Utshovঅধ্যায় 271
271.1
উশনোবাচ
নমস্তস্মৈ ভগবতে দেবায় প্রভবিষ্ণবে
যস্য পৃথ্বীতলং তাত সাকাশং বাহুগোচরম্
271.2
মূর্ধা যস্য ত্বনন্তং চ স্থানং দানবসত্তম
তস্যাহং তে প্রবক্ষ্যামি বিষ্ণোর্মাহাত্ম্যমুত্তমম্
271.3
ভীষ্ম উবাচ
তয়োঃ সংবদতোরেবমাজগাম মহামুনিঃ
সনত্কুমারো ধর্মাত্মা সংশয়চ্ছেদনায় বৈ
271.4
স পূজিতোঽসুরেন্দ্রেণ মুনিনোশনসা তথা
নিষসাদাসনে রাজন্মহার্হে মুনিপুংগবঃ
271.5
তমাসীনং মহাপ্রাজ্ঞমুশনা বাক্যমব্রবীৎ
ব্রূহ্যস্মৈ দানবেন্দ্রায় বিষ্ণোর্মাহাত্ম্যমুত্তমম্
271.6
সনত্কুমারস্তু ততঃ শ্রুত্বা প্রাহ বচোঽর্থবৎ
বিষ্ণোর্মাহাত্ম্যসংয়ুক্তং দানবেন্দ্রায় ধীমতে
271.7
শৃণু সর্বমিদং দৈত্য বিষ্ণোর্মাহাত্ম্যমুত্তমম্
বিষ্ণৌ জগত্স্থিতং সর্বমিতি বিদ্ধি পরংতপ
271.8
সৃজত্যেষ মহাবাহো ভূতগ্রামং চরাচরম্
এষ চাক্ষিপতে কালে কালে বিসৃজতে পুনঃ
অস্মিন্গচ্ছন্তি বিলয়মস্মাচ্চ প্রভবন্ত্যুত
271.9
নৈষ দানবতা শক্যস্তপসা নৈব চেজ্যয়া
সংপ্রাপ্তুমিন্দ্রিয়াণাং তু সংয়মেনৈব শক্যতে
271.10
বাহ্যে চাভ্যন্তরে চৈব কর্মণা মনসি স্থিতঃ
নির্মলীকুরুতে বুদ্ধ্যা সোঽমুত্রানন্ত্যমশ্নুতে
271.11
যথা হিরণ্যকর্তা বৈ রূপ্যমগ্নৌ বিশোধয়েৎ
বহুশোঽতিপ্রয়ত্নেন মহতাত্মকৃতেন হ
271.12
তদ্বজ্জাতিশতৈর্জীবঃ শুধ্যতেঽল্পেন কর্মণা
যত্নেন মহতা চৈবাপ্যেকজাতৌ বিশুধ্যতে
271.13
লীলয়াল্পং যথা গাত্রাত্প্রমৃজ্যাদাত্মনো রজঃ
বহু যত্নেন মহতা দোষনির্হরণং তথা
271.14
যথা চাল্পেন মাল্যেন বাসিতং তিলসর্ষপম্
ন মুঞ্চতি স্বকং গন্ধং তদ্বত্সূক্ষ্মস্য দর্শনম্
271.15
তদেব বহুভির্মাল্যৈর্বাস্যমানং পুনঃ পুনঃ
বিমুঞ্চতি স্বকং গন্ধং মাল্যগন্ধেঽবতিষ্ঠতি
271.16
এবং জাতিশতৈর্যুক্তো গুণৈরেব প্রসঙ্গিষু
বুদ্ধ্যা নিবর্ততে দোষো যত্নেনাভ্যাসজেন বৈ
271.17
কর্মণা স্বেন রক্তানি বিরক্তানি চ দানব
যথা কর্মবিশেষাংশ্চ প্রাপ্নুবন্তি তথা শৃণু
271.18
যথা চ সংপ্রবর্তন্তে যস্মিংস্তিষ্ঠন্তি বা বিভো
তত্তেঽনুপূর্ব্যা ব্যাখ্যাস্যে তদিহৈকমনাঃ শৃণু
271.19
অনাদিনিধনঃ শ্রীমান্হরির্নারায়ণঃ প্রভুঃ
স বৈ সৃজতি ভূতানি স্থাবরাণি চরাণি চ
271.20
এষ সর্বেষু ভূতেষু ক্ষরশ্চাক্ষর এব চ
একাদশবিকারাত্মা জগত্পিবতি রশ্মিভিঃ
271.21
পাদৌ তস্য মহীং বিদ্ধি মূর্ধানং দিবমেব চ
