Utshovঅধ্যায় 263
263.1
যুধিষ্ঠির উবাচ
ধর্মমর্থং চ কামং চ বেদাঃ শংসন্তি ভারত
কস্য লাভো বিশিষ্টোঽত্র তন্মে ব্রূহি পিতামহ
263.2
ভীষ্ম উবাচ
অত্র তে বর্তয়িষ্যামি ইতিহাসং পুরাতনম্
কুণ্ডধারেণ যত্প্রীত্যা ভক্তায়োপকৃতং পুরা
263.3
অধনো ব্রাহ্মণঃ কশ্চিত্কামাদ্ধর্মমবৈক্ষত
যজ্ঞার্থং স ততোঽর্থার্থী তপোঽতপ্যত দারুণম্
263.4
স নিশ্চয়মথো কৃত্বা পূজয়ামাস দেবতাঃ
ভক্ত্যা ন চৈবাধ্যগচ্ছদ্ধনং সংপূজ্য দেবতাঃ
263.5
ততশ্চিন্তাং পুনঃ প্রাপ্তঃ কতমদ্দৈবতং নু তৎ
যন্মে দ্রুতং প্রসীদেত মানুষৈরজডীকৃতম্
263.6
অথ সৌম্যেন বপুষা দেবানুচরমন্তিকে
প্রত্যপশ্যজ্জলধরং কুণ্ডধারমবস্থিতম্
263.7
দৃষ্ট্বৈব তং মহাত্মানং তস্য ভক্তিরজায়ত
অয়ং মে ধাস্যতি শ্রেয়ো বপুরেতদ্ধি তাদৃশম্
263.8
সংনিকৃষ্টশ্চ দেবস্য ন চান্যৈর্মানুষৈর্বৃতঃ
এষ মে দাস্যতি ধনং প্রভূতং শীঘ্রমেব চ
263.9
ততো ধূপৈশ্চ গন্ধৈশ্চ মাল্যৈরুচ্চাবচৈরপি
বলিভির্বিবিধৈশ্চাপি পূজয়ামাস তং দ্বিজঃ
263.10
ততঃ স্বল্পেন কালেন তুষ্টো জলধরস্তদা
তস্যোপকারে নিয়তামিমাং বাচমুবাচ হ
263.11
ব্রহ্মঘ্নে চ সুরাপে চ চোরে ভগ্নব্রতে তথা
নিষ্কৃতির্বিহিতা সদ্ভিঃ কৃতঘ্নে নাস্তি নিষ্কৃতিঃ
263.12
আশায়াস্তনয়োঽধর্মঃ ক্রোধোঽসূয়াসুতঃ স্মৃতঃ
পুত্রো লোভো নিকৃত্যাস্তু কৃতঘ্নো নার্হতি প্রজাম্
263.13
ততঃ স ব্রাহ্মণঃ স্বপ্নে কুণ্ডধারস্য তেজসা
অপশ্যত্সর্বভূতানি কুশেষু শয়িতস্তদা
263.14
শমেন তপসা চৈব ভক্ত্যা চ নিরুপস্কৃতঃ
শুদ্ধাত্মা ব্রাহ্মণো রাত্রৌ নিদর্শনমপশ্যত
263.15
মণিভদ্রং স তত্রস্থং দেবতানাং মহাদ্যুতিম্
অপশ্যত মহাত্মানং ব্যাদিশন্তং যুধিষ্ঠির
263.16
তত্র দেবাঃ প্রয়চ্ছন্তি রাজ্যানি চ ধনানি চ
শুভৈঃ কর্মভিরারব্ধাঃ প্রচ্ছিদন্ত্যশুভেষু চ
263.17
পশ্যতামথ যক্ষাণাং কুণ্ডধারো মহাদ্যুতিঃ
নিষ্পত্য পতিতো ভূমৌ দেবানাং ভরতর্ষভ
263.18
ততস্তু দেববচনান্মণিভদ্রো মহায়শাঃ
উবাচ পতিতং ভূমৌ কুণ্ডধার কিমিষ্যতে
263.19
কুণ্ডধার উবাচ
যদি প্রসন্না দেবা মে ভক্তোঽয়ং ব্রাহ্মণো মম
