Utshovসর্গ 38
38.1
এবমাস্তে মহাবাহুরহন্যহনি রাঘবঃ ।
প্রশাসত্সর্বকার্যাণি পৌরজানপদেষু চ ।। ৭.৩৮.১ ॥
38.2
ততঃ কতিপয়াহঃসু বৈদেহং মিথিলাধিপম্ ।
রাঘবঃ প্রাঞ্জলির্ভূত্বা বাক্যমেতদুবাচ হ ।। ৭.৩৮.২ ॥
38.3
ভবান্হি গতিরব্যগ্রা ভবতা পালিতা বয়ম্ ।
ভবতস্তেজসোগ্রেণ রাবণো নিহতো ময়া ।। ৭.৩৮.৩ ॥
38.4
ইক্ষ্বাকূণাং চ সর্বেষাং মৈথিলানাং চ সর্বশঃ ।
অতুলাঃ প্রীতয়ো রাজন্সম্বন্ধকপুরোগমাঃ ।। ৭.৩৮.৪ ॥
38.5
তদ্ভবান্স্বপুরং যাতু রত্নান্যাদায় পার্থিব ।
ভরতশ্চ সহায়ার্থং পৃষ্ঠতস্তে ঽনুয়াস্যতি ।। ৭.৩৮.৫ ॥
38.6
স তথেতি নৃপঃ কৃত্বা রাঘবং বাক্যমব্রবীৎ ।
প্রীতো ঽস্মি ভবতো রাজন্দর্শনেন নয়েন চ ।। ৭.৩৮.৬ ॥
38.7
যান্যেতানি তু রত্নানি মদর্থং সঞ্চিতানি বৈ ।
দুহিত্রে তানি বৈ রাজন্সর্বাণ্যেব দদামি চ ।। ৭.৩৮.৭ ॥
38.8
এবমুক্ত্বা তু কাকুত্স্থং জনকো হৃষ্টমানসঃ ।
প্রয়য়ৌ মিথিলাং শ্রীমাংস্তমনুজ্ঞায় রাঘবম্ ।। ৭.৩৮.৮ ॥
38.9
ততঃ প্রয়াতে জনকে কেকয়ং মাতুলং প্রভুঃ ।
রাঘবঃ প্রাঞ্জলির্ভূত্বা বাক্যমেতদুবাচ হ ।। ৭.৩৮.৯ ॥
38.10
ইদং রাজ্যমহং চৈব ভরতশ্চ সলক্ষ্মণঃ ।
আয়ত্তাস্ত্বং হি নো রাজন্গতিশ্চ পুরুষর্ষভ ।। ৭.৩৮.১০ ॥
38.11
রাজা হি বৃদ্ধঃ সন্তাপং ত্বদর্থমুপয়াস্যতি ।
তস্মাদ্গমনমদ্যৈব রোচতে তব পার্থিব ।। ৭.৩৮.১১ ॥
38.12
লক্ষ্মণেনানুয়াত্রেণ পৃষ্ঠতো ঽনুগমিষ্যতে ।
ধনমাদায় বিপুলং রত্নানি বিবিধানি চ ।। ৭.৩৮.১২ ॥
38.13
যুধাজিত্তু তথেত্যাহ গমনং প্রতি রাঘবম্ ।
রত্নানি চ ধনং চৈব ত্বয্যেবাক্ষয্যমস্ত্বিতি ।। ৭.৩৮.১৩ ॥
38.14
প্রদক্ষিণং স রাজানং কৃত্বা কেকয়বর্ধনঃ ।
রামেণ হি কৃতঃ পূর্বমভিবাদ্য প্রদক্ষিণম্ ।। ৭.৩৮.১৪ ॥
38.15
লক্ষ্মণেন সহায়েন প্রয়াতঃ কেকয়েশ্বরঃ ।
হতে ঽসুরে যথা বৃত্রে বিষ্ণুনা সহ বাসবঃ ।। ৭.৩৮.১৫ ॥
38.16
তং বিসৃজ্য ততো রামো বয়স্যমকুতোভয়ম্ ।
প্রতর্দনং কাশিপতিং পরিষ্বজ্যেদমব্রবীৎ ।। ৭.৩৮.১৬ ॥
38.17
দর্শিতা ভবতা প্রীতির্দর্শিতং সৌহৃদং পরম্ ।
