অধ্যায় 269

269.1

যুধিষ্ঠির উবাচ
কিংশীলঃ কিংসমাচারঃ কিংবিদ্যঃ কিংপরায়ণঃ
প্রাপ্নোতি ব্রহ্মণঃ স্থানং যত্পরং প্রকৃতের্ধ্রুবম্

ভীষ্ম উবাচ
মোক্ষধর্মেষু নিরতো লঘ্বাহারো জিতেন্দ্রিয়ঃ
প্রাপ্নোতি পরমং স্থানং যত্পরং প্রকৃতের্ধ্রুবম্

স্বগৃহাদভিনিঃসৃত্য লাভালাভে সমো মুনিঃ
সমুপোঢেষু কামেষু নিরপেক্ষঃ পরিব্রজেৎ

ন চক্ষুষা ন মনসা ন বাচা দূষয়েদপি
ন প্রত্যক্ষং পরোক্ষং বা দূষণং ব্যাহরেত্ক্বচিৎ

ন হিংস্যাত্সর্বভূতানি মৈত্রায়ণগতিশ্চরেৎ
নেদং জীবিতমাসাদ্য বৈরং কুর্বীত কেনচিৎ

অতিবাদাংস্তিতিক্ষেত নাভিমন্যেত্কথংচন
ক্রোধ্যমানঃ প্রিয়ং ব্রূয়াদাক্রুষ্টঃ কুশলং বদেৎ

প্রদক্ষিণং প্রসব্যং চ গ্রামমধ্যে ন চাচরেৎ
ভৈক্ষচর্যামনাপন্নো ন গচ্ছেত্পূর্বকেতিতঃ

অবকীর্ণঃ সুগুপ্তশ্চ ন বাচা হ্যপ্রিয়ং বদেৎ
মৃদুঃ স্যাদপ্রতিক্রূরো বিস্রব্ধঃ স্যাদরোষণঃ

বিধূমে ন্যস্তমুসলে ব্যঙ্গারে ভুক্তবজ্জনে
অতীতে পাত্রসংচারে ভিক্ষাং লিপ্সেত বৈ মুনিঃ

অনুয়াত্রিকমর্থস্য মাত্রালাভেষ্বনাদৃতঃ
অলাভে ন বিহন্যেত লাভশ্চৈনং ন হর্ষয়েৎ

লাভং সাধারণং নেচ্ছেন্ন ভুঞ্জীতাভিপূজিতঃ
অভিপূজিতলাভং হি জুগুপ্সেতৈব তাদৃশঃ

ন চান্নদোষান্নিন্দেত ন গুণানভিপূজয়েৎ
শয্যাসনে বিবিক্তে চ নিত্যমেবাভিপূজয়েৎ

শূন্যাগারং বৃক্ষমূলমরণ্যমথ বা গুহাম্
অজ্ঞাতচর্যাং গত্বান্যাং ততোঽন্যত্রৈব সংবিশেৎ

অনুরোধবিরোধাভ্যাং সমঃ স্যাদচলো ধ্রুবঃ
সুকৃতং দুষ্কৃতং চোভে নানুরুধ্যেত কর্মণি

বাচো বেগং মনসঃ ক্রোধবেগং; বিবিত্সাবেগমুদরোপস্থবেগম্
এতান্বেগান্বিনয়েদ্বৈ তপস্বী; নিন্দা চাস্য হৃদয়ং নোপহন্যাৎ

মধ্যস্থ এব তিষ্ঠেত প্রশংসানিন্দয়োঃ সমঃ
এতত্পবিত্রং পরমং পরিব্রাজক আশ্রমে

মহাত্মা সুব্রতো দান্তঃ সর্বত্রৈবানপাশ্রিতঃ
অপূর্বচারকঃ সৌম্যো অনিকেতঃ সমাহিতঃ

বানপ্রস্থগৃহস্থাভ্যাং ন সংসৃজ্যেত কর্হিচিৎ
অজ্ঞাতলিপ্সাং লিপ্সেত ন চৈনং হর্ষ আবিশেৎ

বিজানতাং মোক্ষ এষ শ্রমঃ স্যাদবিজানতাম্
মোক্ষয়ানমিদং কৃত্স্নং বিদুষাং হারিতোঽব্রবীৎ

অভয়ং সর্বভূতেভ্যো দত্ত্বা যঃ প্রব্রজেদ্গৃহাৎ
লোকাস্তেজোময়াস্তস্য তথানন্ত্যায় কল্পতে