Utshovঅধ্যায় 270
270.1
যুধিষ্ঠির উবাচ
ধন্যা ধন্যা ইতি জনাঃ সর্বেঽস্মান্প্রবদন্ত্যুত
ন দুঃখিততরঃ কশ্চিত্পুমানস্মাভিরস্তি হ
270.2
লোকসংভাবিতৈর্দুঃখং যত্প্রাপ্তং কুরুসত্তম
প্রাপ্য জাতিং মনুষ্যেষু দেবৈরপি পিতামহ
270.3
কদা বয়ং করিষ্যামঃ সংন্যাসং দুঃখসংজ্ঞকম্
দুঃখমেতচ্ছরীরাণাং ধারণং কুরুসত্তম
270.4
বিমুক্তাঃ সপ্তদশভির্হেতুভূতৈশ্চ পঞ্চভিঃ
ইন্দ্রিয়ার্থৈর্গুণৈশ্চৈব অষ্টাভিঃ প্রপিতামহ
270.5
ন গচ্ছন্তি পুনর্ভাবং মুনয়ঃ সংশিতব্রতাঃ
কদা বয়ং ভবিষ্যামো রাজ্যং হিত্বা পরংতপ
270.6
ভীষ্ম উবাচ
নাস্ত্যনন্তং মহারাজ সর্বং সংখ্যানগোচরম্
পুনর্ভাবোঽপি সংখ্যাতো নাস্তি কিংচিদিহাচলম্
270.7
ন চাপি গম্যতে রাজন্নৈষ দোষঃ প্রসঙ্গতঃ
উদ্যোগাদেব ধর্মজ্ঞ কালেনৈব গমিষ্যথ
270.8
ঈশোঽয়ং সততং দেহী নৃপতে পুণ্যপাপয়োঃ
তত এব সমুত্থেন তমসা রুধ্যতেঽপি চ
270.9
যথাঞ্জনময়ো বায়ুঃ পুনর্মানঃশিলং রজঃ
অনুপ্রবিশ্য তদ্বর্ণো দৃশ্যতে রঞ্জয়ন্দিশঃ
270.10
তথা কর্মফলৈর্দেহী রঞ্জিতস্তমসাবৃতঃ
বিবর্ণো বর্ণমাশ্রিত্য দেহেষু পরিবর্ততে
270.11
জ্ঞানেন হি যদা জন্তুরজ্ঞানপ্রভবং তমঃ
ব্যপোহতি তদা ব্রহ্ম প্রকাশেত সনাতনম্
270.12
অয়ত্নসাধ্যং মুনয়ো বদন্তি; যে চাপি মুক্তাস্ত উপাসিতব্যাঃ
ত্বয়া চ লোকেন চ সামরেণ; তস্মান্ন শাম্যন্তি মহর্ষিসংঘাঃ
270.13
অস্মিন্নর্থে পুরা গীতং শৃণুষ্বৈকমনা নৃপ
যথা দৈত্যেন বৃত্রেণ ভ্রষ্টৈশ্বর্যেণ চেষ্টিতম্
270.14
নির্জিতেনাসহায়েন হৃতরাজ্যেন ভারত
অশোচতা শত্রুমধ্যে বুদ্ধিমাস্থায় কেবলাম্
270.15
ভ্রষ্টৈশ্বর্যং পুরা বৃত্রমুশনা বাক্যমব্রবীৎ
কচ্চিত্পরাজিতস্যাদ্য ন ব্যথা তেঽস্তি দানব
270.16
বৃত্র উবাচ
সত্যেন তপসা চৈব বিদিত্বা সংক্ষয়ং হ্যহম্
ন শোচামি ন হৃষ্যামি ভূতানামাগতিং গতিম্
270.17
কালসংচোদিতা জীবা মজ্জন্তি নরকেঽবশাঃ
পরিদৃষ্টানি সর্বাণি দিব্যান্যাহুর্মনীষিণঃ
270.18
