অধ্যায় 256

256.1

তুলাধার উবাচ
সদ্ভির্বা যদি বাসদ্ভিরয়ং পন্থাঃ সমাশ্রিতঃ
প্রত্যক্ষং ক্রিয়তাং সাধু ততো জ্ঞাস্যসি তদ্যথা

এতে শকুন্তা বহবঃ সমন্তাদ্বিচরন্তি হি
তবোত্তমাঙ্গে সংভূতাঃ শ্যেনাশ্চান্যাশ্চ জাতয়ঃ

আহ্বয়ৈনান্মহাব্রহ্মন্বিশমানাংস্ততস্ততঃ
পশ্যেমান্হস্তপাদেষু শ্লিষ্টান্দেহে চ সর্বশঃ

সংভাবয়ন্তি পিতরং ত্বয়া সংভাবিতাঃ খগাঃ
অসংশয়ং পিতা চ ত্বং পুত্রানাহ্বয় জাজলে

ভীষ্ম উবাচ
ততো জাজলিনা তেন সমাহূতাঃ পতত্রিণঃ
বাচমুচ্চারয়ন্দিব্যাং ধর্মস্য বচনাত্কিল

অহিংসাদিকৃতং কর্ম ইহ চৈব পরত্র চ
স্পর্ধা নিহন্তি বৈ ব্রহ্মন্সাহতা হন্তি তং নরম্

শ্রদ্ধাবৃদ্ধং বাঙ্মনসী ন যজ্ঞস্ত্রাতুমর্হতি
অত্র গাথা ব্রহ্মগীতাঃ কীর্তয়ন্তি পুরাবিদঃ

শুচেরশ্রদ্দধানস্য শ্রদ্দধানস্য চাশুচেঃ
দেবাশ্চিত্তমমন্যন্ত সদৃশং যজ্ঞকর্মণি

শ্রোত্রিয়স্য কদর্যস্য বদান্যস্য চ বার্ধুষেঃ
মীমাংসিত্বোভয়ং দেবাঃ সমমন্নমকল্পয়ন্

প্রজাপতিস্তানুবাচ বিষমং কৃতমিত্যুত
শ্রদ্ধাপূতং বদান্যস্য হতমশ্রদ্ধয়েতরৎ
ভোজ্যমন্নং বদান্যস্য কদর্যস্য ন বার্ধুষেঃ

অশ্রদ্দধান এবৈকো দেবানাং নার্হতে হবিঃ
তস্যৈবান্নং ন ভোক্তব্যমিতি ধর্মবিদো বিদুঃ

অশ্রদ্ধা পরমং পাপং শ্রদ্ধা পাপপ্রমোচনী
জহাতি পাপং শ্রদ্ধাবান্সর্পো জীর্ণামিব ত্বচম্

জ্যায়সী যা পবিত্রাণাং নিবৃত্তিঃ শ্রদ্ধয়া সহ
নিবৃত্তশীলদোষো যঃ শ্রদ্ধাবান্পূত এব সঃ

কিং তস্য তপসা কার্যং কিং বৃত্তেন কিমাত্মনা
শ্রদ্ধাময়োঽয়ং পুরুষো যো যচ্ছ্রদ্ধঃ স এব সঃ

ইতি ধর্মঃ সমাখ্যাতঃ সদ্ভির্ধর্মার্থদর্শিভিঃ
বয়ং জিজ্ঞাসমানাস্ত্বা সংপ্রাপ্তা ধর্মদর্শনাৎ

স্পর্ধাং জহি মহাপ্রাজ্ঞ ততঃ প্রাপ্স্যসি যত্পরম্
শ্রদ্ধাবাঞ্শ্রদ্দধানশ্চ ধর্মাংশ্চৈবেহ বাণিজঃ
স্ববর্ত্মনি স্থিতশ্চৈব গরীয়ানেষ জাজলে

এবং বহুমতার্থং চ তুলাধারেণ ভাষিতম্
সম্যক্চৈবমুপালব্ধো ধর্মশ্চোক্তঃ সনাতনঃ

তস্য বিখ্যাতবীর্যস্য শ্রুত্বা বাক্যানি স দ্বিজঃ
তুলাধারস্য কৌন্তেয় শান্তিমেবান্বপদ্যত

ততোঽচিরেণ কালেন তুলাধারঃ স এব চ
দিবং গত্বা মহাপ্রাজ্ঞৌ বিহরেতাং যথাসুখম্
স্বং স্বং স্থানমুপাগম্য স্বকর্মফলনির্জিতম্

সমানাং শ্রদ্দধানানাং সংয়তানাং সুচেতসাম্
কুর্বতাং যজ্ঞ ইত্যেব ন যজ্ঞো জাতু নেষ্যতে

শ্রদ্ধা বৈ সাত্ত্বিকী দেবী সূর্যস্য দুহিতা নৃপ
সাবিত্রী প্রসবিত্রী চ জীববিশ্বাসিনী তথা

বাগ্বৃদ্ধং ত্রায়তে শ্রদ্ধা মনোবৃদ্ধং চ ভারত
যথৌপম্যোপদেশেন কিং ভূয়ঃ শ্রোতুমিচ্ছসি