Utshovঅধ্যায় 259
259.1
যুধিষ্ঠির উবাচ
কথং রাজা প্রজা রক্ষেন্ন চ কিংচিত্প্রতাপয়েৎ
পৃচ্ছামি ত্বাং সতাং শ্রেষ্ঠ তন্মে ব্রূহি পিতামহ
259.2
ভীষ্ম উবাচ
অত্রাপ্যুদাহরন্তীমমিতিহাসং পুরাতনম্
দ্যুমত্সেনস্য সংবাদং রাজ্ঞা সত্যবতা সহ
259.3
অব্যাহৃতং ব্যাজহার সত্যবানিতি নঃ শ্রুতম্
বধায় নীয়মানেষু পিতুরেবানুশাসনাৎ
259.4
অধর্মতাং যাতি ধর্মো যাত্যধর্মশ্চ ধর্মতাম্
বধো নাম ভবেদ্ধর্মো নৈতদ্ভবিতুমর্হতি
259.5
দ্যুমত্সেন উবাচ
অথ চেদবধো ধর্মো ধর্মঃ কো জাতু চিদ্ভবেৎ
দস্যবশ্চেন্ন হন্যেরন্সত্যবন্সংকরো ভবেৎ
259.6
মমেদমিতি নাস্যৈতত্প্রবর্তেত কলৌ যুগে
লোকয়াত্রা ন চৈব স্যাদথ চেদ্বেত্থ শংস নঃ
259.7
সত্যবানুবাচ
সর্ব এব ত্রয়ো বর্ণাঃ কার্যা ব্রাহ্মণবন্ধনাঃ
ধর্মপাশনিবদ্ধানামল্পো ব্যপচরিষ্যতি
259.8
যো যস্তেষামপচরেত্তমাচক্ষীত বৈ দ্বিজঃ
অয়ং মে ন শৃণোতীতি তস্মিন্রাজা প্রধারয়েৎ
259.9
তত্ত্বাভেদেন যচ্ছাস্ত্রং তত্কার্যং নান্যথা বধঃ
অসমীক্ষ্যৈব কর্মাণি নীতিশাস্ত্রং যথাবিধি
259.10
দস্যূন্হিনস্তি বৈ রাজা ভূয়সো বাপ্যনাগসঃ
ভার্যা মাতা পিতা পুত্রো হন্যতে পুরুষে হতে
পরেণাপকৃতে রাজা তস্মাত্সম্যক্প্রধারয়েৎ
259.11
অসাধুশ্চৈব পুরুষো লভতে শীলমেকদা
সাধোশ্চাপি হ্যসাধুভ্যো জায়তেঽশোভনা প্রজা
259.12
ন মূলঘাতঃ কর্তব্যো নৈষ ধর্মঃ সনাতনঃ
অপি খল্ববধেনৈব প্রায়শ্চিত্তং বিধীয়তে
259.13
উদ্বেজনেন বন্ধেন বিরূপকরণেন চ
বধদণ্ডেন তে ক্লেশ্যা ন পুরোঽহিতসংপদা
259.14
যদা পুরোহিতং বা তে পর্যেয়ুঃ শরণৈষিণঃ
করিষ্যামঃ পুনর্ব্রহ্মন্ন পাপমিতি বাদিনঃ
259.15
তদা বিসর্গমর্হাঃ স্যুরিতীদং নৃপশাসনম্
বিভ্রদ্দণ্ডাজিনং মুণ্ডো ব্রাহ্মণোঽর্হতি বাসনম্
259.16
গরীয়াংসো গরীয়াংসমপরাধে পুনঃ পুনঃ
তথা বিসর্গমর্হন্তি ন যথা প্রথমে তথা
259.17
দ্যুমত্সেন উবাচ
যত্র যত্রৈব শক্যেরন্সংয়ন্তুং সময়ে প্রজাঃ
স তাবত্প্রোচ্যতে ধর্মো যাবন্ন প্রতিলঙ্ঘ্যতে
259.18
অহন্যমানেষু পুনঃ সর্বমেব পরাভবেৎ
