UtshovChapter 192
192.1
युधिष्ठिर उवाच
कालमृत्युयमानां च ब्राह्मणस्य च सत्तम
विवादो व्याहृतः पूर्वं तद्भवान्वक्तुमर्हति
Yudhishthira uvacha
Kalamrityuyamanam cha brahmanasya cha sattama
Vivado vyahritah purvam tadbhavanvaktumarhati
192.2
भीष्म उवाच
अत्राप्युदाहरन्तीममितिहासं पुरातनम्
इक्ष्वाकोः सूर्यपुत्रस्य यद्वृत्तं ब्राह्मणस्य च
Bhishma uvacha
Atrapyudaharantimamitihasam puratanam
Ikshvakoh suryaputrasya yadvrittam brahmanasya cha
192.3
कालस्य मृत्योश्च तथा यद्वृत्तं तन्निबोध मे
यथा स तेषां संवादो यस्मिन्स्थानेऽपि चाभवत्
Kalasya mrityoshcha tatha yadvrittam tannibodha me
Yatha sa tesham sanvado yasminsthanepi chabhavat
192.4
ब्राह्मणो जापकः कश्चिद्धर्मवृत्तो महायशाः
षडङ्गविन्महाप्राज्ञः पैप्पलादिः स कौशिकः
Brahmano japakah kashchiddharmavritto mahayashah
Shadangavinmahapragyah paippaladih sa kaushikah
192.5
तस्यापरोक्षं विज्ञानं षडङ्गेषु तथैव च
वेदेषु चैव निष्णातो हिमवत्पादसंश्रयः
Tasyaparoksham vigyanam shadangeshu tathaiva cha
Vedeshu chaiva nishnato himavatpadasanshrayah
192.6
सोऽन्त्यं ब्राह्मं तपस्तेपे संहितां संयतो जपन्
तस्य वर्षसहस्रं तु नियमेन तथा गतम्
Sontyam brahmam tapastepe sanhitam sanyato japan
Tasya varshasahasram tu niyamena tatha gatam
192.7
स देव्या दर्शितः साक्षात्प्रीतास्मीति तदा किल
जप्यमावर्तयंस्तूष्णीं न च तां किंचिदब्रवीत्
Sa devya darshitah sakshatpritasmiti tada kila
Japyamavartayanstushnim na cha tam kinchidabravit
192.8
तस्यानुकम्पया देवी प्रीता समभवत्तदा
वेदमाता ततस्तस्य तज्जप्यं समपूजयत्
Tasyanukampaya devi prita samabhavattada
Vedamata tatastasya tajjapyam samapujayat
192.9
समाप्तजप्यस्तूत्थाय शिरसा पादयोस्तथा
पपात देव्या धर्मात्मा वचनं चेदमब्रवीत्
Samaptajapyastutthaya shirasa padayostatha
Papata devya dharmatma vachanam chedamabravit
192.10
दिष्ट्या देवि प्रसन्ना त्वं दर्शनं चागता मम
यदि वापि प्रसन्नासि जप्ये मे रमतां मनः
Dishtya devi prasanna tvam darshanam chagata mama
Yadi vapi prasannasi japye me ramatam manah
192.11
सावित्र्युवाच
किं प्रार्थयसि विप्रर्षे किं चेष्टं करवाणि ते
प्रब्रूहि जपतां श्रेष्ठ सर्वं तत्ते भविष्यति
Savitryuvacha
Kim prarthayasi viprarshe kim cheshtam karavani te
Prabruhi japatam shreshtha sarvam tatte bhavishyati
192.12
भीष्म उवाच
इत्युक्तः स तदा देव्या विप्रः प्रोवाच धर्मवित्
जप्यं प्रति ममेच्छेयं वर्धत्विति पुनः पुनः
Bhishma uvacha
Ityuktah sa tada devya viprah provacha dharmavit
Japyam prati mamechchheyam vardhatviti punah punah
192.13
मनसश्च समाधिर्मे वर्धेताहरहः शुभे
तत्तथेति ततो देवी मधुरं प्रत्यभाषत
Manasashcha samadhirme vardhetaharahah shubhe
Tattatheti tato devi madhuram pratyabhashata
192.14
इदं चैवापरं प्राह देवी तत्प्रियकाम्यया
निरयं नैव यातासि यत्र याता द्विजर्षभाः
Idam chaivaparam praha devi tatpriyakamyaya
Nirayam naiva yatasi yatra yata dvijarshabhah
192.15
यास्यसि ब्रह्मणः स्थानमनिमित्तमनिन्दितम्
साधये भविता चैतद्यत्त्वयाहमिहार्थिता
Yasyasi brahmanah sthanamanimittamaninditam
Sadhaye bhavita chaitadyattvayahamiharthita
192.16
नियतो जप चैकाग्रो धर्मस्त्वां समुपैष्यति
कालो मृत्युर्यमश्चैव समायास्यन्ति तेऽन्तिकम्
भविता च विवादोऽत्र तव तेषां च धर्मतः
Niyato japa chaikagro dharmastvam samupaishyati
Kalo mrityuryamashchaiva samayasyanti tentikam
Bhavita cha vivadotra tava tesham cha dharmatah
