Utshovসর্গ 35
35.1
অপৃচ্ছত তদা রামো দক্ষিণাশাশ্রমং মুনিম্ ।
প্রাঞ্জলির্বিনয়োপেত ইদমাহ বচো ঽর্থবৎ ।। ৭.৩৫.১ ॥
35.2
অতুলং বলমেতদ্বৈ বালিনো রাবণস্য চ ।
ন ত্বেতাভ্যাং হনুমতা সমং ত্বিতি মতির্মম ।। ৭.৩৫.২ ॥
35.3
শৌর্যং দাক্ষ্যং বলং ধৈর্যং প্রাজ্ঞতা নয়সাধনম্ ।
বিক্রমশ্চ প্রভাবশ্চ হনূমতি কৃতালয়াঃ ।। ৭.৩৫.৩ ॥
35.4
দৃষ্ট্বৈব সাগরং বীক্ষ্য সীদন্তীং কপিবাহিনীম্ ।
সমাশ্বাস্য মহাবাহুর্যোজনানাং শতং প্লুতঃ ।। ৭.৩৫.৪ ॥
35.5
ধর্ষয়িত্বা পুরীং লঙ্কাং রাবণান্তঃপুরং তদা ।
দৃষ্ট্বা সম্ভাষিতা চাপি সীতা হ্যাশ্বাসিতা তথা ।। ৭.৩৫.৫ ॥
35.6
সেনাগ্রগা মন্ত্রিসুতাঃ কিঙ্করা রাবণাত্মজঃ ।
এতে হনুমতা তত্র হ্যেকেন বিতিপাতিতাঃ ।। ৭.৩৫.৬ ॥
35.7
ভূয়ো বন্ধাদ্বিমুক্তেন ভাষয়িত্বা দশাননম্ ।
লঙ্কা ভস্মীকৃতা যেন পাবকেনেব মেদিনী ।। ৭.৩৫.৭ ॥
35.8
ন কালস্য ন শক্রস্য ন বিষ্ণোর্বিত্তপস্য চ ।
কর্মাণি তানি শ্রূয়ন্তে যানি যুদ্ধে হনূমতঃ ।। ৭.৩৫.৮ ॥
35.9
এতস্য বাহুবীর্যেণ লঙ্কা সীতা চ লক্ষ্মণঃ ।
প্রাপ্তা ময়া জয়শ্চৈব রাজ্যং মিত্রাণি বান্ধবাঃ ।। ৭.৩৫.৯ ॥
35.10
হনূমান্যদি মে নঃ স্যাদ্বানরাধিপতেঃ সখা ।
প্রবৃত্তিমপি কো বেত্তুং জানক্যাঃ শক্তিমান্ভবেৎ ।। ৭.৩৫.১০ ॥
35.11
কিমর্থং বাল্যনেনৈব সুগ্রীবপ্রিয়কাম্যয়া ।
তদা বৈরে সমুত্পন্নে ন দগ্ধো বীরুধো যথা ।। ৭.৩৫.১১ ॥
35.12
নহি বেদিতবান্মন্যে হনূমানাত্মনো বলম্ ।
যদ্দৃষ্টবাঞ্জীবিতেষ্টং ক্লিশ্যন্তং বানরাধিপম্ ।। ৭.৩৫.১২ ॥
35.13
এতন্মে ভগবন্সর্বং হনূমতি মহামতৌ ।
বিস্তরেণ যথাতত্ত্বং কথয়ামরপূজিত ।। ৭.৩৫.১৩ ॥
35.14
রাঘবস্য বচঃ শ্রুত্বা হেতুয়ুক্তমৃষিস্তদা ।
হনূমতঃ সমক্ষং তমিদং বচনমব্রবীৎ ।। ৭.৩৫.১৪ ॥
35.15
সত্যমেতদ্রঘুশ্রেষ্ঠ যদ্ব্রবীষি হনূমতঃ ।
ন বলে বিদ্যতে তুল্যো ন গতৌ ন মতৌ পরঃ ।। ৭.৩৫.১৫ ॥
35.16
অমোঘশাপৈঃ শপ্তস্তু দত্তো ঽস্য মুনিভিঃ পুরা ।
ন বেত্তা হি বলং যেন বলী সন্নিরিমর্দনঃ ।। ৭.৩৫.১৬ ॥
35.17
বাল্যে ঽপ্যেতেন যত্কর্ম কৃতং রাম মহাবল ।
