Utshovঅধ্যায় 254
254.1
ভীষ্ম উবাচ
ইত্যুক্তঃ স তদা তেন তুলাধারেণ ধীমতা
প্রোবাচ বচনং ধীমাঞ্জাজলির্জপতাং বরঃ
254.2
বিক্রীণানঃ সর্বরসান্সর্বগন্ধাংশ্চ বাণিজ
বনস্পতীনোষধীশ্চ তেষাং মূলফলানি চ
254.3
অধ্যগা নৈষ্ঠিকীং বুদ্ধিং কুতস্ত্বামিদমাগতম্
এতদাচক্ষ্ব মে সর্বং নিখিলেন মহামতে
254.4
এবমুক্তস্তুলাধারো ব্রাহ্মণেন যশস্বিনা
উবাচ ধর্মসূক্ষ্মাণি বৈশ্যো ধর্মার্থতত্ত্ববিৎ
জাজলিং কষ্টতপসং জ্ঞানতৃপ্তস্তদা নৃপ
254.5
বেদাহং জাজলে ধর্মং সরহস্যং সনাতনম্
সর্বভূতহিতং মৈত্রং পুরাণং যং জনা বিদুঃ
254.6
অদ্রোহেণৈব ভূতানামল্পদ্রোহেণ বা পুনঃ
যা বৃত্তিঃ স পরো ধর্মস্তেন জীবামি জাজলে
254.7
পরিচ্ছিন্নৈঃ কাষ্ঠতৃণৈর্ময়েদং শরণং কৃতম্
অলক্তং পদ্মকং তুঙ্গং গন্ধাংশ্চোচ্চাবচাংস্তথা
254.8
রসাংশ্চ তাংস্তান্বিপ্রর্ষে মদ্যবর্জানহং বহূন্
ক্রীত্বা বৈ প্রতিবিক্রীণে পরহস্তাদমায়য়া
254.9
সর্বেষাং যঃ সুহৃন্নিত্যং সর্বেষাং চ হিতে রতঃ
কর্মণা মনসা বাচা স ধর্মং বেদ জাজলে
254.10
নাহং পরেষাং কর্মাণি প্রশংসামি শপামি বা
আকাশস্যেব বিপ্রর্ষে পশ্যঁল্লোকস্য চিত্রতাম্
254.11
নানুরুধ্যে বিরুধ্যে বা ন দ্বেষ্মি ন চ কাময়ে
সমোঽস্মি সর্বভূতেষু পশ্য মে জাজলে ব্রতম্
254.12
ইষ্টানিষ্টবিমুক্তস্য প্রীতিরাগবহিষ্কৃতঃ
তুলা মে সর্বভূতেষু সমা তিষ্ঠতি জাজলে
254.13
ইতি মাং ত্বং বিজানীহি সর্বলোকস্য জাজলে
সমং মতিমতাং শ্রেষ্ঠ সমলোষ্টাশ্মকাঞ্চনম্
254.14
যথান্ধবধিরোন্মত্তা উচ্ছ্বাসপরমাঃ সদা
দেবৈরপিহিতদ্বারাঃ সোপমা পশ্যতো মম
254.15
যথা বৃদ্ধাতুরকৃশা নিঃস্পৃহা বিষয়ান্প্রতি
তথার্থকামভোগেষু মমাপি বিগতা স্পৃহা
254.16
যদা চায়ং ন বিভেতি যদা চাস্মান্ন বিভ্যতি
যদা নেচ্ছতি ন দ্বেষ্টি তদা সিধ্যতি বৈ দ্বিজঃ
254.17
যদা ন কুরুতে ভাবং সর্বভূতেষু পাপকম্
কর্মণা মনসা বাচা ব্রহ্ম সংপদ্যতে তদা
254.18
ন ভূতো ন ভবিষ্যশ্চ ন চ ধর্মোঽস্তি কশ্চন
যোঽভয়ঃ সর্বভূতানাং স প্রাপ্নোত্যভয়ং পদম্
254.19
