Utshovঅধ্যায় 262
262.1
কপিল উবাচ
বেদাঃ প্রমাণং লোকানাং ন বেদাঃ পৃষ্ঠতঃকৃতাঃ
দ্বে ব্রহ্মণী বেদিতব্যে শব্দব্রহ্ম পরং চ যৎ
শব্দব্রহ্মণি নিষ্ণাতঃ পরং ব্রহ্মাধিগচ্ছতি
262.2
শরীরমেতত্কুরুতে যদ্বেদে কুরুতে তনুম্
কৃতশুদ্ধশরীরো হি পাত্রং ভবতি ব্রাহ্মণঃ
262.3
আনন্ত্যমনুয়ুঙ্ক্তে যঃ কর্মণা তদ্ব্রবীমি তে
নিরাগমমনৈতিহ্যং প্রত্যক্ষং লোকসাক্ষিকম্
262.4
ধর্ম ইত্যেব যে যজ্ঞান্বিতন্বন্তি নিরাশিষঃ
উত্পন্নত্যাগিনোঽলুব্ধাঃ কৃপাসূয়াবিবর্জিতাঃ
ধনানামেষ বৈ পন্থাস্তীর্থেষু প্রতিপাদনম্
262.5
অনাশ্রিতাঃ পাপকৃত্যাঃ কদাচিত্কর্ময়োনিতঃ
মনঃসংকল্পসংসিদ্ধা বিশুদ্ধজ্ঞাননিশ্চয়াঃ
262.6
অক্রুধ্যন্তোঽনসূয়ন্তো নিরহংকারমত্সরাঃ
জ্ঞাননিষ্ঠাস্ত্রিশুক্লাশ্চ সর্বভূতহিতে রতাঃ
262.7
আসন্গৃহস্থা ভূয়িষ্ঠমব্যুত্ক্রান্তাঃ স্বকর্মসু
রাজানশ্চ তথা যুক্তা ব্রাহ্মণাশ্চ যথাবিধি
262.8
সমা হ্যার্জবসংপন্নাঃ সংতুষ্টা জ্ঞাননিশ্চয়াঃ
প্রত্যক্ষধর্মাঃ শুচয়ঃ শ্রদ্দধানাঃ পরাবরে
262.9
পুরস্তাদ্ভাবিতাত্মানো যথাবচ্চরিতব্রতাঃ
চরন্তি ধর্মং কৃচ্ছ্রেঽপি দুর্গে চৈবাধিসংহতাঃ
262.10
সংহত্য ধর্মং চরতাং পুরাসীত্সুখমেব তৎ
তেষাং নাসীদ্বিধাতব্যং প্রায়শ্চিত্তং কদাচন
262.11
সত্যং হি ধর্মমাস্থায় দুরাধর্ষতমা মতাঃ
ন মাত্রামনুরুধ্যন্তে ন ধর্মচ্ছলমন্ততঃ
262.12
য এব প্রথমঃ কল্পস্তমেবাভ্যাচরন্সহ
অস্যাং স্থিতৌ স্থিতানাং হি প্রায়শ্চিত্তং ন বিদ্যতে
দুর্বলাত্মন উত্পন্নং প্রায়শ্চিত্তমিতি শ্রুতিঃ
262.13
যত এবংবিধা বিপ্রাঃ পুরাণা যজ্ঞবাহনাঃ
ত্রৈবিদ্যবৃদ্ধাঃ শুচয়ো বৃত্তবন্তো যশস্বিনঃ
যজন্তোঽহরহর্যজ্ঞৈর্নিরাশীর্বন্ধনা বুধাঃ
262.14
তেষাং যজ্ঞাশ্চ বেদাশ্চ কর্মাণি চ যথাগমম্
আগমাশ্চ যথাকালং সংকল্পাশ্চ যথাব্রতম্
262.15
অপেতকামক্রোধানাং প্রকৃত্যা সংশিতাত্মনাম্
ঋজূনাং শমনিত্যানাং স্থিতানাং স্বেষু কর্মসু
সর্বমানন্ত্যমেবাসীদিতি নঃ শাশ্বতী শ্রুতিঃ
262.16
তেষামদীনসত্ত্বানাং দুশ্চরাচারকর্মণাম্
স্বকর্মভিঃ সংবৃতানাং তপো ঘোরত্বমাগতম্
262.17
তং সদাচারমাশ্চর্যং পুরাণং শাশ্বতং ধ্রুবম্
অশক্নুবদ্ভিশ্চরিতুং কিংচিদ্ধর্মেষু সূচিতম্
262.18
নিরাপদ্ধর্ম আচারস্ত্বপ্রমাদোঽপরাভবঃ
সর্ববর্ণেষু যত্তেষু নাসীত্কশ্চিদ্ব্যতিক্রমঃ
262.19
ধর্মমেকং চতুষ্পাদমাশ্রিতাস্তে নরর্ষভাঃ
তং সন্তো বিধিবত্প্রাপ্য গচ্ছন্তি পরমাং গতিম্
262.20
গৃহেভ্য এব নিষ্ক্রম্য বনমন্যে সমাশ্রিতাঃ
গৃহমেবাভিসংশ্রিত্য ততোঽন্যে ব্রহ্মচারিণঃ
262.21
ধর্মমেতং চতুষ্পাদমাশ্রমং ব্রাহ্মণা বিদুঃ
আনন্ত্যং ব্রহ্মণঃ স্থানং ব্রাহ্মণা নাম নিশ্চয়ঃ
262.22
অত এবংবিধা বিপ্রাঃ পুরাণা ধর্মচারিণঃ
ত এতে দিবি দৃশ্যন্তে জ্যোতির্ভূতা দ্বিজাতয়ঃ
