Utshovঅধ্যায় 273
273.1
ভীষ্ম উবাচ
বৃত্রস্য তু মহারাজ জ্বরাবিষ্টস্য সর্বশঃ
অভবন্যানি লিঙ্গানি শরীরে তানি মে শৃণু
273.2
জ্বলিতাস্যোঽভবদ্ঘোরো বৈবর্ণ্যং চাগমত্পরম্
গাত্রকম্পশ্চ সুমহাঞ্শ্বাসশ্চাপ্যভবন্মহান্
রোমহর্ষশ্চ তীব্রোঽভূন্নিঃশ্বাসশ্চ মহান্নৃপ
273.3
শিবা চাশিবসংকাশা তস্য বক্ত্রাত্সুদারুণা
নিষ্পপাত মহাঘোরা স্মৃতিঃ সা তস্য ভারত
উল্কাশ্চ জ্বলিতাস্তস্য দীপ্তাঃ পার্শ্বে প্রপেদিরে
273.4
গৃধ্রকঙ্কবডাশ্চৈব বাচোঽমুঞ্চন্সুদারুণাঃ
বৃত্রস্যোপরি সংহৃষ্টাশ্চক্রবত্পরিবভ্রমুঃ
273.5
ততস্তং রথমাস্থায় দেবাপ্যায়িতমাহবে
বজ্রোদ্যতকরঃ শক্রস্তং দৈত্যং প্রত্যবৈক্ষত
273.6
অমানুষমথো নাদং স মুমোচ মহাসুরঃ
ব্যজৃম্ভত চ রাজেন্দ্র তীব্রজ্বরসমন্বিতঃ
অথাস্য জৃম্ভতঃ শক্রস্ততো বজ্রমবাসৃজৎ
273.7
স বজ্রঃ সুমহাতেজাঃ কালাগ্নিসদৃশোপমঃ
ক্ষিপ্রমেব মহাকায়ং বৃত্রং দৈত্যমপাতয়ৎ
273.8
ততো নাদঃ সমভবত্পুনরেব সমন্ততঃ
বৃত্রং বিনিহতং দৃষ্ট্বা দেবানাং ভরতর্ষভ
273.9
বৃত্রং তু হত্বা ভগবান্দানবারির্মহায়শাঃ
বজ্রেণ বিষ্ণুয়ুক্তেন দিবমেব সমাবিশৎ
273.10
অথ বৃত্রস্য কৌরব্য শরীরাদভিনিঃসৃতা
ব্রহ্মহত্যা মহাঘোরা রৌদ্রা লোকভয়াবহা
273.11
করালদশনা ভীমা বিকৃতা কৃষ্ণপিঙ্গলা
প্রকীর্ণমূর্ধজা চৈব ঘোরনেত্রা চ ভারত
273.12
কপালমালিনী চৈব কৃশা চ ভরতর্ষভ
রুধিরার্দ্রা চ ধর্মজ্ঞ চীরবস্ত্রনিবাসিনী
273.13
সাভিনিষ্ক্রম্য রাজেন্দ্র তাদৃগ্রূপা ভয়াবহা
বজ্রিণং মৃগয়ামাস তদা ভরতসত্তম
273.14
কস্যচিত্ত্বথ কালস্য বৃত্রহা কুরুনন্দন
স্বর্গায়াভিমুখঃ প্রায়াল্লোকানাং হিতকাম্যয়া
273.15
বিসান্নিঃসরমাণং তু দৃষ্ট্বা শক্রং মহৌজসম্
কণ্ঠে জগ্রাহ দেবেন্দ্রং সুলগ্না চাভবত্তদা
273.16
স হি তস্মিন্সমুত্পন্নে ব্রহ্মহত্যাকৃতে ভয়ে
নলিন্যাং বিসমধ্যস্থো বভূবাব্দগণান্বহূন্
273.17
অনুসৃত্য তু যত্নাত্স তয়া বৈ ব্রহ্মহত্যয়া
তদা গৃহীতঃ কৌরব্য নিশ্চেষ্টঃ সমপদ্যত
273.18
তস্যা ব্যপোহনে শক্রঃ পরং যত্নং চকার হ
ন চাশকত্তাং দেবেন্দ্রো ব্রহ্মহত্যাং ব্যপোহিতুম্
273.19
গৃহীত এব তু তয়া দেবেন্দ্রো ভরতর্ষভ
পিতামহমুপাগম্য শিরসা প্রত্যপূজয়ৎ
273.20
জ্ঞাত্বা গৃহীতং শক্রং তু দ্বিজপ্রবরহত্যয়া
ব্রহ্মা সংচিন্তয়ামাস তদা ভরতসত্তম
273.21
তামুবাচ মহাবাহো ব্রহ্মহত্যাং পিতামহঃ
স্বরেণ মধুরেণাথ সান্ত্বয়ন্নিব ভারত