বাহবস্তু দিশো দৈত্য শ্রোত্রমাকাশমেব চ
271.22
তস্য তেজোময়ঃ সূর্যো মনশ্চন্দ্রমসি স্থিতম্
বুদ্ধির্জ্ঞানগতা নিত্যং রসস্ত্বপ্সু প্রবর্ততে
271.23
ভ্রুবোরনন্তরাস্তস্য গ্রহা দানবসত্তম
নক্ষত্রচক্রং নেত্রাভ্যাং পাদয়োর্ভূশ্চ দানব
271.24
রজস্তমশ্চ সত্ত্বং চ বিদ্ধি নারায়ণাত্মকম্
সোঽঽশ্রমাণাং মুখং তাত কর্মণস্তত্ফলং বিদুঃ
271.25
অকর্মণঃ ফলং চৈব স এব পরমব্যয়ঃ
ছন্দাংসি তস্য রোমাণি অক্ষরং চ সরস্বতী
271.26
বহ্বাশ্রয়ো বহুমুখো ধর্মো হৃদি সমাশ্রিতঃ
স ব্রহ্মপরমো ধর্মস্তপশ্চ সদসচ্চ সঃ
271.27
শ্রুতিশাস্ত্রগ্রহোপেতঃ ষোডশর্ত্বিক্ক্রতুশ্চ সঃ
পিতামহশ্চ বিষ্ণুশ্চ সোঽশ্বিনৌ স পুরংদরঃ
271.28
মিত্রশ্চ বরুণশ্চৈব যমোঽথ ধনদস্তথা
তে পৃথগ্দর্শনাস্তস্য সংবিদন্তি তথৈকতাম্
একস্য বিদ্ধি দেবস্য সর্বং জগদিদং বশে
271.29
নানাভূতস্য দৈত্যেন্দ্র তস্যৈকত্বং বদত্যয়ম্
জন্তুঃ পশ্যতি জ্ঞানেন ততঃ সত্ত্বং প্রকাশতে
271.30
সংহারবিক্ষেপসহস্রকোটী;স্তিষ্ঠন্তি জীবাঃ প্রচরন্তি চান্যে
প্রজাবিসর্গস্য চ পারিমাণ্যং; বাপীসহস্রাণি বহূনি দৈত্য
271.31
বাপ্যঃ পুনর্যোজনবিস্তৃতাস্তাঃ; ক্রোশং চ গম্ভীরতয়াবগাঢাঃ
আয়ামতঃ পঞ্চশতাশ্চ সর্বাঃ; প্রত্যেকশো যোজনতঃ প্রবৃদ্ধাঃ
271.32
বাপ্যা জলং ক্ষিপ্যতি বালকোট্যা; ত্বহ্না সকৃচ্চাপ্যথ ন দ্বিতীয়ম্
তাসাং ক্ষয়ে বিদ্ধি কৃতং বিসর্গং; সংহারমেকং চ তথা প্রজানাম্
271.33
ষড্জীববর্ণাঃ পরমং প্রমাণং; কৃষ্ণো ধূম্রো নীলমথাস্য মধ্যম্
রক্তং পুনঃ সহ্যতরং সুখং তু; হারিদ্রবর্ণং সুসুখং চ শুক্লম্
271.34
পরং তু শুক্লং বিমলং বিশোকং; গতক্লমং সিধ্যতি দানবেন্দ্র
গত্বা তু যোনিপ্রভবানি দৈত্য; সহস্রশঃ সিদ্ধিমুপৈতি জীবঃ
271.35
গতিং চ যাং দর্শনমাহ দেবো; গত্বা শুভং দর্শনমেব চাহ
গতিঃ পুনর্বর্ণকৃতা প্রজানাং; বর্ণস্তথা কালকৃতোঽসুরেন্দ্র
271.36
শতং সহস্রাণি চতুর্দশেহ; পরা গতির্জীবগুণস্য দৈত্য
আরোহণং তত্কৃতমেব বিদ্ধি; স্থানং তথা নিঃসরণং চ তেষাম্
271.37
কৃষ্ণস্য বর্ণস্য গতির্নিকৃষ্টা; স মজ্জতে নরকে পচ্যমানঃ
স্থানং তথা দুর্গতিভিস্তু তস্য; প্রজাবিসর্গান্সুবহূন্বদন্তি
271.38
শতং সহস্রাণি ততশ্চরিত্বা; প্রাপ্নোতি বর্ণং হরিতং তু পশ্চাৎ
স চৈব তস্মিন্নিবসত্যনীশো; যুগক্ষয়ে তমসা সংবৃতাত্মা