192.17
एवमुक्त्वा भगवती जगाम भवनं स्वकम्
ब्राह्मणोऽपि जपन्नास्ते दिव्यं वर्षशतं तदा
Evamuktva bhagavati jagama bhavanam svakam
Brahmanopi japannaste divyam varshashatam tada
192.18
समाप्ते नियमे तस्मिन्नथ विप्रस्य धीमतः
साक्षात्प्रीतस्तदा धर्मो दर्शयामास तं द्विजम्
Samapte niyame tasminnatha viprasya dhimatah
Sakshatpritastada dharmo darshayamasa tam dvijam
192.19
धर्म उवाच
द्विजाते पश्य मां धर्ममहं त्वां द्रष्टुमागतः
जप्यस्य च फलं यत्ते संप्राप्तं तच्च मे शृणु
Dharma uvacha
Dvijate pashya mam dharmamaham tvam drashtumagatah
Japyasya cha phalam yatte sampraptam tachcha me shrinu
192.20
जिता लोकास्त्वया सर्वे ये दिव्या ये च मानुषाः
देवानां निरयान्साधो सर्वानुत्क्रम्य यास्यसि
Jita lokastvaya sarve ye divya ye cha manushah
Devanam nirayansadho sarvanutkramya yasyasi
192.21
प्राणत्यागं कुरु मुने गच्छ लोकान्यथेप्सितान्
त्यक्त्वात्मनः शरीरं च ततो लोकानवाप्स्यसि
Pranatyagam kuru mune gachchha lokanyathepsitan
Tyaktvatmanah shariram cha tato lokanavapsyasi
192.22
ब्राह्मण उवाच
कृतं लोकैर्हि मे धर्म गच्छ च त्वं यथासुखम्
बहुदुःखसुखं देहं नोत्सृजेयमहं विभो
Brahmana uvacha
Kritam lokairhi me dharma gachchha cha tvam yathasukham
Bahuduhkhasukham deham notsrijeyamaham vibho
192.23
धर्म उवाच
अवश्यं भोः शरीरं ते त्यक्तव्यं मुनिपुंगव
स्वर्ग आरोह्यतां विप्र किं वा ते रोचतेऽनघ
Dharma uvacha
Avashyam bhoh shariram te tyaktavyam munipungava
Svarga arohyatam vipra kim va te rochatenagha
192.24
ब्राह्मण उवाच
न रोचये स्वर्गवासं विना देहादहं विभो
गच्छ धर्म न मे श्रद्धा स्वर्गं गन्तुं विनात्मना
Brahmana uvacha
Na rochaye svargavasam vina dehadaham vibho
Gachchha dharma na me shraddha svargam gantum vinatmana
192.25
धर्म उवाच
अलं देहे मनः कृत्वा त्यक्त्वा देहं सुखी भव
गच्छ लोकानरजसो यत्र गत्वा न शोचसि
Dharma uvacha
Alam dehe manah kritva tyaktva deham sukhi bhava
Gachchha lokanarajaso yatra gatva na shochasi
192.26
ब्राह्मण उवाच
रमे जपन्महाभाग कृतं लोकैः सनातनैः
सशरीरेण गन्तव्यो मया स्वर्गो न वा विभो
Brahmana uvacha
Rame japanmahabhaga kritam lokaih sanatanaih
Sasharirena gantavyo maya svargo na va vibho
192.27
धर्म उवाच
यदि त्वं नेच्छसि त्यक्तुं शरीरं पश्य वै द्विज
एष कालस्तथा मृत्युर्यमश्च त्वामुपागताः
Dharma uvacha
Yadi tvam nechchhasi tyaktum shariram pashya vai dvija
Esha kalastatha mrityuryamashcha tvamupagatah
192.28
भीष्म उवाच
अथ वैवस्वतः कालो मृत्युश्च त्रितयं विभो
ब्राह्मणं तं महाभागमुपागम्येदमब्रुवन्
Bhishma uvacha
Atha vaivasvatah kalo mrityushcha tritayam vibho
Brahmanam tam mahabhagamupagamyedamabruvan
192.29
तपसोऽस्य सुतप्तस्य तथा सुचरितस्य च
फलप्राप्तिस्तव श्रेष्ठा यमोऽहं त्वामुपब्रुवे
Tapasosya sutaptasya tatha sucharitasya cha
Phalapraptistava shreshtha yamoham tvamupabruve
192.30
यथावदस्य जप्यस्य फलं प्राप्तस्त्वमुत्तमम्
कालस्ते स्वर्गमारोढुं कालोऽहं त्वामुपागतः
Yathavadasya japyasya phalam praptastvamuttamam
Kalaste svargamarodhum kaloham tvamupagatah
192.31
मृत्युं मा विद्धि धर्मज्ञ रूपिणं स्वयमागतम्
कालेन चोदितं विप्र त्वामितो नेतुमद्य वै
Mrityum ma viddhi dharmagya rupinam svayamagatam
Kalena choditam vipra tvamito netumadya vai
192.32
ब्राह्मण उवाच
स्वागतं सूर्यपुत्राय कालाय च महात्मने
मृत्यवे चाथ धर्माय किं कार्यं करवाणि वः
