UtshovChapter 269
269.1
युधिष्ठिर उवाच
किंशीलः किंसमाचारः किंविद्यः किंपरायणः
प्राप्नोति ब्रह्मणः स्थानं यत्परं प्रकृतेर्ध्रुवम्
Yudhishthira uvacha
Kinshilah kinsamacharah kinvidyah kimparayanah
Prapnoti brahmanah sthanam yatparam prakriterdhruvam
269.2
भीष्म उवाच
मोक्षधर्मेषु निरतो लघ्वाहारो जितेन्द्रियः
प्राप्नोति परमं स्थानं यत्परं प्रकृतेर्ध्रुवम्
Bhishma uvacha
Mokshadharmeshu nirato laghvaharo jitendriyah
Prapnoti paramam sthanam yatparam prakriterdhruvam
269.3
स्वगृहादभिनिःसृत्य लाभालाभे समो मुनिः
समुपोढेषु कामेषु निरपेक्षः परिव्रजेत्
Svagrihadabhinihsritya labhalabhe samo munih
Samupodheshu kameshu nirapekshah parivrajet
269.4
न चक्षुषा न मनसा न वाचा दूषयेदपि
न प्रत्यक्षं परोक्षं वा दूषणं व्याहरेत्क्वचित्
Na chakshusha na manasa na vacha dushayedapi
Na pratyaksham paroksham va dushanam vyaharetkvachit
269.5
न हिंस्यात्सर्वभूतानि मैत्रायणगतिश्चरेत्
नेदं जीवितमासाद्य वैरं कुर्वीत केनचित्
Na hinsyatsarvabhutani maitrayanagatishcharet
Nedam jivitamasadya vairam kurvita kenachit
269.6
अतिवादांस्तितिक्षेत नाभिमन्येत्कथंचन
क्रोध्यमानः प्रियं ब्रूयादाक्रुष्टः कुशलं वदेत्
Ativadanstitiksheta nabhimanyetkathanchana
Krodhyamanah priyam bruyadakrushtah kushalam vadet
269.7
प्रदक्षिणं प्रसव्यं च ग्राममध्ये न चाचरेत्
भैक्षचर्यामनापन्नो न गच्छेत्पूर्वकेतितः
Pradakshinam prasavyam cha gramamadhye na chacharet
Bhaikshacharyamanapanno na gachchhetpurvaketitah
269.8
अवकीर्णः सुगुप्तश्च न वाचा ह्यप्रियं वदेत्
मृदुः स्यादप्रतिक्रूरो विस्रब्धः स्यादरोषणः
Avakirnah suguptashcha na vacha hyapriyam vadet
Mriduh syadapratikruro visrabdhah syadaroshanah
269.9
विधूमे न्यस्तमुसले व्यङ्गारे भुक्तवज्जने
अतीते पात्रसंचारे भिक्षां लिप्सेत वै मुनिः
Vidhume nyastamusale vyangare bhuktavajjane
Atite patrasanchare bhiksham lipseta vai munih
269.10
अनुयात्रिकमर्थस्य मात्रालाभेष्वनादृतः
अलाभे न विहन्येत लाभश्चैनं न हर्षयेत्
Anuyatrikamarthasya matralabheshvanadritah
Alabhe na vihanyeta labhashchainam na harshayet
269.11
लाभं साधारणं नेच्छेन्न भुञ्जीताभिपूजितः
अभिपूजितलाभं हि जुगुप्सेतैव तादृशः
Labham sadharanam nechchhenna bhunjitabhipujitah
Abhipujitalabham hi jugupsetaiva tadrishah
269.12
न चान्नदोषान्निन्देत न गुणानभिपूजयेत्
शय्यासने विविक्ते च नित्यमेवाभिपूजयेत्
Na channadoshannindeta na gunanabhipujayet
Shayyasane vivikte cha nityamevabhipujayet
269.13
शून्यागारं वृक्षमूलमरण्यमथ वा गुहाम्
अज्ञातचर्यां गत्वान्यां ततोऽन्यत्रैव संविशेत्
Shunyagaram vrikshamulamaranyamatha va guham
Agyatacharyam gatvanyam tatonyatraiva sanvishet
269.14
अनुरोधविरोधाभ्यां समः स्यादचलो ध्रुवः
सुकृतं दुष्कृतं चोभे नानुरुध्येत कर्मणि
Anurodhavirodhabhyam samah syadachalo dhruvah
Sukritam dushkritam chobhe nanurudhyeta karmani
269.15
वाचो वेगं मनसः क्रोधवेगं; विवित्सावेगमुदरोपस्थवेगम्
एतान्वेगान्विनयेद्वै तपस्वी; निन्दा चास्य हृदयं नोपहन्यात्
Vacho vegam manasah krodhavegam; vivitsavegamudaropasthavegam
Etanveganvinayedvai tapasvi; ninda chasya hridayam nopahanyat
269.16
मध्यस्थ एव तिष्ठेत प्रशंसानिन्दयोः समः
एतत्पवित्रं परमं परिव्राजक आश्रमे
Madhyastha eva tishtheta prashansanindayoh samah
Etatpavitram paramam parivrajaka ashrame
269.17
महात्मा सुव्रतो दान्तः सर्वत्रैवानपाश्रितः
अपूर्वचारकः सौम्यो अनिकेतः समाहितः
Mahatma suvrato dantah sarvatraivanapashritah
Apurvacharakah saumyo aniketah samahitah
269.18
वानप्रस्थगृहस्थाभ्यां न संसृज्येत कर्हिचित्
अज्ञातलिप्सां लिप्सेत न चैनं हर्ष आविशेत्
Vanaprasthagrihasthabhyam na sansrijyeta karhichit
Agyatalipsam lipseta na chainam harsha avishet
269.19
विजानतां मोक्ष एष श्रमः स्यादविजानताम्
मोक्षयानमिदं कृत्स्नं विदुषां हारितोऽब्रवीत्
Vijanatam moksha esha shramah syadavijanatam
Mokshayanamidam kritsnam vidusham haritobravit
269.20
अभयं सर्वभूतेभ्यो दत्त्वा यः प्रव्रजेद्गृहात्
लोकास्तेजोमयास्तस्य तथानन्त्याय कल्पते
Abhayam sarvabhutebhyo dattva yah pravrajedgrihat
Lokastejomayastasya tathanantyaya kalpate