Utshovঅধ্যায় 277
277.1
যুধিষ্ঠির উবাচ
কথং নু মুক্তঃ পৃথিবীং চরেদস্মদ্বিধো নৃপঃ
নিত্যং কৈশ্চ গুণৈর্যুক্তঃ সঙ্গপাশাদ্বিমুচ্যতে
277.2
ভীষ্ম উবাচ
অত্র তে বর্তয়িষ্যামি ইতিহাসং পুরাতনম্
অরিষ্টনেমিনা প্রোক্তং সগরায়ানুপৃচ্ছতে
277.3
সগর উবাচ
কিং শ্রেয়ঃ পরমং ব্রহ্মন্কৃত্বেহ সুখমশ্নুতে
কথং ন শোচেন্ন ক্ষুভ্যেদেতদিচ্ছামি বেদিতুম্
277.4
ভীষ্ম উবাচ
এবমুক্তস্তদা তার্ক্ষ্যঃ সর্বশাস্ত্রবিশারদঃ
বিবুধ্য সংপদং চাগ্র্যাং সদ্বাক্যমিদমব্রবীৎ
277.5
সুখং মোক্ষসুখং লোকে ন চ লোকোঽবগচ্ছতি
প্রসক্তঃ পুত্রপশুষু ধনধান্যসমাকুলঃ
277.6
সক্তবুদ্ধিরশান্তাত্মা ন স শক্যশ্চিকিত্সিতুম্
স্নেহপাশসিতো মূঢো ন স মোক্ষায় কল্পতে
277.7
স্নেহজানিহ তে পাশান্বক্ষ্যামি শৃণু তান্মম
সকর্ণকেন শিরসা শক্যাশ্ছেত্তুং বিজানতা
277.8
সংভাব্য পুত্রান্কালেন যৌবনস্থান্নিবেশ্য চ
সমর্থাঞ্জীবনে জ্ঞাত্বা মুক্তশ্চর যথাসুখম্
277.9
ভার্যাং পুত্রবতীং বৃদ্ধাং লালিতাং পুত্রবত্সলাম্
জ্ঞাত্বা প্রজহি কালে ত্বং পরার্থমনুদৃশ্য চ
277.10
সাপত্যো নিরপত্যো বা মুক্তশ্চর যথাসুখম্
ইন্দ্রিয়ৈরিন্দ্রিয়ার্থাংস্ত্বমনুভূয় যথাবিধি
277.11
কৃতকৌতূহলস্তেষু মুক্তশ্চর যথাসুখম্
উপপত্ত্যোপলব্ধেষু লাভেষু চ সমো ভব
277.12
এষ তাবত্সমাসেন তব সংকীর্তিতো ময়া
মোক্ষার্থো বিস্তরেণাপি ভূয়ো বক্ষ্যামি তচ্ছৃণু
277.13
মুক্তা বীতভয়া লোকে চরন্তি সুখিনো নরাঃ
সক্তভাবা বিনশ্যন্তি নরাস্তত্র ন সংশয়ঃ
277.14
আহারসংচয়াশ্চৈব তথা কীটপিপীলিকাঃ
অসক্তাঃ সুখিনো লোকে সক্তাশ্চৈব বিনাশিনঃ
277.15
স্বজনে ন চ তে চিন্তা কর্তব্যা মোক্ষবুদ্ধিনা
ইমে ময়া বিনাভূতা ভবিষ্যন্তি কথং ত্বিতি
277.16
স্বয়মুত্পদ্যতে জন্তুঃ স্বয়মেব বিবর্ধতে
সুখদুঃখে তথা মৃত্যুং স্বয়মেবাধিগচ্ছতি
277.17
ভোজনাচ্ছাদনে চৈব মাত্রা পিত্রা চ সংগ্রহম্
স্বকৃতেনাধিগচ্ছন্তি লোকে নাস্ত্যকৃতং পুরা
277.18
ধাত্রা বিহিতভক্ষ্যাণি সর্বভূতানি মেদিনীম্
লোকে বিপরিধাবন্তি রক্ষিতানি স্বকর্মভিঃ
277.19
স্বয়ং মৃত্পিণ্ডভূতস্য পরতন্ত্রস্য সর্বদা
কো হেতুঃ স্বজনং পোষ্টুং রক্ষিতুং বাদৃঢাত্মনঃ
277.20
স্বজনং হি যদা মৃত্যুর্হন্ত্যেব তব পশ্যতঃ
কৃতেঽপি যত্নে মহতি তত্র বোদ্ধব্যমাত্মনা
277.21
জীবন্তমপি চৈবৈনং ভরণে রক্ষণে তথা
অসমাপ্তে পরিত্যজ্য পশ্চাদপি মরিষ্যসি
277.22
যদা মৃতশ্চ স্বজনং ন জ্ঞাস্যসি কথংচন
সুখিতং দুঃখিতং বাপি ননু বোদ্ধব্যমাত্মনা
277.23
মৃতে বা ত্বয়ি জীবে বা যদি ভোক্ষ্যতি বৈ জনঃ
স্বকৃতং ননু বুদ্ধ্বৈবং কর্তব্যং হিতমাত্মনঃ
277.24
