Utshovঅধ্যায় 267
267.1
ভীষ্ম উবাচ
অত্রৈবোদাহরন্তীমমিতিহাসং পুরাতনম্
নারদস্য চ সংবাদং দেবলস্যাসিতস্য চ
267.2
আসীনং দেবলং বৃদ্ধং বুদ্ধ্বা বুদ্ধিমতাং বরঃ
নারদঃ পরিপপ্রচ্ছ ভূতানাং প্রভবাপ্যয়ম্
267.3
কুতঃ সৃষ্টমিদং বিশ্বং ব্রহ্মন্স্থাবরজঙ্গমম্
প্রলয়ে চ কমভ্যেতি তদ্ভবান্প্রব্রবীতু মে
267.4
অসিত উবাচ
যেভ্যঃ সৃজতি ভূতানি কালো ভাবপ্রচোদিতঃ
মহাভূতানি পঞ্চেতি তান্যাহুর্ভূতচিন্তকাঃ
267.5
তেভ্যঃ সৃজতি ভূতানি কাল আত্মপ্রচোদিতঃ
এতেভ্যো যঃ পরং ব্রূয়াদসদ্ব্রূয়াদসংশয়ম্
267.6
বিদ্ধি নারদ পঞ্চৈতাঞ্শাশ্বতানচলান্ধ্রুবান্
মহতস্তেজসো রাশীন্কালষষ্ঠান্স্বভাবতঃ
267.7
আপশ্চৈবান্তরিক্ষং চ পৃথিবী বায়ুপাবকৌ
অসিদ্ধিঃ পরমেতেভ্যো ভূতেভ্যো মুক্তসংশয়ম্
267.8
নোপপত্ত্যা ন বা যুক্ত্যা ত্বসদ্ব্রূয়াদসংশয়ম্
বেত্থ তানভিনির্বৃত্তান্ষডেতে যস্য রাশয়ঃ
267.9
পঞ্চৈব তানি কালশ্চ ভাবাভাবৌ চ কেবলৌ
অষ্টৌ ভূতানি ভূতানাং শাশ্বতানি ভবাপ্যয়ৌ
267.10
অভাবাদ্ভাবিতেষ্বেব তেভ্যশ্চ প্রভবন্ত্যপি
বিনষ্টোঽপি চ তান্যেব জন্তুর্ভবতি পঞ্চধা
267.11
তস্য ভূমিময়ো দেহঃ শ্রোত্রমাকাশসংভবম্
সূর্যশ্চক্ষুরসুর্বায়ুরদ্ভ্যস্তু খলু শোণিতম্
267.12
চক্ষুষী নাসিকাকর্ণৌ ত্বগ্জিহ্বেতি চ পঞ্চমী
ইন্দ্রিয়াণীন্দ্রিয়ার্থানাং জ্ঞানানি কবয়ো বিদুঃ
267.13
দর্শনং শ্রবণং ঘ্রাণং স্পর্শনং রসনং তথা
উপপত্ত্যা গুণান্বিদ্ধি পঞ্চ পঞ্চসু পঞ্চধা
267.14
রূপং গন্ধো রসঃ স্পর্শঃ শব্দশ্চৈবাথ তদ্গুণাঃ
ইন্দ্রিয়ৈরুপলভ্যন্তে পঞ্চধা পঞ্চ পঞ্চভিঃ
267.15
রূপং গন্ধং রসং স্পর্শং শব্দং চৈতাংস্তু তদ্গুণান্
ইন্দ্রিয়াণি ন বুধ্যন্তে ক্ষেত্রজ্ঞস্তৈস্তু বুধ্যতে
267.16
চিত্তমিন্দ্রিয়সংঘাতাত্পরং তস্মাত্পরং মনঃ
মনসস্তু পরা বুদ্ধিঃ ক্ষেত্রজ্ঞো বুদ্ধিতঃ পরঃ
267.17
পূর্বং চেতয়তে জন্তুরিন্দ্রিয়ৈর্বিষয়ান্পৃথক্
বিচার্য মনসা পশ্চাদথ বুদ্ধ্যা ব্যবস্যতি
ইন্দ্রিয়ৈরুপলব্ধার্থান্সর্বান্যস্ত্বধ্যবস্যতি
267.18
চিত্তমিন্দ্রিয়সংঘাতং মনো বুদ্ধিং তথাষ্টমীম্
অষ্টৌ জ্ঞানেন্দ্রিয়াণ্যাহুরেতান্যধ্যাত্মচিন্তকাঃ
267.19
পাণিপাদং চ পায়ুশ্চ মেহনং পঞ্চমং মুখম্
ইতি সংশব্দ্যমানানি শৃণু কর্মেন্দ্রিয়াণ্যপি