ক্ষপয়িত্বা তু তং কালং গণিতং কালচোদিতাঃ
সাবশেষেণ কালেন সংভবন্তি পুনঃ পুনঃ
270.19
তির্যগ্যোনিসহস্রাণি গত্বা নরকমেব চ
নির্গচ্ছন্ত্যবশা জীবাঃ কালবন্ধনবন্ধনাঃ
270.20
এবং সংসরমাণানি জীবান্যহমদৃষ্টবান্
যথা কর্ম তথা লাভ ইতি শাস্ত্রনিদর্শনম্
270.21
তির্যগ্গচ্ছন্তি নরকং মানুষ্যং দৈবমেব চ
সুখদুঃখে প্রিয়দ্বেষ্যে চরিত্বা পূর্বমেব চ
270.22
কৃতান্তবিধিসংয়ুক্তং সর্বলোকঃ প্রপদ্যতে
গতং গচ্ছন্তি চাধ্বানং সর্বভূতানি সর্বদা
270.23
ভীষ্ম উবাচ
কালসংখ্যানসংখ্যাতং সৃষ্টিস্থিতিপরায়ণম্
তং ভাষমাণং ভগবানুশনা প্রত্যভাষত
ভীমান্দুষ্টপ্রলাপাংস্ত্বং তাত কস্মাত্প্রভাষসে
270.24
বৃত্র উবাচ
প্রত্যক্ষমেতদ্ভবতস্তথান্যেষাং মনীষিণাম্
ময়া যজ্জয়লুব্ধেন পুরা তপ্তং মহত্তপঃ
270.25
গন্ধানাদায় ভূতানাং রসাংশ্চ বিবিধানপি
অবর্ধং ত্রীন্সমাক্রম্য লোকান্বৈ স্বেন তেজসা
270.26
জ্বালামালাপরিক্ষিপ্তো বৈহায়সচরস্তথা
অজেয়ঃ সর্বভূতানামাসং নিত্যমপেতভীঃ
270.27
ঐশ্বর্যং তপসা প্রাপ্তং ভ্রষ্টং তচ্চ স্বকর্মভিঃ
ধৃতিমাস্থায় ভগবন্ন শোচামি ততস্ত্বহম্
270.28
যুয়ুত্সতা মহেন্দ্রেণ পুরা সার্ধং মহাত্মনা
ততো মে ভগবান্দৃষ্টো হরির্নারায়ণঃ প্রভুঃ
270.29
বৈকুণ্ঠঃ পুরুষো বিষ্ণুঃ শুক্লোঽনন্তঃ সনাতনঃ
মুঞ্জকেশো হরিশ্মশ্রুঃ সর্বভূতপিতামহঃ
270.30
নূনং তু তস্য তপসঃ সাবশেষং মমাস্তি বৈ
যদহং প্রষ্টুমিচ্ছামি ভবন্তং কর্মণঃ ফলম্
270.31
ঐশ্বর্যং বৈ মহদ্ব্রহ্মন্কস্মিন্বর্ণে প্রতিষ্ঠিতম্
নিবর্ততে চাপি পুনঃ কথমৈশ্বর্যমুত্তমম্
270.32
কস্মাদ্ভূতানি জীবন্তি প্রবর্তন্তেঽথ বা পুনঃ
কিং বা ফলং পরং প্রাপ্য জীবস্তিষ্ঠতি শাশ্বতঃ
270.33
কেন বা কর্মণা শক্যমথ জ্ঞানেন কেন বা
ব্রহ্মর্ষে তত্ফলং প্রাপ্তুং তন্মে ব্যাখ্যাতুমর্হসি
270.34
ইতীদমুক্তঃ স মুনিস্তদানীং; প্রত্যাহ যত্তচ্ছৃণু রাজসিংহ
ময়োচ্যমানং পুরুষর্ষভ ত্ব;মনন্যচিত্তঃ সহ সোদরীয়ৈঃ