UtshovChapter 242
242.1
शुक उवाच
यस्माद्धर्मात्परो धर्मो विद्यते नेह कश्चन
यो विशिष्टश्च धर्मेभ्यस्तं भवान्प्रब्रवीतु मे
Shuka uvacha
Yasmaddharmatparo dharmo vidyate neha kashchana
Yo vishishtashcha dharmebhyastam bhavanprabravitu me
242.2
व्यास उवाच
धर्मं ते संप्रवक्ष्यामि पुराणमृषिसंस्तुतम्
विशिष्टं सर्वधर्मेभ्यस्तमिहैकमनाः शृणु
Vyasa uvacha
Dharmam te sampravakshyami puranamrishisanstutam
Vishishtam sarvadharmebhyastamihaikamanah shrinu
242.3
इन्द्रियाणि प्रमाथीनि बुद्ध्या संयम्य यत्नतः
सर्वतो निष्पतिष्णूनि पिता बालानिवात्मजान्
Indriyani pramathini buddhya sanyamya yatnatah
Sarvato nishpatishnuni pita balanivatmajan
242.4
मनसश्चेन्द्रियाणां च ह्यैकाग्र्यं परमं तपः
तज्ज्यायः सर्वधर्मेभ्यः स धर्मः पर उच्यते
Manasashchendriyanam cha hyaikagryam paramam tapah
Tajjyayah sarvadharmebhyah sa dharmah para uchyate
242.5
तानि सर्वाणि संधाय मनःषष्ठानि मेधया
आत्मतृप्त इवासीत बहु चिन्त्यमचिन्तयन्
Tani sarvani sandhaya manahshashthani medhaya
Atmatripta ivasita bahu chintyamachintayan
242.6
गोचरेभ्यो निवृत्तानि यदा स्थास्यन्ति वेश्मनि
तदा त्वमात्मनात्मानं परं द्रक्ष्यसि शाश्वतम्
Gocharebhyo nivrittani yada sthasyanti veshmani
Tada tvamatmanatmanam param drakshyasi shashvatam
242.7
सर्वात्मानं महात्मानं विधूममिव पावकम्
तं पश्यन्ति महात्मानो ब्राह्मणा ये मनीषिणः
Sarvatmanam mahatmanam vidhumamiva pavakam
Tam pashyanti mahatmano brahmana ye manishinah
242.8
यथा पुष्पफलोपेतो बहुशाखो महाद्रुमः
आत्मनो नाभिजानीते क्व मे पुष्पं क्व मे फलम्
Yatha pushpaphalopeto bahushakho mahadrumah
Atmano nabhijanite kva me pushpam kva me phalam
242.9
एवमात्मा न जानीते क्व गमिष्ये कुतो न्वहम्
अन्यो ह्यत्रान्तरात्मास्ति यः सर्वमनुपश्यति
Evamatma na janite kva gamishye kuto nvaham
Anyo hyatrantaratmasti yah sarvamanupashyati
242.10
ज्ञानदीपेन दीप्तेन पश्यत्यात्मानमात्मना
दृष्ट्वा त्वमात्मनात्मानं निरात्मा भव सर्ववित्
Gyanadipena diptena pashyatyatmanamatmana
Drishtva tvamatmanatmanam niratma bhava sarvavit
242.11
विमुक्तः सर्वपापेभ्यो मुक्तत्वच इवोरगः
परां बुद्धिमवाप्येह विपाप्मा विगतज्वरः
Vimuktah sarvapapebhyo muktatvacha ivoragah
Param buddhimavapyeha vipapma vigatajvarah
242.12
सर्वतःस्रोतसं घोरां नदीं लोकप्रवाहिनीम्
पञ्चेन्द्रियग्राहवतीं मनःसंकल्परोधसम्
Sarvatahsrotasam ghoram nadim lokapravahinim
Panchendriyagrahavatim manahsankalparodhasam
242.13
लोभमोहतृणच्छन्नां कामक्रोधसरीसृपाम्
सत्यतीर्थानृतक्षोभां क्रोधपङ्कां सरिद्वराम्
Lobhamohatrinachchhannam kamakrodhasarisripam
