Utshovঅধ্যায় 260
260.1
যুধিষ্ঠির উবাচ
অবিরোধেন ভূতানাং ত্যাগঃ ষাড্গুণ্যকারকঃ
যঃ স্যাদুভয়ভাগ্ধর্মস্তন্মে ব্রূহি পিতামহ
260.2
গার্হস্থ্যস্য চ ধর্মস্য ত্যাগধর্মস্য চোভয়োঃ
অদূরসংপ্রস্থিতয়োঃ কিং স্বিচ্ছ্রেয়ঃ পিতামহ
260.3
ভীষ্ম উবাচ
উভৌ ধর্মৌ মহাভাগাবুভৌ পরমদুশ্চরৌ
উভৌ মহাফলৌ তাত সদ্ভিরাচরিতাবুভৌ
260.4
অত্র তে বর্তয়িষ্যামি প্রামাণ্যমুভয়োস্তয়োঃ
শৃণুষ্বৈকমনাঃ পার্থ ছিন্নধর্মার্থসংশয়ম্
260.5
অত্রাপ্যুদাহরন্তীমমিতিহাসং পুরাতনম্
কপিলস্য গোশ্চ সংবাদং তন্নিবোধ যুধিষ্ঠির
260.6
আম্নায়মনুপশ্যন্হি পুরাণং শাশ্বতং ধ্রুবম্
নহুষঃ পূর্বমালেভে ত্বষ্টুর্গামিতি নঃ শ্রুতম্
260.7
তাং নিয়ুক্তামদীনাত্মা সত্ত্বস্থঃ সময়ে রতঃ
জ্ঞানবান্নিয়তাহারো দদর্শ কপিলস্তদা
260.8
স বুদ্ধিমুত্তমাং প্রাপ্তো নৈষ্ঠিকীমকুতোভয়াম্
স্মরামি শিথিলং সত্যং বেদা ইত্যব্রবীত্সকৃৎ
260.9
তাং গামৃষিঃ স্যূমরশ্মিঃ প্রবিশ্য যতিমব্রবীৎ
হংহো বেদা যদি মতা ধর্মাঃ কেনাপরে মতাঃ
260.10
তপস্বিনো ধৃতিমতঃ শ্রুতিবিজ্ঞানচক্ষুষঃ
সর্বমার্ষং হি মন্যন্তে ব্যাহৃতং বিদিতাত্মনঃ
260.11
তস্যৈবং গততৃষ্ণস্য বিজ্বরস্য নিরাশিষঃ
কা বিবক্ষাস্তি বেদেষু নিরারম্ভস্য সর্বশঃ
260.12
কপিল উবাচ
নাহং বেদান্বিনিন্দামি ন বিবক্ষামি কর্হিচিৎ
পৃথগাশ্রমিণাং কর্মাণ্যেকার্থানীতি নঃ শ্রুতম্
260.13
গচ্ছত্যেব পরিত্যাগী বানপ্রস্থশ্চ গচ্ছতি
গৃহস্থো ব্রহ্মচারী চ উভৌ তাবপি গচ্ছতঃ
260.14
দেবয়ানা হি পন্থানশ্চত্বারঃ শাশ্বতা মতাঃ
তেষাং জ্যায়ঃকনীয়স্ত্বং ফলেষূক্তং বলাবলম্
260.15
এবং বিদিত্বা সর্বার্থানারভেদিতি বৈদিকম্
নারভেদিতি চান্যত্র নৈষ্ঠিকী শ্রূয়তে শ্রুতিঃ
260.16
অনারম্ভে হ্যদোষঃ স্যাদারম্ভেঽদোষ উত্তমঃ
এবং স্থিতস্য শাস্ত্রস্য দুর্বিজ্ঞেয়ং বলাবলম্
260.17
যদ্যত্র কিংচিত্প্রত্যক্ষমহিংসায়াঃ পরং মতম্
ঋতে ত্বাগমশাস্ত্রেভ্যো ব্রূহি তদ্যদি পশ্যসি
260.18
স্যূমরশ্মিরুবাচ
স্বর্গকামো যজেতেতি সততং শ্রূয়তে শ্রুতিঃ
ফলং প্রকল্প্য পূর্বং হি ততো যজ্ঞঃ প্রতায়তে
260.19
অজশ্চাশ্বশ্চ মেষশ্চ গৌশ্চ পক্ষিগণাশ্চ যে
গ্রাম্যারণ্যা ওষধয়ঃ প্রাণস্যান্নমিতি শ্রুতিঃ
260.20
তথৈবান্নং হ্যহরহঃ সায়ং প্রাতর্নিরুপ্যতে