Brahmana uvacha
Svagatam suryaputraya kalaya cha mahatmane
Mrityave chatha dharmaya kim karyam karavani vah
192.33
भीष्म उवाच
अर्घ्यं पाद्यं च दत्त्वा स तेभ्यस्तत्र समागमे
अब्रवीत्परमप्रीतः स्वशक्त्या किं करोमि वः
Bhishma uvacha
Arghyam padyam cha dattva sa tebhyastatra samagame
Abravitparamapritah svashaktya kim karomi vah
192.34
तस्मिन्नेवाथ काले तु तीर्थयात्रामुपागतः
इक्ष्वाकुरगमत्तत्र समेता यत्र ते विभो
Tasminnevatha kale tu tirthayatramupagatah
Ikshvakuragamattatra sameta yatra te vibho
192.35
सर्वानेव तु राजर्षिः संपूज्याभिप्रणम्य च
कुशलप्रश्नमकरोत्सर्वेषां राजसत्तमः
Sarvaneva tu rajarshih sampujyabhipranamya cha
Kushalaprashnamakarotsarvesham rajasattamah
192.36
तस्मै सोऽथासनं दत्त्वा पाद्यमर्घ्यं तथैव च
अब्रवीद्ब्राह्मणो वाक्यं कृत्वा कुशलसंविदम्
Tasmai sothasanam dattva padyamarghyam tathaiva cha
Abravidbrahmano vakyam kritva kushalasanvidam
192.37
स्वागतं ते महाराज ब्रूहि यद्यदिहेच्छसि
स्वशक्त्या किं करोमीह तद्भवान्प्रब्रवीतु मे
Svagatam te maharaja bruhi yadyadihechchhasi
Svashaktya kim karomiha tadbhavanprabravitu me
192.38
राजोवाच
राजाहं ब्राह्मणश्च त्वं यदि षट्कर्मसंस्थितः
ददामि वसु किंचित्ते प्रार्थितं तद्वदस्व मे
Rajovacha
Rajaham brahmanashcha tvam yadi shatkarmasansthitah
Dadami vasu kinchitte prarthitam tadvadasva me
192.39
ब्राह्मण उवाच
द्विविधा ब्राह्मणा राजन्धर्मश्च द्विविधः स्मृतः
प्रवृत्तश्च निवृत्तश्च निवृत्तोऽस्मि प्रतिग्रहात्
Brahmana uvacha
Dvividha brahmana rajandharmashcha dvividhah smritah
Pravrittashcha nivrittashcha nivrittosmi pratigrahat
192.40
तेभ्यः प्रयच्छ दानानि ये प्रवृत्ता नराधिप
अहं न प्रतिगृह्णामि किमिष्टं किं ददानि ते
ब्रूहि त्वं नृपतिश्रेष्ठ तपसा साधयामि किम्
Tebhyah prayachchha danani ye pravritta naradhipa
Aham na pratigrihnami kimishtam kim dadani te
Bruhi tvam nripatishreshtha tapasa sadhayami kim
192.41
राजोवाच
क्षत्रियोऽहं न जानामि देहीति वचनं क्वचित्
प्रयच्छ युद्धमित्येवं वादिनः स्मो द्विजोत्तम
Rajovacha
Kshatriyoham na janami dehiti vachanam kvachit
Prayachchha yuddhamityevam vadinah smo dvijottama
192.42
ब्राह्मण उवाच
तुष्यसि त्वं स्वधर्मेण तथा तुष्टा वयं नृप
अन्योन्यस्योत्तरं नास्ति यदिष्टं तत्समाचर
Brahmana uvacha
Tushyasi tvam svadharmena tatha tushta vayam nripa
Anyonyasyottaram nasti yadishtam tatsamachara
192.43
राजोवाच
स्वशक्त्याहं ददानीति त्वया पूर्वं प्रभाषितम्
याचे त्वां दीयतां मह्यं जप्यस्यास्य फलं द्विज
Rajovacha
Svashaktyaham dadaniti tvaya purvam prabhashitam
Yache tvam diyatam mahyam japyasyasya phalam dvija
192.44
ब्राह्मण उवाच
युद्धं मम सदा वाणी याचतीति विकत्थसे
न च युद्धं मया सार्धं किमर्थं याचसे पुनः
Brahmana uvacha
Yuddham mama sada vani yachatiti vikatthase
Na cha yuddham maya sardham kimartham yachase punah
192.45
राजोवाच
वाग्वज्रा ब्राह्मणाः प्रोक्ताः क्षत्रिया बाहुजीविनः
वाग्युद्धं तदिदं तीव्रं मम विप्र त्वया सह
Rajovacha
Vagvajra brahmanah proktah kshatriya bahujivinah
Vagyuddham tadidam tivram mama vipra tvaya saha
192.46
ब्राह्मण उवाच
सैवाद्यापि प्रतिज्ञा मे स्वशक्त्या किं प्रदीयताम्
ब्रूहि दास्यामि राजेन्द्र विभवे सति माचिरम्
Brahmana uvacha
Saivadyapi pratigya me svashaktya kim pradiyatam
Bruhi dasyami rajendra vibhave sati machiram
192.47
राजोवाच