273.22
মুচ্যতাং ত্রিদশেন্দ্রোঽয়ং মত্প্রিয়ং কুরু ভামিনি
ব্রূহি কিং তে করোম্যদ্য কামং কং ত্বমিহেচ্ছসি
273.23
ব্রহ্মহত্যোবাচ
ত্রিলোকপূজিতে দেবে প্রীতে ত্রৈলোক্যকর্তরি
কৃতমেবেহ মন্যেঽহং নিবাসং তু বিধত্স্ব মে
273.24
ত্বয়া কৃতেয়ং মর্যাদা লোকসংরক্ষণার্থিনা
স্থাপনা বৈ সুমহতী ত্বয়া দেব প্রবর্তিতা
273.25
প্রীতে তু ত্বয়ি ধর্মজ্ঞ সর্বলোকেশ্বরে প্রভো
শক্রাদপগমিষ্যামি নিবাসং তু বিধত্স্ব মে
273.26
ভীষ্ম উবাচ
তথেতি তাং প্রাহ তদা ব্রহ্মহত্যাং পিতামহঃ
উপায়তঃ স শক্রস্য ব্রহ্মহত্যাং ব্যপোহত
273.27
ততঃ স্বয়ংভুবা ধ্যাতস্তত্র বহ্নির্মহাত্মনা
ব্রহ্মাণমুপসংগম্য ততো বচনমব্রবীৎ
273.28
প্রাপ্তোঽস্মি ভগবন্দেব ত্বত্সকাশমরিংদম
যত্কর্তব্যং ময়া দেব তদ্ভবান্বক্তুমর্হতি
273.29
ব্রহ্মোবাচ
বহুধা বিভজিষ্যামি ব্রহ্মহত্যামিমামহম্
শক্রস্যাদ্য বিমোক্ষার্থং চতুর্ভাগং প্রতীচ্ছ মে
273.30
অগ্নিরুবাচ
মম মোক্ষস্য কোঽন্তো বৈ ব্রহ্মন্ধ্যায়স্ব বৈ প্রভো
এতদিচ্ছামি বিজ্ঞাতুং তত্ত্বতো লোকপূজিত
273.31
ব্রহ্মোবাচ
যস্ত্বাং জ্বলন্তমাসাদ্য স্বয়ং বৈ মানবঃ ক্বচিৎ
বীজৌষধিরসৈর্বহ্নে ন যক্ষ্যতি তমোবৃতঃ
273.32
তমেষা যাস্যতি ক্ষিপ্রং তত্রৈব চ নিবত্স্যতি
ব্রহ্মহত্যা হব্যবাহ ব্যেতু তে মানসো জ্বরঃ
273.33
ভীষ্ম উবাচ
ইত্যুক্তঃ প্রতিজগ্রাহ তদ্বচো হব্যকব্যভুক্
পিতামহস্য ভগবাংস্তথা চ তদভূত্প্রভো
273.34
ততো বৃক্ষৌষধিতৃণং সমাহূয় পিতামহঃ
ইমমর্থং মহারাজ বক্তুং সমুপচক্রমে
273.35
ততো বৃক্ষৌষধিতৃণং তথৈবোক্তং যথাতথম্
ব্যথিতং বহ্নিবদ্রাজন্ব্রহ্মাণমিদমব্রবীৎ
273.36
অস্মাকং ব্রহ্মহত্যাতো কোঽন্তো লোকপিতামহ
স্বভাবনিহতানস্মান্ন পুনর্হন্তুমর্হসি
273.37
বয়মগ্নিং তথা শীতং বর্ষং চ পবনেরিতম্
সহামঃ সততং দেব তথা ছেদনভেদনম্
273.38
ব্রহ্মহত্যামিমামদ্য ভবতঃ শাসনাদ্বয়ম্
গ্রহীষ্যামস্ত্রিলোকেশ মোক্ষং চিন্তয়তাং ভবান্
273.39
ব্রহ্মোবাচ
পর্বকালে তু সংপ্রাপ্তে যো বৈ ছেদনভেদনম্
করিষ্যতি নরো মোহাত্তমেষানুগমিষ্যতি
273.40
ভীষ্ম উবাচ
ততো বৃক্ষৌষধিতৃণমেবমুক্তং মহাত্মনা
ব্রহ্মাণমভিসংপূজ্য জগামাশু যথাগতম্
273.41
আহূয়াপ্সরসো দেবস্ততো লোকপিতামহঃ
বাচা মধুরয়া প্রাহ সান্ত্বয়ন্নিব ভারত
273.42
ইয়মিন্দ্রাদনুপ্রাপ্তা ব্রহ্মহত্যা বরাঙ্গনাঃ
চতুর্থমস্যা ভাগং হি ময়োক্তাঃ সংপ্রতীচ্ছত