পূর্বে পূর্বতরে চৈব সুশাস্যা অভবঞ্জনাঃ
259.19
মৃদবঃ সত্যভূয়িষ্ঠা অল্পদ্রোহাল্পমন্যবঃ
পুরা ধিগ্দণ্ড এবাসীদ্বাগ্দণ্ডস্তদনন্তরম্
259.20
আসীদাদানদণ্ডোঽপি বধদণ্ডোঽদ্য বর্ততে
বধেনাপি ন শক্যন্তে নিয়ন্তুমপরে জনাঃ
259.21
নৈব দস্যুর্মনুষ্যাণাং ন দেবানামিতি শ্রুতিঃ
ন গন্ধর্বপিতৄণাং চ কঃ কস্যেহ ন কশ্চন
259.22
পদ্মং শ্মশানাদাদত্তে পিশাচাচ্চাপি দৈবতম্
তেষু যঃ সময়ং কুর্যাদজ্ঞেষু হতবুদ্ধিষু
259.23
সত্যবানুবাচ
তান্ন শক্নোষি চেত্সাধূন্পরিত্রাতুমহিংসয়া
কস্যচিদ্ভূতভব্যস্য লাভেনান্তং তথা কুরু
259.24
দ্যুমত্সেন উবাচ
রাজানো লোকয়াত্রার্থং তপ্যন্তে পরমং তপঃ
অপত্রপন্তি তাদৃগ্ভ্যস্তথাবৃত্তা ভবন্তি চ
259.25
বিত্রাস্যমানাঃ সুকৃতো ন কামাদ্ঘ্নন্তি দুষ্কৃতীন্
সুকৃতেনৈব রাজানো ভূয়িষ্ঠং শাসতে প্রজাঃ
259.26
শ্রেয়সঃ শ্রেয়সীমেবং বৃত্তিং লোকোঽনুবর্ততে
সদৈব হি গুরোর্বৃত্তমনুবর্তন্তি মানবাঃ
259.27
আত্মানমসমাধায় সমাধিত্সতি যঃ পরান্
বিষয়েষ্বিন্দ্রিয়বশং মানবাঃ প্রহসন্তি তম্
259.28
যো রাজ্ঞো দম্ভমোহেন কিংচিত্কুর্যাদসাংপ্রতম্
সর্বোপায়ৈর্নিয়ম্যঃ স তথা পাপান্নিবর্ততে
259.29
আত্মৈবাদৌ নিয়ন্তব্যো দুষ্কৃতং সংনিয়চ্ছতা
দণ্ডয়েচ্চ মহাদণ্ডৈরপি বন্ধূননন্তরান্
259.30
যত্র বৈ পাপকৃত্ক্লেশ্যো ন মহদ্দুঃখমর্ছতি
বর্ধন্তে তত্র পাপানি ধর্মো হ্রসতি চ ধ্রুবম্
ইতি কারুণ্যশীলস্তু বিদ্বান্বৈ ব্রাহ্মণোঽন্বশাৎ
259.31
ইতি চৈবানুশিষ্টোঽস্মি পূর্বৈস্তাত পিতামহৈঃ
আশ্বাসয়দ্ভিঃ সুভৃশমনুক্রোশাত্তথৈব চ
259.32
এতত্প্রথমকল্পেন রাজা কৃতয়ুগেঽভজৎ
পাদোনেনাপি ধর্মেণ গচ্ছেত্ত্রেতায়ুগে তথা
দ্বাপরে তু দ্বিপাদেন পাদেন ত্বপরে যুগে
259.33
তথা কলিয়ুগে প্রাপ্তে রাজ্ঞাং দুশ্চরিতেন হ
ভবেত্কালবিশেষেণ কলা ধর্মস্য ষোডশী
259.34
অথ প্রথমকল্পেন সত্যবন্সংকরো ভবেৎ
আয়ুঃ শক্তিং চ কালং চ নির্দিশ্য তপ আদিশেৎ
259.35
সত্যায় হি যথা নেহ জহ্যাদ্ধর্মফলং মহৎ
ভূতানামনুকম্পার্থং মনুঃ স্বায়ংভুবোঽব্রবীৎ