যস্মাদুদ্বিজতে লোকঃ সর্বো মৃত্যুমুখাদিব
বাক্ক্রূরাদ্দণ্ডপারুষ্যাত্স প্রাপ্নোতি মহদ্ভয়ম্
254.20
যথাবদ্বর্তমানানাং বৃদ্ধানাং পুত্রপৌত্রিণাম্
অনুবর্তামহে বৃত্তমহিংস্রাণাং মহাত্মনাম্
254.21
প্রনষ্টঃ শাশ্বতো ধর্মঃ সদাচারেণ মোহিতঃ
তেন বৈদ্যস্তপস্বী বা বলবান্বা বিমোহ্যতে
254.22
আচারাজ্জাজলে প্রাজ্ঞঃ ক্ষিপ্রং ধর্মমবাপ্নুয়াৎ
এবং যঃ সাধুভির্দান্তশ্চরেদদ্রোহচেতসা
254.23
নদ্যাং যথা চেহ কাষ্ঠমুহ্যমানং যদৃচ্ছয়া
যদৃচ্ছয়ৈব কাষ্ঠেন সংধিং গচ্ছেত কেনচিৎ
254.24
তত্রাপরাণি দারূণি সংসৃজ্যন্তে ততস্ততঃ
তৃণকাষ্ঠকরীষাণি কদা চিন্নসমীক্ষয়া
এবমেবায়মাচারঃ প্রাদুর্ভূতো যতস্ততঃ
254.25
যস্মান্নোদ্বিজতে ভূতং জাতু কিংচিত্কথংচন
অভয়ং সর্বভূতেভ্যঃ স প্রাপ্নোতি সদা মুনে
254.26
যস্মাদুদ্বিজতে বিদ্বন্সর্বলোকো বৃকাদিব
ক্রোশতস্তীরমাসাদ্য যথা সর্বে জলেচরাঃ
254.27
সহায়বান্দ্রব্যবান্যঃ সুভগোঽন্যোঽপরস্তথা
ততস্তানেব কবয়ঃ শাস্ত্রেষু প্রবদন্ত্যুত
কীর্ত্যর্থমল্পহৃল্লেখাঃ পটবঃ কৃত্স্ননির্ণয়াঃ
254.28
তপোভির্যজ্ঞদানৈশ্চ বাক্যৈঃ প্রজ্ঞাশ্রিতৈস্তথা
প্রাপ্নোত্যভয়দানস্য যদ্যত্ফলমিহাশ্নুতে
254.29
লোকে যঃ সর্বভূতেভ্যো দদাত্যভয়দক্ষিণাম্
স সর্বয়জ্ঞৈরীজানঃ প্রাপ্নোত্যভয়দক্ষিণাম্
ন ভূতানামহিংসায়া জ্যায়ান্ধর্মোঽস্তি কশ্চন
254.30
যস্মান্নোদ্বিজতে ভূতং জাতু কিংচিত্কথংচন
সোঽভয়ং সর্বভূতেভ্যঃ সংপ্রাপ্নোতি মহামুনে
254.31
যস্মাদুদ্বিজতে লোকঃ সর্পাদ্বেশ্মগতাদিব
ন স ধর্মমবাপ্নোতি ইহ লোকে পরত্র চ
254.32
সর্বভূতাত্মভূতস্য সম্যগ্ভূতানি পশ্যতঃ
দেবাপি মার্গে মুহ্যন্তি অপদস্য পদৈষিণঃ
254.33
দানং ভূতাভয়স্যাহুঃ সর্বদানেভ্য উত্তমম্
ব্রবীমি তে সত্যমিদং শ্রদ্দধস্ব চ জাজলে
254.34
স এব সুভগো ভূত্বা পুনর্ভবতি দুর্ভগঃ
ব্যাপত্তিং কর্মণাং দৃষ্ট্বা জুগুপ্সন্তি জনাঃ সদা
254.35
অকারণো হি নেহাস্তি ধর্মঃ সূক্ষ্মোঽপি জাজলে
ভূতভব্যার্থমেবেহ ধর্মপ্রবচনং কৃতম্
254.36