তন্ন বর্ণয়িতুং শক্যমিতি বালতয়া ঽ ঽস্যতে ।। ৭.৩৫.১৭ ॥
35.18
যদি বা ঽস্তি ত্বভিপ্রায়স্তচ্ছ্রোতুং তব রাঘব ।
সমাধায় মতিং রাম নিশাময় বদাম্যহম্ ।। ৭.৩৫.১৮ ॥
35.19
সূর্যদত্তবরস্বর্ণঃ সুমেরুর্নাম পর্বতঃ ।
যত্র রাজ্যং প্রশাস্ত্যস্য কেসরী নাম বৈ পিতা ।। ৭.৩৫.১৯ ॥
35.20
তস্য ভার্যা বভূবৈষা হ্যঞ্জনেতি পরিশ্রুতা ।
জনয়ামাস তস্যাং বৈ বায়ুরাত্মজমুত্তমম্ ।। ৭.৩৫.২০ ॥
35.21
শালিশূকনিভাভাসং প্রাসূতামুং তদা ঽঞ্জনা ।
ফলান্যাহর্তুকামা বৈ নিষ্ক্রান্তা গহনেচরা ।। ৭.৩৫.২১ ॥
35.22
এষ মাতুর্বিয়োগাচ্চ ক্ষুধয়া চ ভৃশার্দিতঃ ।
রুরোদ শিশুরত্যর্থং শিশুঃ শরবণে যথা ।। ৭.৩৫.২২ ॥
35.23
তদোদ্যন্তং বিবস্বন্তং জপাপুষ্পোত্করোপমম্ ।
দদর্শ ফললোভাচ্চ হ্যুত্পপাত রবিং প্রতি ।। ৭.৩৫.২৩ ॥
35.24
বালার্কাভিমুখো বালো বালার্ক ইব মূর্তিমান্ ।
গ্রহীতুকামো বালার্কং প্লবতে ঽম্বরমধ্যগঃ ।। ৭.৩৫.২৪ ॥
35.25
এতস্মিন্প্লবমানে তু শিশুভাবে হনূমতি ।
দেবদানবয়ক্ষাণাং বিস্ময়ঃ সুমহানভূৎ ।। ৭.৩৫.২৫ ॥
35.26
নাপ্যেবং বেগবান্বায়ুর্গরুডো বা মনস্তথা ।
যথা ঽয়ং বায়ুপুত্রস্তু ক্রমতে ঽম্বরমুত্তমম্ ।। ৭.৩৫.২৬ ॥
35.27
যদি তাবচ্ছিশোরস্য ত্বীদৃশো গতিবিক্রমঃ ।
যৌবনং বলমাসাদ্য কথং বেগো ভবিষ্যতি ।। ৭.৩৫.২৭ ॥
35.28
তমনুপ্লবতে বায়ুঃ প্লবন্তং পুত্রমাত্মনঃ ।
সূর্যদাহভয়াদ্রক্ষংস্তুষারচয়শীতলঃ ।। ৭.৩৫.২৮ ॥
35.29
বহুয়োজনসাহস্রং ক্রমত্যেষ গতোম্বরম্ ।
পিতুর্বলাচ্চ বাল্যাচ্চ ভাস্করাভ্যাশমাগতঃ ।। ৭.৩৫.২৯ ॥
35.30
শিশুরেষ ত্বদোষজ্ঞ ইতি মত্বা দিবাকরঃ ।
কার্যং চাত্র সমায়ত্তমিত্যেবং ন দদাহ সঃ ।। ৭.৩৫.৩০ ॥
35.31
যমেব দিবসং হ্যেষ গ্রহীতুং ভাস্করং প্লুতঃ ।
তমেব দিবসং রাহুর্জিঘৃক্ষতি দিবাকরম্ ।। ৭.৩৫.৩১ ॥
35.32
অনেন স পরামৃষ্টো রাম সূর্যরথোপরি ।
অপক্রান্তস্ততস্ত্রস্তো রাহুশ্চন্দ্রার্কমর্দনঃ ।। ৭.৩৫.৩২ ॥
35.33
স ইন্দ্রভবনং গত্বা সরোষঃ সিংহিকাসুতঃ ।
অব্রবীদ্ভ্রুকুটিং কৃত্বা দেবং দেবগণৈর্বৃতম্ ।। ৭.৩৫.৩৩ ॥
35.34
