অধ্যায় 264

264.1

যুধিষ্ঠির উবাচ
বহূনাং যজ্ঞতপসামেকার্থানাং পিতামহ
ধর্মার্থং ন সুখার্থার্থং কথং যজ্ঞঃ সমাহিতঃ

ভীষ্ম উবাচ
অত্র তে বর্তয়িষ্যামি নারদেনানুকীর্তিতম্
উঞ্ছবৃত্তেঃ পুরাবৃত্তং যজ্ঞার্থে ব্রাহ্মণস্য হ

রাষ্ট্রে ধর্মোত্তরে শ্রেষ্ঠে বিদর্ভেষ্বভবদ্দ্বিজঃ
উঞ্ছবৃত্তিরৃষিঃ কশ্চিদ্যজ্ঞে যজ্ঞং সমাদধে

শ্যামাকমশনং তত্র সূর্যপত্নী সুবর্চলা
তিক্তং চ বিরসং শাকং তপসা স্বাদুতাং গতম্

উপগম্য বনে পৃথ্বীং সর্বভূতবিহিংসয়া
অপি মূলফলৈরিজ্যো যজ্ঞঃ স্বর্গ্যঃ পরংতপ

তস্য ভার্যা ব্রতকৃশা শুচিঃ পুষ্করচারিণী
যজ্ঞপত্নীত্বমানীতা সত্যেনানুবিধীয়তে
সা তু শাপপরিত্রস্তা ন স্বভাবানুবর্তিনী

ময়ূরজীর্ণপর্ণানাং বস্ত্রং তস্যাশ্চ পর্ণিনাম্
অকামায়াঃ কৃতং তত্র যজ্ঞে হোত্রানুমার্গতঃ

শুক্রস্য পুনরাজাতিরপধ্যানাদধর্মবিৎ
তস্মিন্বনে সমীপস্থো মৃগোঽভূত্সহচারিকঃ
বচোভিরব্রবীত্সত্যং ত্বয়া দুষ্কৃতকং কৃতম্

যদি মন্ত্রাঙ্গহীনোঽয়ং যজ্ঞো ভবতি বৈকৃতঃ
মাং ভোঃ প্রক্ষিপ হোত্রে ত্বং গচ্ছ স্বর্গমতন্দ্রিতঃ

ততস্তু যজ্ঞে সাবিত্রী সাক্ষাত্তং সংন্যমন্ত্রয়ৎ
নিমন্ত্রয়ন্তী প্রত্যুক্তা ন হন্যাং সহবাসিনম্

এবমুক্তা নিবৃত্তা সা প্রবিষ্টা যজ্ঞপাবকম্
কিং নু দুশ্চরিতং যজ্ঞে দিদৃক্ষুঃ সা রসাতলম্

সা তু বদ্ধাঞ্জলিং সত্যময়াচদ্ধরিণং পুনঃ
সত্যেন সংপরিষ্বজ্য সংদিষ্টো গম্যতামিতি

ততঃ স হরিণো গত্বা পদান্যষ্টৌ ন্যবর্তত
সাধু হিংসয় মাং সত্য হতো যাস্যামি সদ্গতিম্

পশ্য হ্যপ্সরসো দিব্যা ময়া দত্তেন চক্ষুষা
বিমানানি বিচিত্রাণি গন্ধর্বাণাং মহাত্মনাম্

ততঃ সুরুচিরং দৃষ্ট্বা স্পৃহালগ্নেন চক্ষুষা
মৃগমালোক্য হিংসায়াং স্বর্গবাসং সমর্থয়ৎ

স তু ধর্মো মৃগো ভূত্বা বহুবর্ষোষিতো বনে
তস্য নিষ্কৃতিমাধত্ত ন হ্যসৌ যজ্ঞসংবিধিঃ

তস্য তেন তু ভাবেন মৃগহিংসাত্মনস্তদা
তপো মহত্সমুচ্ছিন্নং তস্মাদ্ধিংসা ন যজ্ঞিয়া

ততস্তং ভগবান্ধর্মো যজ্ঞং যাজয়ত স্বয়ম্
সমাধানং চ ভার্যায়া লেভে স তপসা পরম্

অহিংসা সকলো ধর্মো হিংসা যজ্ঞেঽসমাহিতা
সত্যং তেঽহং প্রবক্ষ্যামি যো ধর্মঃ সত্যবাদিনাম্