Utshovঅধ্যায় 276
276.1
যুধিষ্ঠির উবাচ
অতত্ত্বজ্ঞস্য শাস্ত্রাণাং সততং সংশয়াত্মনঃ
অকৃতব্যবসায়স্য শ্রেয়ো ব্রূহি পিতামহ
276.2
ভীষ্ম উবাচ
গুরুপূজা চ সততং বৃদ্ধানাং পর্যুপাসনম্
শ্রবণং চৈব বিদ্যানাং কূটস্থং শ্রেয় উচ্যতে
276.3
অত্রাপ্যুদাহরন্তীমমিতিহাসং পুরাতনম্
গালবস্য চ সংবাদং দেবর্ষের্নারদস্য চ
276.4
বীতমোহক্লমং বিপ্রং জ্ঞানতৃপ্তং জিতেন্দ্রিয়ম্
শ্রেয়স্কামং জিতাত্মানং নারদং গালবোঽব্রবীৎ
276.5
যৈঃ কৈশ্চিত্সংমতো লোকে গুণৈস্তু পুরুষো নৃষু
ভবত্যনপগান্সর্বাংস্তান্গুণাঁল্লক্ষয়াম্যহম্
276.6
ভবানেবংবিধোঽস্মাকং সংশয়ং ছেত্তুমর্হতি
অমূঢশ্চিরমূঢানাং লোকতত্ত্বমজানতাম্
276.7
জ্ঞানে হ্যেবং প্রবৃত্তিঃ স্যাত্কার্যাকার্যে বিজানতঃ
যত্কার্যং ন ব্যবস্যামস্তদ্ভবান্বক্তুমর্হতি
276.8
ভগবন্নাশ্রমাঃ সর্বে পৃথগাচারদর্শিনঃ
ইদং শ্রেয় ইদং শ্রেয় ইতি নানাপ্রধাবিতাঃ
276.9
তাংস্তু বিপ্রস্থিতান্দৃষ্ট্বা শাস্ত্রৈঃ শাস্ত্রাভিনন্দিনঃ
স্বশাস্ত্রৈঃ পরিতুষ্টাংশ্চ শ্রেয়ো নোপলভামহে
276.10
শাস্ত্রং যদি ভবেদেকং ব্যক্তং শ্রেয়ো ভবেত্তদা
শাস্ত্রৈশ্চ বহুভির্ভূয়ঃ শ্রেয়ো গুহ্যং প্রবেশিতম্
276.11
এতস্মাত্কারণাচ্ছ্রেয়ঃ কলিলং প্রতিভাতি মাম্
ব্রবীতু ভগবাংস্তন্মে উপসন্নোঽস্ম্যধীহি ভোঃ
276.12
নারদ উবাচ
আশ্রমাস্তাত চত্বারো যথাসংকল্পিতাঃ পৃথক্
তান্সর্বাননুপশ্য ত্বং সমাশ্রিত্যৈব গালব
276.13
তেষাং তেষাং তথা হি ত্বমাশ্রমাণাং ততস্ততঃ
নানারূপগুণোদ্দেশং পশ্য বিপ্রস্থিতং পৃথক্
নয়ন্তি চৈব তে সম্যগভিপ্রেতমসংশয়ম্
276.14
ঋজু পশ্যংস্তথা সম্যগাশ্রমাণাং পরাং গতিম্
যত্তু নিঃশ্রেয়সং সম্যক্তচ্চৈবাসংশয়াত্মকম্
276.15
অনুগ্রহং চ মিত্রাণামমিত্রাণাং চ নিগ্রহম্
সংগ্রহং চ ত্রিবর্গস্য শ্রেয় আহুর্মনীষিণঃ
276.16
নিবৃত্তিঃ কর্মণঃ পাপাত্সততং পুণ্যশীলতা
সদ্ভিশ্চ সমুদাচারঃ শ্রেয় এতদসংশয়ম্
276.17
মার্দবং সর্বভূতেষু ব্যবহারেষু চার্জবম্
বাক্চৈব মধুরা প্রোক্তা শ্রেয় এতদসংশয়ম্
276.18
দেবতাভ্যঃ পিতৃভ্যশ্চ সংবিভাগোঽতিথিষ্বপি
অসংত্যাগশ্চ ভৃত্যানাং শ্রেয় এতদসংশয়ম্
276.19