উদ্যোগশ্চ কৃতো রাজন্ভরতেন ত্বয়া সহ ।। ৭.৩৮.১৭ ॥
38.18
তদ্ভবানদ্য কাশেয় পুরীং বারাণসীং ব্রজ ।
রমণীয়াং ত্বয়া গুপ্তাং সুপ্রকাশাং সুতোরণাম্ ।। ৭.৩৮.১৮ ॥
38.19
এতাবদুক্ত্বা চোত্থায় কাকুত্স্থঃ পরমাসনাৎ ।
পর্যষ্বজত ধর্মাত্মা নিরন্তরমুরোগতম্ ।। ৭.৩৮.১৯ ॥
38.20
বিসর্জয়ামাস তদা কৌসল্যানন্দবর্ধনঃ ।
রাঘবেণাভ্যনুজ্ঞাতঃ কাশীশো ঽপ্যকুতোভয়ঃ ।বারাণসীং যয়ৌ তূর্ণং রাঘবেণ বিসর্জিতঃ ।। ৭.৩৮.২০ ॥
38.21
বিসৃজ্য তং কাশিপতিং ত্রিশতং পৃথিবীপতীন্ ।
প্রহসন্রাঘবো বাক্যমুবাচ মধুরাক্ষরম্ ।। ৭.৩৮.২১ ॥
38.22
ভবতাং প্রীতিরব্যগ্রা তেজসা পরিরক্ষিতা ।
ধর্মশ্চ নিয়তো নিত্যং সত্যং চ ভবতাং সদা ।। ৭.৩৮.২২ ॥
38.23
যুষ্মাকং চানুভাবেন তেজসা চ মহাত্মনাম্ ।
হতো দুরাত্মা দুর্বুদ্ধী রাবণো রাক্ষসাধমঃ ।। ৭.৩৮.২৩ ॥
38.24
হেতুমাত্রমহং তত্র ভবতাং তেজসা হতঃ ।
রাবণঃ সগণো যুদ্ধে সপুত্রামাত্যবান্ধবঃ ।। ৭.৩৮.২৪ ॥
38.25
ভবন্তশ্চ সমানীতা ভরতেন মহাত্মনা ।
শ্রুত্বা জনকরাজস্য কাননাত্তনয়াং হৃতাম্ ।। ৭.৩৮.২৫ ॥
38.26
উদ্যুক্তানাং চ সর্বেষাং পার্থিবানাং মহাত্মনাম্ ।
কালো ব্যতীতঃ সুমহান্গমনং রোচয়াম্যতঃ ।। ৭.৩৮.২৬ ॥
38.27
প্রত্যূচুস্তং চ রাজানো হর্ষেণ মহতা বৃতাঃ ।
দিষ্ট্যাং ত্বং বিজয়ী রাম স্বরাজ্যে ঽপি প্রতিষ্ঠিতঃ ।। ৭.৩৮.২৭ ॥
38.28
দিষ্ট্যা প্রত্যাহৃতা সীতা দিষ্ট্যা শত্রুঃ পরাজিতঃ ।
এষ নঃ পরমঃ কাম এষা নঃ পীতিরুত্তমা ।। ৭.৩৮.২৮ ॥
38.29
যত্ত্বাং বিজয়িনং রাম পশ্যামো হতশাত্রবম্ ।
। ৭.৩৮.২৯ ॥
38.30
এতত্ত্বয্যুপপন্নং চ যদস্মাংস্ত্বং প্রশংসসে ।
প্রশংসার্হ ন জানীমঃ প্রশংসাং বক্তুমীদৃশীম্ ।। ৭.৩৮.৩০ ॥
38.31
আপৃচ্ছামো গমিষ্যামো হৃদিস্থো নঃ সদা ভবান্ ।
বর্তামহে মহাবাহো প্রীত্যাত্র মহতা বৃতাঃ ।ভবেচ্চ তে মহারাজ প্রীতিরস্মাসু নিত্যদা ।। ৭.৩৮.৩১ ॥
38.32
বাঢমিত্যেব রাজানো হর্ষেণ পরমান্বিতাঃ ।
উচুঃ প্রাঞ্জলয়ঃ সর্বে রাঘবং গমনোত্সুকাঃ ।। ৭.৩৮.৩২ ॥
38.33
পূজিতাশ্চৈব রামেণ জগ্মুর্দেশান্স্বকান্স্বকান্ ।
। ৭.৩৮.৩৩ ।।