Utshovসর্গ 39
39.1
তে প্রয়াতা মহাত্মানঃ পার্থিবাস্তে প্রহৃষ্টবৎ ।
গজবাজিসহস্রৌঘৈঃ কম্পয়ন্তো বসুন্ধরাম্ ।। ৭.৩৯.১ ॥
39.2
অক্ষৌহিণ্যো হি তত্রাসন্রাঘবার্থে সমুদ্যতাঃ ।
ভরতস্যাজ্ঞয়া ঽনেকাঃ প্রহৃষ্টা বলবাহনাঃ ।। ৭.৩৯.২ ॥
39.3
ঊচুস্তে চ মহীপালা বলদর্পসমন্বিতাঃ ।
ন রামরাবণং যুদ্ধে পশ্যামঃ পুরতঃ স্থিতম্ ।। ৭.৩৯.৩ ॥
39.4
ভরতেন বয়ং পশ্চাত্সমানীতা নিরর্থকম্ ।
হতা হি রাক্ষসাঃ ক্ষিপ্রং পার্থিবৈঃ স্যুর্ন সংশয়ঃ ।। ৭.৩৯.৪ ॥
39.5
রামস্য বাহুবীর্যেণ রক্ষিতা লক্ষ্মণস্য চ ।
সুখং পারেসমুদ্রস্য যুধ্যেম বিগতজ্বরাঃ ।। ৭.৩৯.৫ ॥
39.6
এতাশ্চান্যাশ্চ রাজানঃ কথাস্তত্র সহস্রশঃ ।
কথয়ন্তঃ স্বরাজ্যানি জগ্মুর্হর্ষসমন্বিতাঃ ।। ৭.৩৯.৬ ॥
39.7
স্বানি রাজ্যানি মুখ্যানি ঋদ্ধানি মুদিতানি চ ।
সমৃদ্ধধনধান্যানি পূর্ণানি বসুমন্তি চ ।। ৭.৩৯.৭ ॥
39.8
যথাপুরাণি তে গত্বা রত্নানি বিবিধান্যথ ।
রামস্য প্রিয়কামার্থমুপহারান্ নৃপা দদুঃ ।। ৭.৩৯.৮ ॥
39.9
অশ্বান্যানানি রত্নানি হস্তিনশ্চ মদোত্কটান্ ।
চন্দনানি চ মুখ্যানি দিব্যান্যাভরণানি চ ।। ৭.৩৯.৯ ॥
39.10
মণিমুক্তাপ্রবালাংস্তু দাস্যো রূপসমন্বিতাঃ ।
অজাবিকাংশ্চ বিবিধান্ রথাংস্তু বিবিধান্দদুঃ ।। ৭.৩৯.১০ ॥
39.11
ভরতো লক্ষ্মণশ্চৈব শত্রুঘ্নশ্চ মহাবলাঃ ।
আদায় তানি রত্নানি স্বাং পুরীং পুনরাগতাঃ ।। ৭.৩৯.১১ ॥
39.12
আগম্য চ পুরীং রম্যাময়োধ্যাং পুরুষর্ষভাঃ ।
তানি রত্নানি চিত্রাণি রামায় সমুপাহরন্ ।। ৭.৩৯.১২ ॥
39.13
প্রতিগৃহ্য চ তত্সর্বং রামঃ প্রীতিসমন্বিতঃ ।
সুগ্রীবায় দদৌ রাজ্ঞে মহাত্মা কৃতকর্মণে ।। ৭.৩৯.১৩ ॥
39.14
বিভীষণায় চ দদৌ তথান্যেভ্যো ঽপি রাঘবঃ ।
রাক্ষসেভ্যঃ কপিভ্যশ্চ যৈর্বৃতো জয়মাপ্তবান্ ।। ৭.৩৯.১৪ ॥
39.15
তে সর্বে রামদত্তানি রত্নানি কপিরাক্ষসাঃ ।
শিরোভির্ধারয়ামাসুর্বাহুভিশ্চ মহাবলাঃ ।। ৭.৩৯.১৫ ॥
