অধ্যায় 268

268.1

যুধিষ্ঠির উবাচ
ভ্রাতরঃ পিতরঃ পুত্রা জ্ঞাতয়ঃ সুহৃদস্তথা
অর্থহেতোর্হতাঃ ক্রূরৈরস্মাভিঃ পাপবুদ্ধিভিঃ

যেয়মর্থোদ্ভবা তৃষ্ণা কথমেতাং পিতামহ
নিবর্তয়েম পাপং হি তৃষ্ণয়া কারিতা বয়ম্

ভীষ্ম উবাচ
অত্রাপ্যুদাহরন্তীমমিতিহাসং পুরাতনম্
গীতং বিদেহরাজেন মাণ্ডব্যায়ানুপৃচ্ছতে

সুসুখং বত জীবামি যস্য মে নাস্তি কিংচন
মিথিলায়াং প্রদীপ্তায়াং ন মে দহ্যতি কিংচন

অর্থাঃ খলু সমৃদ্ধা হি বাঢং দুঃখং বিজানতাম্
অসমৃদ্ধাস্ত্বপি সদা মোহয়ন্ত্যবিচক্ষণান্

যচ্চ কামসুখং লোকে যচ্চ দিব্যং মহত্সুখম্
তৃষ্ণাক্ষয়সুখস্যৈতে নার্হতঃ ষোডশীং কলাম্

যথৈব শৃঙ্গং গোঃ কালে বর্ধমানস্য বর্ধতে
তথৈব তৃষ্ণা বিত্তেন বর্ধমানেন বর্ধতে

কিংচিদেব মমত্বেন যদা ভবতি কল্পিতম্
তদেব পরিতাপায় নাশে সংপদ্যতে পুনঃ

ন কামাননুরুধ্যেত দুঃখং কামেষু বৈ রতিঃ
প্রাপ্যার্থমুপয়ুঞ্জীত ধর্মে কামং বিবর্জয়েৎ

বিদ্বান্সর্বেষু ভূতেষু ব্যাঘ্রমাংসোপমো ভবেৎ
কৃতকৃত্যো বিশুদ্ধাত্মা সর্বং ত্যজতি বৈ সহ

উভে সত্যানৃতে ত্যক্ত্বা শোকানন্দৌ প্রিয়াপ্রিয়ে
ভয়াভয়ে চ সংত্যজ্য সংপ্রশান্তো নিরাময়ঃ

যা দুস্ত্যজা দুর্মতিভির্যা ন জীর্যতি জীর্যতঃ
যোঽসৌ প্রাণান্তিকো রোগস্তাং তৃষ্ণাং ত্যজতঃ সুখম্

চারিত্রমাত্মনঃ পশ্যংশ্চন্দ্রশুদ্ধমনাময়ম্
ধর্মাত্মা লভতে কীর্তিং প্রেত্য চেহ যথাসুখম্

রাজ্ঞস্তদ্বচনং শ্রুত্বা প্রীতিমানভবদ্দ্বিজঃ
পূজয়িত্বা চ তদ্বাক্যং মাণ্ডব্যো মোক্ষমাশ্রিতঃ