Utshovঅধ্যায় 272
272.1
যুধিষ্ঠির উবাচ
অহো ধর্মিষ্ঠতা তাত বৃত্রস্যামিততেজসঃ
যস্য বিজ্ঞানমতুলং বিষ্ণোর্ভক্তিশ্চ তাদৃশী
272.2
দুর্বিজ্ঞেয়মিদং তাত বিষ্ণোরমিততেজসঃ
কথং বা রাজশার্দূল পদং তজ্জ্ঞাতবানসৌ
272.3
ভবতা কথিতং হ্যেতচ্ছ্রদ্দধে চাহমচ্যুত
ভূয়স্তু মে সমুত্পন্না বুদ্ধিরব্যক্তদর্শনাৎ
272.4
কথং বিনিহতো বৃত্রঃ শক্রেণ ভরতর্ষভ
ধর্মিষ্ঠো বিষ্ণুভক্তশ্চ তত্ত্বজ্ঞশ্চ পদান্বয়ে
272.5
এতন্মে সংশয়ং ব্রূহি পৃচ্ছতো ভরতর্ষভ
বৃত্রস্তু রাজশার্দূল যথা শক্রেণ নির্জিতঃ
272.6
যথা চৈবাভবদ্যুদ্ধং তচ্চাচক্ষ্ব পিতামহ
বিস্তরেণ মহাবাহো পরং কৌতূহলং হি মে
272.7
ভীষ্ম উবাচ
রথেনেন্দ্রঃ প্রয়াতো বৈ সার্ধং সুরগণৈঃ পুরা
দদর্শাথাগ্রতো বৃত্রং বিষ্ঠিতং পর্বতোপমম্
272.8
যোজনানাং শতান্যূর্ধ্বং পঞ্চোচ্ছ্রিতমরিংদম
শতানি বিস্তরেণাথ ত্রীণ্যেবাভ্যধিকানি তু
272.9
তত্প্রেক্ষ্য তাদৃশং রূপং ত্রৈলোক্যেনাপি দুর্জয়ম্
বৃত্রস্য দেবাঃ সংত্রস্তা ন শান্তিমুপলেভিরে
272.10
শক্রস্য তু তদা রাজন্নূরুস্তম্ভো ব্যজায়ত
ভয়াদ্বৃত্রস্য সহসা দৃষ্ট্বা তদ্রূপমুত্তমম্
272.11
ততো নাদঃ সমভবদ্বাদিত্রাণাং চ নিস্বনঃ
দেবাসুরাণাং সর্বেষাং তস্মিন্যুদ্ধ উপস্থিতে
272.12
অথ বৃত্রস্য কৌরব্য দৃষ্ট্বা শক্রমুপস্থিতম্
ন সংভ্রমো ন ভীঃ কাচিদাস্থা বা সমজায়ত
272.13
ততঃ সমভবদ্যুদ্ধং ত্রৈলোক্যস্য ভয়ংকরম্
শক্রস্য চ সুরেন্দ্রস্য বৃত্রস্য চ মহাত্মনঃ
272.14
অসিভিঃ পট্টিশৈঃ শূলৈঃ শক্তিতোমরমুদ্গরৈঃ
শিলাভির্বিবিধাভিশ্চ কার্মুকৈশ্চ মহাস্বনৈঃ
272.15
অস্ত্রৈশ্চ বিবিধৈর্দিব্যৈঃ পাবকোল্কাভিরেব চ
দেবাসুরৈস্ততঃ সৈন্যৈঃ সর্বমাসীত্সমাকুলম্
272.16
পিতামহপুরোগাশ্চ সর্বে দেবগণাস্তথা
ঋষয়শ্চ মহাভাগাস্তদ্যুদ্ধং দ্রষ্টুমাগমন্
272.17
বিমানাগ্র্যৈর্মহারাজ সিদ্ধাশ্চ ভরতর্ষভ
গন্ধর্বাশ্চ বিমানাগ্র্যৈরপ্সরোভিঃ সমাগমন্
272.18
ততোঽন্তরিক্ষমাবৃত্য বৃত্রো ধর্মভৃতাং বরঃ
অশ্মবর্ষেণ দেবেন্দ্রং পর্বতাত্সমবাকিরৎ
272.19
ততো দেবগণাঃ ক্রুদ্ধাঃ সর্বতঃ শস্ত্রবৃষ্টিভিঃ
অশ্মবর্ষমপোহন্ত বৃত্রপ্রেরিতমাহবে
272.20
বৃত্রশ্চ কুরুশার্দূল মহামায়ো মহাবলঃ
মোহয়ামাস দেবেন্দ্রং মায়ায়ুদ্ধেন সর্বতঃ
272.21
তস্য বৃত্রার্দিতস্যাথ মোহ আসীচ্ছতক্রতোঃ
রথংতরেণ তং তত্র বসিষ্ঠঃ সমবোধয়ৎ
272.22
বসিষ্ঠ উবাচ
দেবশ্রেষ্ঠোঽসি দেবেন্দ্র সুরারিবিনিবর্হণ
ত্রৈলোক্যবলসংয়ুক্তঃ কস্মাচ্ছক্র বিষীদসি