271.39
স বৈ যদা সত্ত্বগুণেন যুক্ত;স্তমো ব্যপোহন্ঘটতে স্ববুদ্ধ্যা
স লোহিতং বর্ণমুপৈতি নীলো; মনুষ্যলোকে পরিবর্ততে চ
271.40
স তত্র সংহারবিসর্গমেব; স্বকর্মজৈর্বন্ধনৈঃ ক্লিশ্যমানঃ
ততঃ স হারিদ্রমুপৈতি বর্ণং; সংহারবিক্ষেপশতে ব্যতীতে
271.41
হারিদ্রবর্ণস্তু প্রজাবিসর্গা;ন্সহস্রশস্তিষ্ঠতি সংচরন্বৈ
অবিপ্রমুক্তো নিরয়ে চ দৈত্য; ততঃ সহস্রাণি দশাপরাণি
271.42
গতীঃ সহস্রাণি চ পঞ্চ তস্য; চত্বারি সংবর্তকৃতানি চৈব
বিমুক্তমেনং নিরয়াচ্চ বিদ্ধি; সর্বেষু চান্যেষু চ সংভবেষু
271.43
স দেবলোকে বিহরত্যভীক্ষ্ণং; ততশ্চ্যুতো মানুষতামুপৈতি
সংহারবিক্ষেপশতানি চাষ্টৌ; মর্ত্যেষু তিষ্ঠন্নমৃতত্বমেতি
271.44
সোঽস্মাদথ ভ্রশ্যতি কালয়োগা;ত্কৃষ্ণে তলে তিষ্ঠতি সর্বকষ্টে
যথা ত্বয়ং সিধ্যতি জীবলোক;স্তত্তেঽভিধাস্যাম্যসুরপ্রবীর
271.45
দৈবানি স ব্যূহশতানি সপ্ত; রক্তো হরিদ্রোঽথ তথৈব শুক্লঃ
সংশ্রিত্য সংধাবতি শুক্লমেত;মষ্টাপরানর্চ্যতমান্স লোকান্
271.46
অষ্টৌ চ ষষ্টিং চ শতানি যানি; মনোবিরুদ্ধানি মহাদ্যুতীনাম্
শুক্লস্য বর্ণস্য পরা গতির্যা; ত্রীণ্যেব রুদ্ধানি মহানুভাব
271.47
সংহারবিক্ষেপমনিষ্টমেকং; চত্বারি চান্যানি বসত্যনীশঃ
ষষ্ঠস্য বর্ণস্য পরা গতির্যা; সিদ্ধা বিশিষ্টস্য গতক্লমস্য
271.48
সপ্তোত্তরং তেষু বসত্যনীশঃ; সংহারবিক্ষেপশতং সশেষম্
তস্মাদুপাবৃত্য মনুষ্যলোকে; ততো মহান্মানুষতামুপৈতি
271.49
তস্মাদুপাবৃত্য ততঃ ক্রমেণ; সোঽগ্রে স্ম সংতিষ্ঠতি ভূতসর্গম্
স সপ্তকৃত্বশ্চ পরৈতি লোকা;ন্সংহারবিক্ষেপকৃতপ্রবাসঃ
271.50
সপ্তৈব সংহারমুপপ্লবানি; সংভাব্য সংতিষ্ঠতি সিদ্ধলোকে
ততোঽব্যয়ং স্থানমনন্তমেতি; দেবস্য বিষ্ণোরথ ব্রহ্মণশ্চ
শেষস্য চৈবাথ নরস্য চৈব; দেবস্য বিষ্ণোঃ পরমস্য চৈব
271.51
সংহারকালে পরিদগ্ধকায়া; ব্রহ্মাণমায়ান্তি সদা প্রজা হি
চেষ্টাত্মনো দেবগণাশ্চ সর্বে; যে ব্রহ্মলোকাদমরাঃ স্ম তেঽপি
271.52
প্রজাবিসর্গং তু সশেষকালং; স্থানানি স্বান্যেব সরন্তি জীবাঃ
নিঃশেষাণাং তত্পদং যান্তি চান্তে; সর্বাপদা যে সদৃশা মনুষ্যাঃ
271.53
যে তু চ্যুতাঃ সিদ্ধলোকাত্ক্রমেণ; তেষাং গতিং যান্তি তথানুপূর্ব্যা
জীবাঃ পরে তদ্বলবেষরূপা; বিধিং স্বকং যান্তি বিপর্যয়েণ
271.54