262.23
নক্ষত্রাণীব ধিষ্ণ্যেষু বহবস্তারকাগণাঃ
আনন্ত্যমুপসংপ্রাপ্তাঃ সংতোষাদিতি বৈদিকম্
262.24
যদ্যাগচ্ছন্তি সংসারং পুনর্যোনিষু তাদৃশাঃ
ন লিপ্যন্তে পাপকৃত্যৈঃ কদাচিত্কর্ময়োনিতঃ
262.25
এবং যুক্তো ব্রাহ্মণঃ স্যাদন্যো ব্রাহ্মণকো ভবেৎ
কর্মৈব পুরুষস্যাহ শুভং বা যদি বাশুভম্
262.26
এবং পক্বকষায়াণামানন্ত্যেন শ্রুতেন চ
সর্বমানন্ত্যমেবাসীদেবং নঃ শাশ্বতী শ্রুতিঃ
262.27
তেষামপেততৃষ্ণানাং নির্ণিক্তানাং শুভাত্মনাম্
চতুর্থ ঔপনিষদো ধর্মঃ সাধারণঃ স্মৃতঃ
262.28
স সিদ্ধৈঃ সাধ্যতে নিত্যং ব্রাহ্মণৈর্নিয়তাত্মভিঃ
সংতোষমূলস্ত্যাগাত্মা জ্ঞানাধিষ্ঠানমুচ্যতে
262.29
অপবর্গগতির্নিত্যো যতিধর্মঃ সনাতনঃ
সাধারণঃ কেবলো বা যথাবলমুপাস্যতে
262.30
গচ্ছতো গচ্ছতঃ ক্ষেমং দুর্বলোঽত্রাবসীদতি
ব্রহ্মণঃ পদমন্বিচ্ছন্সংসারান্মুচ্যতে শুচিঃ
262.31
স্যূমরশ্মিরুবাচ
যে ভুঞ্জতে যে দদতে যজন্তেঽধীয়তে চ যে
মাত্রাভির্ধর্মলব্ধাভির্যে বা ত্যাগং সমাশ্রিতাঃ
262.32
এতেষাং প্রেত্যভাবে তু কতমঃ স্বর্গজিত্তমঃ
এতদাচক্ষ্ব মে ব্রহ্মন্যথাতথ্যেন পৃচ্ছতঃ
262.33
কপিল উবাচ
পরিগ্রহাঃ শুভাঃ সর্বে গুণতোঽভ্যুদয়াশ্চ যে
ন তু ত্যাগসুখং প্রাপ্তা এতত্ত্বমপি পশ্যসি
262.34
স্যূমরশ্মিরুবাচ
ভবন্তো জ্ঞাননিষ্ঠা বৈ গৃহস্থাঃ কর্মনিশ্চয়াঃ
আশ্রমাণাং চ সর্বেষাং নিষ্ঠায়ামৈক্যমুচ্যতে
262.35
একত্বে চ পৃথক্ত্বে চ বিশেষো নান্য উচ্যতে
তদ্যথাবদ্যথান্যায়ং ভগবান্প্রব্রবীতু মে
262.36
কপিল উবাচ
শরীরপক্তিঃ কর্মাণি জ্ঞানং তু পরমা গতিঃ
পক্বে কষায়ে বমনৈ রসজ্ঞানে ন তিষ্ঠতি
262.37
আনৃশংস্যং ক্ষমা শান্তিরহিংসা সত্যমার্জবম্
অদ্রোহো নাভিমানশ্চ হ্রীস্তিতিক্ষা শমস্তথা
262.38
পন্থানো ব্রহ্মণস্ত্বেতে এতৈঃ প্রাপ্নোতি যত্পরম্
তদ্বিদ্বাননুবুধ্যেত মনসা কর্মনিশ্চয়ম্
262.39
যাং বিপ্রাঃ সর্বতঃ শান্তা বিশুদ্ধা জ্ঞাননিশ্চয়াঃ
গতিং গচ্ছন্তি সংতুষ্টাস্তামাহুঃ পরমাং গতিম্
262.40
বেদাংশ্চ বেদিতব্যং চ বিদিত্বা চ যথাস্থিতি
এবং বেদবিদিত্যাহুরতোঽন্যো বাতরেটকঃ
262.41
সর্বং বিদুর্বেদবিদো বেদে সর্বং প্রতিষ্ঠিতম্
বেদে হি নিষ্ঠা সর্বস্য যদ্যদস্তি চ নাস্তি চ
262.42
এষৈব নিষ্ঠা সর্বস্য যদ্যদস্তি চ নাস্তি চ
এতদন্তং চ মধ্যং চ সচ্চাসচ্চ বিজানতঃ
262.43
সমস্তত্যাগ ইত্যেব শম ইত্যেব নিষ্ঠিতঃ
সংতোষ ইত্যত্র শুভমপবর্গে প্রতিষ্ঠিতম্
262.44
ঋতং সত্যং বিদিতং বেদিতব্যং; সর্বস্যাত্মা জঙ্গমং স্থাবরং চ
সর্বং সুখং যচ্ছিবমুত্তমং চ; ব্রহ্মাব্যক্তং প্রভবশ্চাব্যয়শ্চ
262.45
তেজঃ ক্ষমা শান্তিরনাময়ং শুভং; তথাবিধং ব্যোম সনাতনং ধ্রুবম্
এতৈঃ শব্দৈর্গম্যতে বুদ্ধিনেত্রৈ;স্তস্মৈ নমো ব্রহ্মণে ব্রাহ্মণায়