshovঅধ্যায় 250
250.1
নারদ উবাচ
বিনীয় দুঃখমবলা সা ত্বতীবায়তেক্ষণা
উবাচ প্রাঞ্জলির্ভূত্বা লতেবাবর্জিতা তদা
250.2
ত্বয়া সৃষ্টা কথং নারী মাদৃশী বদতাং বর
রৌদ্রকর্মাভিজায়েত সর্বপ্রাণিভয়ংকরী
250.3
বিভেম্যহমধর্মস্য ধর্ম্যমাদিশ কর্ম মে
ত্বং মাং ভীতামবেক্ষস্ব শিবেনেশ্বর চক্ষুষা
250.4
বালান্বৃদ্ধান্বয়ঃস্থাংশ্চ ন হরেয়মনাগসঃ
প্রাণিনঃ প্রাণিনামীশ নমস্তেঽভিপ্রসীদ মে
250.5
প্রিয়ান্পুত্রান্বয়স্যাংশ্চ ভ্রাতৄন্মাতৄঃ পিতৄনপি
অপধ্যাস্যন্তি যদ্দেব মৃতাংস্তেষাং বিভেম্যহম্
250.6
কৃপণাশ্রুপরিক্লেদো দহেন্মাং শাশ্বতীঃ সমাঃ
তেভ্যোঽহং বলবদ্ভীতা শরণং ত্বামুপাগতা
250.7
যমস্য ভবনে দেব যাত্যন্তে পাপকর্মিণঃ
প্রসাদয়ে ত্বা বরদ প্রসাদং কুরু মে প্রভো
250.8
এতমিচ্ছাম্যহং কামং ত্বত্তো লোকপিতামহ
ইচ্ছেয়ং ত্বত্প্রসাদাচ্চ তপস্তপ্তুং সুরেশ্বর
250.9
পিতামহ উবাচ
মৃত্যো সংকল্পিতা মে ত্বং প্রজাসংহারহেতুনা
গচ্ছ সংহর সর্বাস্ত্বং প্রজা মা চ বিচারয়
250.10
এতদেবমবশ্যং হি ভবিতা নৈতদন্যথা
ক্রিয়তামনবদ্যাঙ্গি যথোক্তং মদ্বচোঽনঘে
250.11
নারদ উবাচ
এবমুক্তা মহাবাহো মৃত্যুঃ পরপুরংজয়
ন ব্যাজহার তস্থৌ চ প্রহ্বা ভগবদুন্মুখী
250.12
পুনঃ পুনরথোক্তা সা গতসত্ত্বেব ভামিনী
তূষ্ণীমাসীত্ততো দেবো দেবানামীশ্বরেশ্বরঃ
250.13
প্রসসাদ কিল ব্রহ্মা স্বয়মেবাত্মনাত্মবান্
স্ময়মানশ্চ লোকেশো লোকান্সর্বানবৈক্ষত
250.14
নিবৃত্তরোষে তস্মিংস্তু ভগবত্যপরাজিতে
সা কন্যাপজগামাস্য সমীপাদিতি নঃ শ্রুতম্
250.15
অপসৃত্যাপ্রতিশ্রুত্য প্রজাসংহরণং তদা
ত্বরমাণেব রাজেন্দ্র মৃত্যুর্ধেনুকমভ্যয়াৎ
250.16
সা তত্র পরমং দেবী তপোঽচরত দুশ্চরম্
সমা হ্যেকপদে তস্থৌ দশ পদ্মানি পঞ্চ চ
250.17
তাং তথা কুর্বতীং তত্র তপঃ পরমদুশ্চরম্
পুনরেব মহাতেজা ব্রহ্মা বচনমব্রবীৎ
250.18
কুরুষ্ব মে বচো মৃত্যো তদনাদৃত্য সত্বরা
তথৈবৈকপদে তাত পুনরন্যানি সপ্ত সা
250.19
তস্থৌ পদ্মানি ষট্চৈব পঞ্চ দ্বে চৈব মানদ
ভূয়ঃ পদ্মায়ুতং তাত মৃগৈঃ সহ চচার সা
250.20
পুনর্গত্বা ততো রাজন্মৌনমাতিষ্ঠদুত্তমম্
অপ্সু বর্ষসহস্রাণি সপ্ত চৈকং চ পার্থিব
250.21
ততো জগাম সা কন্যা কৌশিকীং ভরতর্ষভ
তত্র বায়ুজলাহারা চচার নিয়মং পুনঃ
250.22
ততো যয়ৌ মহাভাগা গঙ্গাং মেরুং চ কেবলম্
তস্থৌ দার্বিব নিশ্চেষ্টা ভূতানাং হিতকাম্যয়া
250.23
ততো হিমবতো মূর্ধ্নি যত্র দেবাঃ সমীজিরে
তত্রাঙ্গুষ্ঠেন রাজেন্দ্র নিখর্বমপরং ততঃ
