Utshovসর্গ 34
34.1
অর্জুনেন বিমুক্তস্তু রাবণো রাক্ষসাধিপঃ ।
চচার পৃথিবীং সর্বামনির্বিণ্ণস্তথা কৃতঃ ।। ৭.৩৪.১ ॥
34.2
রাক্ষসং বা মনুষ্যং বা শৃণুতে ঽয়ং বলাধিকম্ ।
রাবণস্তং সমাসাদ্য যুদ্ধে হ্বয়তি দর্পিতঃ ।। ৭.৩৪.২ ॥
34.3
ততঃ কদাচিত্কিষ্কিন্ধাং নগরীং বালিপালিতাম্ ।
গত্বা হ্বয়তি যুদ্ধায় বালিনং হেমমালিনম্ ।। ৭.৩৪.৩ ॥
34.4
ততস্তু বানরামাত্যস্তারস্তারাপিতা প্রভুঃ ।
উবাচ বানরো বাক্যং যুদ্ধপ্রেপ্সুমুপাগতম্ ।। ৭.৩৪.৪ ॥
34.5
রাক্ষসেন্দ গতো বালী যস্তে প্রতিবলো ভবেৎ ।
কো ঽন্যঃ প্রমুখতঃ স্থাতুং তব শক্তঃ প্লবঙ্গমঃ ।। ৭.৩৪.৫ ॥
34.6
চতুর্ভ্যো ঽপি সমুদ্রেভ্যঃ সন্ধ্যামন্বাস্য রাবণ ।
ইমং মুহূর্তমায়াতি বালী তিষ্ঠ মুহূর্তকম্ ।। ৭.৩৪.৬ ॥
34.7
এতানস্থিচয়ান্পশ্য য এতে শঙ্খপাণ্ডুরাঃ ।
যুদ্ধার্থিনামিমে রাজন্বানরাধিপতেজসা ।। ৭.৩৪.৭ ॥
34.8
যদ্বা ঽমৃতরসঃ পীতস্ত্বয়া রাবণ রাক্ষস ।
তদা বালিনমাসাদ্য তদন্তং তব জীবিতম্ ।। ৭.৩৪.৮ ॥
34.9
পশ্যেদানীং জগচ্চিত্রমিমং বিশ্রবসঃ সুত ।
ইদং মুহূর্তং তিষ্ঠস্ব দুর্লভং তে ভবিষ্যতি ।। ৭.৩৪.৯ ॥
34.10
অথবা ত্বরসে মর্তুং গচ্ছ দক্ষিণসাগরম্ ।
বালিনং দ্রক্ষ্যসে তত্র ভূমিস্থমিব পাবকম্ ।। ৭.৩৪.১০ ॥
34.11
স তু তারং বিনির্ভর্ত্স্য রাবণো লোকরাবণঃ ।
পুষ্পকং তত্সমারুহ্য প্রয়য়ৌ দক্ষিণার্ণবম্ ।। ৭.৩৪.১১ ॥
34.12
তত্র হেমগিরিপ্রখ্যং তরুণার্কনিভাননম্ ।
রাবণো বালিনং দৃষ্ট্বা সন্ধ্যোপাসনতত্পরম্ ।। ৭.৩৪.১২ ॥
34.13
পুষ্পকাদবরুহ্যাথ রাবণো ঽঞ্জনসন্নিভঃ ।
গ্রহীতুং বালিনং তূর্ণং নিঃশব্দপদমাব্রজৎ ।। ৭.৩৪.১৩ ॥
34.14
যদৃচ্ছয়া তদা দৃষ্টো বালিনাপি স রাবণঃ ।
পাপাভিপ্রায়বান্ দৃষ্ট্বা চকার ন তু সম্ভ্রমম্ ।। ৭.৩৪.১৪ ॥
34.15
শশমালক্ষ্য সিংহো বা পন্নগং গরুডো যথা ।
ন চিন্তয়তি তং বালী রাবণং পাপনিশ্চয়ম্ ।। ৭.৩৪.১৫ ॥
34.16
জিঘৃক্ষমাণমায়ান্তং রাবণং পাপচেতসম্ ।