272.23
এষ ব্রহ্মা চ বিষ্ণুশ্চ শিবশ্চৈব জগত্প্রভুঃ
সোমশ্চ ভগবান্দেবঃ সর্বে চ পরমর্ষয়ঃ
272.24
মা কার্ষীঃ কশ্মলং শক্র কশ্চিদেবেতরো যথা
আর্যাং যুদ্ধে মতিং কৃত্বা জহি শত্রুং সুরেশ্বর
272.25
এষ লোকগুরুস্ত্র্যক্ষঃ সর্বলোকনমস্কৃতঃ
নিরীক্ষতে ত্বাং ভগবাংস্ত্যজ মোহং সুরেশ্বর
272.26
এতে ব্রহ্মর্ষয়শ্চৈব বৃহস্পতিপুরোগমাঃ
স্তবেন শক্র দিব্যেন স্তুবন্তি ত্বাং জয়ায় বৈ
272.27
ভীষ্ম উবাচ
এবং সংবোধ্যমানস্য বসিষ্ঠেন মহাত্মনা
অতীব বাসবস্যাসীদ্বলমুত্তমতেজসঃ
272.28
ততো বুদ্ধিমুপাগম্য ভগবান্পাকশাসনঃ
যোগেন মহতা যুক্তস্তাং মায়াং ব্যপকর্ষত
272.29
ততোঽঙ্গিরঃসুতঃ শ্রীমাংস্তে চৈব পরমর্ষয়ঃ
দৃষ্ট্বা বৃত্রস্য বিক্রান্তমুপগম্য মহেশ্বরম্
ঊচুর্বৃত্রবিনাশার্থং লোকানাং হিতকাম্যয়া
272.30
ততো ভগবতস্তেজো জ্বরো ভূত্বা জগত্পতেঃ
সমাবিশন্মহারৌদ্রং বৃত্রং দৈত্যবরং তদা
272.31
বিষ্ণুশ্চ ভগবান্দেবঃ সর্বলোকাভিপূজিতঃ
ঐন্দ্রং সমাবিশদ্বজ্রং লোকসংরক্ষণে রতঃ
272.32
ততো বৃহস্পতির্ধীমানুপাগম্য শতক্রতুম্
বসিষ্ঠশ্চ মহাতেজাঃ সর্বে চ পরমর্ষয়ঃ
272.33
তে সমাসাদ্য বরদং বাসবং লোকপূজিতম্
ঊচুরেকাগ্রমনসো জহি বৃত্রমিতি প্রভো
272.34
মহেশ্বর উবাচ
এষ বৃত্রো মহাঞ্শক্র বলেন মহতা বৃতঃ
বিশ্বাত্মা সর্বগশ্চৈব বহুমায়শ্চ বিশ্রুতঃ
272.35
তদেনমসুরশ্রেষ্ঠং ত্রৈলোক্যেনাপি দুর্জয়ম্
জহি ত্বং যোগমাস্থায় মাবমংস্থাঃ সুরেশ্বর
272.36
অনেন হি তপস্তপ্তং বলার্থমমরাধিপ
ষষ্টিং বর্ষসহস্রাণি ব্রহ্মা চাস্মৈ বরং দদৌ
272.37
মহত্ত্বং যোগিনাং চৈব মহামায়ত্বমেব চ
মহাবলত্বং চ তথা তেজশ্চাগ্র্যং সুরেশ্বর
272.38
এতদ্বৈ মামকং তেজঃ সমাবিশতি বাসব
বৃত্রমেনং ত্বমপ্যেবং জহি বজ্রেণ দানবম্
272.39
শক্র উবাচ
ভগবংস্ত্বত্প্রসাদেন দিতিজং সুদুরাসদম্
বজ্রেণ নিহনিষ্যামি পশ্যতস্তে সুরর্ষভ
272.40
ভীষ্ম উবাচ
আবিশ্যমানে দৈত্যে তু জ্বরেণাথ মহাসুরে
দেবতানামৃষীণাং চ হর্ষান্নাদো মহানভূৎ
272.41
ততো দুন্দুভয়শ্চৈব শঙ্খাশ্চ সুমহাস্বনাঃ
মুরজা ডিণ্ডিমাশ্চৈব প্রাবাদ্যন্ত সহস্রশঃ
272.42
অসুরাণাং তু সর্বেষাং স্মৃতিলোপোঽভবন্মহান্
প্রজ্ঞানাশশ্চ বলবান্ক্ষণেন সমপদ্যত
272.43
তমাবিষ্টমথো জ্ঞাত্বা ঋষয়ো দেবতাস্তথা
স্তুবন্তঃ শক্রমীশানং তথা প্রাচোদয়ন্নপি
272.44
রথস্থস্য হি শক্রস্য যুদ্ধকালে মহাত্মনঃ
ঋষিভিঃ স্তূয়মানস্য রূপমাসীত্সুদুর্দৃশম্