39.16
হনূমন্তং চ নৃপতিরিক্ষ্বাকূণাং মহারথঃ ।
অঙ্গদং চ মহাবাহুমঙ্কমারোপ্য বীর্যবান্ ।। ৭.৩৯.১৬ ॥
39.17
রামঃ কমলপত্রাক্ষঃ সুগ্রীবমিদমব্রবীৎ ।
অঙ্গদস্তে সুপুত্রো ঽয়ং মন্ত্রী চাপ্যনিলাত্মজঃ ।। ৭.৩৯.১৭ ॥
39.18
সুগ্রীবমন্ত্রিতে যুক্তৌ মম চাপি হিতে রতৌ ।
অর্হতো বিবিধাং পূজাং ত্বত্কৃতে বৈ হরীশ্বর ।। ৭.৩৯.১৮ ॥
39.19
ইত্যুক্ত্বা ব্যবমুচ্যাঙ্গাদ্ভূষণানি মহায়শাঃ ।
স ববন্ধ মহার্হাণি তদাঙ্গদহনূমতোঃ ।। ৭.৩৯.১৯ ॥
39.20
আভাষ্য চ মহাবীর্যান্রাঘবো যূথপর্ষভান্ ।
নীলং নলং কেসরিণং কুমুদং গন্ধমাদনম্ ।। ৭.৩৯.২০ ॥
39.21
সুষেণং পনসং বীরং মৈন্দং দ্বিবিদমেব চ ।
জাম্ববন্তং গবাক্ষং চ বিনতং ধূম্রমেব চ ।। ৭.৩৯.২১ ॥
39.22
বলীমুখং প্রজঙ্ঘং চ সন্নাদং চ মহাবলম্ ।
দরীমুখং দধিমুখমিন্দ্রজানুং চ যূথপম্ ।। ৭.৩৯.২২ ॥
39.23
মধুরং শ্লক্ষ্ণয়া বাচা নেত্রাভ্যামাপিবন্নিব ।
সুহৃদো মে ভবন্তশ্চ শরীরং ভ্রাতরস্তথা ।। ৭.৩৯.২৩ ॥
39.24
যুষ্মাভিরুদ্ধৃতশ্চাহং ব্যসনাত্কাননৌকসঃ ।
ধন্যো রাজা চ সুগ্রীবো ভবদ্ভিঃ সুহৃদাং বরৈঃ ।। ৭.৩৯.২৪ ॥
39.25
এবমুক্ত্বা দদৌ তেভ্যো ভূষণানি যথার্হতঃ ।
বজ্রাণি চ মহার্হাণি সস্বজে চ নরর্ষভঃ ।। ৭.৩৯.২৫ ॥
39.26
তে পিবন্তঃ সুগন্ধীনি মধূনি মধুপিঙ্গলাঃ ।
মাংসানি চ সুমৃষ্টানি মূলানি চ ফলানি চ ।। ৭.৩৯.২৬ ॥
39.27
এবং তেষাং নিবসতাং মাসঃ সাগ্রো যয়ৌ তদা ।
মুহূর্তমিব তে সর্বে রামভক্ত্যা চ মেনিরে ।। ৭.৩৯.২৭ ॥
39.28
রামো ঽপি রেমে তৈঃ সার্ধং বানরৈঃ কামরূপিভিঃ ।
রাক্ষসৈশ্চ মহাবীর্যৈর্ঋক্ষৈশ্চৈব মহাবলৈঃ ।। ৭.৩৯.২৮ ॥
39.29
এবং তেষাং যয়ৌ মাসো দ্বিতীয়ঃ শিশিরঃ সুখম্ ।
বানরাণাং প্রহৃষ্টানাং রাক্ষসানাং চ সর্বশঃ ।। ৭.৩৯.২৯ ॥
39.30
ইক্ষ্বাকুনগরে রম্যে পরাং প্রীতিমুপাসতাম্ ।
রামস্য প্রীতিকরণৈঃ কালস্তেষাং সুখং যয়ৌ ।। ৭.৩৯.৩০ ।।