Utshovঅধ্যায় 258
258.1
যুধিষ্ঠির উবাচ
কথং কার্যং পরীক্ষেত শীঘ্রং বাথ চিরেণ বা
সর্বথা কার্যদুর্গেঽস্মিন্ভবান্নঃ পরমো গুরুঃ
258.2
ভীষ্ম উবাচ
অত্রাপ্যুদাহরন্তীমমিতিহাসং পুরাতনম্
চিরকারেস্তু যত্পূর্বং বৃত্তমাঙ্গিরসে কুলে
258.3
চিরকারিক ভদ্রং তে ভদ্রং তে চিরকারিক
চিরকারী হি মেধাবী নাপরাধ্যতি কর্মসু
258.4
চিরকারী মহাপ্রাজ্ঞো গৌতমস্যাভবত্সুতঃ
চিরং হি সর্বকার্যাণি সমেক্ষাবান্প্রপদ্যতে
258.5
চিরং সংচিন্তয়ন্নর্থাংশ্চিরং জাগ্রচ্চিরং স্বপন্
চিরকার্যাভিসংপত্তেশ্চিরকারী তথোচ্যতে
258.6
অলসগ্রহণং প্রাপ্তো দুর্মেধাবী তথোচ্যতে
বুদ্ধিলাঘবয়ুক্তেন জনেনাদীর্ঘদর্শিনা
258.7
ব্যভিচারে তু কস্মিংশ্চিদ্ব্যতিক্রম্যাপরান্সুতান্
পিত্রোক্তঃ কুপিতেনাথ জহীমাং জননীমিতি
258.8
স তথেতি চিরেণোক্ত্বা স্বভাবাচ্চিরকারিকঃ
বিমৃশ্য চিরকারিত্বাচ্চিন্তয়ামাস বৈ চিরম্
258.9
পিতুরাজ্ঞাং কথং কুর্যাং ন হন্যাং মাতরং কথম্
কথং ধর্মচ্ছলে নাস্মিন্নিমজ্জেয়মসাধুবৎ
258.10
পিতুরাজ্ঞা পরো ধর্মঃ স্বধর্মো মাতৃরক্ষণম্
অস্বতন্ত্রং চ পুত্রত্বং কিং নু মাং নাত্র পীডয়েৎ
258.11
স্ত্রিয়ং হত্বা মাতরং চ কো হি জাতু সুখী ভবেৎ
পিতরং চাপ্যবজ্ঞায় কঃ প্রতিষ্ঠামবাপ্নুয়াৎ
258.12
অনবজ্ঞা পিতুর্যুক্তা ধারণং মাতৃরক্ষণম্
যুক্তক্ষমাবুভাবেতৌ নাতিবর্তেতমাং কথম্
258.13
পিতা হ্যাত্মানমাধত্তে জায়ায়াং জজ্ঞিয়ামিতি
শীলচারিত্রগোত্রস্য ধারণার্থং কুলস্য চ
258.14
সোঽহমাত্মা স্বয়ং পিত্রা পুত্রত্বে প্রকৃতঃ পুনঃ
বিজ্ঞানং মে কথং ন স্যাদ্বুবুধে চাত্মসংভবম্
258.15
জাতকর্মণি যত্প্রাহ পিতা যচ্চোপকর্মণি
পর্যাপ্তঃ স দৃঢীকারঃ পিতুর্গৌরবনিশ্চয়ে
258.16
গুরুরগ্র্যঃ পরো ধর্মঃ পোষণাধ্যয়নাদ্ধিতঃ
পিতা যদাহ ধর্মঃ স বেদেষ্বপি সুনিশ্চিতঃ
258.17
প্রীতিমাত্রং পিতুঃ পুত্রঃ সর্বং পুত্রস্য বৈ পিতা
শরীরাদীনি দেয়ানি পিতা ত্বেকঃ প্রয়চ্ছতি
258.18
তস্মাত্পিতুর্বচঃ কার্যং ন বিচার্যং কথংচন
পাতকান্যপি পূয়ন্তে পিতুর্বচনকারিণঃ
258.19
ভোগে ভাগ্যে প্রসবনে সর্বলোকনিদর্শনে