তস্থৌ পিতামহং চৈব তোষয়ামাস যত্নতঃ
250.24
ততস্তামব্রবীত্তত্র লোকানাং প্রভবাপ্যয়ঃ
কিমিদং বর্ততে পুত্রি ক্রিয়তাং তদ্বচো মম
250.25
ততোঽব্রবীত্পুনর্মৃত্যুর্ভগবন্তং পিতামহম্
ন হরেয়ং প্রজা দেব পুনস্ত্বাহং প্রসাদয়ে
250.26
তামধর্মভয়ত্রস্তাং পুনরেব চ যাচতীম্
তদাব্রবীদ্দেবদেবো নিগৃহ্যেদং বচস্ততঃ
250.27
অধর্মো নাস্তি তে মৃত্যো সংয়চ্ছেমাঃ প্রজাঃ শুভে
ময়া হ্যুক্তং মৃষা ভদ্রে ভবিতা নেহ কিংচন
250.28
ধর্মঃ সনাতনশ্চ ত্বামিহৈবানুপ্রবেক্ষ্যতে
অহং চ বিবুধাশ্চৈব ত্বদ্ধিতে নিরতাঃ সদা
250.29
ইমমন্যং চ তে কামং দদামি মনসেপ্সিতম্
ন ত্বা দোষেণ যাস্যন্তি ব্যাধিসংপীডিতাঃ প্রজাঃ
250.30
পুরুষেষু চ রূপেণ পুরুষস্ত্বং ভবিষ্যসি
স্ত্রীষু স্ত্রীরূপিণী চৈব তৃতীয়েষু নপুংসকম্
250.31
সৈবমুক্তা মহারাজ কৃতাঞ্জলিরুবাচ হ
পুনরেব মহাত্মানং নেতি দেবেশমব্যয়ম্
250.32
তামব্রবীত্তদা দেবো মৃত্যো সংহর মানবান্
অধর্মস্তে ন ভবিতা তথা ধ্যাস্যাম্যহং শুভে
250.33
যানশ্রুবিন্দূন্পতিতানপশ্যং; যে পাণিভ্যাং ধারিতাস্তে পুরস্তাৎ
তে ব্যাধয়ো মানবান্ঘোররূপাঃ; প্রাপ্তে কালে পীডয়িষ্যন্তি মৃত্যো
250.34
সর্বেষাং ত্বং প্রাণিনামন্তকালে; কামক্রোধৌ সহিতৌ যোজয়েথাঃ
এবং ধর্মস্ত্বামুপৈষ্যত্যমেয়ো; ন চাধর্মং লপ্স্যসে তুল্যবৃত্তিঃ
250.35
এবং ধর্মং পালয়িষ্যস্যথোক্তং; ন চাত্মানং মজ্জয়িষ্যস্যধর্মে
তস্মাত্কামং রোচয়াভ্যাগতং ত্বং; সংয়োজ্যাথো সংহরস্বেহ জন্তূন্
250.36
সা বৈ তদা মৃত্যুসংজ্ঞাপদেশা;চ্ছাপাদ্ভীতা বাঢমিত্যব্রবীত্তম্
অথো প্রাণান্প্রাণিনামন্তকালে; কামক্রোধৌ প্রাপ্য নির্মোহ্য হন্তি
250.37
মৃত্যোর্যে তে ব্যাধয়শ্চাশ্রুপাতা; মনুষ্যাণাং রুজ্যতে যৈঃ শরীরম্
সর্বেষাং বৈ প্রাণিনাং প্রাণনান্তে; তস্মাচ্ছোকং মা কৃথা বুধ্য বুদ্ধ্যা
250.38
সর্বে দেবাঃ প্রাণিনাং প্রাণনান্তে; গত্বা বৃত্তাঃ সংনিবৃত্তাস্তথৈব
এবং সর্বে মানবাঃ প্রাণনান্তে; গত্বাবৃত্তা দেববদ্রাজসিংহ
250.39
বায়ুর্ভীমো ভীমনাদো মহৌজাঃ; সর্বেষাং চ প্রাণিনাং প্রাণভূতঃ
নানাবৃত্তির্দেহিনাং দেহভেদে; তস্মাদ্বায়ুর্দেবদেবো বিশিষ্টঃ
250.40
সর্বে দেবা মর্ত্যসংজ্ঞাবিশিষ্টাঃ; সর্বে মর্ত্যা দেবসংজ্ঞাবিশিষ্টাঃ
তস্মাত্পুত্রং মা শুচো রাজসিংহ; পুত্রঃ স্বর্গং প্রাপ্য তে মোদতে হ
250.41
এবং মৃত্যুর্দেবসৃষ্টা প্রজানাং; প্রাপ্তে কালে সংহরন্তী যথাবৎ
তস্যাশ্চৈব ব্যাধয়স্তেঽশ্রুপাতাঃ; প্রাপ্তে কালে সংহরন্তীহ জন্তূন্