Utshovঅধ্যায় 253
253.1
ভীষ্ম উবাচ
অত্রাপ্যুদাহরন্তীমমিতিহাসং পুরাতনম্
তুলাধারস্য বাক্যানি ধর্মে জাজলিনা সহ
253.2
বনে বনচরঃ কশ্চিজ্জাজলির্নাম বৈ দ্বিজঃ
সাগরোদ্দেশমাগম্য তপস্তেপে মহাতপাঃ
253.3
নিয়তো নিয়তাহারশ্চীরাজিনজটাধরঃ
মলপঙ্কধরো ধীমান্বহূন্বর্ষগণান্মুনিঃ
253.4
স কদাচিন্মহাতেজা জলবাসো মহীপতে
চচার লোকান্বিপ্রর্ষিঃ প্রেক্ষমাণো মনোজবঃ
253.5
স চিন্তয়ামাস মুনির্জলমধ্যে কদাচন
বিপ্রেক্ষ্য সাগরান্তাং বৈ মহীং সবনকাননাম্
253.6
ন ময়া সদৃশোঽস্তীহ লোকে স্থাবরজঙ্গমে
অপ্সু বৈহায়সং গচ্ছেন্ময়া যোঽন্যঃ সহেতি বৈ
253.7
স দৃশ্যমানো রক্ষোভির্জলমধ্যেঽবদত্ততঃ
অব্রুবংশ্চ পিশাচাস্তং নৈবং ত্বং বক্তুমর্হসি
253.8
তুলাধারো বণিগ্ধর্মা বারাণস্যাং মহায়শাঃ
সোঽপ্যেবং নার্হতে বক্তুং যথা ত্বং দ্বিজসত্তম
253.9
ইত্যুক্তো জাজলির্ভূতৈঃ প্রত্যুবাচ মহাতপাঃ
পশ্যেয়ং তমহং প্রাজ্ঞং তুলাধারং যশস্বিনম্
253.10
ইতি ব্রুবাণং তমৃষিং রক্ষাংস্যুদ্ধৃত্য সাগরাৎ
অব্রুবন্গচ্ছ পন্থানমাস্থায়েমং দ্বিজোত্তম
253.11
ইত্যুক্তো জাজলির্ভূতৈর্জগাম বিমনাস্তদা
বারাণস্যাং তুলাধারং সমাসাদ্যাব্রবীদ্বচঃ
253.12
যুধিষ্ঠির উবাচ
কিং কৃতং সুকৃতং কর্ম তাত জাজলিনা পুরা
যেন সিদ্ধিং পরাং প্রাপ্তস্তন্নো ব্যাখ্যাতুমর্হসি
253.13
ভীষ্ম উবাচ
অতীব তপসা যুক্তো ঘোরেণ স বভূব হ
নদ্যুপস্পর্শনরতঃ সায়ং প্রাতর্মহাতপাঃ
253.14
অগ্নীন্পরিচরন্সম্যক্স্বাধ্যায়পরমো দ্বিজঃ
বানপ্রস্থবিধানজ্ঞো জাজলির্জ্বলিতঃ শ্রিয়া
253.15
সত্যে তপসি তিষ্ঠন্স ন চ ধর্মমবৈক্ষত
বর্ষাস্বাকাশশায়ী স হেমন্তে জলসংশ্রয়ঃ
253.16
বাতাতপসহো গ্রীষ্মে ন চ ধর্মমবিন্দত
দুঃখশয্যাশ্চ বিবিধা ভূমৌ চ পরিবর্তনম্
253.17
ততঃ কদাচিত্স মুনির্বর্ষাস্বাকাশমাস্থিতঃ
অন্তরিক্ষাজ্জলং মূর্ধ্না প্রত্যগৃহ্ণান্মুহুর্মুহুঃ
253.18
অথ তস্য জটাঃ ক্লিন্না বভূবুর্গ্রথিতাঃ প্রভো
অরণ্যগমনান্নিত্যং মলিনো মলসংয়ুতাঃ
253.19
স কদাচিন্নিরাহারো বায়ুভক্ষো মহাতপাঃ
তস্থৌ কাষ্ঠবদব্যগ্রো ন চচাল চ কর্হিচিৎ
253.20
তস্য স্ম স্থাণুভূতস্য নির্বিচেষ্টস্য ভারত
কুলিঙ্গশকুনৌ রাজন্নীডং শিরসি চক্রতুঃ
253.21
স তৌ দয়াবান্বিপ্রর্ষিরুপপ্রৈক্ষত দম্পতী
কুর্বাণং নীডকং তত্র জটাসু তৃণতন্তুভিঃ
253.22
যদা স ন চলত্যেব স্থাণুভূতো মহাতপাঃ
ততস্তৌ পরিবিশ্বস্তৌ সুখং তত্রোষতুস্তদা
253.23
অতীতাস্বথ বর্ষাসু শরত্কাল উপস্থিতে
প্রাজাপত্যেন বিধিনা বিশ্বাসাত্কামমোহিতৌ
253.24
তত্রাপাতয়তাং রাজঞ্শিরস্যণ্ডানি খেচরৌ
তান্যবুধ্যত তেজস্বী স বিপ্রঃ সংশিতব্রতঃ
253.25
বুদ্ধ্বা চ স মহাতেজা ন চচালৈব জাজলিঃ
ধর্মে ধৃতমনা নিত্যং নাধর্মং স ত্বরোচয়ৎ
253.26
অহন্যহনি চাগম্য ততস্তৌ তস্য মূর্ধনি
আশ্বাসিতৌ বৈ বসতঃ সংপ্রহৃষ্টৌ তদা বিভো