267.20
জল্পনাভ্যবহারার্থং মুখমিন্দ্রিয়মুচ্যতে
গমনেন্দ্রিয়ং তথা পাদৌ কর্মণঃ করণে করৌ
267.21
পায়ূপস্থৌ বিসর্গার্থমিন্দ্রিয়ে তুল্যকর্মণী
বিসর্গে চ পুরীষস্য বিসর্গে চাভিকামিকে
267.22
বলং ষষ্ঠং ষডেতানি বাচা সম্যগ্যথাগমম্
জ্ঞানচেষ্টেন্দ্রিয়গুণাঃ সর্বে সংশব্দিতা ময়া
267.23
ইন্দ্রিয়াণাং স্বকর্মভ্যঃ শ্রমাদুপরমো যদা
ভবতীন্দ্রিয়সংন্যাসাদথ স্বপিতি বৈ নরঃ
267.24
ইন্দ্রিয়াণাং ব্যুপরমে মনোঽনুপরতং যদি
সেবতে বিষয়ানেব তদ্বিদ্যাত্স্বপ্নদর্শনম্
267.25
সাত্ত্বিকাশ্চৈব যে ভাবাস্তথা রাজসতামসাঃ
কর্ময়ুক্তান্প্রশংসন্তি সাত্ত্বিকানিতরাংস্তথা
267.26
আনন্দঃ কর্মণাং সিদ্ধিঃ প্রতিপত্তিঃ পরা গতিঃ
সাত্ত্বিকস্য নিমিত্তানি ভাবান্সংশ্রয়তে স্মৃতিঃ
267.27
জন্তুষ্বেকতমেষ্বেবং ভাবা যে বিধিমাস্থিতাঃ
ভাবয়োরীপ্সিতং নিত্যং প্রত্যক্ষগমনং দ্বয়োঃ
267.28
ইন্দ্রিয়াণি চ ভাবাশ্চ গুণাঃ সপ্তদশ স্মৃতাঃ
তেষামষ্টাদশো দেহী যঃ শরীরে স শাশ্বতঃ
267.29
অথ বা সশরীরাস্তে গুণাঃ সর্বে শরীরিণাম্
সংশ্রিতাস্তদ্বিয়োগে হি সশরীরা ন সন্তি তে
267.30
অথ বা সংনিপাতোঽয়ং শরীরং পাঞ্চভৌতিকম্
একশ্চ দশ চাষ্টৌ চ গুণাঃ সহ শরীরিণাম্
ঊষ্মণা সহ বিংশো বা সংঘাতঃ পাঞ্চভৌতিকঃ
267.31
মহান্সংধারয়ত্যেতচ্ছরীরং বায়ুনা সহ
তস্যাস্য ভাবয়ুক্তস্য নিমিত্তং দেহভেদনে
267.32
যথৈবোত্পদ্যতে কিংচিত্পঞ্চত্বং গচ্ছতে তথা
পুণ্যপাপবিনাশান্তে পুণ্যপাপসমীরিতম্
দেহং বিশতি কালেন ততোঽয়ং কর্মসংভবম্
267.33
হিত্বা হিত্বা হ্যয়ং প্রৈতি দেহাদ্দেহং কৃতাশ্রয়ঃ
কালসংচোদিতঃ ক্ষেত্রী বিশীর্ণাদ্বা গৃহাদ্গৃহম্
267.34
তত্র নৈবানুতপ্যন্তে প্রাজ্ঞা নিশ্চিতনিশ্চয়াঃ
কৃপণাস্ত্বনুতপ্যন্তে জনাঃ সংবন্ধিমানিনঃ
267.35
ন হ্যয়ং কস্যচিত্কশ্চিন্নাস্য কশ্চন বিদ্যতে
ভবত্যেকো হ্যয়ং নিত্যং শরীরে সুখদুঃখভাক্
267.36
নৈব সংজায়তে জন্তুর্ন চ জাতু বিপদ্যতে
যাতি দেহময়ং ভুক্ত্বা কদাচিত্পরমাং গতিম্
267.37
পুণ্যপাপময়ং দেহং ক্ষপয়ন্কর্মসংচয়াৎ
ক্ষীণদেহঃ পুনর্দেহী ব্রহ্মত্বমুপগচ্ছতি
267.38
পুণ্যপাপক্ষয়ার্থং চ সাংখ্যং জ্ঞানং বিধীয়তে
তত্ক্ষয়ে হ্যস্য পশ্যন্তি ব্রহ্মভাবে পরাং গতিম্