Utshovঅধ্যায় 261
261.1
কপিল উবাচ
এতাবদনুপশ্যন্তো যতয়ো যান্তি মার্গগাঃ
নৈষাং সর্বেষু লোকেষু কশ্চিদস্তি ব্যতিক্রমঃ
261.2
নির্দ্বংদ্বা নির্নমস্কারা নিরাশীর্বন্ধনা বুধাঃ
বিমুক্তাঃ সর্বপাপেভ্যশ্চরন্তি শুচয়োঽমলাঃ
261.3
অপবর্গেঽথ সংত্যাগে বুদ্ধৌ চ কৃতনিশ্চয়াঃ
ব্রহ্মিষ্ঠা ব্রহ্মভূতাশ্চ ব্রহ্মণ্যেব কৃতালয়াঃ
261.4
বিশোকা নষ্টরজসস্তেষাং লোকাঃ সনাতনাঃ
তেষাং গতিং পরাং প্রাপ্য গার্হস্থ্যে কিং প্রয়োজনম্
261.5
স্যূমরশ্মিরুবাচ
যদ্যেষা পরমা নিষ্ঠা যদ্যেষা পরমা গতিঃ
গৃহস্থানব্যপাশ্রিত্য নাশ্রমোঽন্যঃ প্রবর্ততে
261.6
যথা মাতরমাশ্রিত্য সর্বে জীবন্তি জন্তবঃ
এবং গৃহস্থমাশ্রিত্য বর্তন্ত ইতরেঽঽশ্রমাঃ
261.7
গৃহস্থ এব যজতে গৃহস্থস্তপ্যতে তপঃ
গার্হস্থ্যমস্য ধর্মস্য মূলং যত্কিংচিদেজতে
261.8
প্রজনাদ্ধ্যভিনির্বৃত্তাঃ সর্বে প্রাণভৃতো মুনে
প্রজনং চাপ্যুতান্যত্র ন কথংচন বিদ্যতে
261.9
যাস্তাঃ স্যুর্বহিরোষধ্যো বহ্বরণ্যাস্তথা দ্বিজ
ওষধিভ্যো বহির্যস্মাত্প্রাণী কশ্চিন্ন বিদ্যতে
কস্যৈষা বাগ্ভবেত্সত্যা মোক্ষো নাস্তি গৃহাদিতি
261.10
অশ্রদ্দধানৈরপ্রাজ্ঞৈঃ সূক্ষ্মদর্শনবর্জিতৈঃ
নিরাশৈরলসৈঃ শ্রান্তৈস্তপ্যমানৈঃ স্বকর্মভিঃ
শ্রমস্যোপরমো দৃষ্টঃ প্রব্রজ্যা নাম পণ্ডিতৈঃ
261.11
ত্রৈলোক্যস্যৈব হেতুর্হি মর্যাদা শাশ্বতী ধ্রুবা
ব্রাহ্মণো নাম ভগবাঞ্জন্মপ্রভৃতি পূজ্যতে
261.12
প্রাগ্গর্ভাধানান্মন্ত্রা হি প্রবর্তন্তে দ্বিজাতিষু
অবিশ্রম্ভেষু বর্তন্তে বিশ্রম্ভেষ্বপ্যসংশয়ম্
261.13
দাহঃ পুনঃ সংশ্রয়ণে সংস্থিতে পাত্রভোজনম্
দানং গবাং পশূনাং বা পিণ্ডানাং চাপ্সু মজ্জনম্
261.14
অর্চিষ্মন্তো বর্হিষদঃ ক্রব্যাদাঃ পিতরঃ স্মৃতাঃ
মৃতস্যাপ্যনুমন্যন্তে মন্ত্রা মন্ত্রাশ্চ কারণম্
261.15
এবং ক্রোশত্সু বেদেষু কুতো মোক্ষোঽস্তি কস্যচিৎ
ঋণবন্তো যদা মর্ত্যাঃ পিতৃদেবদ্বিজাতিষু
261.16
শ্রিয়া বিহীনৈরলসৈঃ পণ্ডিতৈরপলাপিতম্