স যাবদেবাস্তি সশেষভুক্তে; প্রজাশ্চ দেব্যৌ চ তথৈব শুক্লে
তাবত্তদা তেষু বিশুদ্ধভাবঃ; সংয়ম্য পঞ্চেন্দ্রিয়রূপমেতৎ
271.55
শুদ্ধাং গতিং তাং পরমাং পরৈতি; শুদ্ধেন নিত্যং মনসা বিচিন্বন্
ততোঽব্যয়ং স্থানমুপৈতি ব্রহ্ম; দুষ্প্রাপমভ্যেতি স শাশ্বতং বৈ
ইত্যেতদাখ্যাতমহীনসত্ত্ব; নারায়ণস্যেহ বলং ময়া তে
271.56
বৃত্র উবাচ
এবং গতে মে ন বিষাদোঽস্তি কশ্চি;ত্সম্যক্চ পশ্যামি বচস্তবৈতৎ
শ্রুত্বা চ তে বাচমদীনসত্ত্ব; বিকল্মষোঽস্ম্যদ্য তথা বিপাপ্মা
271.57
প্রবৃত্তমেতদ্ভগবন্মহর্ষে; মহাদ্যুতেশ্চক্রমনন্তবীর্যম্
বিষ্ণোরনন্তস্য সনাতনং ত;ত্স্থানং সর্গা যত্র সর্বে প্রবৃত্তাঃ
স বৈ মহাত্মা পুরুষোত্তমো বৈ; তস্মিঞ্জগত্সর্বমিদং প্রতিষ্ঠিতম্
271.58
ভীষ্ম উবাচ
এবমুক্ত্বা স কৌন্তেয় বৃত্রঃ প্রাণানবাসৃজৎ
যোজয়িত্বা তথাত্মানং পরং স্থানমবাপ্তবান্
271.59
যুধিষ্ঠির উবাচ
অয়ং স ভগবান্দেবঃ পিতামহ জনার্দনঃ
সনত্কুমারো বৃত্রায় যত্তদাখ্যাতবান্পুরা
271.60
ভীষ্ম উবাচ
মূলস্থায়ী স ভগবান্স্বেনানন্তেন তেজসা
তত্স্থঃ সৃজতি তান্ভাবান্নানারূপান্মহাতপাঃ
271.61
তুরীয়ার্ধেন তস্যেমং বিদ্ধি কেশবমচ্যুতম্
তুরীয়ার্ধেন লোকাংস্ত্রীন্ভাবয়ত্যেষ বুদ্ধিমান্
271.62
অর্বাক্স্থিতস্তু যঃ স্থায়ী কল্পান্তে পরিবর্ততে
স শেতে ভগবানপ্সু যোঽসাবতিবলঃ প্রভুঃ
তান্বিধাতা প্রসন্নাত্মা লোকাংশ্চরতি শাশ্বতান্
271.63
সর্বাণ্যশূন্যানি করোত্যনন্তঃ; সনত্কুমারঃ সংচরতে চ লোকান্
স চানিরুদ্ধঃ সৃজতে মহাত্মা; তত্স্থং জগত্সর্বমিদং বিচিত্রম্
271.64
যুধিষ্ঠির উবাচ
বৃত্রেণ পরমার্থজ্ঞ দৃষ্টা মন্যেঽঽত্মনো গতিঃ
শুভা তস্মাত্স সুখিতো ন শোচতি পিতামহ
271.65
শুক্লঃ শুক্লাভিজাতীয়ঃ সাধ্যো নাবর্ততেঽনঘ
তির্যগ্গতেশ্চ নির্মুক্তো নিরয়াচ্চ পিতামহ
271.66
হারিদ্রবর্ণে রক্তে বা বর্তমানস্তু পার্থিব
তির্যগেবানুপশ্যেত কর্মভিস্তামসৈর্বৃতঃ
271.67
বয়ং তু ভৃশমাপন্না রক্তাঃ কষ্টমুখেঽসুখে
কাং গতিং প্রতিপত্স্যামো নীলাং কৃষ্ণাধমামথ
271.68
ভীষ্ম উবাচ
শুদ্ধাভিজনসংপন্নাঃ পাণ্ডবাঃ সংশিতব্রতাঃ
বিহৃত্য দেবলোকেষু পুনর্মানুষ্যমেষ্যথ
271.69
প্রজাবিসর্গং চ সুখেন কালে; প্রত্যেত্য দেবেষু সুখানি ভুক্ত্বা
সুখেন সংয়াস্যথ সিদ্ধসংখ্যাং; মা বো ভয়ং ভূদ্বিমলাঃ স্থ সর্বে