অস্যানুগ্রহমিচ্ছামি কৃতং কিংচিত্সুখোদয়ম্
263.20
ভীষ্ম উবাচ
ততস্তং মণিভদ্রস্তু পুনর্বচনমব্রবীৎ
দেবানামেব বচনাত্কুণ্ডধারং মহাদ্যুতিম্
263.21
উত্তিষ্ঠোত্তিষ্ঠ ভদ্রং তে কৃতকার্যঃ সুখী ভব
যাবদ্ধনং প্রার্থয়তে ব্রাহ্মণোঽয়ং সখা তব
দেবানাং শাসনাত্তাবদসংখ্যেয়ং দদাম্যহম্
263.22
বিচার্য কুণ্ডধারস্তু মানুষ্যং চলমধ্রুবম্
তপসে মতিমাধত্ত ব্রাহ্মণস্য যশস্বিনঃ
263.23
কুণ্ডধার উবাচ
নাহং ধনানি যাচামি ব্রাহ্মণায় ধনপ্রদ
অন্যমেবাহমিচ্ছামি ভক্তায়ানুগ্রহং কৃতম্
263.24
পৃথিবীং রত্নপূর্ণাং বা মহদ্বা ধনসংচয়ম্
ভক্তায় নাহমিচ্ছামি ভবেদেষ তু ধার্মিকঃ
263.25
ধর্মেঽস্য রমতাং বুদ্ধির্ধর্মং চৈবোপজীবতু
ধর্মপ্রধানো ভবতু মমৈষোঽনুগ্রহো মতঃ
263.26
মণিভদ্র উবাচ
যদা ধর্মফলং রাজ্যং সুখানি বিবিধানি চ
ফলান্যেবায়মশ্নাতু কায়ক্লেশবিবর্জিতঃ
263.27
ভীষ্ম উবাচ
ততস্তদেব বহুশঃ কুণ্ডধারো মহায়শাঃ
অভ্যাসমকরোদ্ধর্মে ততস্তুষ্টাস্য দেবতাঃ
263.28
মণিভদ্র উবাচ
প্রীতাস্তে দেবতাঃ সর্বা দ্বিজস্যাস্য তথৈব চ
ভবিষ্যত্যেষ ধর্মাত্মা ধর্মে চাধাস্যতে মতিঃ
263.29
ভীষ্ম উবাচ
ততঃ প্রীতো জলধরঃ কৃতকার্যো যুধিষ্ঠির
ঈপ্সিতং মনসো লব্ধ্বা বরমন্যৈঃ সুদুর্লভম্
263.30
ততোঽপশ্যত চীরাণি সূক্ষ্মাণি দ্বিজসত্তমঃ
পার্শ্বতোঽভ্যাগতো ন্যস্তান্যথ নির্বেদমাগতঃ
263.31
ব্রাহ্মণ উবাচ
অয়ং ন সুকৃতং বেত্তি কো ন্বন্যো বেত্স্যতে কৃতম্
গচ্ছামি বনমেবাহং বরং ধর্মেণ জীবিতুম্
263.32
ভীষ্ম উবাচ
নির্বেদাদ্দেবতানাং চ প্রসাদাত্স দ্বিজোত্তমঃ
বনং প্রবিশ্য সুমহত্তপ আরব্ধবাংস্তদা
263.33
দেবতাতিথিশেষেণ ফলমূলাশনো দ্বিজঃ
ধর্মে চাপি মহারাজ রতিরস্যাভ্যজায়ত
263.34
ত্যক্ত্বা মূলফলং সর্বং পর্ণাহারোঽভবদ্দ্বিজঃ
পর্ণং ত্যক্ত্বা জলাহারস্তদাসীদ্দ্বিজসত্তমঃ
263.35
বায়ুভক্ষস্ততঃ পশ্চাদ্বহূন্বর্ষগণানভূৎ
ন চাস্য ক্ষীয়তে প্রাণস্তদদ্ভুতমিবাভবৎ
263.36
ধর্মে চ শ্রদ্দধানস্য তপস্যুগ্রে চ বর্ততঃ
কালেন মহতা তস্য দিব্যা দৃষ্টিরজায়ত
263.37
তস্য বুদ্ধিঃ প্রাদুরাসীদ্যদি দদ্যাং মহদ্ধনম্
