অধ্যায় 252

252.1

যুধিষ্ঠির উবাচ
সূক্ষ্মং সাধু সমাদিষ্টং ভবতা ধর্মলক্ষণম্
প্রতিভা ত্বস্তি মে কাচিত্তাং ব্রূয়ামনুমানতঃ

ভূয়াংসো হৃদয়ে যে মে প্রশ্নাস্তে ব্যাহৃতাস্ত্বয়া
ইমমন্যং প্রবক্ষ্যামি ন রাজন্বিগ্রহাদিব

ইমানি হি প্রাপয়ন্তি সৃজন্ত্যুত্তারয়ন্তি চ
ন ধর্মঃ পরিপাঠেন শক্যো ভারত বেদিতুম্

অন্যো ধর্মঃ সমস্থস্য বিষমস্থস্য চাপরঃ
আপদস্তু কথং শক্যাঃ পরিপাঠেন বেদিতুম্

সদাচারো মতো ধর্মঃ সন্তস্ত্বাচারলক্ষণাঃ
সাধ্যাসাধ্যং কথং শক্যং সদাচারো হ্যলক্ষণম্

দৃশ্যতে ধর্মরূপেণ অধর্মং প্রাকৃতশ্চরন্
ধর্মং চাধর্মরূপেণ কশ্চিদপ্রাকৃতশ্চরন্

পুনরস্য প্রমাণং হি নির্দিষ্টং শাস্ত্রকোবিদৈঃ
বেদবাদাশ্চানুয়ুগং হ্রসন্তীতি হ নঃ শ্রুতম্

অন্যে কৃতয়ুগে ধর্মাস্ত্রেতায়াং দ্বাপরেঽপরে
অন্যে কলিয়ুগে ধর্মা যথাশক্তিকৃতা ইব

আম্নায়বচনং সত্যমিত্যয়ং লোকসংগ্রহঃ
আম্নায়েভ্যঃ পরং বেদাঃ প্রসৃতা বিশ্বতোমুখাঃ

তে চেত্সর্বে প্রমাণং বৈ প্রমাণং তন্ন বিদ্যতে
প্রমাণে চাপ্রমাণে চ বিরুদ্ধে শাস্ত্রতা কুতঃ

ধর্মস্য হ্রিয়মাণস্য বলবদ্ভির্দুরাত্মভিঃ
যা যা বিক্রিয়তে সংস্থা ততঃ সাপি প্রণশ্যতি

বিদ্ম চৈবং ন বা বিদ্ম শক্যং বা বেদিতুং ন বা
অণীয়ান্ক্ষুরধারায়া গরীয়ান্পর্বতাদপি

গন্ধর্বনগরাকারঃ প্রথমং সংপ্রদৃশ্যতে
অন্বীক্ষ্যমাণঃ কবিভিঃ পুনর্গচ্ছত্যদর্শনম্

নিপানানীব গোভ্যাশে ক্ষেত্রে কুল্যেব ভারত
স্মৃতোঽপি শাশ্বতো ধর্মো বিপ্রহীণো ন দৃশ্যতে

কামাদন্যে ক্ষয়াদন্যে কারণৈরপরৈস্তথা
অসন্তো হি বৃথাচারং ভজন্তে বহবোঽপরে

ধর্মো ভবতি স ক্ষিপ্রং বিলীনস্ত্বেব সাধুষু
অন্যে তানাহুরুন্মত্তানপি চাবহসন্ত্যুত

মহাজনা হ্যুপাবৃত্তা রাজধর্মং সমাশ্রিতাঃ
ন হি সর্বহিতঃ কশ্চিদাচারঃ সংপ্রদৃশ্যতে

তেনৈবান্যঃ প্রভবতি সোঽপরং বাধতে পুনঃ
দৃশ্যতে চৈব স পুনস্তুল্যরূপো যদৃচ্ছয়া

যেনৈবান্যঃ প্রভবতি সোঽপরানপি বাধতে
আচারাণামনৈকাগ্র্যং সর্বেষামেব লক্ষয়েৎ

চিরাভিপন্নঃ কবিভিঃ পূর্বং ধর্ম উদাহৃতঃ
তেনাচারেণ পূর্বেণ সংস্থা ভবতি শাশ্বতী