অধ্যায় 265

265.1

যুধিষ্ঠির উবাচ
কথং ভবতি পাপাত্মা কথং ধর্মং করোতি বা
কেন নির্বেদমাদত্তে মোক্ষং বা কেন গচ্ছতি

ভীষ্ম উবাচ
বিদিতাঃ সর্বধর্মাস্তে স্থিত্যর্থমনুপৃচ্ছসি
শৃণু মোক্ষং সনির্বেদং পাপং ধর্মং চ মূলতঃ

বিজ্ঞানার্থং হি পঞ্চানামিচ্ছা পূর্বং প্রবর্ততে
প্রাপ্য তাঞ্জায়তে কামো দ্বেষো বা ভরতর্ষভ

ততস্তদর্থং যততে কর্ম চারভতে পুনঃ
ইষ্টানাং রূপগন্ধানামভ্যাসং চ চিকীর্ষতি

ততো রাগঃ প্রভবতি দ্বেষশ্চ তদনন্তরম্
ততো লোভঃ প্রভবতি মোহশ্চ তদনন্তরম্

লোভমোহাভিভূতস্য রাগদ্বেষান্বিতস্য চ
ন ধর্মে জায়তে বুদ্ধির্ব্যাজাদ্ধর্মং করোতি চ

ব্যাজেন চরতো ধর্মমর্থব্যাজোঽপি রোচতে
ব্যাজেন সিধ্যমানেষু ধনেষু কুরুনন্দন

তত্রৈব কুরুতে বুদ্ধিং ততঃ পাপং চিকীর্ষতি
সুহৃদ্ভির্বার্যমাণোঽপি পণ্ডিতৈশ্চাপি ভারত

উত্তরং ন্যায়সংবদ্ধং ব্রবীতি বিধিয়োজিতম্
অধর্মস্ত্রিবিধস্তস্য বর্ধতে রাগমোহজঃ

পাপং চিন্তয়তে চৈব প্রব্রবীতি করোতি চ
তস্যাধর্মপ্রবৃত্তস্য দোষান্পশ্যন্তি সাধবঃ

একশীলাশ্চ মিত্রত্বং ভজন্তে পাপকর্মিণঃ
স নেহ সুখমাপ্নোতি কুত এব পরত্র বৈ

এবং ভবতি পাপাত্মা ধর্মাত্মানং তু মে শৃণু
যথা কুশলধর্মা স কুশলং প্রতিপদ্যতে

য এতান্প্রজ্ঞয়া দোষান্পূর্বমেবানুপশ্যতি
কুশলঃ সুখদুঃখানাং সাধূংশ্চাপ্যুপসেবতে

তস্য সাধুসমাচারাদভ্যাসাচ্চৈব বর্ধতে
প্রজ্ঞা ধর্মে চ রমতে ধর্মং চৈবোপজীবতি

সোঽথ ধর্মাদবাপ্তেষু ধনেষু কুরুতে মনঃ
তস্যৈব সিঞ্চতে মূলং গুণান্পশ্যতি যত্র বৈ

ধর্মাত্মা ভবতি হ্যেবং মিত্রং চ লভতে শুভম্
স মিত্রধনলাভাত্তু প্রেত্য চেহ চ নন্দতি

শব্দে স্পর্শে তথা রূপে রসে গন্ধে চ ভারত
প্রভুত্বং লভতে জন্তুর্ধর্মস্যৈতত্ফলং বিদুঃ

স ধর্মস্য ফলং লব্ধ্বা ন তৃপ্যতি যুধিষ্ঠির
অতৃপ্যমাণো নির্বেদমাদত্তে জ্ঞানচক্ষুষা

প্রজ্ঞাচক্ষুর্যদা কামে দোষমেবানুপশ্যতি
বিরজ্যতে তদা কামান্ন চ ধর্মং বিমুঞ্চতি

সর্বত্যাগে চ যততে দৃষ্ট্বা লোকং ক্ষয়াত্মকম্
ততো মোক্ষায় যততে নানুপায়াদুপায়তঃ

শনৈর্নির্বেদমাদত্তে পাপং কর্ম জহাতি চ
ধর্মাত্মা চৈব ভবতি মোক্ষং চ লভতে পরম্

এতত্তে কথিতং তাত যন্মাং ত্বং পরিপৃচ্ছসি
পাপং ধর্মং তথা মোক্ষং নির্বেদং চৈব ভারত

তস্মাদ্ধর্মে প্রবর্তেথাঃ সর্বাবস্থং যুধিষ্ঠির
ধর্মে স্থিতানাং কৌন্তেয় সিদ্ধির্ভবতি শাশ্বতী