253.27
অণ্ডেভ্যস্ত্বথ পুষ্টেভ্যঃ প্রজায়ন্ত শকুন্তকাঃ
ব্যবর্ধন্ত চ তত্রৈব ন চাকম্পত জাজলিঃ
253.28
স রক্ষমাণস্ত্বণ্ডানি কুলিঙ্গানাং যতব্রতঃ
তথৈব তস্থৌ ধর্মাত্মা নির্বিচেষ্টঃ সমাহিতঃ
253.29
ততস্তু কালসময়ে বভূবুস্তেঽথ পক্ষিণঃ
বুবুধে তাংশ্চ স মুনির্জাতপক্ষাঞ্শকুন্তকান্
253.30
ততঃ কদাচিত্তাংস্তত্র পশ্যন্পক্ষীন্যতব্রতঃ
বভূব পরমপ্রীতস্তদা মতিমতাং বরঃ
253.31
তথা তানভিসংবৃদ্ধান্দৃষ্ট্বা চাপ্নুবতাং মুদম্
শকুনৌ নির্ভয়ৌ তত্র ঊষতুশ্চাত্মজৈঃ সহ
253.32
জাতপক্ষাংশ্চ সোঽপশ্যদুড্ডীনান্পুনরাগতান্
সায়ং সায়ং দ্বিজান্বিপ্রো ন চাকম্পত জাজলিঃ
253.33
কদাচিত্পুনরভ্যেত্য পুনর্গচ্ছন্তি সংততম্
ত্যক্তা মাতৃপিতৃভ্যাং তে ন চাকম্পত জাজলিঃ
253.34
অথ তে দিবসং চারীং গত্বা সায়ং পুনর্নৃপ
উপাবর্তন্ত তত্রৈব নিবাসার্থং শকুন্তকাঃ
253.35
কদাচিদ্দিবসান্পঞ্চ সমুত্পত্য বিহংগমাঃ
ষষ্ঠেঽহনি সমাজগ্মুর্ন চাকম্পত জাজলিঃ
253.36
ক্রমেণ চ পুনঃ সর্বে দিবসানি বহূন্যপি
নোপাবর্তন্ত শকুনা জাতপ্রাণাঃ স্ম তে যদা
253.37
কদাচিন্মাসমাত্রেণ সমুত্পত্য বিহংগমাঃ
নৈবাগচ্ছংস্ততো রাজন্প্রাতিষ্ঠত স জাজলিঃ
253.38
ততস্তেষু প্রলীনেষু জাজলির্জাতবিস্ময়ঃ
সিদ্ধোঽস্মীতি মতিং চক্রে ততস্তং মান আবিশৎ
253.39
স তথা নির্গতান্দৃষ্ট্বা শকুন্তান্নিয়তব্রতঃ
সংভাবিতাত্মা সংভাব্য ভৃশং প্রীতস্তদাভবন্
253.40
স নদ্যাং সমুপস্পৃশ্য তর্পয়িত্বা হুতাশনম্
উদয়ন্তমথাদিত্যমভ্যগচ্ছন্মহাতপাঃ
253.41
সংভাব্য চটকান্মূর্ধ্নি জাজলির্জপতাং বরঃ
আস্ফোটয়ত্তদাকাশে ধর্মঃ প্রাপ্তো ময়েতি বৈ
253.42
অথান্তরিক্ষে বাগাসীত্তাং স শুশ্রাব জাজলিঃ
ধর্মেণ ন সমস্ত্বং বৈ তুলাধারস্য জাজলে
253.43
বারাণস্যাং মহাপ্রাজ্ঞস্তুলাধারঃ প্রতিষ্ঠিতঃ
সোঽপ্যেবং নার্হতে বক্তুং যথা ত্বং ভাষসে দ্বিজ
253.44
সোঽমর্ষবশমাপন্নস্তুলাধারদিদৃক্ষয়া
পৃথিবীমচরদ্রাজন্যত্রসায়ংগৃহো মুনিঃ
253.45
কালেন মহতাগচ্ছত্স তু বারাণসীং পুরীম্
বিক্রীণন্তং চ পণ্যানি তুলাধারং দদর্শ সঃ
253.46
সোঽপি দৃষ্ট্বৈব তং বিপ্রমায়ান্তং ভাণ্ডজীবনঃ
সমুত্থায় সুসংহৃষ্টঃ স্বাগতেনাভ্যপূজয়ৎ
253.47
তুলাধার উবাচ
আয়ানেবাসি বিদিতো মম ব্রহ্মন্ন সংশয়ঃ
ব্রবীমি যত্তু বচনং তচ্ছৃণুষ্ব দ্বিজোত্তম
253.48
সাগরানূপমাশ্রিত্য তপস্তপ্তং ত্বয়া মহৎ
ন চ ধর্মস্য সংজ্ঞাং ত্বং পুরা বেত্থ কথংচন
253.49
ততঃ সিদ্ধস্য তপসা তব বিপ্র শকুন্তকাঃ
ক্ষিপ্রং শিরস্যজায়ন্ত তে চ সংভাবিতাস্ত্বয়া
253.50
জাতপক্ষা যদা তে চ গতাশ্চারীমিতস্ততঃ
মন্যমানস্ততো ধর্মং চটকপ্রভবং দ্বিজ
খে বাচং ত্বমথাশ্রৌষীর্মাং প্রতি দ্বিজসত্তম
253.51
অমর্ষবশমাপন্নস্ততঃ প্রাপ্তো ভবানিহ
করবাণি প্রিয়ং কিং তে তদ্ব্রূহি দ্বিজসত্তম