অধ্যায় 266

266.1

যুধিষ্ঠির উবাচ
মোক্ষঃ পিতামহেনোক্ত উপায়ান্নানুপায়তঃ
তমুপায়ং যথান্যায়ং শ্রোতুমিচ্ছামি ভারত

ভীষ্ম উবাচ
ত্বয্যেবৈতন্মহাপ্রাজ্ঞ যুক্তং নিপুণদর্শনম্
যদুপায়েন সর্বার্থান্নিত্যং মৃগয়সেঽনঘ

করণে ঘটস্য যা বুদ্ধির্ঘটোত্পত্তৌ ন সানঘ
এবং ধর্মাভ্যুপায়েষু নান্যদ্ধর্মেষু কারণম্

পূর্বে সমুদ্রে যঃ পন্থা ন স গচ্ছতি পশ্চিমম্
একঃ পন্থা হি মোক্ষস্য তন্মে বিস্তরতঃ শৃণু

ক্ষময়া ক্রোধমুচ্ছিন্দ্যাত্কামং সংকল্পবর্জনাৎ
সত্ত্বসংসেবনাদ্ধীরো নিদ্রামুচ্ছেতুমর্হতি

অপ্রমাদাদ্ভয়ং রক্ষেচ্ছ্বাসং ক্ষেত্রজ্ঞশীলনাৎ
ইচ্ছাং দ্বেষং চ কামং চ ধৈর্যেণ বিনিবর্তয়েৎ

ভ্রমং প্রমোহমাবর্তমভ্যাসাদ্বিনিবর্তয়েৎ
নিদ্রাং চ প্রতিভাং চৈব জ্ঞানাভ্যাসেন তত্ত্ববিৎ

উপদ্রবাংস্তথা রোগান্হিতজীর্ণমিতাশনাৎ
লোভং মোহং চ সংতোষাদ্বিষয়াংস্তত্ত্বদর্শনাৎ

অনুক্রোশাদধর্মং চ জয়েদ্ধর্মমুপেক্ষয়া
আয়ত্যা চ জয়েদাশামর্থং সঙ্গবিবর্জনাৎ

অনিত্যত্বেন চ স্নেহং ক্ষুধং যোগেন পণ্ডিতঃ
কারুণ্যেনাত্মনো মানং তৃষ্ণাং চ পরিতোষতঃ

উত্থানেন জয়েত্তন্দ্রীং বিতর্কং নিশ্চয়াজ্জয়েৎ
মৌনেন বহুভাষ্যং চ শৌর্যেণ চ ভয়ং জয়েৎ

যচ্ছেদ্বাঙ্মনসী বুদ্ধ্যা তাং যচ্ছেজ্জ্ঞানচক্ষুষা
জ্ঞানমাত্মা মহান্যচ্ছেত্তং যচ্ছেচ্ছান্তিরাত্মনঃ

তদেতদুপশান্তেন বোদ্ধব্যং শুচিকর্মণা
যোগদোষান্সমুচ্ছিদ্য পঞ্চ যান্কবয়ো বিদুঃ

কামং ক্রোধং চ লোভং চ ভয়ং স্বপ্নং চ পঞ্চমম্
পরিত্যজ্য নিষেবেত তথেমান্যোগসাধনান্

ধ্যানমধ্যয়নং দানং সত্যং হ্রীরার্জবং ক্ষমা
শৌচমাহারতঃ শুদ্ধিরিন্দ্রিয়াণাং চ সংয়মঃ

এতৈর্বিবর্ধতে তেজঃ পাপ্মানমপহন্তি চ
সিধ্যন্তি চাস্য সংকল্পা বিজ্ঞানং চ প্রবর্ততে

ধূতপাপঃ স তেজস্বী লঘ্বাহারো জিতেন্দ্রিয়ঃ
কামক্রোধৌ বশে কৃত্বা নিনীষেদ্ব্রহ্মণঃ পদম্

অমূঢত্বমসঙ্গিত্বং কামক্রোধবিবর্জনম্
অদৈন্যমনুদীর্ণত্বমনুদ্বেগো ব্যবস্থিতিঃ

এষ মার্গো হি মোক্ষস্য প্রসন্নো বিমলঃ শুচিঃ
তথা বাক্কায়মনসাং নিয়মঃ কামতোঽন্যথা