পশবশ্চাথ ধান্যং চ যজ্ঞস্যাঙ্গমিতি শ্রুতিঃ
260.21
এতানি সহ যজ্ঞেন প্রজাপতিরকল্পয়ৎ
তেন প্রজাপতির্দেবান্যজ্ঞেনায়জত প্রভুঃ
260.22
তে স্মান্যোন্যংচরাঃ সর্বে প্রাণিনঃ সপ্ত সপ্ত চ
যজ্ঞেষূপাকৃতং বিশ্বং প্রাহুরুত্তমসংজ্ঞিতম্
260.23
এতচ্চৈবাভ্যনুজ্ঞাতং পূর্বৈঃ পূর্বতরৈস্তথা
কো জাতু ন বিচিন্বীত বিদ্বান্স্বাং শক্তিমাত্মনঃ
260.24
পশবশ্চ মনুষ্যাশ্চ দ্রুমাশ্চৌষধিভিঃ সহ
স্বর্গমেবাভিকাঙ্ক্ষন্তে ন চ স্বর্গস্ত্বৃতে মখম্
260.25
ওষধ্যঃ পশবো বৃক্ষা বীরুদাজ্যং পয়ো দধি
হবির্ভূমির্দিশঃ শ্রদ্ধা কালশ্চৈতানি দ্বাদশ
260.26
ঋচো যজূংষি সামানি যজমানশ্চ ষোডশঃ
অগ্নির্জ্ঞেয়ো গৃহপতিঃ স সপ্তদশ উচ্যতে
অঙ্গান্যেতানি যজ্ঞস্য যজ্ঞো মূলমিতি শ্রুতিঃ
260.27
আজ্যেন পয়সা দধ্না শকৃতামিক্ষয়া ত্বচা
বালৈঃ শৃঙ্গেণ পাদেন সংভবত্যেব গৌর্মখম্
এবং প্রত্যেকশঃ সর্বং যদ্যদস্য বিধীয়তে
260.28
যজ্ঞং বহন্তি সংভূয় সহর্ত্বিগ্ভিঃ সদক্ষিণৈঃ
সংহত্যৈতানি সর্বাণি যজ্ঞং নির্বর্তয়ন্ত্যুত
260.29
যজ্ঞার্থানি হি সৃষ্টানি যথা বৈ শ্রূয়তে শ্রুতিঃ
এবং পূর্বে পূর্বতরাঃ প্রবৃত্তাশ্চৈব মানবাঃ
260.30
ন হিনস্তি হ্যারভতে নাভিদ্রুহ্যতি কিংচন
যজ্ঞো যষ্টব্য ইত্যেব যো যজত্যফলেপ্সয়া
260.31
যজ্ঞাঙ্গান্যপি চৈতানি যথোক্তানি নসংশয়ঃ
বিধিনা বিধিয়ুক্তানি তারয়ন্তি পরস্পরম্
260.32
আম্নায়মার্ষং পশ্যামি যস্মিন্বেদাঃ প্রতিষ্ঠিতাঃ
তং বিদ্বাংসোঽনুপশ্যন্তি ব্রাহ্মণস্যানুদর্শনাৎ
260.33
ব্রাহ্মণপ্রভবো যজ্ঞো ব্রাহ্মণার্পণ এব চ
অনু যজ্ঞং জগত্সর্বং যজ্ঞশ্চানু জগত্সদা
260.34
ওমিতি ব্রহ্মণো যোনির্নমঃ স্বাহা স্বধা বষট্
যস্যৈতানি প্রয়ুজ্যন্তে যথাশক্তি কৃতান্যপি
260.35
ন তস্য ত্রিষু লোকেষু পরলোকভয়ং বিদুঃ
ইতি বেদা বদন্তীহ সিদ্ধাশ্চ পরমর্ষয়ঃ
260.36
ঋচো যজূংষি সামানি স্তোভাশ্চ বিধিচোদিতাঃ
যস্মিন্নেতানি সর্বাণি বহিরেব স বৈ দ্বিজঃ
260.37
অগ্ন্যাধেয়ে যদ্ভবতি যচ্চ সোমে সুতে দ্বিজ
যচ্চেতরৈর্মহায়জ্ঞৈর্বেদ তদ্ভগবান্স্বতঃ
260.38
তস্মাদ্ব্রহ্মন্যজেতৈব যাজয়েচ্চাবিচারয়ন্
যজতঃ স্বর্গবিধিনা প্রেত্য স্বর্গফলং মহৎ
260.39
নায়ং লোকোঽস্ত্যয়জ্ঞানাং পরশ্চেতি বিনিশ্চয়ঃ
বেদবাদবিদশ্চৈব প্রমাণমুভয়ং তদা