সূক্ষ্মত্বান্ন স বিজ্ঞাতুং শক্যতে বহুনিহ্নবঃ
উপলভ্যান্তরা চান্যানাচারানববুধ্যতে
254.37
যে চ ছিন্দন্তি বৃষণান্যে চ ভিন্দন্তি নস্তকান্
বহন্তি মহতো ভারান্বধ্নন্তি দময়ন্তি চ
254.38
হত্বা সত্ত্বানি খাদন্তি তান্কথং ন বিগর্হসে
মানুষা মানুষানেব দাসভোগেন ভুঞ্জতে
254.39
বধবন্ধবিরোধেন কারয়ন্তি দিবানিশম্
আত্মনা চাপি জানাসি যদ্দুঃখং বধতাডনে
254.40
পঞ্চেন্দ্রিয়েষু ভূতেষু সর্বং বসতি দৈবতম্
আদিত্যশ্চন্দ্রমা বায়ুর্ব্রহ্মা প্রাণঃ ক্রতুর্যমঃ
254.41
তানি জীবানি বিক্রীয় কা মৃতেষু বিচারণা
কা তৈলে কা ঘৃতে ব্রহ্মন্মধুন্যপ্স্বৌষধেষু বা
254.42
অদংশমশকে দেশে সুখং সংবর্ধিতান্পশূন্
তাংশ্চ মাতুঃ প্রিয়াঞ্জানন্নাক্রম্য বহুধা নরাঃ
বহুদংশকুশান্দেশান্নয়ন্তি বহুকর্দমান্
254.43
বাহসংপীডিতা ধুর্যাঃ সীদন্ত্যবিধিনাপরে
ন মন্যে ভ্রূণহত্যাপি বিশিষ্টা তেন কর্মণা
254.44
কৃষিং সাধ্বিতি মন্যন্তে সা চ বৃত্তিঃ সুদারুণা
ভূমিং ভূমিশয়াংশ্চৈব হন্তি কাষ্ঠময়োমুখম্
তথৈবানডুহো যুক্তান্সমবেক্ষস্ব জাজলে
254.45
অঘ্ন্যা ইতি গবাং নাম ক এনান্হন্তুমর্হতি
মহচ্চকারাকুশলং পৃষধ্রো গালভন্নিব
254.46
ঋষয়ো যতয়ো হ্যেতন্নহুষে প্রত্যবেদয়ন্
গাং মাতরং চাপ্যবধীর্বৃষভং চ প্রজাপতিম্
অকার্যং নহুষাকার্ষীর্লপ্স্যামস্ত্বত্কৃতে ভয়ম্
254.47
শতং চৈকং চ রোগাণাং সর্বভূতেষ্বপাতয়ন্
ঋষয়স্তে মহাভাগাঃ প্রজাস্বেব হি জাজলে
ভ্রূণহং নহুষং ত্বাহুর্ন তে হোষ্যামহে হবিঃ
254.48
ইত্যুক্ত্বা তে মহাত্মানঃ সর্বে তত্ত্বার্থদর্শিনঃ
ঋষয়ো যতয়ঃ শান্তাস্তরসা প্রত্যবেদয়ন্
254.49
ঈদৃশানশিবান্ঘোরানাচারানিহ জাজলে
কেবলাচরিতত্বাত্তু নিপুণান্নাববুধ্যসে
254.50
কারণাদ্ধর্মমন্বিচ্ছেন্ন লোকচরিতং চরেৎ
যো হন্যাদ্যশ্চ মাং স্তৌতি তত্রাপি শৃণু জাজলে
254.51
সমৌ তাবপি মে স্যাতাং ন হি মে স্তঃ প্রিয়াপ্রিয়ে
এতদীদৃশকং ধর্মং প্রশংসন্তি মনীষিণঃ
254.52
উপপত্ত্যা হি সংপন্নো যতিভিশ্চৈব সেব্যতে
সততং ধর্মশীলৈশ্চ নৈপুণ্যেনোপলক্ষিতঃ