সত্যস্য বচনং শ্রেয়ঃ সত্যজ্ঞানং তু দুষ্করম্
যদ্ভূতহিতমত্যন্তমেতত্সত্যং ব্রবীম্যহম্
276.20
অহংকারস্য চ ত্যাগঃ প্রণয়স্য চ নিগ্রহঃ
সংতোষশ্চৈকচর্যা চ কূটস্থং শ্রেয় উচ্যতে
276.21
ধর্মেণ বেদাধ্যয়নং বেদাঙ্গানাং তথৈব চ
বিদ্যার্থানাং চ জিজ্ঞাসা শ্রেয় এতদসংশয়ম্
276.22
শব্দরূপরসস্পর্শান্সহ গন্ধেন কেবলান্
নাত্যর্থমুপসেবেত শ্রেয়সোঽর্থী পরংতপ
276.23
নক্তংচর্যা দিবাস্বপ্নমালস্যং পৈশুনং মদম্
অতিয়োগময়োগং চ শ্রেয়সোঽর্থী পরিত্যজেৎ
276.24
কর্মোত্কর্ষং ন মার্গেত পরেষাং পরিনিন্দয়া
স্বগুণৈরেব মার্গেত বিপ্রকর্ষং পৃথগ্জনাৎ
276.25
নির্গুণাস্ত্বেব ভূয়িষ্ঠমাত্মসংভাবিনো নরাঃ
দোষৈরন্যান্গুণবতঃ ক্ষিপন্ত্যাত্মগুণক্ষয়াৎ
276.26
অনুচ্যমানাশ্চ পুনস্তে মন্যন্তে মহাজনাৎ
গুণবত্তরমাত্মানং স্বেন মানেন দর্পিতাঃ
276.27
অব্রুবন্কস্যচিন্নিন্দামাত্মপূজামবর্ণয়ন্
বিপশ্চিদ্গুণসংপন্নঃ প্রাপ্নোত্যেব মহদ্যশঃ
276.28
অব্রুবন্বাতি সুরভির্গন্ধঃ সুমনসাং শুচিঃ
তথৈবাব্যাহরন্ভাতি বিমলো ভানুরম্বরে
276.29
এবমাদীনি চান্যানি পরিত্যক্তানি মেধয়া
জ্বলন্তি যশসা লোকে যানি ন ব্যাহরন্তি চ
276.30
ন লোকে দীপ্যতে মূর্খঃ কেবলাত্মপ্রশংসয়া
অপি চাপিহিতঃ শ্বভ্রে কৃতবিদ্যঃ প্রকাশতে
276.31
অসন্নুচ্চৈরপি প্রোক্তঃ শব্দঃ সমুপশাম্যতি
দীপ্যতে ত্বেব লোকেষু শনৈরপি সুভাষিতম্
276.32
মূঢানামবলিপ্তানামসারং ভাষিতং বহু
দর্শয়ত্যন্তরাত্মানং দিবা রূপমিবাংশুমান্
276.33
এতস্মাত্কারণাত্প্রজ্ঞাং মৃগয়ন্তে পৃথগ্বিধাম্
প্রজ্ঞালাভো হি ভূতানামুত্তমঃ প্রতিভাতি মাম্
276.34
নাপৃষ্টঃ কস্যচিদ্ব্রূয়ান্ন চান্যায়েন পৃচ্ছতঃ
জ্ঞানবানপি মেধাবী জডবল্লোকমাচরেৎ
276.35
ততো বাসং পরীক্ষেত ধর্মনিত্যেষু সাধুষু
মনুষ্যেষু বদান্যেষু স্বধর্মনিরতেষু চ
276.36
চতুর্ণাং যত্র বর্ণানাং ধর্মব্যতিকরো ভবেৎ
ন তত্র বাসং কুর্বীত শ্রেয়োর্থী বৈ কথংচন
276.37
নিরারম্ভোঽপ্যয়মিহ যথালব্ধোপজীবনঃ
পুণ্যং পুণ্যেষু বিমলং পাপং পাপেষু চাপ্নুয়াৎ
276.38
অপামগ্নেস্তথেন্দোশ্চ স্পর্শং বেদয়তে যথা
তথা পশ্যামহে স্পর্শমুভয়োঃ পাপপুণ্যয়োঃ
276.39
অপশ্যন্তোঽন্নবিষয়ং ভুঞ্জতে বিঘসাশিনঃ
