UtshovChapter 275
275.1
युधिष्ठिर उवाच
शोकाद्दुःखाच्च मृत्योश्च त्रस्यन्ति प्राणिनः सदा
उभयं मे यथा न स्यात्तन्मे ब्रूहि पितामह
Yudhishthira uvacha
Shokadduhkhachcha mrityoshcha trasyanti praninah sada
Ubhayam me yatha na syattanme bruhi pitamaha
275.2
भीष्म उवाच
अत्रैवोदाहरन्तीममितिहासं पुरातनम्
नारदस्य च संवादं समङ्गस्य च भारत
Bhishma uvacha
Atraivodaharantimamitihasam puratanam
Naradasya cha sanvadam samangasya cha bharata
275.3
नारद उवाच
उरसेव प्रणमसे बाहुभ्यां तरसीव च
संप्रहृष्टमना नित्यं विशोक इव लक्ष्यसे
Narada uvacha
Uraseva pranamase bahubhyam tarasiva cha
Samprahrishtamana nityam vishoka iva lakshyase
275.4
उद्वेगं नेह ते किंचित्सुसूक्ष्ममपि लक्षये
नित्यतृप्त इव स्वस्थो बालवच्च विचेष्टसे
Udvegam neha te kinchitsusukshmamapi lakshaye
Nityatripta iva svastho balavachcha vicheshtase
275.5
समङ्ग उवाच
भूतं भव्यं भविष्यच्च सर्वं सत्त्वेषु मानद
तेषां तत्त्वानि जानामि ततो न विमना ह्यहम्
Samanga uvacha
Bhutam bhavyam bhavishyachcha sarvam sattveshu manada
Tesham tattvani janami tato na vimana hyaham
275.6
उपक्रमानहं वेद पुनरेव फलोदयान्
लोके फलानि चित्राणि ततो न विमना ह्यहम्
Upakramanaham veda punareva phalodayan
Loke phalani chitrani tato na vimana hyaham
275.7
अगाधाश्चाप्रतिष्ठाश्च गतिमन्तश्च नारद
अन्धा जडाश्च जीवन्ति पश्यास्मानपि जीवतः
Agadhashchapratishthashcha gatimantashcha narada
Andha jadashcha jivanti pashyasmanapi jivatah
275.8
विहितेनैव जीवन्ति अरोगाङ्गा दिवौकसः
बलवन्तोऽबलाश्चैव तद्वदस्मान्सभाजय
Vihitenaiva jivanti aroganga divaukasah
Balavantobalashchaiva tadvadasmansabhajaya
275.9
सहस्रिणश्च जीवन्ति जीवन्ति शतिनस्तथा
शाकेन चान्ये जीवन्ति पश्यास्मानपि जीवतः
Sahasrinashcha jivanti jivanti shatinastatha
Shakena chanye jivanti pashyasmanapi jivatah
275.10
यदा न शोचेमहि किं नु न स्या;द्धर्मेण वा नारद कर्मणा वा
कृतान्तवश्यानि यदा सुखानि; दुःखानि वा यन्न विधर्षयन्ति
Yada na shochemahi kim nu na sya;ddharmena va narada karmana va
Kritantavashyani yada sukhani; duhkhani va yanna vidharshayanti
275.11
यस्मै प्रज्ञां कथयन्ते मनुष्याः; प्रज्ञामूलो हीन्द्रियाणां प्रसादः
मुह्यन्ति शोचन्ति यदेन्द्रियाणि; प्रज्ञालाभो नास्ति मूढेन्द्रियस्य
Yasmai pragyam kathayante manushyah; pragyamulo hindriyanam prasadah
Muhyanti shochanti yadendriyani; pragyalabho nasti mudhendriyasya
275.12
मूढस्य दर्पः स पुनर्मोह एव; मूढस्य नायं न परोऽस्ति लोकः
न ह्येव दुःखानि सदा भवन्ति; सुखस्य वा नित्यशो लाभ एव
Mudhasya darpah sa punarmoha eva; mudhasya nayam na parosti lokah
Na hyeva duhkhani sada bhavanti; sukhasya va nityasho labha eva
275.13
भावात्मकं संपरिवर्तमानं; न मादृशः संज्वरं जातु कुर्यात्
इष्टान्भोगान्नानुरुध्येत्सुखं वा; न चिन्तयेद्दुःखमभ्यागतं वा
Bhavatmakam samparivartamanam; na madrishah sanjvaram jatu kuryat
Ishtanbhogannanurudhyetsukham va; na chintayedduhkhamabhyagatam va
275.14
समाहितो न स्पृहयेत्परेषां; नानागतं नाभिनन्देत लाभम्
न चापि हृष्येद्विपुलेऽर्थलाभे; तथार्थनाशे च न वै विषीदेत्
Samahito na sprihayetparesham; nanagatam nabhinandeta labham
Na chapi hrishyedvipulerthalabhe; tatharthanashe cha na vai vishidet
275.15
न बान्धवा न च वित्तं न कौली; न च श्रुतं न च मन्त्रा न वीर्यम्
दुःखात्त्रातुं सर्व एवोत्सहन्ते; परत्र शीले न तु यान्ति शान्तिम्
Na bandhava na cha vittam na kauli; na cha shrutam na cha mantra na viryam
Duhkhattratum sarva evotsahante; paratra shile na tu yanti shantim
275.16
नास्ति बुद्धिरयुक्तस्य नायोगाद्विद्यते सुखम्
धृतिश्च दुःखत्यागश्चाप्युभयं नः सुखोदयम्
Nasti buddhirayuktasya nayogadvidyate sukham
Dhritishcha duhkhatyagashchapyubhayam nah sukhodayam
275.17
प्रियं हि हर्षजननं हर्ष उत्सेकवर्धनः
उत्सेको नरकायैव तस्मात्तं संत्यजाम्यहम्
Priyam hi harshajananam harsha utsekavardhanah
Utseko narakayaiva tasmattam santyajamyaham
275.18
एताञ्शोकभयोत्सेकान्मोहनान्सुखदुःखयोः
पश्यामि साक्षिवल्लोके देहस्यास्य विचेष्टनात्
Etanshokabhayotsekanmohanansukhaduhkhayoh
Pashyami sakshivalloke dehasyasya vicheshtanat
275.19
अर्थकामौ परित्यज्य विशोको विगतज्वरः
तृष्णामोहौ तु संत्यज्य चरामि पृथिवीमिमाम्
Arthakamau parityajya vishoko vigatajvarah
Trishnamohau tu santyajya charami prithivimimam
275.20
न मृत्युतो न चाधर्मान्न लोभान्न कुतश्चन
पीतामृतस्येवात्यन्तमिह चामुत्र वा भयम्
Na mrityuto na chadharmanna lobhanna kutashchana
Pitamritasyevatyantamiha chamutra va bhayam
275.21
एतद्ब्रह्मन्विजानामि महत्कृत्वा तपोऽव्ययम्
तेन नारद संप्राप्तो न मां शोकः प्रबाधते
Etadbrahmanvijanami mahatkritva tapovyayam
Tena narada samprapto na mam shokah prabadhate