यत्तद्वर्षशतं पूर्णं जप्यं वै जपता त्वया
फलं प्राप्तं तत्प्रयच्छ मम दित्सुर्भवान्यदि
Rajovacha
Yattadvarshashatam purnam japyam vai japata tvaya
Phalam praptam tatprayachchha mama ditsurbhavanyadi
192.48
ब्राह्मण उवाच
परमं गृह्यतां तस्य फलं यज्जपितं मया
अर्धं त्वमविचारेण फलं तस्य समाप्नुहि
Brahmana uvacha
Paramam grihyatam tasya phalam yajjapitam maya
Ardham tvamavicharena phalam tasya samapnuhi
192.49
अथ वा सर्वमेवेह जप्यकं मामकं फलम्
राजन्प्राप्नुहि कामं त्वं यदि सर्वमिहेच्छसि
Atha va sarvameveha japyakam mamakam phalam
Rajanprapnuhi kamam tvam yadi sarvamihechchhasi
192.50
राजोवाच
कृतं सर्वेण भद्रं ते जप्यं यद्याचितं मया
स्वस्ति तेऽस्तु गमिष्यामि किं च तस्य फलं वद
Rajovacha
Kritam sarvena bhadram te japyam yadyachitam maya
Svasti testu gamishyami kim cha tasya phalam vada
192.51
ब्राह्मण उवाच
फलप्राप्तिं न जानामि दत्तं यज्जपितं मया
अयं धर्मश्च कालश्च यमो मृत्युश्च साक्षिणः
Brahmana uvacha
Phalapraptim na janami dattam yajjapitam maya
Ayam dharmashcha kalashcha yamo mrityushcha sakshinah
192.52
राजोवाच
अज्ञातमस्य धर्मस्य फलं मे किं करिष्यति
प्राप्नोतु तत्फलं विप्रो नाहमिच्छे ससंशयम्
Rajovacha
Agyatamasya dharmasya phalam me kim karishyati
Prapnotu tatphalam vipro nahamichchhe sasanshayam
192.53
ब्राह्मण उवाच
नाददेऽपरवक्तव्यं दत्तं वाचा फलं मया
वाक्यं प्रमाणं राजर्षे ममापि तव चैव हि
Brahmana uvacha
Nadadeparavaktavyam dattam vacha phalam maya
Vakyam pramanam rajarshe mamapi tava chaiva hi
192.54
नाभिसंधिर्मया जप्ये कृतपूर्वः कथंचन
जप्यस्य राजशार्दूल कथं ज्ञास्याम्यहं फलम्
Nabhisandhirmaya japye kritapurvah kathanchana
Japyasya rajashardula katham gyasyamyaham phalam
192.55
ददस्वेति त्वया चोक्तं ददामीति तथा मया
न वाचं दूषयिष्यामि सत्यं रक्ष स्थिरो भव
Dadasveti tvaya choktam dadamiti tatha maya
Na vacham dushayishyami satyam raksha sthiro bhava
192.56
अथैवं वदतो मेऽद्य वचनं न करिष्यसि
महानधर्मो भविता तव राजन्मृषाकृतः
Athaivam vadato medya vachanam na karishyasi
Mahanadharmo bhavita tava rajanmrishakritah
192.57
न युक्तं तु मृषा वाणी त्वया वक्तुमरिंदम
तथा मयाप्यभ्यधिकं मृषा वक्तुं न शक्यते
Na yuktam tu mrisha vani tvaya vaktumarindama
Tatha mayapyabhyadhikam mrisha vaktum na shakyate
192.58
संश्रुतं च मया पूर्वं ददानीत्यविचारितम्
तद्गृह्णीष्वाविचारेण यदि सत्ये स्थितो भवान्
Sanshrutam cha maya purvam dadanityavicharitam
Tadgrihnishvavicharena yadi satye sthito bhavan
192.59
इहागम्य हि मां राजञ्जाप्यं फलमयाचिथाः
तन्मन्निसृष्टं गृह्णीष्व भव सत्ये स्थिरोऽपि च
Ihagamya hi mam rajanjapyam phalamayachithah
Tanmannisrishtam grihnishva bhava satye sthiropi cha
192.60
नायं लोकोऽस्ति न परो न च पूर्वान्स तारयेत्
कुत एवावरान्राजन्मृषावादपरायणः
Nayam lokosti na paro na cha purvansa tarayet
Kuta evavaranrajanmrishavadaparayanah
192.61
न यज्ञाध्ययने दानं नियमास्तारयन्ति हि
तथा सत्यं परे लोके यथा वै पुरुषर्षभ
Na yagyadhyayane danam niyamastarayanti hi
Tatha satyam pare loke yatha vai purusharshabha
192.62
तपांसि यानि चीर्णानि चरिष्यसि च यत्तपः
समाः शतैः सहस्रैश्च तत्सत्यान्न विशिष्यते
Tapansi yani chirnani charishyasi cha yattapah
Samah shataih sahasraishcha tatsatyanna vishishyate
192.63
सत्यमेकाक्षरं ब्रह्म सत्यमेकाक्षरं तपः
सत्यमेकाक्षरो यज्ञः सत्यमेकाक्षरं श्रुतम्
