অধ্যায় 257

257.1

ভীষ্ম উবাচ
অত্রাপ্যুদাহরন্তীমমিতিহাসং পুরাতনম্
প্রজানামনুকম্পার্থং গীতং রাজ্ঞা বিচখ্নুনা

ছিন্নস্থূণং বৃষং দৃষ্ট্বা বিরাবং চ গবাং ভৃশম্
গোগ্রহে যজ্ঞবাটস্য প্রেক্ষমাণঃ স পার্থিবঃ

স্বস্তি গোভ্যোঽস্তু লোকেষু ততো নির্বচনং কৃতম্
হিংসায়াং হি প্রবৃত্তায়ামাশীরেষানুকল্পিতা

অব্যবস্থিতমর্যাদৈর্বিমূঢৈর্নাস্তিকৈর্নরৈঃ
সংশয়াত্মভিরব্যক্তৈর্হিংসা সমনুকীর্তিতা

সর্বকর্মস্বহিংসা হি ধর্মাত্মা মনুরব্রবীৎ
কামরাগাদ্বিহিংসন্তি বহির্বেদ্যাং পশূন্নরাঃ

তস্মাত্প্রমাণতঃ কার্যো ধর্মঃ সূক্ষ্মো বিজানতা
অহিংসৈব হি সর্বেভ্যো ধর্মেভ্যো জ্যায়সী মতা

উপোষ্য সংশিতো ভূত্বা হিত্বা বেদকৃতাঃ শ্রুতীঃ
আচার ইত্যনাচারাঃ কৃপণাঃ ফলহেতবঃ

যদি যজ্ঞাংশ্চ বৃক্ষাংশ্চ যূপাংশ্চোদ্দিশ্য মানবাঃ
বৃথা মাংসানি খাদন্তি নৈষ ধর্মঃ প্রশস্যতে

মাংসং মধু সুরা মত্স্যা আসবং কৃসরৌদনম্
ধূর্তৈঃ প্রবর্তিতং হ্যেতন্নৈতদ্বেদেষু কল্পিতম্

কামান্মোহাচ্চ লোভাচ্চ লৌল্যমেতত্প্রবর্তিতম্
বিষ্ণুমেবাভিজানন্তি সর্বয়জ্ঞেষু ব্রাহ্মণাঃ
পায়সৈঃ সুমনোভিশ্চ তস্যাপি যজনং স্মৃতম্

যজ্ঞিয়াশ্চৈব যে বৃক্ষা বেদেষু পরিকল্পিতাঃ
যচ্চাপি কিংচিত্কর্তব্যমন্যচ্চোক্ষৈঃ সুসংস্কৃতম্
মহাসত্ত্বৈঃ শুদ্ধভাবৈঃ সর্বং দেবার্হমেব তৎ

যুধিষ্ঠির উবাচ
শরীরমাপদশ্চাপি বিবদন্ত্যবিহিংসতঃ
কথং যাত্রা শরীরস্য নিরারম্ভস্য সেত্স্যতি

ভীষ্ম উবাচ
যথা শরীরং ন গ্লায়েন্নেয়ান্মৃত্যুবশং যথা
তথা কর্মসু বর্তেত সমর্থো ধর্মমাচরেৎ