বেদবাদাপরিজ্ঞানং সত্যাভাসমিবানৃতম্
261.17
ন বৈ পাপৈর্হ্রিয়তে কৃষ্যতে বা; যো ব্রাহ্মণো যজতে বেদশাস্ত্রৈঃ
ঊর্ধ্বং যজ্ঞঃ পশুভিঃ সার্ধমেতি; সংতর্পিতস্তর্পয়তে চ কামৈঃ
261.18
ন বেদানাং পরিভবান্ন শাঠ্যেন ন মায়য়া
মহত্প্রাপ্নোতি পুরুষো ব্রহ্ম ব্রহ্মণি বিন্দতি
261.19
কপিল উবাচ
দর্শং চ পৌর্ণমাসং চ অগ্নিহোত্রং চ ধীমতাম্
চাতুর্মাস্যানি চৈবাসংস্তেষু যজ্ঞঃ সনাতনঃ
261.20
অনারম্ভাঃ সুধৃতয়ঃ শুচয়ো ব্রহ্মসংশ্রিতাঃ
ব্রহ্মণৈব স্ম তে দেবাংস্তর্পয়ন্ত্যমৃতৈষিণঃ
261.21
সর্বভূতাত্মভূতস্য সর্বভূতানি পশ্যতঃ
দেবাপি মার্গে মুহ্যন্তি অপদস্য পদৈষিণঃ
261.22
চতুর্দ্বারং পুরুষং চতুর্মুখং; চতুর্ধা চৈনমুপয়াতি নিন্দা
বাহুভ্যাং বাচ উদরাদুপস্থা;ত্তেষাং দ্বারং দ্বারপালো বুভূষেৎ
261.23
নাক্ষৈর্দীব্যেন্নাদদীতান্যবিত্তং; ন বায়োনীয়স্য শৃতং প্রগৃহ্ণেৎ
ক্রুদ্ধো ন চৈব প্রহরেত ধীমাং;স্তথাস্য তত্পাণিপাদং সুগুপ্তম্
261.24
নাক্রোশমর্ছেন্ন মৃষা বদেচ্চ; ন পৈশুনং জনবাদং চ কুর্যাৎ
সত্যব্রতো মিতভাষোঽপ্রমত্ত;স্তথাস্য বাগ্দ্বারমথো সুগুপ্তম্
261.25
নানাশনঃ স্যান্ন মহাশনঃ স্যা;দলোলুপঃ সাধুভিরাগতঃ স্যাৎ
যাত্রার্থমাহারমিহাদদীত; তথাস্য স্যাজ্জাঠরী দ্বারগুপ্তিঃ
261.26
ন বীরপত্নীং বিহরেত নারীং; ন চাপি নারীমনৃতাবাহ্বয়ীত
ভার্যাব্রতং হ্যাত্মনি ধারয়ীত; তথাস্যোপস্থদ্বারগুপ্তির্ভবেত
261.27
দ্বারাণি যস্য সর্বাণি সুগুপ্তানি মনীষিণঃ
উপস্থমুদরং বাহূ বাক্চতুর্থী স বৈ দ্বিজঃ
261.28
মোঘান্যগুপ্তদ্বারস্য সর্বাণ্যেব ভবন্ত্যুত
কিং তস্য তপসা কার্যং কিং যজ্ঞেন কিমাত্মনা
261.29
অনুত্তরীয়বসনমনুপস্তীর্ণশায়িনম্
বাহূপধানং শাম্যন্তং তং দেবা ব্রাহ্মণং বিদুঃ
261.30
দ্বংদ্বারামেষু সর্বেষু য একো রমতে মুনিঃ
পরেষামননুধ্যায়ংস্তং দেবা ব্রাহ্মণং বিদুঃ
261.31
যেন সর্বমিদং বুদ্ধং প্রকৃতির্বিকৃতিশ্চ যা