ভর্ত্রা চৈব সমায়োগে সীমন্তোন্নয়নে তথা
258.20
পিতা স্বর্গঃ পিতা ধর্মঃ পিতা পরমকং তপঃ
পিতরি প্রীতিমাপন্নে সর্বাঃ প্রীয়ন্তি দেবতাঃ
258.21
আশিষস্তা ভজন্ত্যেনং পুরুষং প্রাহ যাঃ পিতা
নিষ্কৃতিঃ সর্বপাপানাং পিতা যদভিনন্দতি
258.22
মুচ্যতে বন্ধনাত্পুষ্পং ফলং বৃন্তাত্প্রমুচ্যতে
ক্লিশ্যন্নপি সুতস্নেহৈঃ পিতা স্নেহং ন মুঞ্চতি
258.23
এতদ্বিচিন্তিতং তাবত্পুত্রস্য পিতৃগৌরবম্
পিতা হ্যল্পতরং স্থানং চিন্তয়িষ্যামি মাতরম্
258.24
যো হ্যয়ং ময়ি সংঘাতো মর্ত্যত্বে পাঞ্চভৌতিকঃ
অস্য মে জননী হেতুঃ পাবকস্য যথারণিঃ
মাতা দেহারণিঃ পুংসাং সর্বস্যার্তস্য নির্বৃতিঃ
258.25
ন চ শোচতি নাপ্যেনং স্থাবির্যমপকর্ষতি
শ্রিয়া হীনোঽপি যো গেহে অম্বেতি প্রতিপদ্যতে
258.26
পুত্রপৌত্রসমাকীর্ণো জননীং যঃ সমাশ্রিতঃ
অপি বর্ষশতস্যান্তে স দ্বিহায়নবচ্চরেৎ
258.27
সমর্থং বাসমর্থং বা কৃশং বাপ্যকৃশং তথা
রক্ষত্যেব সুতং মাতা নান্যঃ পোষ্টা বিধানতঃ
258.28
তদা স বৃদ্ধো ভবতি যদা ভবতি দুঃখিতঃ
তদা শূন্যং জগত্তস্য যদা মাত্রা বিয়ুজ্যতে
258.29
নাস্তি মাতৃসমা ছায়া নাস্তি মাতৃসমা গতিঃ
নাস্তি মাতৃসমং ত্রাণং নাস্তি মাতৃসমা প্রপা
258.30
কুক্ষিসংধারণাদ্ধাত্রী জননাজ্জননী স্মৃতা
অঙ্গানাং বর্ধনাদম্বা বীরসূত্বেন বীরসূঃ
258.31
শিশোঃ শুশ্রূষণাচ্ছুশ্রূর্মাতা দেহমনন্তরম্
চেতনাবান্নরো হন্যাদ্যস্য নাসুষিরং শিরঃ
258.32
দম্পত্যোঃ প্রাণসংশ্লেষে যোঽভিসংধিঃ কৃতঃ কিল
তং মাতা বা পিতা বেদ ভূতার্থো মাতরি স্থিতঃ
258.33
মাতা জানাতি যদ্গোত্রং মাতা জানাতি যস্য সঃ
মাতুর্ভরণমাত্রেণ প্রীতিঃ স্নেহঃ পিতুঃ প্রজাঃ
258.34
পাণিবন্ধং স্বয়ং কৃত্বা সহধর্মমুপেত্য চ
যদি যাপ্যন্তি পুরুষাঃ স্ত্রিয়ো নার্হন্তি যাপ্যতাম্
258.35
ভরণাদ্ধি স্ত্রিয়ো ভর্তা পাত্যাচ্চৈব স্ত্রিয়াঃ পতিঃ
গুণস্যাস্য নিবৃত্তৌ তু ন ভর্তা ন পতিঃ পতিঃ
258.36
এবং স্ত্রী নাপরাধ্নোতি নর এবাপরাধ্যতি
ব্যুচ্চরংশ্চ মহাদোষং নর এবাপরাধ্যতি
258.37
স্ত্রিয়া হি পরমো ভর্তা দৈবতং পরমং স্মৃতম্
তস্যাত্মনা তু সদৃশমাত্মানং পরমং দদৌ