Satyatirthanritakshobham krodhapankam saridvaram
242.14
अव्यक्तप्रभवां शीघ्रां दुस्तरामकृतात्मभिः
प्रतरस्व नदीं बुद्ध्या कामग्राहसमाकुलाम्
Avyaktaprabhavam shighram dustaramakritatmabhih
Pratarasva nadim buddhya kamagrahasamakulam
242.15
संसारसागरगमां योनिपातालदुस्तराम्
आत्मजन्मोद्भवां तात जिह्वावर्तां दुरासदाम्
Sansarasagaragamam yonipataladustaram
Atmajanmodbhavam tata jihvavartam durasadam
242.16
यां तरन्ति कृतप्रज्ञा धृतिमन्तो मनीषिणः
तां तीर्णः सर्वतोमुक्तो विपूतात्मात्मविच्छुचिः
Yam taranti kritapragya dhritimanto manishinah
Tam tirnah sarvatomukto viputatmatmavichchhuchih
242.17
उत्तमां बुद्धिमास्थाय ब्रह्मभूयं गमिष्यसि
संतीर्णः सर्वसंक्लेशान्प्रसन्नात्मा विकल्मषः
Uttamam buddhimasthaya brahmabhuyam gamishyasi
Santirnah sarvasankleshanprasannatma vikalmashah
242.18
भूमिष्ठानीव भूतानि पर्वतस्थो निशामय
अक्रुध्यन्नप्रहृष्यंश्च ननृशंसमतिस्तथा
ततो द्रक्ष्यसि भूतानां सर्वेषां प्रभवाप्ययौ
Bhumishthaniva bhutani parvatastho nishamaya
Akrudhyannaprahrishyanshcha nanrishansamatistatha
Tato drakshyasi bhutanam sarvesham prabhavapyayau
242.19
एवं वै सर्वधर्मेभ्यो विशिष्टं मेनिरे बुधाः
धर्मं धर्मभृतां श्रेष्ठ मुनयस्तत्त्वदर्शिनः
Evam vai sarvadharmebhyo vishishtam menire budhah
Dharmam dharmabhritam shreshtha munayastattvadarshinah
242.20
आत्मनोऽव्ययिनो ज्ञात्वा इदं पुत्रानुशासनम्
प्रयताय प्रवक्तव्यं हितायानुगताय च
Atmanovyayino gyatva idam putranushasanam
Prayataya pravaktavyam hitayanugataya cha
242.21
आत्मज्ञानमिदं गुह्यं सर्वगुह्यतमं महत्
अब्रुवं यदहं तात आत्मसाक्षिकमञ्जसा
Atmagyanamidam guhyam sarvaguhyatamam mahat
Abruvam yadaham tata atmasakshikamanjasa
242.22
नैव स्त्री न पुमानेतन्नैव चेदं नपुंसकम्
अदुःखमसुखं ब्रह्म भूतभव्यभवात्मकम्
Naiva stri na pumanetannaiva chedam napunsakam
Aduhkhamasukham brahma bhutabhavyabhavatmakam
242.23
नैतज्ज्ञात्वा पुमान्स्त्री वा पुनर्भवमवाप्नुयात्
अभवप्रतिपत्त्यर्थमेतद्वर्त्म विधीयते
Naitajgyatva pumanstri va punarbhavamavapnuyat
Abhavapratipattyarthametadvartma vidhiyate
242.24
यथा मतानि सर्वाणि न चैतानि यथा तथा
कथितानि मया पुत्र भवन्ति न भवन्ति च
Yatha matani sarvani na chaitani yatha tatha
Kathitani maya putra bhavanti na bhavanti cha
242.25
तत्प्रीतियुक्तेन गुणान्वितेन; पुत्रेण सत्पुत्रगुणान्वितेन
पृष्टो हीदं प्रीतिमता हितार्थं; ब्रूयात्सुतस्येह यदुक्तमेतत्
Tatpritiyuktena gunanvitena; putrena satputragunanvitena
Prishto hidam pritimata hitartham; bruyatsutasyeha yaduktametat