গতিজ্ঞঃ সর্বভূতানাং তং দেবা ব্রাহ্মণং বিদুঃ
261.32
অভয়ং সর্বভূতেভ্যঃ সর্বেষামভয়ং যতঃ
সর্বভূতাত্মভূতো যস্তং দেবা ব্রাহ্মণং বিদুঃ
261.33
নান্তরেণানুজানন্তি বেদানাং যত্ক্রিয়াফলম্
অনুজ্ঞায় চ তত্সর্বমন্যদ্রোচয়তেঽফলম্
261.34
ফলবন্তি চ কর্মাণি ব্যুষ্টিমন্তি ধ্রুবাণি চ
বিগুণানি চ পশ্যন্তি তথানৈকান্তিকানি চ
261.35
গুণাশ্চাত্র সুদুর্জ্ঞেয়া জ্ঞাতাশ্চাপি সুদুষ্করাঃ
অনুষ্ঠিতাশ্চান্তবন্ত ইতি ত্বমনুপশ্যসি
261.36
স্যূমরশ্মিরুবাচ
যথা চ বেদপ্রামাণ্যং ত্যাগশ্চ সফলো যথা
তৌ পন্থানাবুভৌ ব্যক্তৌ ভগবংস্তদ্ব্রবীহি মে
261.37
কপিল উবাচ
প্রত্যক্ষমিহ পশ্যন্তি ভবন্তঃ সত্পথে স্থিতাঃ
প্রত্যক্ষং তু কিমত্রাস্তি যদ্ভবন্ত উপাসতে
261.38
স্যূমরশ্মিরুবাচ
স্যূমরশ্মিরহং ব্রহ্মঞ্জিজ্ঞাসার্থমিহাগতঃ
শ্রেয়স্কামঃ প্রত্যবোচমার্জবান্ন বিবক্ষয়া
ইমং চ সংশয়ং ঘোরং ভগবান্প্রব্রবীতু মে
261.39
প্রত্যক্ষমিহ পশ্যন্তো ভবন্তঃ সত্পথে স্থিতাঃ
কিমত্র প্রত্যক্ষতমং ভবন্তো যদুপাসতে
অন্যত্র তর্কশাস্ত্রেভ্য আগমাচ্চ যথাগমম্
261.40
আগমো বেদবাদস্তু তর্কশাস্ত্রাণি চাগমঃ
যথাগমমুপাসীত আগমস্তত্র সিধ্যতি
সিদ্ধিঃ প্রত্যক্ষরূপা চ দৃশ্যত্যাগমনিশ্চয়াৎ
261.41
নৌর্নাবীব নিবদ্ধা হি স্রোতসা সনিবন্ধনা
হ্রিয়মাণা কথং বিপ্র কুবুদ্ধীংস্তারয়িষ্যতি
এতদ্ব্রবীতু ভগবানুপপন্নোঽস্ম্যধীহি ভোঃ
261.42
নৈব ত্যাগী ন সংতুষ্টো নাশোকো ন নিরাময়ঃ
ন নির্বিবিত্সো নাবৃত্তো নাপবৃত্তোঽস্তি কশ্চন
261.43
ভবন্তোঽপি চ হৃষ্যন্তি শোচন্তি চ যথা বয়ম্
ইন্দ্রিয়ার্থাশ্চ ভবতাং সমানাঃ সর্বজন্তুষু
261.44
এবং চতুর্ণাং বর্ণানামাশ্রমাণাং প্রবৃত্তিষু
একমালম্বমানানাং নির্ণয়ে কিং নিরাময়ম্
261.45
কপিল উবাচ
যদ্যদাচরতে শাস্ত্রমথ সর্বপ্রবৃত্তিষু
যস্য যত্র হ্যনুষ্ঠানং তত্র তত্র নিরাময়ম্
261.46
সর্বং পাবয়তে জ্ঞানং যো জ্ঞানং হ্যনুবর্ততে