এবং বিজানঁল্লোকেঽস্মিন্কঃ কস্যেত্যভিনিশ্চিতঃ
মোক্ষে নিবেশয় মনো ভূয়শ্চাপ্যুপধারয়
277.25
ক্ষুত্পিপাসাদয়ো ভাবা জিতা যস্যেহ দেহিনঃ
ক্রোধো লোভস্তথা মোহঃ সত্ত্ববান্মুক্ত এব সঃ
277.26
দ্যূতে পানে তথা স্ত্রীষু মৃগয়ায়াং চ যো নরঃ
ন প্রমাদ্যতি সংমোহাত্সততং মুক্ত এব সঃ
277.27
দিবসে দিবসে নাম রাত্রৌ রাত্রৌ সদা সদা
ভোক্তব্যমিতি যঃ খিন্নো দোষবুদ্ধিঃ স উচ্যতে
277.28
আত্মভাবং তথা স্ত্রীষু মুক্তমেব পুনঃ পুনঃ
যঃ পশ্যতি সদা যুক্তো যথাবন্মুক্ত এব সঃ
277.29
সংভবং চ বিনাশং চ ভূতানাং চেষ্টিতং তথা
যস্তত্ত্বতো বিজানাতি লোকেঽস্মিন্মুক্ত এব সঃ
277.30
প্রস্থং বাহসহস্রেষু যাত্রার্থং চৈব কোটিষু
প্রাসাদে মঞ্চকস্থানং যঃ পশ্যতি স মুচ্যতে
277.31
মৃত্যুনাভ্যাহতং লোকং ব্যাধিভিশ্চোপপীডিতম্
অবৃত্তিকর্শিতং চৈব যঃ পশ্যতি স মুচ্যতে
277.32
যঃ পশ্যতি সুখী তুষ্টো নপশ্যংশ্চ বিহন্যতে
যশ্চাপ্যল্পেন সংতুষ্টো লোকেঽস্মিন্মুক্ত এব সঃ
277.33
অগ্নীষোমাবিদং সর্বমিতি যশ্চানুপশ্যতি
ন চ সংস্পৃশ্যতে ভাবৈরদ্ভুতৈর্মুক্ত এব সঃ
277.34
পর্যঙ্কশয্যা ভূমিশ্চ সমানে যস্য দেহিনঃ
শালয়শ্চ কদন্নং চ যস্য স্যান্মুক্ত এব সঃ
277.35
ক্ষৌমং চ কুশচীরং চ কৌশেয়ং বল্কলানি চ
আবিকং চর্ম চ সমং যস্য স্যান্মুক্ত এব সঃ
277.36
পঞ্চভূতসমুদ্ভূতং লোকং যশ্চানুপশ্যতি
তথা চ বর্ততে দৃষ্ট্বা লোকেঽস্মিন্মুক্ত এব সঃ
277.37
সুখদুঃখে সমে যস্য লাভালাভৌ জয়াজয়ৌ
ইচ্ছাদ্বেষৌ ভয়োদ্বেগৌ সর্বথা মুক্ত এব সঃ
277.38
রক্তমূত্রপুরীষাণাং দোষাণাং সংচয়ং তথা
শরীরং দোষবহুলং দৃষ্ট্বা চেদং বিমুচ্যতে
277.39
বলীপলিতসংয়োগং কার্শ্যং বৈবর্ণ্যমেব চ
কুব্জভাবং চ জরয়া যঃ পশ্যতি স মুচ্যতে
277.40
পুংস্ত্বোপঘাতং কালেন দর্শনোপরমং তথা
বাধির্যং প্রাণমন্দত্বং যঃ পশ্যতি স মুচ্যতে
277.41
গতানৃষীংস্তথা দেবানসুরাংশ্চ তথা গতান্
লোকাদস্মাত্পরং লোকং যঃ পশ্যতি স মুচ্যতে
277.42
প্রভাবৈরন্বিতাস্তৈস্তৈঃ পার্থিবেন্দ্রাঃ সহস্রশঃ
যে গতাঃ পৃথিবীং ত্যক্ত্বা ইতি জ্ঞাত্বা বিমুচ্যতে
277.43
অর্থাংশ্চ দুর্লভাঁল্লোকে ক্লেশাংশ্চ সুলভাংস্তথা
দুঃখং চৈব কুটুম্বার্থে যঃ পশ্যতি স মুচ্যতে
277.44
অপত্যানাং চ বৈগুণ্যং জনং বিগুণমেব চ
পশ্যন্ভূয়িষ্ঠশো লোকে কো মোক্ষং নাভিপূজয়েৎ
277.45
শাস্ত্রাল্লোকাচ্চ যো বুদ্ধঃ সর্বং পশ্যতি মানবঃ
অসারমিব মানুষ্যং সর্বথা মুক্ত এব সঃ
277.46
এতচ্ছ্রুত্বা মম বচো ভবাংশ্চরতু মুক্তবৎ
গার্হস্থ্যে যদি তে মোক্ষে কৃতা বুদ্ধিরবিক্লবা
277.47
তত্তস্য বচনং শ্রুত্বা সম্যক্স পৃথিবীপতিঃ
মোক্ষজৈশ্চ গুণৈর্যুক্তঃ পালয়ামাস চ প্রজাঃ