Utshovঅধ্যায় 278
278.1
যুধিষ্ঠির উবাচ
তিষ্ঠতে মে সদা তাত কৌতূহলমিদং হৃদি
তদহং শ্রোতুমিচ্ছামি ত্বত্তঃ কুরুপিতামহ
278.2
কথং দেবর্ষিরুশনা সদা কাব্যো মহামতিঃ
অসুরাণাং প্রিয়করঃ সুরাণামপ্রিয়ে রতঃ
278.3
বর্ধয়ামাস তেজশ্চ কিমর্থমমিতৌজসাম্
নিত্যং বৈরনিবদ্ধাশ্চ দানবাঃ সুরসত্তমৈঃ
278.4
কথং চাপ্যুশনা প্রাপ শুক্রত্বমমরদ্যুতিঃ
ঋদ্ধিং চ স কথং প্রাপ্তঃ সর্বমেতদ্ব্রবীহি মে
278.5
ন যাতি চ স তেজস্বী মধ্যেন নভসঃ কথম্
এতদিচ্ছামি বিজ্ঞাতুং নিখিলেন পিতামহ
278.6
ভীষ্ম উবাচ
শৃণু রাজন্নবহিতঃ সর্বমেতদ্যথাতথম্
যথামতি যথা চৈতচ্ছ্রুতপূর্বং ময়ানঘ
278.7
এষ ভার্গবদায়াদো মুনিঃ সত্যো দৃঢব্রতঃ
অসুরাণাং প্রিয়করো নিমিত্তে করুণাত্মকে
278.8
ইন্দ্রোঽথ ধনদো রাজা যক্ষরক্ষোধিপঃ স চ
প্রভবিষ্ণুশ্চ কোশস্য জগতশ্চ তথা প্রভুঃ
278.9
তস্যাত্মানমথাবিশ্য যোগসিদ্ধো মহামুনিঃ
রুদ্ধ্বা ধনপতিং দেবং যোগেন হৃতবান্বসু
278.10
হৃতে ধনে ততঃ শর্ম ন লেভে ধনদস্তথা
আপন্নমন্যুঃ সংবিগ্নঃ সোঽভ্যগাত্সুরসত্তমম্
278.11
নিবেদয়ামাস তদা শিবায়ামিততেজসে
দেবশ্রেষ্ঠায় রুদ্রায় সৌম্যায় বহুরূপিণে
278.12
কুবের উবাচ
যোগাত্মকেনোশনসা রুদ্ধ্বা মম হৃতং বসু
যোগেনাত্মগতিং কৃত্বা নিঃসৃতশ্চ মহাতপাঃ
278.13
ভীষ্ম উবাচ
এতচ্ছ্রুত্বা ততঃ ক্রুদ্ধো মহায়োগী মহেশ্বরঃ
সংরক্তনয়নো রাজঞ্শূলমাদায় তস্থিবান্
278.14
ক্বাস্বৌ ক্বাসাবিতি প্রাহ গৃহীত্বা পরমায়ুধম্
উশনা দূরতস্তস্য বভৌ জ্ঞাত্বা চিকীর্ষিতম্
278.15
স মহায়োগিনো বুদ্ধ্বা তং রোষং বৈ মহাত্মনঃ
গতিমাগমনং বেত্তি স্থানং বেত্তি ততঃ প্রভুঃ
278.16
সংচিন্ত্যোগ্রেণ তপসা মহাত্মানং মহেশ্বরম্
উশনা যোগসিদ্ধাত্মা শূলাগ্রে প্রত্যদৃশ্যত
278.17
বিজ্ঞাতরূপঃ স তদা তপঃসিদ্ধেন ধন্বিনা
জ্ঞাত্বা শূলং চ দেবেশঃ পাণিনা সমনাময়ৎ
278.18
আনতেনাথ শূলেন পাণিনামিততেজসা
পিনাকমিতি চোবাচ শূলমুগ্রায়ুধঃ প্রভুঃ
278.19
পাণিমধ্যগতং দৃষ্ট্বা ভার্গবং তমুমাপতিঃ
আস্যং বিবৃত্য ককুদী পাণিং সংপ্রাক্ষিপচ্ছনৈঃ