জ্ঞানাদপেত্য যা বৃত্তিঃ সা বিনাশয়তি প্রজাঃ
261.47
ভবন্তো জ্ঞানিনো নিত্যং সর্বতশ্চ নিরাগমাঃ
ঐকাত্ম্যং নাম কশ্চিদ্ধি কদাচিদভিপদ্যতে
261.48
শাস্ত্রং হ্যবুদ্ধ্বা তত্ত্বেন কেচিদ্বাদবলা জনাঃ
কামদ্বেষাভিভূতত্বাদহংকারবশং গতাঃ
261.49
যাথাতথ্যমবিজ্ঞায় শাস্ত্রাণাং শাস্ত্রদস্যবঃ
ব্রহ্মস্তেনা নিরারম্ভা অপক্বমতয়োঽশিবাঃ
261.50
বৈগুণ্যমেব পশ্যন্তি ন গুণাননুয়ুঞ্জতে
তেষাং তমঃশরীরাণাং তম এব পরায়ণম্
261.51
যো যথাপ্রকৃতির্জন্তুঃ প্রকৃতেঃ স্যাদ্বশানুগঃ
তস্য দ্বেষশ্চ কামশ্চ ক্রোধো দম্ভোঽনৃতং মদঃ
নিত্যমেবাভিবর্তন্তে গুণাঃ প্রকৃতিসংভবাঃ
261.52
এতদ্বুদ্ধ্যানুপশ্যন্তঃ সংত্যজেয়ুঃ শুভাশুভম্
পরাং গতিমভীপ্সন্তো যতয়ঃ সংয়মে রতাঃ
261.53
স্যূমরশ্মিরুবাচ
সর্বমেতন্ময়া ব্রহ্মঞ্শাস্ত্রতঃ পরিকীর্তিতম্
ন হ্যবিজ্ঞায় শাস্ত্রার্থং প্রবর্তন্তে প্রবৃত্তয়ঃ
261.54
যঃ কশ্চিন্ন্যায্য আচারঃ সর্বং শাস্ত্রমিতি শ্রুতিঃ
যদন্যায্যমশাস্ত্রং তদিত্যেষা শ্রূয়তে শ্রুতিঃ
261.55
ন প্রবৃত্তিরৃতে শাস্ত্রাত্কাচিদস্তীতি নিশ্চয়ঃ
যদন্যদ্বেদবাদেভ্যস্তদশাস্ত্রমিতি শ্রুতিঃ
261.56
শাস্ত্রাদপেতং পশ্যন্তি বহবো ব্যক্তমানিনঃ
শাস্ত্রদোষান্ন পশ্যন্তি ইহ চামুত্র চাপরে
অবিজ্ঞানহতপ্রজ্ঞা হীনপ্রজ্ঞাস্তমোবৃতাঃ
261.57
শক্যং ত্বেকেন মুক্তেন কৃতকৃত্যেন সর্বশঃ
পিণ্ডমাত্রং ব্যপাশ্রিত্য চরিতুং সর্বতোদিশম্
বেদবাদং ব্যপাশ্রিত্য মোক্ষোঽস্তীতি প্রভাষিতুম্
261.58
ইদং তু দুষ্করং কর্ম কুটুম্বমভিসংশ্রিতম্
দানমধ্যয়নং যজ্ঞঃ প্রজাসংতানমার্জবম্
261.59
যদ্যেতদেবং কৃত্বাপি ন বিমোক্ষোঽস্তি কস্যচিৎ
ধিক্কর্তারং চ কার্যং চ শ্রমশ্চায়ং নিরর্থকঃ
261.60
নাস্তিক্যমন্যথা চ স্যাদ্বেদানাং পৃষ্ঠতঃক্রিয়া
এতস্যানন্ত্যমিচ্ছামি ভগবঞ্শ্রোতুমঞ্জসা
261.61
তথ্যং বদস্ব মে ব্রহ্মন্নুপসন্নোঽস্ম্যধীহি ভোঃ
যথা তে বিদিতো মোক্ষস্তথেচ্ছাম্যুপশিক্ষিতুম্