Satyamekaksharam brahma satyamekaksharam tapah
Satyamekaksharo yagyah satyamekaksharam shrutam
192.64
सत्यं वेदेषु जागर्ति फलं सत्ये परं स्मृतम्
सत्याद्धर्मो दमश्चैव सर्वं सत्ये प्रतिष्ठितम्
Satyam vedeshu jagarti phalam satye param smritam
Satyaddharmo damashchaiva sarvam satye pratishthitam
192.65
सत्यं वेदास्तथाङ्गानि सत्यं यज्ञस्तथा विधिः
व्रतचर्यास्तथा सत्यमोंकारः सत्यमेव च
Satyam vedastathangani satyam yagyastatha vidhih
Vratacharyastatha satyamonkarah satyameva cha
192.66
प्राणिनां जननं सत्यं सत्यं संततिरेव च
सत्येन वायुरभ्येति सत्येन तपते रविः
Praninam jananam satyam satyam santatireva cha
Satyena vayurabhyeti satyena tapate ravih
192.67
सत्येन चाग्निर्दहति स्वर्गः सत्ये प्रतिष्ठितः
सत्यं यज्ञस्तपो वेदाः स्तोभा मन्त्राः सरस्वती
Satyena chagnirdahati svargah satye pratishthitah
Satyam yagyastapo vedah stobha mantrah sarasvati
192.68
तुलामारोपितो धर्मः सत्यं चैवेति नः श्रुतम्
समां कक्षां धारयतो यतः सत्यं ततोऽधिकम्
Tulamaropito dharmah satyam chaiveti nah shrutam
Samam kaksham dharayato yatah satyam tatodhikam
192.69
यतो धर्मस्ततः सत्यं सर्वं सत्येन वर्धते
किमर्थमनृतं कर्म कर्तुं राजंस्त्वमिच्छसि
Yato dharmastatah satyam sarvam satyena vardhate
Kimarthamanritam karma kartum rajanstvamichchhasi
192.70
सत्ये कुरु स्थिरं भावं मा राजन्ननृतं कृथाः
कस्मात्त्वमनृतं वाक्यं देहीति कुरुषेऽशुभम्
Satye kuru sthiram bhavam ma rajannanritam krithah
Kasmattvamanritam vakyam dehiti kurusheshubham
192.71
यदि जप्यफलं दत्तं मया नेषिष्यसे नृप
स्वधर्मेभ्यः परिभ्रष्टो लोकाननुचरिष्यसि
Yadi japyaphalam dattam maya neshishyase nripa
Svadharmebhyah paribhrashto lokananucharishyasi
192.72
संश्रुत्य यो न दित्सेत याचित्वा यश्च नेच्छति
उभावानृतिकावेतौ न मृषा कर्तुमर्हसि
Sanshrutya yo na ditseta yachitva yashcha nechchhati
Ubhavanritikavetau na mrisha kartumarhasi
192.73
राजोवाच
योद्धव्यं रक्षितव्यं च क्षत्रधर्मः किल द्विज
दातारः क्षत्रियाः प्रोक्ता गृह्णीयां भवतः कथम्
Rajovacha
Yoddhavyam rakshitavyam cha kshatradharmah kila dvija
Datarah kshatriyah prokta grihniyam bhavatah katham
192.74
ब्राह्मण उवाच
न छन्दयामि ते राजन्नापि ते गृहमाव्रजम्
इहागम्य तु याचित्वा न गृह्णीषे पुनः कथम्
Brahmana uvacha
Na chhandayami te rajannapi te grihamavrajam
Ihagamya tu yachitva na grihnishe punah katham
192.75
धर्म उवाच
अविवादोऽस्तु युवयोर्वित्तं मां धर्ममागतम्
द्विजो दानफलैर्युक्तो राजा सत्यफलेन च
Dharma uvacha
Avivadostu yuvayorvittam mam dharmamagatam
Dvijo danaphalairyukto raja satyaphalena cha
192.76
स्वर्ग उवाच
स्वर्गं मां विद्धि राजेन्द्र रूपिणं स्वयमागतम्
अविवादोऽस्तु युवयोरुभौ तुल्यफलौ युवाम्
Svarga uvacha
Svargam mam viddhi rajendra rupinam svayamagatam
Avivadostu yuvayorubhau tulyaphalau yuvam
192.77
राजोवाच
कृतं स्वर्गेण मे कार्यं गच्छ स्वर्ग यथासुखम्
विप्रो यदीच्छते दातुं प्रतीच्छतु च मे धनम्
Rajovacha
Kritam svargena me karyam gachchha svarga yathasukham
Vipro yadichchhate datum pratichchhatu cha me dhanam
192.78
ब्राह्मण उवाच
बाल्ये यदि स्यादज्ञानान्मया हस्तः प्रसारितः
निवृत्तिलक्षणं धर्ममुपासे संहितां जपन्
Brahmana uvacha
Balye yadi syadagyananmaya hastah prasaritah
Nivrittilakshanam dharmamupase sanhitam japan
192.79
निवृत्तं मां चिरं राजन्विप्रं लोभयसे कथम्