278.20
স তু প্রবিষ্ট উশনা কোষ্ঠং মাহেশ্বরং প্রভুঃ
ব্যচরচ্চাপি তত্রাসৌ মহাত্মা ভৃগুনন্দনঃ
278.21
যুধিষ্ঠির উবাচ
কিমর্থং ব্যচরদ্রাজন্নুশনা তস্য ধীমতঃ
জঠরে দেবদেবস্য কিং চাকার্ষীন্মহাদ্যুতিঃ
278.22
ভীষ্ম উবাচ
পুরা সোঽন্তর্জলগতঃ স্থাণুভূতো মহাব্রতঃ
বর্ষাণামভবদ্রাজন্প্রয়ুতান্যর্বুদানি চ
278.23
উদতিষ্ঠত্তপস্তপ্ত্বা দুশ্চরং স মহাহ্রদাৎ
ততো দেবাতিদেবস্তং ব্রহ্মা সমুপসর্পত
278.24
তপোবৃদ্ধিমপৃচ্ছচ্চ কুশলং চৈনমব্যয়ম্
তপঃ সুচীর্ণমিতি চ প্রোবাচ বৃষভধ্বজঃ
278.25
তত্সংয়োগেন বৃদ্ধিং চাপ্যপশ্যত্স তু শংকরঃ
মহামতিরচিন্ত্যাত্মা সত্যধর্মরতঃ সদা
278.26
স তেনাঢ্যো মহায়োগী তপসা চ ধনেন চ
ব্যরাজত মহারাজ ত্রিষু লোকেষু বীর্যবান্
278.27
ততঃ পিনাকী যোগাত্মা ধ্যানয়োগং সমাবিশৎ
উশনা তু সমুদ্বিগ্নো নিলিল্যে জঠরে ততঃ
278.28
তুষ্টাব চ মহায়োগী দেবং তত্রস্থ এব চ
নিঃসারং কাঙ্ক্ষমাণস্তু তেজসা প্রত্যহন্যত
278.29
উশনা তু তদোবাচ জঠরস্থো মহামুনিঃ
প্রসাদং মে কুরুষ্বেতি পুনঃ পুনররিংদম
278.30
তমুবাচ মহাদেবো গচ্ছ শিশ্নেন মোক্ষণম্
ইতি স্রোতাংসি সর্বাণি রুদ্ধ্বা ত্রিদশপুংগবঃ
278.31
অপশ্যমানঃ স দ্বারং সর্বতঃপিহিতো মুনিঃ
পর্যক্রামদ্দহ্যমান ইতশ্চেতশ্চ তেজসা
278.32
স বিনিষ্ক্রম্য শিশ্নেন শুক্রত্বমভিপেদিবান্
কার্যেণ তেন নভসো নাগচ্ছত চ মধ্যতঃ
278.33
নিষ্ক্রান্তমথ তং দৃষ্ট্বা জ্বলন্তমিব তেজসা
ভবো রোষসমাবিষ্টঃ শূলোদ্যতকরঃ স্থিতঃ
278.34
ন্যবারয়ত তং দেবী ক্রুদ্ধং পশুপতিং পতিম্
পুত্রত্বমগমদ্দেব্যা বারিতে শংকরে চ সঃ
278.35
দেব্যুবাচ
হিংসনীয়স্ত্বয়া নৈষ মম পুত্রত্বমাগতঃ
ন হি দেবোদরাত্কশ্চিন্নিঃসৃতো নাশমর্ছতি
278.36
ভীষ্ম উবাচ
ততঃ প্রীতোঽভবদ্দেব্যাঃ প্রহসংশ্চেদমব্রবীৎ
গচ্ছত্বেষ যথাকামমিতি রাজন্পুনঃ পুনঃ
278.37
ততঃ প্রণম্য বরদং দেবং দেবীমুমাং তথা
উশনা প্রাপ তদ্ধীমান্গতিমিষ্টাং মহামুনিঃ
278.38
এতত্তে কথিতং তাত ভার্গবস্য মহাত্মনঃ
চরিতং ভরতশ্রেষ্ঠ যন্মাং ত্বং পরিপৃচ্ছসি