ভুঞ্জানং চান্নবিষয়ান্বিষয়ং বিদ্ধি কর্মণাম্
276.40
যত্রাগময়মানানামসত্কারেণ পৃচ্ছতাম্
প্রব্রূয়াদ্ব্রহ্মণো ধর্মং ত্যজেত্তং দেশমাত্মবান্
276.41
শিষ্যোপাধ্যায়িকা বৃত্তির্যত্র স্যাত্সুসমাহিতা
যথাবচ্ছাস্ত্রসংপন্না কস্তং দেশং পরিত্যজেৎ
276.42
আকাশস্থা ধ্রুবং যত্র দোষং ব্রূয়ুর্বিপশ্চিতাম্
আত্মপূজাভিকামা বৈ কো বসেত্তত্র পণ্ডিতঃ
276.43
যত্র সংলোডিতা লুব্ধৈঃ প্রায়শো ধর্মসেতবঃ
প্রদীপ্তমিব শৈলান্তং কস্তং দেশং ন সংত্যজেৎ
276.44
যত্র ধর্মমনাশঙ্কাশ্চরেয়ুর্বীতমত্সরাঃ
চরেত্তত্র বসেচ্চৈব পুণ্যশীলেষু সাধুষু
276.45
ধর্মমর্থনিমিত্তং তু চরেয়ুর্যত্র মানবাঃ
ন তাননুবসেজ্জাতু তে হি পাপকৃতো জনাঃ
276.46
কর্মণা যত্র পাপেন বর্তন্তে জীবিতেস্পবঃ
ব্যবধাবেত্ততস্তূর্ণং সসর্পাচ্ছরণাদিব
276.47
যেন খট্বাং সমারূঢঃ কর্মণানুশয়ী ভবেৎ
আদিতস্তন্ন কর্তব্যমিচ্ছতা ভবমাত্মনঃ
276.48
যত্র রাজা চ রাজ্ঞশ্চ পুরুষাঃ প্রত্যনন্তরাঃ
কুটুম্বিনামগ্রভুজস্ত্যজেত্তদ্রাষ্ট্রমাত্মবান্
276.49
শ্রোত্রিয়াস্ত্বগ্রভোক্তারো ধর্মনিত্যাঃ সনাতনাঃ
যাজনাধ্যাপনে যুক্তা যত্র তদ্রাষ্ট্রমাবসেৎ
276.50
স্বাহাস্বধাবষট্কারা যত্র সম্যগনুষ্ঠিতাঃ
অজস্রং চৈব বর্তন্তে বসেত্তত্রাবিচারয়ন্
276.51
অশুচীন্যত্র পশ্যেত ব্রাহ্মণান্বৃত্তিকর্শিতান্
ত্যজেত্তদ্রাষ্ট্রমাসন্নমুপসৃষ্টমিবামিষম্
276.52
প্রীয়মাণা নরা যত্র প্রয়চ্ছেয়ুরয়াচিতাঃ
স্বস্থচিত্তো বসেত্তত্র কৃতকৃত্য ইবাত্মবান্
276.53
দণ্ডো যত্রাবিনীতেষু সত্কারশ্চ কৃতাত্মসু
চরেত্তত্র বসেচ্চৈব পুণ্যশীলেষু সাধুষু
276.54
উপসৃষ্টেষ্বদান্তেষু দুরাচারেষ্বসাধুষু
অবিনীতেষু লুব্ধেষু সুমহদ্দণ্ডধারণম্
276.55
যত্র রাজা ধর্মনিত্যো রাজ্যং বৈ পর্যুপাসিতা
অপাস্য কামান্কামেশো বসেত্তত্রাবিচারয়ন্
276.56
তথাশীলা হি রাজানঃ সর্বান্বিষয়বাসিনঃ
শ্রেয়সা যোজয়ন্ত্যাশু শ্রেয়সি প্রত্যুপস্থিতে
276.57
পৃচ্ছতস্তে ময়া তাত শ্রেয় এতদুদাহৃতম্
ন হি শক্যং প্রধানেন শ্রেয়ঃ সংখ্যাতুমাত্মনঃ
276.58
এবং প্রবর্তমানস্য বৃত্তিং প্রণিহিতাত্মনঃ
তপসৈবেহ বহুলং শ্রেয়ো ব্যক্তং ভবিষ্যতি