Utshovসর্গ 37
37.1
অভিষিক্তে তু কাকুত্স্থে ধর্মেণ বিদিতাত্মনি ।
ব্যতীতা যা নিশা পূর্বা পৌরাণাং হর্ষবর্ধিনী ।। ৭.৩৭.১ ॥
37.2
তস্যাং রজন্যাং ব্যুষ্টায়াং প্রাতর্নৃপতিবোধকাঃ ।
বন্দিনঃ সমুপাতিষ্ঠন্সৌম্যা নৃপতিবেশ্মনি ।। ৭.৩৭.২ ॥
37.3
তে রক্তকণ্ঠিনঃ সর্বে কিন্নরা ইব শিক্ষিতাঃ ।
তুষ্টুবুর্নপতিং বীরং যথাবৎ সম্প্রহর্ষিণঃ ।। ৭.৩৭.৩ ॥
37.4
বীর সৌম্য প্রবুধ্যস্ব কৌসল্যাপ্রীতিবর্ধন ।
জগদ্ধি সর্বং স্বপিতি ত্বয়ি সুপ্তে নরাধিপ ।। ৭.৩৭.৪ ॥
37.5
বিক্রমস্তে যথা বিষ্ণো রূপং চৈবাশ্বিনোরিব ।
বুদ্ধ্যা বৃহস্পতেস্তুল্যঃ প্রজাপতিসমো হ্যসি ।। ৭.৩৭.৫ ॥
37.6
ক্ষমা তে পৃথিবীতুল্যা তেজসা ভাস্করোপমঃ ।
বেগস্তে বায়ুনা তুল্যো গাম্ভীর্যমুদধেরিব ।। ৭.৩৭.৬ ॥
37.7
অপ্রকম্প্যো যতা স্থাণুশ্চন্দ্রে সৌম্যত্বমীদৃশম্ ।
নেদৃশাঃ পার্থিবাঃ পূর্বং ভবিতারো নরাধিপ ।। ৭.৩৭.৭ ॥
37.8
যথা ত্বমতিদুর্ধর্ষো ধর্মনিত্যঃ প্রজাহিতঃ ।
ন ত্বাং জহাতি কীর্তিশ্চ লক্ষ্মীশ্চ পুরুষর্ষভ ।। ৭.৩৭.৮ ॥
37.9
শ্রীশ্চ ধর্মশ্চ কাকুত্স্থ ত্বয়ি নিত্যং প্রতিষ্ঠিতৌ ।
এতাশ্চান্যাশ্চ মধুরা বন্দিভিঃ পরিকীর্তিতাঃ ।। ৭.৩৭.৯ ॥
37.10
সূতাশ্চ সংস্তবৈর্দিব্যৈর্বোধয়ন্তি স্ম রাঘবম্ ।
স্তুতিভিঃ স্তূয়মানাভিঃ প্রত্যবুধ্যত রাঘবঃ ।। ৭.৩৭.১০ ॥
37.11
স তদ্বিহায় শয়নং পাণ্ডরাচ্ছাদনাস্তৃতম্ ।
উত্তস্থৌ নাগশয়নাদ্ধরির্নারায়ণো যথা ।। ৭.৩৭.১১ ॥
37.12
তমুত্থিতং মহাত্মানং প্রহ্বাঃ প্রাঞ্জলয়ো নরাঃ ।
সলিলং ভাজনৈঃ শুভ্রৈরুপতস্থুঃ সহস্রশঃ ।। ৭.৩৭.১২ ॥
37.13
কৃতোদকশুচির্ভূত্বা কালে হুতহুতাশনঃ ।
দেবাগারং জগামাশু পুণ্যমিক্ষ্বাকুসেবিতম্ ।। ৭.৩৭.১৩ ॥
37.14
তত্র দেবান্পিতঽন্বিপ্রানর্চয়িত্বা যথাবিধি ।
বাহ্যকক্ষান্তরং রামো নির্জগাম জনৈর্বৃতঃ ।। ৭.৩৭.১৪ ॥
37.15
উপতস্থুর্মহাত্মানো মন্ত্রিণঃ সপুরোহিতাঃ ।
বসিষ্ঠপ্রমুখাঃ সর্বে দীপ্যমানা ইবাগ্নয়ঃ ।। ৭.৩৭.১৫ ॥
37.16
ক্ষত্রিয়াশ্চ মহাত্মানো নানাজনপদেশ্বরাঃ ।
রামস্যোপাবিশন্পার্শ্বে শক্রস্যেব যথা ঽমরাঃ ।। ৭.৩৭.১৬ ॥
37.17
ভরতো লক্ষ্মণশ্চাত্র শত্রুঘ্নশ্চ মহায়শাঃ ।
উপাসাঞ্চক্রিরে হৃষ্টা বেদাস্ত্রয় ইবাধ্বরম্ ।। ৭.৩৭.১৭ ॥
37.18
যাতাঃ প্রাঞ্জলয়ো ভূত্বা কিঙ্করা মুদিতাননাঃ ।
মুদিতা নাম পার্শ্বস্থা বহবঃ সমুপাবিশন্ ।। ৭.৩৭.১৮ ॥
37.19
বানরাশ্চ মহাবীর্যা বিংশতিঃ কামরূপিণঃ ।
সুগ্রীবপ্রমুখা রামমুপাসন্তে মহৌজসঃ ।। ৭.৩৭.১৯ ॥
37.20
বিভীষণশ্চ রক্ষোভিশ্চতুর্ভিঃ পরিবারিতঃ ।
উপাসতে মহাত্মানং ধনেশমিব গুহ্যকাঃ ।। ৭.৩৭.২০ ॥
37.21
তথা নিগমবৃদ্ধাশ্চ কুলীনা যে চ মানবাঃ ।
শিরসা ঽ ঽবন্দ্য রাজানমুপাসন্তে বিচক্ষণাঃ ।। ৭.৩৭.২১ ॥
37.22
তথা পরিবৃতো রাজা শ্রীমদ্ভির্ঋষিভির্বৃতঃ ।
রাজভিশ্চ মহাবীর্যৈর্বানরৈশ্চ সরাক্ষসৈঃ ।। ৭.৩৭.২২ ॥
37.23
যথা দেবেশ্বরো নিত্যমৃষিভিঃ সমুপাস্যতে ।
অধিকস্তেন রূপেণ সহস্রাক্ষাদ্বিরোচতে ।। ৭.৩৭.২৩ ॥
37.24
তেষাং সমুপবিষ্টানাং তাস্তাঃ সুমধুরাঃ কথাঃ ।
কথ্যন্তে ধর্মসংয়ুক্তাঃ পুরাণজ্ঞৈর্মহাত্মভিঃ ।। ৭.৩৭.২৪ ।।