কক্ষাবলম্বিনং কৃত্বা গমিষ্যে ত্রীন্মহার্ণবান্ ।। ৭.৩৪.১৬ ॥
34.17
দ্রক্ষ্যন্ত্যরিং মমাঙ্কস্থং স্রংসদূরুকরাম্বরম্ ।
লম্বমানং দশগ্রীবং গরুডস্যেব পন্নগম্ ।। ৭.৩৪.১৭ ॥
34.18
ইত্যেবং মতিমাস্থায় বালী কর্ণমুপাশ্রিতঃ ।
জপন্বৈ নৈগমান্মন্ত্রাংস্তস্থৌ পর্বতরাডিব ।। ৭.৩৪.১৮ ॥
34.19
তাবন্যোন্যং জিঘৃক্ষন্তৌ হরিরাক্ষসপার্থিবৌ ।
প্রয়ত্নবন্তৌ তত্কর্ম ঈহতুর্বলদর্পিতৌ ।। ৭.৩৪.১৯ ॥
34.20
হস্তগ্রাহং তু তং মত্বা পাদশব্দেন রাবণম্ ।
পরাঙ্মুখো ঽপি জগ্রাহ বালী সর্পমিবাণ্ডজঃ ।। ৭.৩৪.২০ ॥
34.21
গ্রহীতুকামং তং গৃহ্য রক্ষসামীশ্বরং হরিঃ ।
খমুত্পপাত বেগেন কৃত্বা কক্ষাবলম্বিনম্ ।। ৭.৩৪.২১ ॥
34.22
তং চাপীডয়মানং তু বিতুদন্তং নখৈর্মুহুঃ ।
জহার রাবণং বালী পবনস্তোয়দং যথা ।। ৭.৩৪.২২ ॥
34.23
অথ তে রাক্ষসামাত্যা হ্রিয়মাণং দশাননম্ ।
মুমোক্ষয়িষবো বালিং রবমাণা অভিদ্রুতাঃ ।। ৭.৩৪.২৩ ॥
34.24
অন্বীয়মানস্তৈর্বালী ভ্রাজতে ঽম্বরমধ্যগঃ ।
অন্বীয়মানো মেঘৌঘৈরম্বরস্থ ইবাংশুমান্ ।। ৭.৩৪.২৪ ॥
34.25
তে ঽশক্নুবন্তঃ সম্প্রাপ্তুং বালিনং রাক্ষসোত্তমাঃ ।
তস্য বাহূরুবেগেন পরিশ্রান্তা ব্যবস্থিতাঃ ।। ৭.৩৪.২৫ ॥
34.26
বালিমার্গাদপাক্রামন্পর্বতেন্দ্রো হি গচ্ছতঃ ।
কিং পুনর্জীবিতপ্রেপ্সুর্বিভ্রদ্বৈ মাংসশোণিতম্ ।। ৭.৩৪.২৬ ॥
34.27
অপক্ষিগণসম্পাতান্বানরেন্দ্রো মহাজবঃ ।
ক্রমশঃ সাগরান্সর্বান্সন্ধ্যাকালমবন্দত ।। ৭.৩৪.২৭ ॥
34.28
সভাজ্যমানো ভূতৈস্তু খৈচরৈঃ খৈচরোত্তমঃ ।
পশ্চিমং সাগরং বালী হ্যাজগাম সরাবণঃ ।। ৭.৩৪.২৮ ॥
34.29
তস্মিন্সন্ধ্যামুপাসিত্বা স্নাত্বা জপ্ত্বা চ বানরঃ ।
উত্তরং সাগরং প্রায়াদ্বহমানো দশাননম্ ।। ৭.৩৪.২৯ ॥
34.30
বহুয়োজনসাহস্রং বহমানো মহাহরিঃ ।
বায়ুবচ্চ মনোবচ্চ জগাম সহ শত্রুণা ।। ৭.৩৪.৩০ ॥
34.31
উত্তরে সাগরে সন্ধ্যামুপাসিত্বা দশাননম্ ।
