অধ্যায় 251

251.1

যুধিষ্ঠির উবাচ
ইমে বৈ মানবাঃ সর্বে ধর্মং প্রতি বিশঙ্কিতাঃ
কোঽয়ং ধর্মঃ কুতো ধর্মস্তন্মে ব্রূহি পিতামহ

251.2

ধর্মো ন্বয়মিহার্থঃ কিমমুত্রার্থোঽপি বা ভবেৎ
উভয়ার্থোঽপি বা ধর্মস্তন্মে ব্রূহি পিতামহ

251.3

ভীষ্ম উবাচ
সদাচারঃ স্মৃতির্বেদাস্ত্রিবিধং ধর্মলক্ষণম্
চতুর্থমর্থমিত্যাহুঃ কবয়ো ধর্মলক্ষণম্

251.4

অপি হ্যুক্তানি কর্মাণি ব্যবস্যন্ত্যুত্তরাবরে
লোকয়াত্রার্থমেবেহ ধর্মস্য নিয়মঃ কৃতঃ
উভয়ত্র সুখোদর্ক ইহ চৈব পরত্র চ

251.5

অলব্ধ্বা নিপুণং ধর্মং পাপঃ পাপে প্রসজ্জতি
ন চ পাপকৃতঃ পাপান্মুচ্যন্তে কেচিদাপদি

251.6

অপাপবাদী ভবতি যদা ভবতি ধর্মবিৎ
ধর্মস্য নিষ্ঠা স্বাচারস্তমেবাশ্রিত্য ভোত্স্যসে

251.7

যদাধর্মসমাবিষ্টো ধনং গৃহ্ণাতি তস্করঃ
রমতে নির্হরন্স্তেনঃ পরবিত্তমরাজকে

251.8

যদাস্য তদ্ধরন্ত্যন্যে তদা রাজানমিচ্ছতি
তদা তেষাং স্পৃহয়তে যে বৈ তুষ্টাঃ স্বকৈর্ধনৈঃ

251.9

অভীতঃ শুচিরভ্যেতি রাজদ্বারমশঙ্কিতঃ
ন হি দুশ্চরিতং কিংচিদন্তরাত্মনি পশ্যতি

251.10

সত্যস্য বচনং সাধু ন সত্যাদ্বিদ্যতে পরম্
সত্যেন বিধৃতং সর্বং সর্বং সত্যে প্রতিষ্ঠিতম্

251.11

অপি পাপকৃতো রৌদ্রাঃ সত্যং কৃত্বা পৃথক্পৃথক্
অদ্রোহমবিসংবাদং প্রবর্তন্তে তদাশ্রয়াঃ
তে চেন্মিথোঽধৃতিং কুর্যুর্বিনশ্যেয়ুরসংশয়ম্

251.12

ন হর্তব্যং পরধনমিতি ধর্মঃ সনাতনঃ
মন্যন্তে বলবন্তস্তং দুর্বলৈঃ সংপ্রবর্তিতম্
যদা নিয়তিদৌর্বল্যমথৈষামেব রোচতে

251.13

ন হ্যত্যন্তং বলয়ুতা ভবন্তি সুখিনোঽপি বা
তস্মাদনার্জবে বুদ্ধির্ন কার্যা তে কথংচন

251.14

অসাধুভ্যোঽস্য ন ভয়ং ন চোরেভ্যো ন রাজতঃ
ন কিংচিত্কস্যচিত্কুর্বন্নির্ভয়ঃ শুচিরাবসেৎ

251.15

সর্বতঃ শঙ্কতে স্তেনো মৃগো গ্রামমিবেয়িবান্
বহুধাচরিতং পাপমন্যত্রৈবানুপশ্যতি

251.16

মুদিতঃ শুচিরভ্যেতি সর্বতো নির্ভয়ঃ সদা
ন হি দুশ্চরিতং কিংচিদাত্মনোঽন্যেষু পশ্যতি

251.17

দাতব্যমিত্যয়ং ধর্ম উক্তো ভূতহিতে রতৈঃ
তং মন্যন্তে ধনয়ুতাঃ কৃপণৈঃ সংপ্রবর্তিতম্

251.18

যদা নিয়তিকার্পণ্যমথৈষামেব রোচতে
ন হ্যত্যন্তং ধনবন্তো ভবন্তি সুখিনোঽপি বা

251.19

যদন্যৈর্বিহিতং নেচ্ছেদাত্মনঃ কর্ম পূরুষঃ
ন তত্পরেষু কুর্বীত জানন্নপ্রিয়মাত্মনঃ

251.20

যোঽন্যস্য স্যাদুপপতিঃ স কং কিং বক্তুমর্হতি
যদন্যস্তস্য তত্কুর্যান্ন মৃষ্যেদিতি মে মতিঃ

251.21

জীবিতুং যঃ স্বয়ং চেচ্ছেত্কথং সোঽন্যং প্রঘাতয়েৎ
যদ্যদাত্মন ইচ্ছেত তত্পরস্যাপি চিন্তয়েৎ

251.22

অতিরিক্তৈঃ সংবিভজেদ্ভোগৈরন্যানকিংচনান্
এতস্মাত্কারণাদ্ধাত্রা কুসীদং সংপ্রবর্তিতম্

251.23

যস্মিংস্তু দেবাঃ সময়ে সংতিষ্ঠেরংস্তথা ভবেৎ
অথ চেল্লাভসময়ে স্থিতির্ধর্মেঽপি শোভনা

251.24

সর্বং প্রিয়াভ্যুপগতং ধর্মমাহুর্মনীষিণঃ
পশ্যৈতং লক্ষণোদ্দেশং ধর্মাধর্মে যুধিষ্ঠির

251.25

লোকসংগ্রহসংয়ুক্তং বিধাত্রা বিহিতং পুরা
সূক্ষ্মধর্মার্থনিয়তং সতাং চরিতমুত্তমম্

251.26

ধর্মলক্ষণমাখ্যাতমেতত্তে কুরুসত্তম
তস্মাদনার্জবে বুদ্ধির্ন কার্যা তে কথংচন

Contains text from DharmicData, made available under the Open Database License (ODbL). Simple meanings are written by AI and can contain mistakes.