সর্বকার্যাপরাধ্যত্বান্নাপরাধ্যন্তি চাঙ্গনাঃ
258.38
যশ্চনোক্তো হি নির্দেশঃ স্ত্রিয়া মৈথুনতৃপ্তয়ে
তস্য স্মারয়তো ব্যক্তমধর্মো নাত্র সংশয়ঃ
258.39
যাবন্নারীং মাতরং চ গৌরবে চাধিকে স্থিতাম্
অবধ্যাং তু বিজানীয়ুঃ পশবোঽপ্যবিচক্ষণাঃ
258.40
দেবতানাং সমাবায়মেকস্থং পিতরং বিদুঃ
মর্ত্যানাং দেবতানাং চ স্নেহাদভ্যেতি মাতরম্
258.41
এবং বিমৃশতস্তস্য চিরকারিতয়া বহু
দীর্ঘঃ কালো ব্যতিক্রান্তস্ততস্তস্যাগমত্পিতা
258.42
মেধাতিথির্মহাপ্রাজ্ঞো গৌতমস্তপসি স্থিতঃ
বিমৃশ্য তেন কালেন পত্ন্যাঃ সংস্থাব্যতিক্রমম্
258.43
সোঽব্রবীদ্দুঃখসংতপ্তো ভৃশমশ্রূণি বর্তয়ন্
শ্রুতধৈর্যপ্রসাদেন পশ্চাত্তাপমুপাগতঃ
258.44
আশ্রমং মম সংপ্রাপ্তস্ত্রিলোকেশঃ পুরংদরঃ
অতিথিব্রতমাস্থায় ব্রাহ্মণং রূপমাস্থিতঃ
258.45
সময়া সান্ত্বিতো বাগ্ভিঃ স্বাগতেনাভিপূজিতঃ
অর্ঘ্যং পাদ্যং চ ন্যায়েন তয়াভিপ্রতিপাদিতঃ
258.46
পরবত্যস্মি চাপ্যুক্তঃ প্রণয়িষ্যে নয়েন চ
অত্র চাকুশলে জাতে স্ত্রিয়ো নাস্তি ব্যতিক্রমঃ
258.47
এবং ন স্ত্রী ন চৈবাহং নাধ্বগস্ত্রিদশেশ্বরঃ
অপরাধ্যতি ধর্মস্য প্রমাদস্ত্বপরাধ্যতি
258.48
ঈর্ষ্যাজং ব্যসনং প্রাহুস্তেন চৈবোর্ধ্বরেতসঃ
ঈর্ষ্যয়া ত্বহমাক্ষিপ্তো মগ্নো দুষ্কৃতসাগরে
258.49
হত্বা সাধ্বীং চ নারীং চ ব্যসনিত্বাচ্চ শাসিতাম্
ভর্তব্যত্বেন ভার্যাং চ কো নু মাং তারয়িষ্যতি
258.50
অন্তরেণ ময়াজ্ঞপ্তশ্চিরকারী হ্যুদারধীঃ
যদ্যদ্য চিরকারী স্যাত্স মাং ত্রায়েত পাতকাৎ
258.51
চিরকারিক ভদ্রং তে ভদ্রং তে চিরকারিক
যদ্যদ্য চিরকারী ত্বং ততোঽসি চিরকারিকঃ
258.52
ত্রাহি মাং মাতরং চৈব তপো যচ্চার্জিতং ময়া
আত্মানং পাতকেভ্যশ্চ ভবাদ্য চিরকারিকঃ
258.53
সহজং চিরকারিত্বং চিরপ্রাজ্ঞতয়া তব
সফলং তত্তবাদ্যাস্তু ভবাদ্য চিরকারিকঃ
258.54
চিরমাশংসিতো মাত্রা চিরং গর্ভেণ ধারিতঃ
সফলং চিরকারিত্বং কুরু ত্বং চিরকারিক
258.55
চিরায়তে চ সংতাপাচ্চিরং স্বপিতি বারিতঃ
আবয়োশ্চিরসংতাপাদবেক্ষ্য চিরকারিক
258.56
এবং স দুঃখিতো রাজন্মহর্ষির্গৌতমস্তদা
