Utshovঅধ্যায় 274
274.1
যুধিষ্ঠির উবাচ
পিতামহ মহাপ্রাজ্ঞ সর্বশাস্ত্রবিশারদ
অস্তি বৃত্রবধাদেব বিবক্ষা মম জায়তে
274.2
জ্বরেণ মোহিতো বৃত্রঃ কথিতস্তে জনাধিপ
নিহতো বাসবেনেহ বজ্রেণেতি মমানঘ
274.3
কথমেষ মহাপ্রাজ্ঞ জ্বরঃ প্রাদুরভূত্কুতঃ
জ্বরোত্পত্তিং নিপুণতঃ শ্রোতুমিচ্ছাম্যহং প্রভো
274.4
ভীষ্ম উবাচ
শৃণু রাজঞ্জ্বরস্যেহ সংভবং লোকবিশ্রুতম্
বিস্তরং চাস্য বক্ষ্যামি যাদৃশং চৈব ভারত
274.5
পুরা মেরোর্মহারাজ শৃঙ্গং ত্রৈলোক্যবিশ্রুতম্
জ্যোতিষ্কং নাম সাবিত্রং সর্বরত্নবিভূষিতম্
অপ্রমেয়মনাধৃষ্যং সর্বলোকেষু ভারত
274.6
তত্র দেবো গিরিতটে হেমধাতুবিভূষিতে
পর্যঙ্ক ইব বিভ্রাজন্নুপবিষ্টো বভূব হ
274.7
শৈলরাজসুতা চাস্য নিত্যং পার্শ্বে স্থিতা বভৌ
তথা দেবা মহাত্মানো বসবশ্চ মহৌজসঃ
274.8
তথৈব চ মহাত্মানাবশ্বিনৌ ভিষজাং বরৌ
তথা বৈশ্রবণো রাজা গুহ্যকৈরভিসংবৃতঃ
274.9
যক্ষাণামধিপঃ শ্রীমান্কৈলাসনিলয়ঃ প্রভুঃ
অঙ্গিরঃপ্রমুখাশ্চৈব তথা দেবর্ষয়োঽপরে
274.10
বিশ্বাবসুশ্চ গন্ধর্বস্তথা নারদপর্বতৌ
অপ্সরোগণসংঘাশ্চ সমাজগ্মুরনেকশঃ
274.11
ববৌ শিবঃ সুখো বায়ুর্নানাগন্ধবহঃ শুচিঃ
সর্বর্তুকুসুমোপেতাঃ পুষ্পবন্তো মহাদ্রুমাঃ
274.12
তথা বিদ্যাধরাশ্চৈব সিদ্ধাশ্চৈব তপোধনাঃ
মহাদেবং পশুপতিং পর্যুপাসন্ত ভারত
274.13
ভূতানি চ মহারাজ নানারূপধরাণ্যথ
রাক্ষসাশ্চ মহারৌদ্রাঃ পিশাচাশ্চ মহাবলাঃ
274.14
বহুরূপধরা হৃষ্টা নানাপ্রহরণোদ্যতাঃ
দেবস্যানুচরাস্তত্র তস্থিরে চানলোপমাঃ
274.15
নন্দী চ ভগবাংস্তত্র দেবস্যানুমতে স্থিতঃ
প্রগৃহ্য জ্বলিতং শূলং দীপ্যমানং স্বতেজসা
274.16
গঙ্গা চ সরিতাং শ্রেষ্ঠা সর্বতীর্থজলোদ্ভবা
পর্যুপাসত তং দেবং রূপিণী কুরুনন্দন
274.17
এবং স ভগবাংস্তত্র পূজ্যমানঃ সুরর্ষিভিঃ
দেবৈশ্চ সুমহাভাগৈর্মহাদেবো ব্যতিষ্ঠত
274.18
কস্যচিত্ত্বথ কালস্য দক্ষো নাম প্রজাপতিঃ
পূর্বোক্তেন বিধানেন যক্ষ্যমাণোঽন্বপদ্যত
274.19
ততস্তস্য মখং দেবাঃ সর্বে শক্রপুরোগমাঃ
গমনায় সমাগম্য বুদ্ধিমাপেদিরে তদা
274.20
তে বিমানৈর্মহাত্মানো জ্বলিতৈর্জ্বলনপ্রভাঃ
দেবস্যানুমতেঽগচ্ছন্গঙ্গাদ্বারমিতি শ্রুতিঃ
274.21
প্রস্থিতা দেবতা দৃষ্ট্বা শৈলরাজসুতা তদা
