Utshovঅধ্যায় 255
255.1
জাজলিরুবাচ
যথা প্রবর্তিতো ধর্মস্তুলাং ধারয়তা ত্বয়া
স্বর্গদ্বারং চ বৃত্তিং চ ভূতানামবরোত্স্যতে
255.2
কৃষ্যা হ্যন্নং প্রভবতি ততস্ত্বমপি জীবসি
পশুভিশ্চৌষধীভিশ্চ মর্ত্যা জীবন্তি বাণিজ
255.3
যতো যজ্ঞঃ প্রভবতি নাস্তিক্যমপি জল্পসি
ন হি বর্তেদয়ং লোকো বার্তামুত্সৃজ্য কেবলম্
255.4
তুলাধার উবাচ
বক্ষ্যামি জাজলে বৃত্তিং নাস্মি ব্রাহ্মণ নাস্তিকঃ
ন চ যজ্ঞং বিনিন্দামি যজ্ঞবিত্তু সুদুর্লভঃ
255.5
নমো ব্রাহ্মণয়জ্ঞায় যে চ যজ্ঞবিদো জনাঃ
স্বয়জ্ঞং ব্রাহ্মণা হিত্বা ক্ষাত্রং যজ্ঞমিহাস্থিতাঃ
255.6
লুব্ধৈর্বিত্তপরৈর্ব্রহ্মন্নাস্তিকৈঃ সংপ্রবর্তিতম্
বেদবাদানবিজ্ঞায় সত্যাভাসমিবানৃতম্
255.7
ইদং দেয়মিদং দেয়মিতি নান্তং চিকীর্ষতি
অতঃ স্তৈন্যং প্রভবতি বিকর্মাণি চ জাজলে
তদেব সুকৃতং হব্যং যেন তুষ্যন্তি দেবতাঃ
255.8
নমস্কারেণ হবিষা স্বাধ্যায়ৈরৌষধৈস্তথা
পূজা স্যাদ্দেবতানাং হি যথা শাস্ত্রনিদর্শনম্
255.9
ইষ্টাপূর্তাদসাধূনাং বিষমা জায়তে প্রজা
লুব্ধেভ্যো জায়তে লুব্ধঃ সমেভ্যো জায়তে সমঃ
255.10
যজমানো যথাত্মানমৃত্বিজশ্চ তথা প্রজাঃ
যজ্ঞাত্প্রজা প্রভবতি নভসোঽম্ভ ইবামলম্
255.11
অগ্নৌ প্রাস্তাহুতির্ব্রহ্মন্নাদিত্যমুপতিষ্ঠতি
আদিত্যাজ্জায়তে বৃষ্টির্বৃষ্টেরন্নং ততঃ প্রজাঃ
255.12
তস্মাত্স্বনুষ্ঠিতাত্পূর্বে সর্বান্কামাংশ্চ লেভিরে
অকৃষ্টপচ্যা পৃথিবী আশীর্ভির্বীরুধোঽভবন্
ন তে যজ্ঞেষ্বাত্মসু বা ফলং পশ্যন্তি কিংচন
255.13
শঙ্কমানাঃ ফলং যজ্ঞে যে যজেরন্কথংচন
জায়ন্তেঽসাধবো ধূর্তা লুব্ধা বিত্তপ্রয়োজনাঃ
255.14
স স্ম পাপকৃতাং লোকান্গচ্ছেদশুভকর্মণা
প্রমাণমপ্রমাণেন যঃ কুর্যাদশুভং নরঃ
পাপাত্মা সোঽকৃতপ্রজ্ঞঃ সদৈবেহ দ্বিজোত্তম
255.15
কর্তব্যমিতি কর্তব্যং বেত্তি যো ব্রাহ্মণোভয়ম্
ব্রহ্মৈব বর্ততে লোকে নৈতি কর্তব্যতাং পুনঃ
255.16
বিগুণং চ পুনঃ কর্ম জ্যায় ইত্যনুশুশ্রুম
সর্বভূতোপঘাতশ্চ ফলভাবে চ সংয়মঃ
255.17
সত্যয়জ্ঞা দময়জ্ঞা অলুব্ধাশ্চাত্মতৃপ্তয়ঃ
উত্পন্নত্যাগিনঃ সর্বে জনা আসন্নমত্সরাঃ
255.18
ক্ষেত্রক্ষেত্রজ্ঞতত্ত্বজ্ঞাঃ স্বয়জ্ঞপরিনিষ্ঠিতাঃ
ব্রাহ্মং বেদমধীয়ন্তস্তোষয়ন্ত্যমরানপি
255.19
অখিলং দৈবতং সর্বং ব্রহ্ম ব্রাহ্মণসংশ্রিতম্
তৃপ্যন্তি তৃপ্যতো দেবাস্তৃপ্তাস্তৃপ্তস্য জাজলে
255.20
যথা সর্বরসৈস্তৃপ্তো নাভিনন্দতি কিংচন
তথা প্রজ্ঞানতৃপ্তস্য নিত্যং তৃপ্তিঃ সুখোদয়া
255.21
ধর্মারামা ধর্মসুখাঃ কৃত্স্নব্যবসিতাস্তথা