চিরকারিং দদর্শাথ পুত্রং স্থিতমথান্তিকে
258.57
চিরকারী তু পিতরং দৃষ্ট্বা পরমদুঃখিতঃ
শস্ত্রং ত্যক্ত্বা ততো মূর্ধ্না প্রসাদায়োপচক্রমে
258.58
গৌতমস্তু সুতং দৃষ্ট্বা শিরসা পতিতং ভুবি
পত্নীং চৈব নিরাকারাং পরামভ্যগমন্মুদম্
258.59
ন হি সা তেন সংভেদং পত্নী নীতা মহাত্মনা
বিজনে চাশ্রমস্থেন পুত্রশ্চাপি সমাহিতঃ
258.60
হন্যাত্ত্বনপবাদেন শস্ত্রপাণৌ সুতে স্থিতে
বিনীতং প্রশ্নয়িত্বা চ ব্যবস্যেদাত্মকর্মসু
258.61
বুদ্ধিশ্চাসীত্সুতং দৃষ্ট্বা পিতুশ্চরণয়োর্নতম্
শস্ত্রগ্রহণচাপল্যং সংবৃণোতি ভয়াদিতি
258.62
ততঃ পিত্রা চিরং স্তুত্বা চিরং চাঘ্রায় মূর্ধনি
চিরং দোর্ভ্যাং পরিষ্বজ্য চিরং জীবেত্যুদাহৃতঃ
258.63
এবং স গৌতমঃ পুত্রং প্রীতিহর্ষসমন্বিতঃ
অভিনন্দ্য মহাপ্রাজ্ঞ ইদং বচনমব্রবীৎ
258.64
চিরকারিক ভদ্রং তে চিরকারী চিরং ভব
চিরায়মাণে ত্বয়ি চ চিরমস্মি সুদুঃখিতঃ
258.65
গাথাশ্চাপ্যব্রবীদ্বিদ্বান্গৌতমো মুনিসত্তমঃ
চিরকারিষু ধীরেষু গুণোদ্দেশসমাশ্রয়াৎ
258.66
চিরেণ মিত্রং বধ্নীয়াচ্চিরেণ চ কৃতং ত্যজেৎ
চিরেণ হি কৃতং মিত্রং চিরং ধারণমর্হতি
258.67
রাগে দর্পে চ মানে চ দ্রোহে পাপে চ কর্মণি
অপ্রিয়ে চৈব কর্তব্যে চিরকারী প্রশস্যতে
258.68
বন্ধূনাং সুহৃদাং চৈব ভৃত্যানাং স্ত্রীজনস্য চ
অব্যক্তেষ্বপরাধেষু চিরকারী প্রশস্যতে
258.69
এবং স গৌতমস্তস্য প্রীতঃ পুত্রস্য ভারত
কর্মণা তেন কৌরব্য চিরকারিতয়া তয়া
258.70
এবং সর্বেষু কার্যেষু বিমৃশ্য পুরুষস্ততঃ
চিরেণ নিশ্চয়ং কৃত্বা চিরং ন পরিতপ্যতে
258.71
চিরং ধারয়তে রোষং চিরং কর্ম নিয়চ্ছতি
পশ্চাত্তাপকরং কর্ম ন কিংচিদুপপদ্যতে
258.72
চিরং বৃদ্ধানুপাসীত চিরমন্বাস্য পূজয়েৎ
চিরং ধর্মান্নিষেবেত কুর্যাচ্চান্বেষণং চিরম্
258.73
চিরমন্বাস্য বিদুষশ্চিরং শিষ্টান্নিষেব্য চ
চিরং বিনীয় চাত্মানং চিরং যাত্যনবজ্ঞতাম্
258.74
ব্রুবতশ্চ পরস্যাপি বাক্যং ধর্মোপসংহিতম্
চিরং পৃচ্ছেচ্চিরং ব্রূয়াচ্চিরং ন পরিভূয়তে
258.75
উপাস্য বহুলাস্তস্মিন্নাশ্রমে সুমহাতপাঃ
সমাঃ স্বর্গং গতো বিপ্রঃ পুত্রেণ সহিতস্তদা