Utshovঅধ্যায় 279
279.1
যুধিষ্ঠির উবাচ
অতঃ পরং মহাবাহো যচ্ছ্রেয়স্তদ্বদস্ব মে
ন তৃপ্যাম্যমৃতস্যেব বচসস্তে পিতামহ
279.2
কিং কর্ম পুরুষঃ কৃত্বা শুভং পুরুষসত্তম
শ্রেয়ঃ পরমবাপ্নোতি প্রেত্য চেহ চ তদ্বদ
279.3
ভীষ্ম উবাচ
অত্র তে বর্তয়িষ্যামি যথা পূর্বং মহায়শাঃ
পরাশরং মহাত্মানং পপ্রচ্ছ জনকো নৃপঃ
279.4
কিং শ্রেয়ঃ সর্বভূতানামস্মিঁল্লোকে পরত্র চ
যদ্ভবেত্প্রতিপত্তব্যং তদ্ভবান্প্রব্রবীতু মে
279.5
ততঃ স তপসা যুক্তঃ সর্বধর্মবিধানবিৎ
নৃপায়ানুগ্রহমনা মুনির্বাক্যমথাব্রবীৎ
279.6
ধর্ম এব কৃতঃ শ্রেয়ানিহ লোকে পরত্র চ
তস্মাদ্ধি পরমং নাস্তি যথা প্রাহুর্মনীষিণঃ
279.7
প্রতিপদ্য নরো ধর্মং স্বর্গলোকে মহীয়তে
ধর্মাত্মকঃ কর্মবিধির্দেহিনাং নৃপসত্তম
তস্মিন্নাশ্রমিণঃ সন্তঃ স্বকর্মাণীহ কুর্বতে
279.8
চতুর্বিধা হি লোকস্য যাত্রা তাত বিধীয়তে
মর্ত্যা যত্রাবতিষ্ঠন্তে সা চ কামাত্প্রবর্ততে
279.9
সুকৃতাসুকৃতং কর্ম নিষেব্য বিবিধৈঃ ক্রমৈঃ
দশার্ধপ্রবিভক্তানাং ভূতানাং বহুধা গতিঃ
279.10
সৌবর্ণং রাজতং বাপি যথা ভাণ্ডং নিষিচ্যতে
তথা নিষিচ্যতে জন্তুঃ পূর্বকর্মবশানুগঃ
279.11
নাবীজাজ্জায়তে কিংচিন্নাকৃত্বা সুখমেধতে
সুকৃতী বিন্দতি সুখং প্রাপ্য দেহক্ষয়ং নরঃ
279.12
দৈবং তাত ন পশ্যামি নাস্তি দৈবস্য সাধনম্
স্বভাবতো হি সংসিদ্ধা দেবগন্ধর্বদানবাঃ
279.13
প্রেত্য জাতিকৃতং কর্ম ন স্মরন্তি সদা জনাঃ
তে বৈ তস্য ফলপ্রাপ্তৌ কর্ম চাপি চতুর্বিধম্
279.14
লোকয়াত্রাশ্রয়শ্চৈব শব্দো বেদাশ্রয়ঃ কৃতঃ
শান্ত্যর্থং মনসস্তাত নৈতদ্বৃদ্ধানুশাসনম্
279.15
চক্ষুষা মনসা বাচা কর্মণা চ চতুর্বিধম্
কুরুতে যাদৃশং কর্ম তাদৃশং প্রতিপদ্যতে
279.16
নিরন্তরং চ মিশ্রং চ ফলতে কর্ম পার্থিব
কল্যাণং যদি বা পাপং ন তু নাশোঽস্য বিদ্যতে
279.17
কদাচিত্সুকৃতং তাত কূটস্থমিব তিষ্ঠতি
মজ্জমানস্য সংসারে যাবদ্দুঃখাদ্বিমুচ্যতে
279.18
ততো দুঃখক্ষয়ং কৃত্বা সুকৃতং কর্ম সেবতে
সুকৃতক্ষয়াদ্দুষ্কৃতং চ তদ্বিদ্ধি মনুজাধিপ
279.19
দমঃ ক্ষমা ধৃতিস্তেজঃ সংতোষঃ সত্যবাদিতা
হ্রীরহিংসাব্যসনিতা দাক্ষ্যং চেতি সুখাবহাঃ
279.20
দুষ্কৃতে সুকৃতে বাপি ন জন্তুরয়তো ভবেৎ
নিত্যং মনঃসমাধানে প্রয়তেত বিচক্ষণঃ
279.21
নায়ং পরস্য সুকৃতং দুষ্কৃতং বাপি সেবতে
করোতি যাদৃশং কর্ম তাদৃশং প্রতিপদ্যতে
279.22
সুখদুঃখে সমাধায় পুমানন্যেন গচ্ছতি
অন্যেনৈব জনঃ সর্বঃ সংগতো যশ্চ পার্থিব
279.23
পরেষাং যদসূয়েত ন তত্কুর্যাত্স্বয়ং নরঃ
যো হ্যসূয়ুস্তথায়ুক্তঃ সোঽবহাসং নিয়চ্ছতি
279.24
ভীরূ রাজন্যো ব্রাহ্মণঃ সর্বভক্ষো; বৈশ্যোঽনীহাবান্হীনবর্ণোঽলসশ্চ
বিদ্বাংশ্চাশীলো বৃত্তহীনঃ কুলীনঃ; সত্যাদ্ভ্রষ্টো ব্রাহ্মণঃ স্ত্রী চ দুষ্টা
279.25
রাগী মুক্তঃ পচমানোঽঽত্মহেতো;র্মূর্খো বক্তা নৃপহীনং চ রাষ্ট্রম্
এতে সর্বে শোচ্যতাং যান্তি রাজ;ন্যশ্চায়ুক্তঃ স্নেহহীনঃ প্রজাসু