উবাচ বচনং সাধ্বী দেবং পশুপতিং পতিম্
274.22
ভগবন্ক্ব নু যান্ত্যেতে দেবাঃ শক্রপুরোগমাঃ
ব্রূহি তত্ত্বেন তত্ত্বজ্ঞ সংশয়ো মে মহানয়ম্
274.23
মহেশ্বর উবাচ
দক্ষো নাম মহাভাগে প্রজানাং পতিরুত্তমঃ
হয়মেধেন যজতে তত্র যান্তি দিবৌকসঃ
274.24
উমা উবাচ
যজ্ঞমেতং মহাভাগ কিমর্থং নাভিগচ্ছসি
কেন বা প্রতিষেধেন গমনং তে ন বিদ্যতে
274.25
মহেশ্বর উবাচ
সুরৈরেব মহাভাগে সর্বমেতদনুষ্ঠিতম্
যজ্ঞেষু সর্বেষু মম ন ভাগ উপকল্পিতঃ
274.26
পূর্বোপায়োপপন্নেন মার্গেণ বরবর্ণিনি
ন মে সুরাঃ প্রয়চ্ছন্তি ভাগং যজ্ঞস্য ধর্মতঃ
274.27
উমা উবাচ
ভগবন্সর্বভূতেষু প্রভবাভ্যধিকো গুণৈঃ
অজেয়শ্চাপ্রধৃষ্যশ্চ তেজসা যশসা শ্রিয়া
274.28
অনেন তে মহাভাগ প্রতিষেধেন ভাগতঃ
অতীব দুঃখমুত্পন্নং বেপথুশ্চ মমানঘ
274.29
ভীষ্ম উবাচ
এবমুক্ত্বা তু সা দেবী দেবং পশুপতিং পতিম্
তূষ্ণীংভূতাভবদ্রাজন্দহ্যমানেন চেতসা
274.30
অথ দেব্যা মতং জ্ঞাত্বা হৃদ্গতং যচ্চিকীর্ষিতম্
স সমাজ্ঞাপয়ামাস তিষ্ঠ ত্বমিতি নন্দিনম্
274.31
ততো যোগবলং কৃত্বা সর্বয়োগেশ্বরেশ্বরঃ
তং যজ্ঞং সুমহাতেজা ভীমৈরনুচরৈস্তদা
সহসা ঘাতয়ামাস দেবদেবঃ পিনাকধৃক্
274.32
কেচিন্নাদানমুঞ্চন্ত কেচিদ্ধাসাংশ্চ চক্রিরে
রুধিরেণাপরে রাজংস্তত্রাগ্নিং সমবাকিরন্
274.33
কেচিদ্যূপান্সমুত্পাট্য বভ্রমুর্বিকৃতাননাঃ
আস্যৈরন্যে চাগ্রসন্ত তথৈব পরিচারকান্
274.34
ততঃ স যজ্ঞো নৃপতে বধ্যমানঃ সমন্ততঃ
আস্থায় মৃগরূপং বৈ খমেবাভ্যপতত্তদা
274.35
তং তু যজ্ঞং তথারূপং গচ্ছন্তমুপলভ্য সঃ
ধনুরাদায় বাণং চ তদান্বসরত প্রভুঃ
274.36
ততস্তস্য সুরেশস্য ক্রোধাদমিততেজসঃ
ললাটাত্প্রসৃতো ঘোরঃ স্বেদবিন্দুর্বভূব হ
274.37
তস্মিন্পতিতমাত্রে তু স্বেদবিন্দৌ তথা ভুবি
প্রাদুর্বভূব সুমহানগ্নিঃ কালানলোপমঃ
274.38
তত্র চাজায়ত তদা পুরুষঃ পুরুষর্ষভ
হ্রস্বোঽতিমাত্ররক্তাক্ষো হরিশ্মশ্রুর্বিভীষণঃ
274.39
ঊর্ধ্বকেশোঽতিলোমাঙ্গঃ শ্যেনোলূকস্তথৈব চ
করালঃ কৃষ্ণবর্ণশ্চ রক্তবাসাস্তথৈব চ
274.40
তং যজ্ঞং স মহাসত্ত্বোঽদহত্কক্ষমিবানলঃ
দেবাশ্চাপ্যদ্রবন্সর্বে ততো ভীতা দিশো দশ
274.41
তেন তস্মিন্বিচরতা পুরুষেণ বিশাং পতে