বুভুক্ষাপনয়ং দত্ত্বা চন্দ্রার্কৌ মম বাসব ।
কিমিদং তত্ত্বয়া দত্তমন্যস্য বলবৃত্রহন্ ।। ৭.৩৫.৩৪ ॥
35.35
অদ্যাহং পর্বকালে তু জিঘৃক্ষুঃ সূর্যমাগতঃ ।
অথান্যো রাহুরাসাদ্য জগ্রাহ সহসা রবিম্ ।। ৭.৩৫.৩৫ ॥
35.36
স রাহোর্বচনং শ্রুত্বা বাসবঃ সম্ভ্রমান্বিতঃ ।
উত্পপাতাসনং হিত্বা চোদ্বহন্কাঞ্চনীং স্রজম্ ।। ৭.৩৫.৩৬ ॥
35.37
ততঃ কৈলাসকূটাভং চতুর্দন্তং মদস্রবম্ ।
শৃঙ্গারধারিণং প্রাংশুং স্বর্ণঘণ্টাট্টহাসিনম্ ।। ৭.৩৫.৩৭ ॥
35.38
ইন্দ্রঃ করীন্দ্রমারুহ্য রাহুং কৃত্বা পুরঃসরম্ ।
প্রায়াদ্যত্রাভবত্সূর্যঃ সহানেন হনূমতা ।। ৭.৩৫.৩৮ ॥
35.39
অথাতিরভসেনাগাদ্রাহুরুত্সৃজ্য বাসবম্ ।
অনেন চ স বৈ দৃষ্টঃ প্রধাবঞ্ছৈলকূটবৎ ।। ৭.৩৫.৩৯ ॥
35.40
ততঃ সূর্যং সমুত্সৃজ্য রাহুং ফলমবেক্ষ্য চ ।
উত্পপাত পুনর্ব্যোম গ্রহীতুং সিংহিকাসুতম্ ।। ৭.৩৫.৪০ ॥
35.41
উত্সৃজ্যার্কমিমং রাম প্রধাবন্তং প্লবঙ্গমম্ ।
অবেক্ষ্যৈবং পরাবৃত্ত্য মুখশেষঃ পরাঙ্মুখঃ ।। ৭.৩৫.৪১ ॥
35.42
ইন্দ্রমাশংসমানস্তু ত্রাতারং সিংহিকাসুতঃ ।
ইন্দ্র ইন্দ্রেতি সংত্রাসান্মুহুর্মহুরভাষত ।। ৭.৩৫.৪২ ॥
35.43
রাহোর্বিক্রোশমানস্য প্রাগেবালক্ষিতং স্বরম্ ।
শ্রুত্বেন্দ্রোবাচ মা ভৈষীরহমেনং নিষূদয়ে ।। ৭.৩৫.৪৩ ॥
35.44
ঐরাবতং ততো দৃষ্ট্বা মহত্তদিদমিত্যপি ।
ফলং মত্বা হস্তিরাজমভিদুদ্রাব মারুতিঃ ।। ৭.৩৫.৪৪ ॥
35.45
তথাস্য ধাবতো রূপমৈরাবতজিঘৃক্ষয়া ।
মুহূর্তমভবদ্ঘোরমিন্দ্রাগ্ন্যোরিব ভাস্বরম্ ।। ৭.৩৫.৪৫ ॥
35.46
এবমাধাবমানং তু নাতিক্রুদ্ধঃ শচীপতিঃ ।
হস্তান্তাদতিমুক্তেন কুলিশেনাভ্যতাডয়ৎ ।। ৭.৩৫.৪৬ ॥
35.47
ততো গিরৌ পপাতৈষ ইন্দ্রবজ্রাভিতাডিতঃ ।
পতমানস্য চৈতস্য বামো হনুরভজ্যত ।। ৭.৩৫.৪৭ ॥
35.48
তস্মিংস্তু পতিতে বালে বজ্রতাডনবিহ্বলে ।
চুক্রোধেন্দ্রায় পবনঃ প্রজানামহিতায় সঃ ।। ৭.৩৫.৪৮ ॥
35.49
প্রচারং স তু সঙ্গৃহ্য প্রজাস্বন্তর্গতঃ প্রভুঃ ।
গুহাং প্রবিষ্টঃ স্বসুতং শিশুমাদায় মারুতঃ ।। ৭.৩৫.৪৯ ॥
35.50
বিণ্মূত্রাশয়মাবৃত্য প্রজানাং পরমার্তিকৃৎ ।