273.43
অপ্সরস ঊচুঃ
গ্রহণে কৃতবুদ্ধীনাং দেবেশ তব শাসনাৎ
মোক্ষং সময়তোঽস্মাকং চিন্তয়স্ব পিতামহ
273.44
ব্রহ্মোবাচ
রজস্বলাসু নারীষু যো বৈ মৈথুনমাচরেৎ
তমেষা যাস্যতি ক্ষিপ্রং ব্যেতু বো মানসো জ্বরঃ
273.45
ভীষ্ম উবাচ
তথেতি হৃষ্টমনস উক্ত্বাথাপ্সরসাং গণাঃ
স্বানি স্থানানি সংপ্রাপ্য রেমিরে ভরতর্ষভ
273.46
ততস্ত্রিলোককৃদ্দেবঃ পুনরেব মহাতপাঃ
অপঃ সংচিন্তয়ামাস ধ্যাতাস্তাশ্চাপ্যথাগমন্
273.47
তাস্তু সর্বাঃ সমাগম্য ব্রহ্মাণমমিতৌজসম্
ইদমূচুর্বচো রাজন্প্রণিপত্য পিতামহম্
273.48
ইমাঃ স্ম দেব সংপ্রাপ্তাস্ত্বত্সকাশমরিংদম
শাসনাত্তব দেবেশ সমাজ্ঞাপয় নো বিভো
273.49
ব্রহ্মোবাচ
ইয়ং বৃত্রাদনুপ্রাপ্তা পুরুহূতং মহাভয়া
ব্রহ্মহত্যা চতুর্থাংশমস্যা যূয়ং প্রতীচ্ছত
273.50
আপ ঊচুঃ
এবং ভবতু লোকেশ যথা বদসি নঃ প্রভো
মোক্ষং সময়তোঽস্মাকং সংচিন্তয়িতুমর্হসি
273.51
ত্বং হি দেবেশ সর্বস্য জগতঃ পরমো গুরুঃ
কোঽন্যঃ প্রসাদো হি ভবেদ্যঃ কৃচ্ছ্রান্নঃ সমুদ্ধরেৎ
273.52
ব্রহ্মোবাচ
অল্পা ইতি মতিং কৃত্বা যো নরো বুদ্ধিমোহিতঃ
শ্লেষ্মমূত্রপুরীষাণি যুষ্মাসু প্রতিমোক্ষ্যতি
273.53
তমেষা যাস্যতি ক্ষিপ্রং তত্রৈব চ নিবত্স্যতি
তথা বো ভবিতা মোক্ষ ইতি সত্যং ব্রবীমি বঃ
273.54
ভীষ্ম উবাচ
ততো বিমুচ্য দেবেন্দ্রং ব্রহ্মহত্যা যুধিষ্ঠির
যথানিসৃষ্টং তং দেশমগচ্ছদ্দেবশাসনাৎ
273.55
এবং শক্রেণ সংপ্রাপ্তা ব্রহ্মহত্যা জনাধিপ
পিতামহমনুজ্ঞাপ্য সোঽশ্বমেধমকল্পয়ৎ
273.56
শ্রূয়তে হি মহারাজ সংপ্রাপ্তা বাসবেন বৈ
ব্রহ্মহত্যা ততঃ শুদ্ধিং হয়মেধেন লব্ধবান্
273.57
সমবাপ্য শ্রিয়ং দেবো হত্বারীংশ্চ সহস্রশঃ
প্রহর্ষমতুলং লেভে বাসবঃ পৃথিবীপতে
273.58
বৃত্রস্য রুধিরাচ্চৈব খুখুণ্ডাঃ পার্থ জজ্ঞিরে
দ্বিজাতিভিরভক্ষ্যাস্তে দীক্ষিতৈশ্চ তপোধনৈঃ
273.59
সর্বাবস্থং ত্বমপ্যেষাং দ্বিজাতীনাং প্রিয়ং কুরু
ইমে হি ভূতলে দেবাঃ প্রথিতাঃ কুরুনন্দন
273.60
এবং শক্রেণ কৌরব্য বুদ্ধিসৌক্ষ্ম্যান্মহাসুরঃ
উপায়পূর্বং নিহতো বৃত্রোঽথামিততেজসা
273.61
এবং ত্বমপি কৌরব্য পৃথিব্যামপরাজিতঃ
ভবিষ্যসি যথা দেবঃ শতক্রতুরমিত্রহা
273.62
যে তু শক্রকথাং দিব্যামিমাং পর্বসু পর্বসু
বিপ্রমধ্যে পঠিষ্যন্তি ন তে প্রাপ্স্যন্তি কিল্বিষম্
273.63
ইত্যেতদ্বৃত্রমাশ্রিত্য শক্রস্যাত্যদ্ভুতং মহৎ
কথিতং কর্ম তে তাত কিং ভূয়ঃ শ্রোতুমিচ্ছসি