स्वेन कार्यं करिष्यामि त्वत्तो नेच्छे फलं नृप
तपःस्वाध्यायशीलोऽहं निवृत्तश्च प्रतिग्रहात्
Nivrittam mam chiram rajanvipram lobhayase katham
Svena karyam karishyami tvatto nechchhe phalam nripa
Tapahsvadhyayashiloham nivrittashcha pratigrahat
192.80
राजोवाच
यदि विप्र निसृष्टं ते जप्यस्य फलमुत्तमम्
आवयोर्यत्फलं किंचित्सहितं नौ तदस्त्विह
Rajovacha
Yadi vipra nisrishtam te japyasya phalamuttamam
Avayoryatphalam kinchitsahitam nau tadastviha
192.81
द्विजाः प्रतिग्रहे युक्ता दातारो राजवंशजाः
यदि धर्मः श्रुतो विप्र सहैव फलमस्तु नौ
Dvijah pratigrahe yukta dataro rajavanshajah
Yadi dharmah shruto vipra sahaiva phalamastu nau
192.82
मा वा भूत्सहभोज्यं नौ मदीयं फलमाप्नुहि
प्रतीच्छ मत्कृतं धर्मं यदि ते मय्यनुग्रहः
Ma va bhutsahabhojyam nau madiyam phalamapnuhi
Pratichchha matkritam dharmam yadi te mayyanugrahah
192.83
भीष्म उवाच
ततो विकृतचेष्टौ द्वौ पुरुषौ समुपस्थितौ
गृहीत्वान्योन्यमावेष्ट्य कुचेलावूचतुर्वचः
Bhishma uvacha
Tato vikritacheshtau dvau purushau samupasthitau
Grihitvanyonyamaveshtya kuchelavuchaturvachah
192.84
न मे धारयसीत्येको धारयामीति चापरः
इहास्ति नौ विवादोऽयमयं राजानुशासकः
Na me dharayasityeko dharayamiti chaparah
Ihasti nau vivadoyamayam rajanushasakah
192.85
सत्यं ब्रवीम्यहमिदं न मे धारयते भवान्
अनृतं वदसीह त्वमृणं ते धारयाम्यहम्
Satyam bravimyahamidam na me dharayate bhavan
Anritam vadasiha tvamrinam te dharayamyaham
192.86
तावुभौ भृशसंतप्तौ राजानमिदमूचतुः
परीक्ष्यतां यथा स्याव नावामिह विगर्हितौ
Tavubhau bhrishasantaptau rajanamidamuchatuh
Parikshyatam yatha syava navamiha vigarhitau
192.87
विरूप उवाच
धारयामि नरव्याघ्र विकृतस्येह गोः फलम्
ददतश्च न गृह्णाति विकृतो मे महीपते
Virupa uvacha
Dharayami naravyaghra vikritasyeha goh phalam
Dadatashcha na grihnati vikrito me mahipate
192.88
विकृत उवाच
न मे धारयते किंचिद्विरूपोऽयं नराधिप
मिथ्या ब्रवीत्ययं हि त्वा मिथ्याभासं नराधिप
Vikrita uvacha
Na me dharayate kinchidvirupoyam naradhipa
Mithya bravityayam hi tva mithyabhasam naradhipa
192.89
राजोवाच
विरूप किं धारयते भवानस्य वदस्व मे
श्रुत्वा तथा करिष्यामीत्येवं मे धीयते मतिः
Rajovacha
Virupa kim dharayate bhavanasya vadasva me
Shrutva tatha karishyamityevam me dhiyate matih
192.90
विरूप उवाच
शृणुष्वावहितो राजन्यथैतद्धारयाम्यहम्
विकृतस्यास्य राजर्षे निखिलेन नरर्षभ
Virupa uvacha
Shrinushvavahito rajanyathaitaddharayamyaham
Vikritasyasya rajarshe nikhilena nararshabha
192.91
अनेन धर्मप्राप्त्यर्थं शुभा दत्ता पुरानघ
धेनुर्विप्राय राजर्षे तपःस्वाध्यायशीलिने
Anena dharmapraptyartham shubha datta puranagha
Dhenurvipraya rajarshe tapahsvadhyayashiline
192.92
तस्याश्चायं मया राजन्फलमभ्येत्य याचितः
विकृतेन च मे दत्तं विशूद्धेनान्तरात्मना
Tasyashchayam maya rajanphalamabhyetya yachitah
Vikritena cha me dattam vishuddhenantaratmana
192.93
ततो मे सुकृतं कर्म कृतमात्मविशुद्धये
गावौ हि कपिले क्रीत्वा वत्सले बहुदोहने
Tato me sukritam karma kritamatmavishuddhaye
Gavau hi kapile kritva vatsale bahudohane
192.94
ते चोञ्छवृत्तये राजन्मया समपवर्जिते
यथाविधि यथाश्रद्धं तदस्याहं पुनः प्रभो
Te chonchhavrittaye rajanmaya samapavarjite
Yathavidhi yathashraddham tadasyaham punah prabho
192.95
इहाद्य वै गृहीत्वा तत्प्रयच्छे द्विगुणं फलम्
एकस्याः पुरुषव्याघ्र कः शुद्धः कोऽत्र दोषवान्