রুরোধ সর্বভূতানি যথা বর্ষাণি বাসবঃ ।। ৭.৩৫.৫০ ॥
35.51
বায়ুপ্রকোপাদ্ভূতানি নিরুচ্ছ্বাসানি সর্বতঃ ।
সন্ধিভির্ভিদ্যমানৈশ্চ কাষ্ঠভূতানি জজ্ঞিরে ।। ৭.৩৫.৫১ ॥
35.52
নিঃস্বাধ্যায়বষট্কারং নিষ্ক্রিয়ং ধর্মবর্জিতম্ ।
বায়ুপ্রকোপাত্ত্রৈলোক্যং নিরয়স্থমিবাভবৎ ।। ৭.৩৫.৫২ ॥
35.53
ততঃ প্রজাঃ সগন্ধর্বাঃ সদেবাসুরমানুষাঃ ।
প্রজাপতিং সমাধাবন্দুঃখিতাশ্চ সুখেচ্ছয়া ।। ৭.৩৫.৫৩ ॥
35.54
ঊচুঃ প্রাঞ্জলয়ো দেবা মহোদরনিভোদরাঃ ।
ত্বয়া নু ভগবন্সৃষ্টাঃ প্রজানাথ চতুর্বিধাঃ ।। ৭.৩৫.৫৪ ॥
35.55
ত্বয়া দত্তো ঽয়মস্মাকমায়ুষঃ পবনঃ পতিঃ ।
সো ঽস্মান্প্রাণেশ্বরো ভূত্বা কস্মাদেষো ঽদ্য সত্তম ।। ৭.৩৫.৫৫ ॥
35.56
রুরোধ দুঃখং জনয়ন্নন্তঃপুর ইব স্ত্রিয়ঃ ।
তস্মাত্ত্বাং শরণং প্রাপ্তা বায়ুনোহতা বয়ম্ ।। ৭.৩৫.৫৬ ॥
35.57
এতত্প্রজানাং শ্রুত্বা তু প্রজানাথঃ প্রজাপতিঃ ।
কারণাদিতি চোক্ত্বাসৌ প্রজাঃ পুনরভাষত ।। ৭.৩৫.৫৭ ॥
35.58
যস্মিংশ্চ কারণে বায়ুশ্চুক্রোধ চ রুরোধ চ ।
প্রজাঃ শৃণুধ্বং তত্সর্বং শ্রোতব্যং চাত্মনঃ ক্ষমম্ ।। ৭.৩৫.৫৮ ॥
35.59
পুত্রস্তস্যামরেশেন ইন্দ্রেণাদ্য নিপাতিতঃ ।
রাহোর্বচনমাস্থায় ততঃ স কুপিতো ঽনিলঃ ।। ৭.৩৫.৫৯ ॥
35.60
অশরীরঃ শরীরেষু বায়ুশ্চরতি পালয়ন্ ।
শরীরং হি বিনা বায়ুং সমতাং যাতি দারুভিঃ ।। ৭.৩৫.৬০ ॥
35.61
বায়ুঃ প্রাণঃ সুখং বায়ুর্বায়ুঃ সর্বমিদং জগৎ ।
বায়ুনা সম্পরিত্যক্তং ন সুখং বিন্দতে জগৎ ।। ৭.৩৫.৬১ ॥
35.62
অদ্যৈব চ পরিত্যক্তং বায়ুনা জগদায়ুষা ।
অদ্যৈব তে নিরুচ্ছ্বাসাঃ কাষ্ঠকুড্যোপমাঃ স্থিতাঃ ।। ৭.৩৫.৬২ ॥
35.63
তদ্যামস্তত্র যত্রাস্তে মারুতো রুক্প্রদো হি নঃ ।
মা বিনাশং গমিষ্যাম অপ্রসাদ্যাদিতেঃ সুতাঃ ।। ৭.৩৫.৬৩ ॥
35.64
ততঃ প্রজাভিঃ সহিতঃ প্রজাপতিঃ সদেবগন্ধর্বভুজঙ্গগুহ্যকৈঃ ।
জগাম তত্রাস্যতি যত্র মারুতঃ সুতং সুরেন্দ্রাভিহতং প্রগৃহ্য সঃ ।। ৭.৩৫.৬৪ ॥
35.65
ততো ঽর্কবৈশ্বানরকাঞ্চনপ্রভং সুতং তদোত্সঙ্গগতং সদাগতেঃ ।
চতুর্মুখো বীক্ষ্য কৃপামথাকরোত্সদেবগন্ধর্বর্ষিয়ক্ষরাক্ষসৈঃ ।। ৭.৩৫.৬৫ ।।