পৃথিবী ব্যচলদ্রাজন্নতীব ভরতর্ষভ
274.42
হাহাভূতে প্রবৃত্তে তু নাদে লোকভয়ংকরে
পিতামহো মহাদেবং দর্শয়ন্প্রত্যভাষত
274.43
ভবতোঽপি সুরাঃ সর্বে ভাগং দাস্যন্তি বৈ প্রভো
ক্রিয়তাং প্রতিসংহারঃ সর্বদেবেশ্বর ত্বয়া
274.44
ইমা হি দেবতাঃ সর্বা ঋষয়শ্চ পরংতপ
তব ক্রোধান্মহাদেব ন শান্তিমুপলেভিরে
274.45
যশ্চৈষ পুরুষো জাতঃ স্বেদাত্তে বিবুধোত্তম
জ্বরো নামৈষ ধর্মজ্ঞ লোকেষু প্রচরিষ্যতি
274.46
একীভূতস্য ন হ্যস্য ধারণে তেজসঃ প্রভো
সমর্থা সকলা পৃথ্বী বহুধা সৃজ্যতাময়ম্
274.47
ইত্যুক্তো ব্রহ্মণা দেবো ভাগে চাপি প্রকল্পিতে
ভগবন্তং তথেত্যাহ ব্রহ্মাণমমিতৌজসম্
274.48
পরাং চ প্রীতিমগমদুত্স্ময়ংশ্চ পিনাকধৃক্
অবাপ চ তদা ভাগং যথোক্তং ব্রহ্মণা ভবঃ
274.49
জ্বরং চ সর্বধর্মজ্ঞো বহুধা ব্যসৃজত্তদা
শান্ত্যর্থং সর্বভূতানাং শৃণু তচ্চাপি পুত্রক
274.50
শীর্ষাভিতাপো নাগানাং পর্বতানাং শিলাজতুঃ
অপাং তু নীলিকাং বিদ্যান্নির্মোকং ভুজগেষু চ
274.51
খোরকঃ সৌরভেয়াণামূষরং পৃথিবীতলে
পশূনামপি ধর্মজ্ঞ দৃষ্টিপ্রত্যবরোধনম্
274.52
রন্ধ্রাগতমথাশ্বানাং শিখোদ্ভেদশ্চ বর্হিণাম্
নেত্ররোগঃ কোকিলানাং জ্বরঃ প্রোক্তো মহাত্মনা
274.53
অব্জানাং পিত্তভেদশ্চ সর্বেষামিতি নঃ শ্রুতম্
শুকানামপি সর্বেষাং হিক্কিকা প্রোচ্যতে জ্বরঃ
274.54
শার্দূলেষ্বথ ধর্মজ্ঞ শ্রমো জ্বর ইহোচ্যতে
মানুষেষু তু ধর্মজ্ঞ জ্বরো নামৈষ বিশ্রুতঃ
মরণে জন্মনি তথা মধ্যে চাবিশতে নরম্
274.55
এতন্মাহেশ্বরং তেজো জ্বরো নাম সুদারুণঃ
নমস্যশ্চৈব মান্যশ্চ সর্বপ্রাণিভিরীশ্বরঃ
274.56
অনেন হি সমাবিষ্টো বৃত্রো ধর্মভৃতাং বরঃ
ব্যজৃম্ভত ততঃ শক্রস্তস্মৈ বজ্রমবাসৃজৎ
274.57
প্রবিশ্য বজ্রো বৃত্রং তু দারয়ামাস ভারত
দারিতশ্চ স বজ্রেণ মহায়োগী মহাসুরঃ
জগাম পরমং স্থানং বিষ্ণোরমিততেজসঃ
274.58
বিষ্ণুভক্ত্যা হি তেনেদং জগদ্ব্যাপ্তমভূত্পুরা
তস্মাচ্চ নিহতো যুদ্ধে বিষ্ণোঃ স্থানমবাপ্তবান্
274.59
ইত্যেষ বৃত্রমাশ্রিত্য জ্বরস্য মহতো ময়া
বিস্তরঃ কথিতঃ পুত্র কিমন্যত্প্রব্রবীমি তে
274.60
ইমাং জ্বরোত্পত্তিমদীনমানসঃ; পঠেত্সদা যঃ সুসমাহিতো নরঃ
বিমুক্তরোগঃ স সুখী মুদা যুতো; লভেত কামান্স যথামনীষিতান্