Ihadya vai grihitva tatprayachchhe dvigunam phalam
Ekasyah purushavyaghra kah shuddhah kotra doshavan
192.96
एवं विवदमानौ स्वस्त्वामिहाभ्यागतौ नृप
कुरु धर्ममधर्मं वा विनये नौ समाधय
Evam vivadamanau svastvamihabhyagatau nripa
Kuru dharmamadharmam va vinaye nau samadhaya
192.97
यदि नेच्छति मे दानं यथा दत्तमनेन वै
भवानत्र स्थिरो भूत्वा मार्गे स्थापयतु प्रभुः
Yadi nechchhati me danam yatha dattamanena vai
Bhavanatra sthiro bhutva marge sthapayatu prabhuh
192.98
राजोवाच
दीयमानं न गृह्णासि ऋणं कस्मात्त्वमद्य वै
यथैव तेऽभ्यनुज्ञातं तथा गृह्णीष्व माचिरम्
Rajovacha
Diyamanam na grihnasi rinam kasmattvamadya vai
Yathaiva tebhyanugyatam tatha grihnishva machiram
192.99
विकृत उवाच
दीयतामित्यनेनोक्तं ददानीति तथा मया
नायं मे धारयत्यत्र गम्यतां यत्र वाञ्छति
Vikrita uvacha
Diyatamityanenoktam dadaniti tatha maya
Nayam me dharayatyatra gamyatam yatra vanchhati
192.100
राजोवाच
ददतोऽस्य न गृह्णासि विषमं प्रतिभाति मे
दण्ड्यो हि त्वं मम मतो नास्त्यत्र खलु संशयः
Rajovacha
Dadatosya na grihnasi vishamam pratibhati me
Dandyo hi tvam mama mato nastyatra khalu sanshayah
192.101
विकृत उवाच
मयास्य दत्तं राजर्षे गृह्णीयां तत्कथं पुनः
काममत्रापराधो मे दण्ड्यमाज्ञापय प्रभो
Vikrita uvacha
Mayasya dattam rajarshe grihniyam tatkatham punah
Kamamatraparadho me dandyamagyapaya prabho
192.102
विरूप उवाच
दीयमानं यदि मया नेषिष्यसि कथंचन
नियंस्यति त्वा नृपतिरयं धर्मानुशासकः
Virupa uvacha
Diyamanam yadi maya neshishyasi kathanchana
Niyansyati tva nripatirayam dharmanushasakah
192.103
विकृत उवाच
स्वं मया याचितेनेह दत्तं कथमिहाद्य तत्
गृह्णीयां गच्छतु भवानभ्यनुज्ञां ददानि ते
Vikrita uvacha
Svam maya yachiteneha dattam kathamihadya tat
Grihniyam gachchhatu bhavanabhyanugyam dadani te
192.104
ब्राह्मण उवाच
श्रुतमेतत्त्वया राजन्ननयोः कथितं द्वयोः
प्रतिज्ञातं मया यत्ते तद्गृहाणाविचारितम्
Brahmana uvacha
Shrutametattvaya rajannanayoh kathitam dvayoh
Pratigyatam maya yatte tadgrihanavicharitam
192.105
राजोवाच
प्रस्तुतं सुमहत्कार्यमावयोर्गह्वरं यथा
जापकस्य दृढीकारः कथमेतद्भविष्यति
Rajovacha
Prastutam sumahatkaryamavayorgahvaram yatha
Japakasya dridhikarah kathametadbhavishyati
192.106
यदि तावन्न गृह्णामि ब्राह्मणेनापवर्जितम्
कथं न लिप्येयमहं दोषेण महताद्य वै
Yadi tavanna grihnami brahmanenapavarjitam
Katham na lipyeyamaham doshena mahatadya vai
192.107
भीष्म उवाच
तौ चोवाच स राजर्षिः कृतकार्यौ गमिष्यथः
नेदानीं मामिहासाद्य राजधर्मो भवेन्मृषा
Bhishma uvacha
Tau chovacha sa rajarshih kritakaryau gamishyathah
Nedanim mamihasadya rajadharmo bhavenmrisha
192.108
स्वधर्मः परिपाल्यश्च राज्ञामेष विनिश्चयः
विप्रधर्मश्च सुगुरुर्मामनात्मानमाविशत्
Svadharmah paripalyashcha ragyamesha vinishchayah
Vipradharmashcha sugururmamanatmanamavishat
192.109
ब्राह्मण उवाच
गृहाण धारयेऽहं ते याचितं ते श्रुतं मया
न चेद्ग्रहीष्यसे राजञ्शपिष्ये त्वां न संशयः
Brahmana uvacha
Grihana dharayeham te yachitam te shrutam maya
Na chedgrahishyase rajanshapishye tvam na sanshayah
192.110
राजोवाच
धिग्राजधर्मं यस्यायं कार्यस्येह विनिश्चयः
इत्यर्थं मे ग्रहीतव्यं कथं तुल्यं भवेदिति
Rajovacha
Dhigrajadharmam yasyayam karyasyeha vinishchayah
Ityartham me grahitavyam katham tulyam bhavediti
192.111
एष पाणिरपूर्वं भो निक्षेपार्थं प्रसारितः