তুষ্টঃ কস্মৈচিদেবাহং ন মিথ্যা বাগ্ভবেন্মম
263.38
ততঃ প্রহৃষ্টবদনো ভূয় আরব্ধবাংস্তপঃ
ভূয়শ্চাচিন্তয়ত্সিদ্ধো যত্পরং সোঽভ্যপদ্যত
263.39
যদি দদ্যামহং রাজ্যং তুষ্টো বৈ যস্য কস্যচিৎ
স ভবেদচিরাদ্রাজা ন মিথ্যা বাগ্ভবেন্মম
263.40
তস্য সাক্ষাত্কুণ্ডধারো দর্শয়ামাস ভারত
ব্রাহ্মণস্য তপোয়োগাত্সৌহৃদেনাভিচোদিতঃ
263.41
সমাগম্য স তেনাথ পূজাং চক্রে যথাবিধি
ব্রাহ্মণঃ কুণ্ডধারস্য বিস্মিতশ্চাভবন্নৃপ
263.42
ততোঽব্রবীত্কুণ্ডধারো দিব্যং তে চক্ষুরুত্তমম্
পশ্য রাজ্ঞাং গতিং বিপ্র লোকাংশ্চাবেক্ষ চক্ষুষা
263.43
ততো রাজ্ঞাং সহস্রাণি মগ্নানি নিরয়ে তদা
দূরাদপশ্যদ্বিপ্রঃ স দিব্যয়ুক্তেন চক্ষুষা
263.44
কুণ্ডধার উবাচ
মাং পূজয়িত্বা ভাবেন যদি ত্বং দুঃখমাপ্নুয়াঃ
কৃতং ময়া ভবেত্কিং তে কশ্চ তেঽনুগ্রহো ভবেৎ
263.45
পশ্য পশ্য চ ভূয়স্ত্বং কামানিচ্ছেত্কথং নরঃ
স্বর্গদ্বারং হি সংরুদ্ধং মানুষেষু বিশেষতঃ
263.46
ভীষ্ম উবাচ
ততোঽপশ্যত্স কামং চ ক্রোধং লোভং ভয়ং মদম্
নিদ্রাং তন্দ্রীং তথালস্যমাবৃত্য পুরুষান্স্থিতান্
263.47
কুণ্ডধার উবাচ
এতৈর্লোকাঃ সুসংরুদ্ধা দেবানাং মানুষাদ্ভয়ম্
তথৈব দেববচনাদ্বিঘ্নং কুর্বন্তি সর্বশঃ
263.48
ন দেবৈরননুজ্ঞাতঃ কশ্চিদ্ভবতি ধার্মিকঃ
এষ শক্তোঽসি তপসা রাজ্যং দাতুং ধনানি চ
263.49
ভীষ্ম উবাচ
ততঃ পপাত শিরসা ব্রাহ্মণস্তোয়ধারিণে
উবাচ চৈনং ধর্মাত্মা মহান্মেঽনুগ্রহঃ কৃতঃ
263.50
কামলোভানুবন্ধেন পুরা তে যদসূয়িতম্
ময়া স্নেহমবিজ্ঞায় তত্র মে ক্ষন্তুমর্হসি
263.51
ক্ষান্তমেব ময়েত্যুক্ত্বা কুণ্ডধারো দ্বিজর্ষভম্
সংপরিষ্বজ্য বাহুভ্যাং তত্রৈবান্তরধীয়ত
263.52
ততঃ সর্বানিমাঁল্লোকান্ব্রাহ্মণোঽনুচচার হ
কুণ্ডধারপ্রসাদেন তপসা যোজিতঃ পুরা
263.53
বিহায়সা চ গমনং তথা সংকল্পিতার্থতা
ধর্মাচ্ছক্ত্যা তথা যোগাদ্যা চৈব পরমা গতিঃ
263.54
দেবতা ব্রাহ্মণাঃ সন্তো যক্ষা মানুষচারণাঃ
ধার্মিকান্পূজয়ন্তীহ ন ধনাঢ্যান্ন কামিনঃ
263.55
সুপ্রসন্না হি তে দেবা যত্তে ধর্মে রতা মতিঃ
ধনে সুখকলা কাচিদ্ধর্মে তু পরমং সুখম্