বহমানো ঽগমদ্বালী পূর্বং বৈ স মহোদধিম্ ।। ৭.৩৪.৩১ ॥
34.32
তত্রাপি সন্ধ্যামন্বাস্য বাসবিঃ সহরীশ্বরঃ ।
কিষ্কিন্ধামভিতো গৃহ্য রাবণং পুনরাগমৎ ।। ৭.৩৪.৩২ ॥
34.33
চতুর্ষ্বপি সমুদ্রেষু সন্ধ্যামন্বাস্য বানরঃ ।
রাবণোদ্বহনশ্রান্তঃ কিষ্কিন্ধোপবনে ঽপতৎ ।। ৭.৩৪.৩৩ ॥
34.34
রাবণং তু মুমোচাথ স্বকক্ষাত্কপিসত্তমঃ ।
কুতস্ত্বমিতি চোবাচ প্রহসন্রাবণং মুহুঃ ।। ৭.৩৪.৩৪ ॥
34.35
বিস্ময়ং তু মহদ্গত্বা শ্রমলোলনিরীক্ষণঃ ।
রাক্ষসেন্দ্রো হরীন্দ্রং তমিদং বচনমব্রবীৎ ।। ৭.৩৪.৩৫ ॥
34.36
বানরেন্দ্র মহেন্দ্রাভ রাক্ষসেন্দ্রো ঽস্মি রাবণঃ ।
যুদ্ধেপ্সুরিহ সম্প্রাপ্তঃ স চাদ্যাসাদিতস্ত্বয়া ।। ৭.৩৪.৩৬ ॥
34.37
অহো বলমহো বীর্যমহো গাম্ভীর্যমেব চ ।
যেনাহং পশুবদ্গৃহ্য ভ্রামিতশ্চতুরো ঽর্ণবান্ ।। ৭.৩৪.৩৭ ॥
34.38
এবমশ্রান্তবদ্বীর শীঘ্রমেব মহার্ণবান্ ।
মাং চৈবোদ্বহমানস্তু কো ঽন্যো বীরঃ ক্রমিষ্যতি ।। ৭.৩৪.৩৮ ॥
34.39
ত্রয়াণামেব ভূতানাং গতিরেষা প্লবঙ্গম ।
মনোনিলসুপর্ণানাং তব চাত্র ন সংশয়ঃ ।। ৭.৩৪.৩৯ ॥
34.40
সো ঽহং দৃষ্টবলস্তুভ্যমিচ্ছামি হরিপুঙ্গব ।
ত্বয়া সহ চিরং সখ্যং সুস্নিগ্ধং পাবকাগ্রতঃ ।। ৭.৩৪.৪০ ॥
34.41
দারাঃ পুত্রাঃ পুরং রাষ্ট্রং ভোগাচ্ছাদনভোজনম্ ।
সর্বমেবাবিভক্তং নৌ ভবিষ্যতি হরীশ্বর ।। ৭.৩৪.৪১ ॥
34.42
ততঃ প্রজ্বালয়িত্বাগ্নিং তাবুভৌ হরীরাক্ষসৌ ।
ভ্রাতৃত্বমুপসম্পন্নৌ পরিষ্বজ্য পরস্পরম্ ।। ৭.৩৪.৪২ ॥
34.43
অন্যোন্যং লম্বিতকরৌ ততস্তৌ হরিরাক্ষসৌ ।
কিষ্কিন্ধাং বিশতুর্হৃষ্টৌ সিংহৌ গিরিগুহামিব ।। ৭.৩৪.৪৩ ॥
34.44
স তত্র মাসমুষিতঃ সুগ্রীব ইব রাবণঃ ।
অমাত্যৈরাগতৈর্নীতস্ত্রৈলোক্যোত্সাদনার্থিভিঃ ।। ৭.৩৪.৪৪ ॥
34.45
এবমেতত্পুরাবৃত্তং বালিনা রাবণঃ প্রভো ।
ধর্ষিতশ্চ কৃতশ্চাপি ভ্রাতা পাবকসন্নিধৌ ।। ৭.৩৪.৪৫ ॥
34.46
বলমপ্রতিমং রাম বালিনো ঽভবদুত্তমম্ ।
সো ঽপি ত্বয়া বিনির্দগ্ধঃ শলভো বহ্নিনা যথা ।। ৭.৩৪.৪৬ ।।