यन्मे धारयसे विप्र तदिदानीं प्रदीयताम्
Esha panirapurvam bho nikshepartham prasaritah
Yanme dharayase vipra tadidanim pradiyatam
192.112
ब्राह्मण उवाच
संहितां जपता यावान्मया कश्चिद्गुणः कृतः
तत्सर्वं प्रतिगृह्णीष्व यदि किंचिदिहास्ति मे
Brahmana uvacha
Sanhitam japata yavanmaya kashchidgunah kritah
Tatsarvam pratigrihnishva yadi kinchidihasti me
192.113
राजोवाच
जलमेतन्निपतितं मम पाणौ द्विजोत्तम
सममस्तु सहैवास्तु प्रतिगृह्णातु वै भवान्
Rajovacha
Jalametannipatitam mama panau dvijottama
Samamastu sahaivastu pratigrihnatu vai bhavan
192.114
विरूप उवाच
कामक्रोधौ विद्धि नौ त्वमावाभ्यां कारितो भवान्
समेति च यदुक्तं ते समा लोकास्तवास्य च
Virupa uvacha
Kamakrodhau viddhi nau tvamavabhyam karito bhavan
Sameti cha yaduktam te sama lokastavasya cha
192.115
नायं धारयते किंचिज्जिज्ञासा त्वत्कृते कृता
कालो धर्मस्तथा मृत्युः कामक्रोधौ तथा युवाम्
Nayam dharayate kinchijjigyasa tvatkrite krita
Kalo dharmastatha mrityuh kamakrodhau tatha yuvam
192.116
सर्वमन्योन्यनिकषे निघृष्टं पश्यतस्तव
गच्छ लोकाञ्जितान्स्वेन कर्मणा यत्र वाञ्छसि
Sarvamanyonyanikashe nighrishtam pashyatastava
Gachchha lokanjitansvena karmana yatra vanchhasi
192.117
भीष्म उवाच
जापकानां फलावाप्तिर्मया ते संप्रकीर्तिता
गतिः स्थानं च लोकाश्च जापकेन यथा जिताः
Bhishma uvacha
Japakanam phalavaptirmaya te samprakirtita
Gatih sthanam cha lokashcha japakena yatha jitah
192.118
प्रयाति संहिताध्यायी ब्रह्माणं परमेष्ठिनम्
अथ वाग्निं समायाति सूर्यमाविशतेऽपि वा
Prayati sanhitadhyayi brahmanam parameshthinam
Atha vagnim samayati suryamavishatepi va
192.119
स तैजसेन भावेन यदि तत्राश्नुते रतिम्
गुणांस्तेषां समादत्ते रागेण प्रतिमोहितः
Sa taijasena bhavena yadi tatrashnute ratim
Gunanstesham samadatte ragena pratimohitah
192.120
एवं सोमे तथा वायौ भूम्याकाशशरीरगः
सरागस्तत्र वसति गुणांस्तेषां समाचरन्
Evam some tatha vayau bhumyakashashariragah
Saragastatra vasati gunanstesham samacharan
192.121
अथ तत्र विरागी स गच्छति त्वथ संशयम्
परमव्ययमिच्छन्स तमेवाविशते पुनः
Atha tatra viragi sa gachchhati tvatha sanshayam
Paramavyayamichchhansa tamevavishate punah
192.122
अमृताच्चामृतं प्राप्तः शीतीभूतो निरात्मवान्
ब्रह्मभूतः स निर्द्वंद्वः सुखी शान्तो निरामयः
Amritachchamritam praptah shitibhuto niratmavan
Brahmabhutah sa nirdvandvah sukhi shanto niramayah
192.123
ब्रह्मस्थानमनावर्तमेकमक्षरसंज्ञकम्
अदुःखमजरं शान्तं स्थानं तत्प्रतिपद्यते
Brahmasthanamanavartamekamaksharasangyakam
Aduhkhamajaram shantam sthanam tatpratipadyate
192.124
चतुर्भिर्लक्षणैर्हीनं तथा षड्भिः सषोडशैः
पुरुषं समतिक्रम्य आकाशं प्रतिपद्यते
Chaturbhirlakshanairhinam tatha shadbhih sashodashaih
Purusham samatikramya akasham pratipadyate
192.125
अथ वेच्छति रागात्मा सर्वं तदधितिष्ठति
यच्च प्रार्थयते तच्च मनसा प्रतिपद्यते
Atha vechchhati ragatma sarvam tadadhitishthati
Yachcha prarthayate tachcha manasa pratipadyate
192.126
अथ वा वीक्षते लोकान्सर्वान्निरयसंस्थितान्
निःस्पृहः सर्वतो मुक्तस्तत्रैव रमते सुखी
Atha va vikshate lokansarvannirayasansthitan
Nihsprihah sarvato muktastatraiva ramate sukhi
192.127
एवमेषा महाराज जापकस्य गतिर्यथा
एतत्ते सर्वमाख्यातं किं भूयः श्रोतुमिच्छसि
Evamesha maharaja japakasya gatiryatha
Etatte sarvamakhyatam kim bhuyah shrotumichchhasi