অধ্যায় 275

275.1

যুধিষ্ঠির উবাচ
শোকাদ্দুঃখাচ্চ মৃত্যোশ্চ ত্রস্যন্তি প্রাণিনঃ সদা
উভয়ং মে যথা ন স্যাত্তন্মে ব্রূহি পিতামহ

ভীষ্ম উবাচ
অত্রৈবোদাহরন্তীমমিতিহাসং পুরাতনম্
নারদস্য চ সংবাদং সমঙ্গস্য চ ভারত

নারদ উবাচ
উরসেব প্রণমসে বাহুভ্যাং তরসীব চ
সংপ্রহৃষ্টমনা নিত্যং বিশোক ইব লক্ষ্যসে

উদ্বেগং নেহ তে কিংচিত্সুসূক্ষ্মমপি লক্ষয়ে
নিত্যতৃপ্ত ইব স্বস্থো বালবচ্চ বিচেষ্টসে

সমঙ্গ উবাচ
ভূতং ভব্যং ভবিষ্যচ্চ সর্বং সত্ত্বেষু মানদ
তেষাং তত্ত্বানি জানামি ততো ন বিমনা হ্যহম্

উপক্রমানহং বেদ পুনরেব ফলোদয়ান্
লোকে ফলানি চিত্রাণি ততো ন বিমনা হ্যহম্

অগাধাশ্চাপ্রতিষ্ঠাশ্চ গতিমন্তশ্চ নারদ
অন্ধা জডাশ্চ জীবন্তি পশ্যাস্মানপি জীবতঃ

বিহিতেনৈব জীবন্তি অরোগাঙ্গা দিবৌকসঃ
বলবন্তোঽবলাশ্চৈব তদ্বদস্মান্সভাজয়

সহস্রিণশ্চ জীবন্তি জীবন্তি শতিনস্তথা
শাকেন চান্যে জীবন্তি পশ্যাস্মানপি জীবতঃ

যদা ন শোচেমহি কিং নু ন স্যা;দ্ধর্মেণ বা নারদ কর্মণা বা
কৃতান্তবশ্যানি যদা সুখানি; দুঃখানি বা যন্ন বিধর্ষয়ন্তি

যস্মৈ প্রজ্ঞাং কথয়ন্তে মনুষ্যাঃ; প্রজ্ঞামূলো হীন্দ্রিয়াণাং প্রসাদঃ
মুহ্যন্তি শোচন্তি যদেন্দ্রিয়াণি; প্রজ্ঞালাভো নাস্তি মূঢেন্দ্রিয়স্য

মূঢস্য দর্পঃ স পুনর্মোহ এব; মূঢস্য নায়ং ন পরোঽস্তি লোকঃ
ন হ্যেব দুঃখানি সদা ভবন্তি; সুখস্য বা নিত্যশো লাভ এব

ভাবাত্মকং সংপরিবর্তমানং; ন মাদৃশঃ সংজ্বরং জাতু কুর্যাৎ
ইষ্টান্ভোগান্নানুরুধ্যেত্সুখং বা; ন চিন্তয়েদ্দুঃখমভ্যাগতং বা

সমাহিতো ন স্পৃহয়েত্পরেষাং; নানাগতং নাভিনন্দেত লাভম্
ন চাপি হৃষ্যেদ্বিপুলেঽর্থলাভে; তথার্থনাশে চ ন বৈ বিষীদেৎ

ন বান্ধবা ন চ বিত্তং ন কৌলী; ন চ শ্রুতং ন চ মন্ত্রা ন বীর্যম্
দুঃখাত্ত্রাতুং সর্ব এবোত্সহন্তে; পরত্র শীলে ন তু যান্তি শান্তিম্

নাস্তি বুদ্ধিরয়ুক্তস্য নায়োগাদ্বিদ্যতে সুখম্
ধৃতিশ্চ দুঃখত্যাগশ্চাপ্যুভয়ং নঃ সুখোদয়ম্

প্রিয়ং হি হর্ষজননং হর্ষ উত্সেকবর্ধনঃ
উত্সেকো নরকায়ৈব তস্মাত্তং সংত্যজাম্যহম্

এতাঞ্শোকভয়োত্সেকান্মোহনান্সুখদুঃখয়োঃ
পশ্যামি সাক্ষিবল্লোকে দেহস্যাস্য বিচেষ্টনাৎ

অর্থকামৌ পরিত্যজ্য বিশোকো বিগতজ্বরঃ
তৃষ্ণামোহৌ তু সংত্যজ্য চরামি পৃথিবীমিমাম্

ন মৃত্যুতো ন চাধর্মান্ন লোভান্ন কুতশ্চন
পীতামৃতস্যেবাত্যন্তমিহ চামুত্র বা ভয়ম্

এতদ্ব্রহ্মন্বিজানামি মহত্কৃত্বা তপোঽব্যয়ম্
তেন নারদ সংপ্রাপ্তো ন মাং শোকঃ প্রবাধতে