অস্তি নস্তত্ত্বতো ভূয় ইতি প্রজ্ঞাগবেষিণঃ
255.22
জ্ঞানবিজ্ঞানিনঃ কেচিত্পরং পারং তিতীর্ষবঃ
অতীব তত্সদা পুণ্যং পুণ্যাভিজনসংহিতম্
255.23
যত্র গত্বা ন শোচন্তি ন চ্যবন্তি ব্যথন্তি চ
তে তু তদ্ব্রহ্মণঃ স্থানং প্রাপ্নুবন্তীহ সাত্ত্বিকাঃ
255.24
নৈব তে স্বর্গমিচ্ছন্তি ন যজন্তি যশোধনৈঃ
সতাং বর্ত্মানুবর্তন্তে যথাবলমহিংসয়া
255.25
বনস্পতীনোষধীশ্চ ফলমূলং চ তে বিদুঃ
ন চৈতানৃত্বিজো লুব্ধা যাজয়ন্তি ধনার্থিনঃ
255.26
স্বমেব চার্থং কুর্বাণা যজ্ঞং চক্রুঃ পুনর্দ্বিজাঃ
পরিনিষ্ঠিতকর্মাণঃ প্রজানুগ্রহকাম্যয়া
255.27
প্রাপয়েয়ুঃ প্রজাঃ স্বর্গং স্বধর্মচরণেন বৈ
ইতি মে বর্ততে বুদ্ধিঃ সমা সর্বত্র জাজলে
255.28
প্রয়ুঞ্জতে যানি যজ্ঞে সদা প্রাজ্ঞা দ্বিজর্ষভ
তেন তে দেবয়ানেন পথা যান্তি মহামুনে
255.29
আবৃত্তিস্তত্র চৈকস্য নাস্ত্যাবৃত্তির্মনীষিণাম্
উভৌ তৌ দেবয়ানেন গচ্ছতো জাজলে পথা
255.30
স্বয়ং চৈষামনডুহো যুজ্যন্তি চ বহন্তি চ
স্বয়মুস্রাশ্চ দুহ্যন্তে মনঃসংকল্পসিদ্ধিভিঃ
255.31
স্বয়ং যূপানুপাদায় যজন্তে স্বাপ্তদক্ষিণৈঃ
যস্তথাভাবিতাত্মা স্যাত্স গামালব্ধুমর্হতি
255.32
ওষধীভিস্তথা ব্রহ্মন্যজেরংস্তে নতাদৃশাঃ
বুদ্ধিত্যাগং পুরস্কৃত্য তাদৃশং প্রব্রবীমি তে
255.33
নিরাশিষমনারম্ভং নির্নমস্কারমস্তুতিম্
অক্ষীণং ক্ষীণকর্মাণং তং দেবা ব্রাহ্মণং বিদুঃ
255.34
নাশ্রাবয়ন্ন চ যজন্ন দদদ্ব্রাহ্মণেষু চ
গ্রাম্যাং বৃত্তিং লিপ্সমানঃ কাং গতিং যাতি জাজলে
ইদং তু দৈবতং কৃত্বা যথা যজ্ঞমবাপ্নুয়াৎ
255.35
জাজলিরুবাচ
ন বৈ মুনীনাং শৃণুমঃ স্ম তত্ত্বং; পৃচ্ছামি ত্বা বাণিজ কষ্টমেতৎ
পূর্বে পূর্বে চাস্য নাবেক্ষমাণা; নাতঃ পরং তমৃষয়ঃ স্থাপয়ন্তি
255.36
অস্মিন্নেবাত্মতীর্থে ন পশবঃ প্রাপ্নুয়ুঃ সুখম্
অথ স্বকর্মণা কেন বাণিজ প্রাপ্নুয়াত্সুখম্
শংস মে তন্মহাপ্রাজ্ঞ ভৃশং বৈ শ্রদ্দধামি তে
255.37
তুলাধার উবাচ
উত যজ্ঞা উতায়জ্ঞা মখং নার্হন্তি তে ক্বচিৎ
আজ্যেন পয়সা দধ্না পূর্ণাহুত্যা বিশেষতঃ
বালৈঃ শৃঙ্গেণ পাদেন সংভবত্যেব গৌর্মখম্
255.38
পত্নীং চানেন বিধিনা প্রকরোতি নিয়োজয়ন্
পুরোডাশো হি সর্বেষাং পশূনাং মেধ্য উচ্যতে
255.39
সর্বা নদ্যঃ সরস্বত্যঃ সর্বে পুণ্যাঃ শিলোচ্চয়াঃ
জাজলে তীর্থমাত্মৈব মা স্ম দেশাতিথির্ভব
255.40
এতানীদৃশকান্ধর্মানাচরন্নিহ জাজলে
কারণৈর্ধর্মমন্বিচ্ছন্ন লোকানাপ্নুতে শুভান্
255.41
ভীষ্ম উবাচ
এতানীদৃশকান্ধর্মাংস্তুলাধারঃ প্রশংসতি
উপপত্ত্যা হি সংপন্নান্নিত্যং সদ্ভির্নিষেবিতান্